Read Ngowili Yekpei Numu Kpɛlɛɛ Va JƆN 13 Bible Online

JƆN 13 - Ngowili Yekpei Numu Kpɛlɛɛ Va bible

JƆN 13

¹Tewema Gomɛi i loni na njii yakpe. Yesu i yɛ kɔɔlɔ kɛ watii i hitinga ngi gbuava dunyei ji hu i yama ngi Kɛkɛ gama. Ngi longɔ yɛla Tuuŋ a nungei nasia ti yɛni a ngi ndɛisia dunyei hu, tawao i loilɔ a tie i to ngi lɛɛvui gɛlɛmɛi.

²Yesu tia ngi gaalopoisia ti heiilɔ kpɔkɔ mɛhɛɛi mɛva. Seitana wilangɔ yɛla a pula Judas lii hu, Saimɔn Kɛriɔtmɔi loi, ngi veva.

³Yesu i yɛ kɔɔlɔ kɛ ngi Kɛkɛ i kpayei gbi venga ngi wɛ; i yɛ gbɔma kɔɔlɔ kɛ i gbuanga Ngewɔ gama lɔ tawao i yamama Ngewɔ gama lɔ.

⁴I hiyeilɔ tebiima, i bobani gbua ngi ma, i tawɛi yili haama.

⁵Kɛ i njɛi wunga panii hu, i tɔtoo a ngi gaalopoisia gɔwɔma wuala, a ti mayila a tawɛi na i yɛ ngi haama.

⁶Kia i foni Saimɔn Pita ma, ta ngi Pita i ndeilɔ ngi ma yɛ, “Ndemɔi, taa bi nɛmahu nya gɔwɔmɛi wuava?”

⁷Yesu i kpɛmboilɔ yɛ, “Na ngi piema wuii yeembui gɔɔ kiahuna kɛɛ wa kɔɔlɔ poma.”

⁸Kɛ Pita i ndenga ngi ma yɛ, “Kunafɔ bɛɛ nya gɔwɔma wua!” “Kɛ Yesu kpɛmbonga yɛ, Kɛlee ngi bi gɔwɔma wua muɛɛ yaa yɛ hinda hu.”

⁹Kɛ Saimɔn Pita i ndenga yɛ, “Ndemɔi, baa nya gɔwɔmɛi lekee wua hɔɔ, nya lokoisia mawua kɛɛ nya wui gbi.”

¹⁰Yesu i ndeilɔ ngi ma yɛ, “Numui na ngi muangɔ, ngi luwui yɛngɔ sɛwɛ, ii yaa gbeweni mua va, kɛlee ngi gɔwɔmɛi; wu kpɛlɛɛ wu yaa sɛwɛ, kɛlee wu yilayee.”

¹¹(Gbamaile i yɛ numui na gɔɔlɔ i wama ngi vema; na vamia i ndeni yɛ, “Wu kpɛlɛɛ ii le waa yɛ sɛwɛ.”)

¹² Kia Yesu i kpɔyɔni a ti gɔwɔmɛisia mawuala, i ngi bobani wuilɔ, i yama i hei ngi heimi tebii ma, i ti mɔli yɛ, “Wu na yeembui gɔɔlɔ ngi pienga a wue saange?

¹³Wa nya loli a Kaamɔ kɛɛ Ndemɔi; tawao wu lɔnyangɔe ajifa Kaamɔi mia a nge kɛɛ Ndemɔi.

¹⁴Ina nya, wu Kaamɔ a nge kɛɛ wu Lemɔi, ngi wu gɔwɔma wuanga, kɛ mahoungɔi hɔɔ wua bɛɛ wu wu nyɔunyɔ gɔwɔma wua.

¹⁵Gbamaile tɔmaseli mia ngi kɛnga a wue aako wua bɛɛ wu ya a pie kia ngi pieni la a wue.

¹⁶ Gbɛɛ ngi tɔnyɛi hugɛ a wue, bɔilopoi ii leweni ngi lemɔi ma; tawao tomɔi ii leweni ngi lomɔi ma.

¹⁷Wu hindei jisia gɔngaa, wa kohunɛ jɔlɔ ina wu ti wieilɔ.

¹⁸“Wu kpɛlɛɛ ii le nga yɛ wu ma; jifa ngi numu laasii nasia gɔɔlɔ ngi ti wɔyɔnga a nya liimablaa; tawao mahoungɔ na i wie Ngewɔ Gɔlɛi i ndeni yɛ ‘Numui na i nya mɛhɛɛi mɛni, i wotenga a nge.’

¹⁹Nyaa ji kpɛlɛɛ hugɛma a wue kiahuna, pɛiŋ i yaa wie, aako i wiengaa, wu la la kɛ ‘Nya mia a na ngi ndeni ngɛɛ tamia a nge.’

²⁰ Gbɛɛ ngi tɔnyɛi hugɛ a wue, numui na a loko hei numu gbi bu nga ngi lo, i loko heini nya bɛɛ lɔ bu; tawao numu gbi lekee a loko hei nya bu, i loko heini nya lomɔi lɔ bu.”

²¹Kia Yesu i njɛpɛi jisia leni, ngi lii i nyanilɔ waa, kɛ i ndenga leeŋ yɛ, “Gbɛɛ ngi tɔnyɛi hugɛ a wue, wu yilayee lɔ i nya vema.”

²²Ngi gaalopoisia ti ti nyɔunyɔ gbeilɔ, tii kɔɔ kulo bɛɛ ngi lii i yelɔ ma.

²³Kaalopoisia yilayee, yeena ngi longɔ yɛla la waa, i yɛ heini Yesu gblanga lɔ ngi ligbingɔ ngi liimɛi;

²⁴faale Saimɔn Pita i ngi loliilɔ a loko, yɛ ngi ma, “Nde ngi ma i numui na gɛ a mue i ngi yɛpɛ lema.”

²⁵I loni ligbini Yesu liimɛi lɔ i ngi mɔli yɛ, “Ndemɔi, yee le?”

²⁶Yesu kpɛmboilɔ yɛ, “Numui na lekee nga bledii ji lɔmbu hakpɛi hu ngi fe ngi wɛ.” Faale kia i bledii lɔmbuni hakpɛi hu, i feni Judas lɔ wɛ, Saimɔn Kɛriɔtmɔi loi.

²⁷Kia lekee Judas i yeebledii houni, kɛ Seitana i wuaangaa ngi lii hu; kɛ Yesu i ndenga ngi ma yɛ, “Na i bi lii hu pieva, pie kaakaa.”

²⁸Kaalopoi nasia ti yɛ heini tebii ma yeengila bɛɛ ii yɛ kɔɔ gbɛe Yesu i ji leni Judas ma.

²⁹Jifa ti kpɛlɛɛ ti navoei i yɛ Judas lɔ yeya, ti lɛɛnga ti giliilɔ tɛɛ Yesu lɔ ndema ngi ma yɛ i li i mɛhɛɛi na yeya ti gbewengɔ faa komɛi va ɔɔ i hani ve fɛɛliblɛisia wɛ.

³⁰Famia, kia Judas i bledii houni, i gbuɛilɔ ngaama; tawao kpindi yɛla.

³¹Kia Judas i gbuani, Yesu i ndeilɔ yɛ, “Kiahuna mia Nuuvu Hindoloi wɔlɔyei maa i gɛnga; kiahuna mia Ngewɔ wɔlɔyei maa i gɛnga Nuuvu Hindoloi hu.

³²Tawao ina Ngewɔ wɔlɔyei maa i gɛnga Nuuvu Hindoloi hu, kɛ Ngewɔ a Nuuvu Hindoloi wɔlɔyei magɛlɔ ta yekpe hu, tawao a wielɔ ngaama.

³³ Nya leengeisia, ngii yaa lɛmbima panda wu lia. Wa nya gɔkɔlilɔ; kɛɛ gbɛɛ ngi hugɛ a wue na kia ngi hugɛni la a Juuisia ti gulɔbleisia ma ngɛɛ, ‘Wɛɛ gu a lila mia ngi lima na.’

³⁴Sawa nina mia na ngi fema wu wɛ: a lɔ a wu nyɔunyɔ. Kia ngi longa a wue, hii mahoungɔ wua bɛɛ wu lo a wu nyɔunyɔ.

³⁵Ndoma i yaa wu lii hu wu nyɔunyɔ va, ta lɔ numui gbi ta kɔɔ kɛ nya gaalopoisia lɔ a wue.”

³⁶Saimɔn Pita i ngi mɔlilɔ yɛ, “Ndemɔi, bi lima mindo lɔ?” Yesu kpɛmboilɔ yɛ, “Mia ngi lima na, bɛɛ gu a tola nya ma kiahuna, kɛɛ ba tolɔ nya ma huɛɛŋ poma.”

³⁷Pita i ngi mɔlilɔ yɛ, “Ndemɔi, gbɛe ngɛɛ gu a tola bi ma kiahuna? Nya magbatɛngɔe haava bi va.”

³⁸Yesu i kpɛmboilɔ yɛ, “Bi lumangɔe vulii haava nya va? Gbɛɛ ngi tɔnyɛi hugɛ a bie, pɛiŋ tɛhinɛi i yaa gokole a kpindi ji, ba mawalilɔ heima sawa bɛɛ bii nya gɔɔ.