Read Ngowili Yekpei Numu Kpɛlɛɛ Va JƆN 12 Bible Online

JƆN 12 - Ngowili Yekpei Numu Kpɛlɛɛ Va bible

JƆN 12

¹Njii wɛita pɛiŋ Tewema Gomɛi i yaa hiti ma, Yesu i wɛilɔ Bɛtani, mia Lasarɔs na Yesu i ngi wuni hee hu i yɛ na.

²Ti mɛhɛɛ gomɛ wa hugbatɛilɔ na ngi wɛ; Mata lɔ i yɛ mɛhɛɛi gɔlɛkɔlɛ kɛɛ Lasarɔs i yɛ nasia lia lɔ ti yɛ heini tebiima tia Yesu-ni.

³ Meri liilɔ a ngulɔ baa gbangɔ waa yeesani yila i Yesu gɔwɔisia mali la, i ti mayila a ngi wundiei; kɛ ngulɔi yeeku nɛnɛɛ i gunga pɛlei bu gbi.

⁴Kɛ Judas Kɛriɔtmɔi, Yesu gaalopoisia yeena i wama ngi vema i ndenga yɛ,

⁵“Gbɛe tii ngulɔi ji majiani a ngengemɔ pawa foo yila va, taa yeenavoei ve fɛɛliblɛisia wɛ?”

⁶Ii ji leni jifa ngi gbewengɔ fɛɛlibla va kɛɛ jifa humamɔ a ngie. Ta mia numui gbi ti navoei loko i yɛ ngi yeya kɛɛ i yɛlɔ a huma ma.

⁷Yesu ndeilɔ yɛ, “Gbe ngi ma, na i ngi yeya i ndamagbatɛ nya gbɔwu volei va.

⁸ Wua fɛɛlibla le kpelema gbi kɛɛ nya, mua wueni ii le watii gbi.”

⁹Kia Juu vaha waa ti kɔɔni kɛ Yesu lɔ Bɛtani, ti wɛilɔ na Yesu va kɛɛ Lasarɔs vuii lɔ va na Yesu i ngi wuni hee hu.

¹⁰Faale Saagbuablaa Waawaisia ti hugbatɛilɔ Lasarɔs bɛɛ waava,

¹¹ajifa ngi va lɔ numu gboto ti gbuama Ngewɔ Wɛlei ma, ta la a Yesu.

¹²Kia ngele wekei i woni, faha wai na ti wani Tewema Gomɛi va ti mɛnilɔ kɛ Yesu lɔ wama Jelusalɛm.

¹³ Faale ti tɔkpɔ yasɛisia yaliilɔ ti li la ngi gulɔ tɛɛ, “A mu Ngewɔ lato! Ngewɔ i numui na luba i wama Ndemɔi biyɛi hu; Ngewɔ i Isrɛlbleisia ti Mahɛi Luba!”

¹⁴Kɛ Yesu i jakasi lɔgbɛ yila majɔɔnga, i hei maahu; kia nyɛingɔ la Ngewɔ Gɔlɛi hu tɛɛ,

¹⁵“Sayɔn nyahaloi, Sayɔnblɛisia waa luwa; wu mahɛi lɔ wama, i heini jakasi lɔgbɛi maahu!”

¹⁶Ngi gaalopoisia tii humbuni a ji yeembui gɔɔ; kɛɛ watii na Ngewɔ i Yesu wɔlɔyei veni ngi wɛ, i hitɛilɔ ti wɛ kɛ ti ji nyɛini wɔɔ Yesu va lɔ tawao i ngi wienga.

¹⁷Numu vaha wai na ti yɛ Yesu galangɔ ji i Lasarɔs wuni hee hu, i ngi loli i gbua kambɛi hu, ti yeehindei ji hugɛilɔ hu gbi.

¹⁸Na vamia fahii i lini ngi gulɔ ajifa ti wilanga a mɛnila kɛ i kabande hindei na wienga.

¹⁹Kɛ Farisiisia ti ndenga ti nyɔunyɔ ma tɛɛ, “Wu tɔnga na kɛ muɛɛ gu a gbɛogbɛ wiela; dunyei gbi lɔ toma ngi ma.”

²⁰Glikiblaa lɛɛnga ti yɛlɔ nungei nasia lia ti lini Ngewɔ vɛlima Komɛi hu.

²¹Yeeglikiblɛi jisia ti wailɔ Filipi gama, na i gbuani Bɛtsaida, Galili lɔlei hu, ti nde ngi ma tɛɛ, “Kaamɔ, mu longɔ mu Yesu lɔ.”

²²Filipi i liilɔ i hugɛ a Andru kɛ ti veengɔ ti ya ti hugɛ a Yesu.

²³Yesu i poteilɔ i nde ti ma yɛ, “Watii i hitinga Nuuvu Hindoloi i ngɔlɔya majɔɔ.

²⁴Gbɛɛ ngi tɔnyɛi hugɛ a wue, kɛlee mba-gaalei i gula pɔlɛi bu, i haa, a yɛ yakpe; kɛɛ i haangaa, a walɔ kpotongɔ.

²⁵ Numui na a lo a ngi lɛɛvui a baalɔ la kɛɛ numui na a lolo a ngi lɛɛvui dunyei ji hu, a lolɔ ngi yeya i wote a kunafɔ lɛɛvui.

²⁶Numu gbi lekee ngi longɔ i yenge nya wɛ, i to nya wooma; ajifa mia nga yɛ na, na mia nya bɔilopoi bɛɛ a yɛ na; numu gbi i yengengaa nya wɛ, nya Kɛkɛ a ngi bɛlɛ heilɔ.

²⁷“Kiahuna nya liimɔnɛngɔe. Gbɔɔ nga nde? Ngi nde ngɛɛ, ‘Kɛkɛ, pie watii ji i windɛ nya maahu?’ Sawo, sabui ji va lɔ ngi wani, ngi fonga yeehawɛi ji ma.

²⁸Kɛkɛ, bi biyɛi wɔlɔ.” Kɛ ngoo i gbuanga ngelegoohu yɛ, “Ngi ngɔlɔnga, tawao nga ngɔɔlɔ gbɔma.”

²⁹Fahii nasia ti yɛ looni ngi gblanga ti ngoi mɛnilɔ kɛ ti ndenga tɛɛ ngelei mia i yianga. Pekeisia ti ndeilɔ tɛɛ, “Malika mia i yɛpɛnga ngi gama.”

³⁰Yesu i kpɛmboilɔ yɛ, “Ngoi ji i wanga wu va lɔ, nya va ii le.

³¹Dunyei gbɛmbo-gbelei mia i hitinga; Watii ji lɔ Ngewɔ i dunyei ji yeemahɛi gbɛma dunyei hu;

³²tawao watii na ta nya lɛ krɔsii ma, nga pielɔ nuuvui gbi ti wa nya gama.”

³³I ji leilɔ kɛva hee yeegbɛ bonda lɔ i wama piema.

³⁴Fahii ti poteilɔ ti nde ngi ma tɛɛ, “Mu mɛninga sawa gɔlɛi hu kɛ Ngewɔ Maha Heingɔi a yɛlɔ na kunafɔ. Ba yee gu bi nde mu ma bɛɛ ta Nuuvu Hindoloi hɛlɛlɔ krɔsii ma? Ye lɔ Nuuvu Hindoloi ji le?”

³⁵Yesu i kpɛmboilɔ yɛ, “Fofoi lɔ lɛ wu gama watii wulo va. A jia kia lɛ fofoi i wu gama, kpindi aa wɛlɛ wɔi wu ma; numui na a jia kpindi hu, ɛɛ mia gɔɔ i lima na.

³⁶Kia lɛ fofoi i wu gama, a la a fofoi vemɔi aako wu yɛ a Ngewɔ leengaa.” Kia Yesu i njɛpɛi jisia leni, i liilɔ i lɔwu ti ma.

³⁷Kia bɛɛ i kabande hinda gbotoi jisia wieni ti yaama, na hu gbi tii lani a ngie;

³⁸ tawao ji i wielɔ hii aako njɛpɛi na i wie Ngewɔ lutui Aisaya i ndeni yɛ, “Ndemɔi, Ye lɔ i langa a ngowili na mu ndenga? Ye lɔ Ngewɔ i ngi gbayayii gɛnga a ngie?”

³⁹Famia tii guni a lala la ajifa Aisaya i gbɔma ndeilɔ yɛ,

⁴⁰“Ngewɔ i ti yamɛisia wumunga, i ti nɛmahuisia laagbɔwunga, aako taa hinda lɔ a ti yamɛisia, ti hinda hugɔɔ a ti nɛmahuisia, ti wote ngi gama ti bawova.”

⁴¹Aisaya i ji leilɔ ajifa i Yesu wɔlɔyei lɔilɔ, i yɛpɛ kɔlooni ngi ma.

⁴²Na hu gbi Juuisia ti mahublaa gboto vulii bɛɛ ti lɛilɔ a ngie, kɛɛ tii puni foofo hu ajifa ta luwa tɛɛ Farisiisia taa ti gbɛ komɛ wɛlei bu;

⁴³ajifa ti longɔ yɛla a nuuvungaa ti latoi i lewe Ngewɔ ndɛi ma.

⁴⁴Kɛ Yesu i yɛpɛnga ngeleya yɛ, “Numui na ngi langɔ a nge, ii lani a nya yakpe; i lani a nya lomɔi lɔ.

⁴⁵Numui na i nya lɔnga, i nya lomɔi lɔnga.

⁴⁶Ngi wanga kia foofo na dunyei hu, aako numui na lekee a la a nge aa lo kpindi hu.

⁴⁷Numui na a nya layieisia mɛni kɛɛ ɛɛ ti wie, ngɛɛ ngi gbɛmbo; ajifa ngii wani dunyei gbɛmboma, ngi wani dunyei bawova lɔ.

⁴⁸Numui na a gbele nya ma tawao ɛɛ loko hei nya layieisia bu, ngi gbɛmbomɔi lɔ na; njɛpɛi na ngi ndenga ta lɔ a ngi gbɛɛmbo kɛlɛma volei ma.

⁴⁹Ajifa ngii yɛpɛma a nya nda gbaya; nya Kɛkɛ na i nya loni, ta vulii lɔ i ndenga nya ma gbɔɔ mahoungɔ ngi nde.

⁵⁰Tawao ngi kɔɔlɔ kɛ ngi jawei lɔ a kunafɔ lɛɛvui. Faale na nya Kɛkɛ a fe nya wɛ ndeva, ta mia nga nde.”