Read Ngowili Yekpei Numu Kpɛlɛɛ Va JƆN 11 Bible Online

JƆN 11 - Ngowili Yekpei Numu Kpɛlɛɛ Va bible

JƆN 11

¹ Taamɔ heegbɛngɔ yila ta toli a Lasarɔs, i yɛ heini Bɛtani lɔ tia ngi ndewenyahaleengaa feleisia, Mata kɛɛ Meri.

² (Meri ji mia i yɛ Yesu malini a ngulɔi, i ngi gɔwɔisia mayila a ngi wundiei.)

³Lasarɔs i heegbɛilɔ gbeleiŋ kɛ ngi ndewenyahaleengeisia ti tutu longa Yesu gama tɛɛ, “Ndemɔi, bi liimamɔi i heegbɛnga.”

⁴Kɛɛ kia Yesu i mɛnini, i ndeilɔ yɛ, “Heegbɛi ji yeekɛlɛma ii yɛni a hee. Ji i wiengalɔ Ngewɔ gbayei magɛva tawao aako Ngewɔ Hindoloi i ngɔlɔya majɔɔ.”

⁵Yesu longɔ yɛla a Mata kɛɛ ngi ndewei Meri kɛɛ Lasarɔs.

⁶Na hu gbi kia i Lasarɔs heegbɛlei mɛnini, i njii fele weka wieilɔ tei na hu i yɛ na.

⁷Na wooma i ndeilɔ ngi gaalopoisia ma yɛ, “A mu li gbɔma Judia.”

⁸Ngi gaalopoisia ti ndeilɔ ngi ma tɛɛ, “Kaamɔ, saange gɛ Juuisia ti longɔ yɛla ti bi hɔwɔhɔwɔ, tamia bi yamama na gbɔma?”

⁹Yesu i kpɛmboilɔ yɛ, “Hawa puu maahu fele ii le aa yɛ folo yilei hu? Numu gbi i jiangaa a foloi, ɛɛ lugba ajifa a dunyei ji yeefofoi lɔlɔ.

¹⁰Kɛɛ numu gbi i jiangaa kpindi hu, a lugbalɔ ajifa fofoi ii ngi hu.”

¹¹Hii i yɛpɛni, kɛ i ndenga ti ma yɛ, “Mu ndiamɔi Lasarɔs i yiinga kɛɛ nyaa lima ngi ngi wu njii hu.”

¹²Ngi gaalopoisia ti ndeilɔ ngi ma tɛɛ, “Ndemɔi, ina i yiingalɔ, kɛ a bawolɔ.”

¹³Lasarɔs haa-yia mia Yesu i ndeni kɛɛ tia ti giliilɔ tɛɛ ngi lii i njii gbamɛi lɔ ma.

¹⁴Kɛ Yesu i hugɛnga a tie gbalauŋ yɛ, “Lasarɔs i haanga;

¹⁵tawao wua wu va nya goohu nɛngɔe ngii yɛ na, aako wu la la. Kɛɛ a mu li ngi gama.”

¹⁶Tɔmɔsi (na ti yɛ toli a Flɛi) i ndeilɔ ngi mbaa-kaalopoisia ma yɛ, “A mu gbi mu to Kaamɔ ma mu li aako mua tieni mu haa.”

¹⁷Ji Yesu i foni Bɛtani, i maleni ti Lasarɔs womɛi gbɔwunga kungɔ a njii naani.

¹⁸Bɛtani i yɛ Jelusalɛm gblanga lɔ fɔɔ, maili felekpe i ti luahu,

¹⁹famia Juu gboto ti wangɔ yɛla Mata gama tia Meri ti lii nɛpɔva ti ndewei haalei va.

²⁰Kia Mata i mɛnini kɛ Yesu lɔ wama, i liilɔ i ngi male, kɛɛ Meri ta i loni pɛlei bu lɔ.

²¹Kɛ Mata i ndenga Yesu ma yɛ, “Ndemɔi, kiaa bi yɛ mbeindo lɔ nya ndewei ii yɛ haa.

²²Tawao kiahuna bɛɛ ngi kɔɔlɔ kɛ gbɛogbɛ bi fɛɛlini Ngewɔ ma a felɔ bi wɛ.”

²³Yesu ndeilɔ ngi ma yɛ, “Bi ndewei a hiyelɔ gbɔma.”

²⁴Kɛɛ Mata poteilɔ i nde ngi ma yɛ, “Ngi kɔɔlɔ kɛ a vululɔ i hiye hee hu kɛlɛma volei ma kuna.”

²⁵Yesu ndeilɔ ngi ma yɛ, “Nya lɔ hiye-haa-hui a nge kɛɛ ndɛvui; numu gbi lekee ngi langɔ a nge, i haa bɛɛ a vululɔ,

²⁶Tawao numu gbi lekee ngi vulungɔ, i la a nge, ɛɛ haa kunafɔ. Bi langɔe a ji?”

²⁷I kpɛmboilɔ yɛ, “Mmm, Ndemɔi, ngi kɔɔlɔ kɛ bia lɔ Ngewɔ Maha Heingɔi a bie, Ngewɔ Hindoloi, na wɔɔ mu ngi gulɔ gbema wava dunyei hu.”

²⁸Kia Mata i ji leni, i yamɛilɔ i ngi ndewei Meri loli, i nde ngi ma ndɔma yɛ, “Kaamɔ i wanga, taa bi lolima.”

²⁹Kia Meri i ji mɛnini, i hiyeilɔ i li a piimɛ Yesu gama.

³⁰Yesu fongɔ ii yɛla tei hu, i yɛ lɛ miando lɔ Mata i ngi maleni na.

³¹Juu nasia tia Meri-ni ti yɛ pɛlei bu ta ngi nɛpɔ, ti ngi lɔilɔ i hiye fulo i gbua, kɛ ti tonga ngi ma, ti lii i ma tɛɛ i lima kambɛi gama lɔ i wɔɔ na.

³²Kia Meri i foni mia Yesu i yɛ na, i ngi lɔ, i gulɛilɔ ngi gɔwɔbu yɛ ngi ma, “Ndemɔi, ina bi yɛ mbeindo lɔ, nya ndewei ii yɛ haa.”

³³Kia Yesu i ngi lɔni a wɔɔ, Juui nasia tia tieni ti wani tia bɛɛ ta wɔɔ, ngi lii i minilɔ waa;

³⁴Kɛ i mɔlinga yɛ, “Ɔɔ kambɛi na wu ngi gbɔwuni hu?” Ti ndeilɔ ngi ma tɛɛ, “Ndemɔi, wa bi tɔ.”

³⁵Yesu i wɔlɛilɔ.

³⁶Juuisia ti ndeilɔ tɛɛ, “I yɛ loni kpa a Lasarɔs!”

³⁷Kɛɛ ti lɛnga ti ndeilɔ tɛɛ, “Ta hii i pieni Pumumɔi i hinda lɔ, aa yɛlɔ gu a piela Lasarɔsi ɛɛ haa?”

³⁸Kɛ Yesu i ya kambɛi gama, ngi lii mɔnɛngɔ waa; ye pui, laagbɔwungɔ a kɔtu waa.

³⁹Yesu i ndeilɔ yɛ, “A kɔtii ji gbua pui laama.” Mata, haamɔi ndeenyahaloi, i ndeilɔ ngi ma yɛ, “Ndemɔi, kiahuna na ngi magui lɔ gbuama ajifa mu ngi gbɔwunga kungɔ na a njii naani.”

⁴⁰Yesu i ndeilɔ ngi ma yɛ, “Ngii ndeni bi ma ngɛɛ bi langaa a nge ba Ngewɔ gbayayii hulɔlɔ?”

⁴¹Kɛ nungeisia ti kɔtii gbuanga kambɛi laama. Kɛ Yesu i ngelema gbenga yɛ, “Kɛkɛ, ngi siɛgbua bi ma ajifa bi nya woo mɛninga.

⁴²Ngi yɛ kɔɔlɔ kɛ ba nya woo mɛnilɔ watii gbi, kɛɛ ngi ji lenga nungei jisia va lɔ ti looni mbei aako ti la la kɛ bia mia bi nya loni.”

⁴³Kia i kpɔyɔni a ji lela, i ndeilɔ ngeleya waa yɛ, “Lasarɔsi, gbua mbei.”

⁴⁴Haamɔi i gbuɛilɔ, ngi lokoisia tia ngi gɔwɔisia huyilingɔ a kula hakpɛisia, ngi wui wuaangɔ kulei hu. Yesu ndeilɔ ti ma yɛ, “A ngi vulo, i li.”

⁴⁵Juu gboto ti wani vama Mata tia Meri ma, ti na lɔilɔ Yesu i pieni, kɛ ti langa a ngie;

⁴⁶kɛɛ ti lɛɛnga ti liilɔ Farisiisia gama ti hugɛ a tie gbɔɔ Yesu i pienga.

⁴⁷Faale Farisiisia tia Saagbuablaa Waawaisia ti Kotii gomɛilɔ tɛɛ, “Gbɔɔ ma pie? Ajifa taamɔi ji lɔ kabande hinda gboto wiema.

⁴⁸Mu gbengaa ngi ma hii, numui gbi ta lalɔ a ngie, tawao Romableisia ta walɔ ti mu Yewɔ Wɛlei gbua mu yeya kɛɛ mu lɔlei gbi.”

⁴⁹Kɛɛ yeengila ta toli a Kayafasi, Saagbuablɛisia ti gulɔmɔ wai a ngie foi na va, i ndeilɔ ti ma yɛ, “Wuii hinda gbi hugɔɔ kulo bɛɛ;

⁵⁰wuii kɔɔ kɛ mahoungɔe wu va numu yila i haa numui gbi va, aako ndɔlei kpɛlɛɛ aa jukulu?”

⁵¹Ii ji leni a ngi wuma wee kɛɛ jifa ta lɔ Saagbuablɛisia ti gulɔmɔ wai a ngie foi na hu, i kulɔma yia lɔ leni yɛ Yesu a haalɔ Juuisia va,

⁵²tawao Juuisia yaangɔ ii le, kɛɛ aako i Ngewɔ leengei nasia ti vayangɔ hu gbi ti lɛma hinda yila.

⁵³Famia i hiye foloi na ma ti yɛlɔ a pele gɔli ngi waava.

⁵⁴Faale Yesu ii yɛ yaa jia foofo hu Judia lɔlei hu tawao, i gbuɛilɔ na i li taa yila hu ta toli a Ifrem i looni ndɔgbɔ lambɛi gblanga, i hei na tia ngi gaalopoisia.

⁵⁵Juuisia ti gomɛi yeewatii i lukpeilɔ kpla tawao numu gboto ti gbuɛilɔ tateisia hu ta li kulɔ Jelusalɛm aako ti ti wua pɛiŋ komɛi i yaa hiti ma.

⁵⁶Ti yɛlɔ a yaama jia a Yesu ji ti yandɔni Ngewɔ Wɛlei bu, ta ti nyɔunyɔ mɔli tɛɛ, “Bi langɔ la ɛɛ wa komɛi ji hu?”

⁵⁷Saagbuablaa Waawaisia tia Farisiisia ti wilangɔ yɛla a ndela nungaa ma tɛɛ numu gbi i Yesu yɛma gɔngalɔ, i hugɛ a tie aako ti ngi hou.