Read Ngowili Yekpei Numu Kpɛlɛɛ Va JƆN 14 Bible Online

JƆN 14 - Ngowili Yekpei Numu Kpɛlɛɛ Va bible

JƆN 14

¹“Wu lii aa nyani; a la a Ngewɔ, wu la a nya bɛɛ.

²Lomu gboto lɔ nya Kɛkɛ wɛlei bu, tawao nyaa lima ngi heima gbatɛ wu va. Ngii yɛ ji le wu ma ina ii hii.

³Ngi yaalɔ ngi heima gbatɛ wu va, nga walɔ gbɔma ngi li a wue aako mua wueni mu yɛ mia nga yɛ na.

⁴Wu pelei na gɔɔlɔ a li mia ngi lima na.”

⁵Tɔmɔsi ndeilɔ ngi ma yɛ, “Ndemɔi, muii mia gɔɔ bi lima na; ma yee gu mu yeepelei gɔ?”

⁶Yesu i kpɛmboilɔ yɛ, “Nya lɔ pelei a nge kɛɛ tɔnyɛi kɛɛ ndɛvui; numu gbi ɛɛ li Kɛkɛi gama kɛlee i lewe a nya hu wee.

⁷Kiaa wu nya gɔɛilɔ, wu yɛ nya Kɛkɛ bɛɛ gɔlɔ; tawao i hiye watii ji ma, wu ngi gɔnga, i yama wu ngi lɔnga.”

⁸Filipi i ndeilɔ ngi ma yɛ, “Ndemɔi, Kɛkɛi gɛ a mue; na lekee mia mu gbewengɔ famia.”

⁹Yesu ndeilɔ ngi ma yɛ, “Mua wueni lɔ lewema huguhangɔ hii, na hu gbi bii nya gɔɔ, Filipi? Numui na i nya lɔnga, i Kɛkɛi lɔnga; ba yee gu a ndela bɛɛ ‘Kɛkɛi gɛ a mue’?

¹⁰Bii lani la kɛ nyaa Kɛkɛi hu, Kɛkɛi bɛɛ i nya hu? Njɛpɛi nasia nga nde wu ma ngii ndema a nya wuma gbaya; kɛɛ Kɛkɛi na i heini nya hu tamia a ta yekpe ngi yengeisia wie.

¹¹A la a nge ji nga nde ngɛ nyaa Kɛkɛi hu, Kɛkɛi bɛɛ i nya hu; ina na ii le, a la a nge kabande hindeisia vulii bɛɛ va nga pie.

¹²Gbɛɛ ngi tɔnyɛi hugɛ a wue, numui na ngi langɔ a nge, ta bɛɛ a gulɔ a kabande hindei jisia wiela nga pie; tawao a kabande hinda waawanga wielɔ tewengɔ jisia ma ajifa nyaa lima nya Kɛkɛi gama.

¹³Hinda gbi wa Ngewɔ vɛli fa nya biyei hu, nga pielɔ aako Kɛkɛi wɔlɔyei i gɛ ngi Hindoloi hu;

¹⁴Wu nya vɛlingaa hinda gbi va nya biyɛi hu, nga pielɔ.

¹⁵“Ina wu longɔi a nge, wa nya jaweisia houlɔ.

¹⁶Nga Kɛkɛi vɛlilɔ tawao a wu gɔlɔ a Kpɔmamɔ weka na wua tieni wa hei kunafɔ va.

¹⁷Tamia a Ngafei na a tɔnyɛi hugɛ kɔloongɔ Ngewɔ ma. Dunyei ɛɛ loko hei ngi bu ajifa ɛɛ gu a ngi lɔla ɔɔ ngi gɔla. Kɛɛ wua wu ngi gɔɔlɔ, ajifa wua tieni wa yɛ heinilɔ tawao i wu hu.

¹⁸“Ngi yaalɔ, ngɛɛ wu lo kia pondongaa; nga walɔ wu gama.

¹⁹I longa kulo, dunyei ɛɛ yaa nya lɔ gbɔma, kɛɛ wua wa nya lɔlɔ; jifa nya vulungɔ, wua bɛɛ wa vululɔ.

²⁰Foloi na ma wa kɔɔlɔ kɛ nyaa Kɛkɛi hu, wu nya hu, ngi wu hu.

²¹“Numui na a nya jaweisia gulu, i ti hou, ta mia ngi longɔ a nge; tawao numui na ngi longɔ a nge, nya Kɛkɛ a lolɔ a ngie, tawao nga lolɔ a ngie ngi nya yekpe gɛ a ngie.”

²²Judas, kɛɛ Kɛriɔtmɔi ii le, i ngi mɔlilɔ yɛ, “Ndemɔi, a yee wie bi bia yekpe gɛ a mue kɛɛ bɛɛ bia yekpe gɛ a dunyei?”

²³Yesu i ngi mɔli gbɛmboilɔ yɛ, “Numu i longaa a nge, a jialɔ a nya layieisia; nya Kɛkɛ a lolɔ a ngie tawao ma walɔ ngi gama mua tieni mu hei.

²⁴Numui na ii loni a nge ɛɛ jia a nya layieisia, tawao, njɛpɛi nasia wa mɛni nga nde, nya woo ii le, Kɛkɛi na i nya loni ta lɔ ngi woo le.

²⁵“Ngi hindei jisia hugɛnga a wue kia lɛ ngi wu lia.

²⁶Kɛɛ Kpɔmamɔi, Ngewɔ Yafei, na Kɛkɛi a njooyo nya biyɛi hu, a wu gaalɔ a nalee gbi ngi kɛni a wue a yaa hitɛ wu nɛmahu na kpɛlɛɛ na wu gaani la.

²⁷“Nyaa ndiilɛli loma a wue; nya liilɛli mia ngi fema wu wɛ; ngii fema kia dunyei a fe la. Wu lii aa nyani tawao waa luwa.

²⁸Wu mɛnilɔ ji ngi ndeni wu ma ngɛɛ, ‘Nyaa lima tawao nga walɔ wu gama.’ Ina wu longɔ yɛla a nge, wu goohu aa nɛɛlɔ, ajifa ngi lima Kɛkɛi gama; jifa Kɛkɛi i leweni nya ma.

²⁹Ngi hugɛnga na a wue pɛiŋ i yaa wie, aako i wiengaa, wu la la.

³⁰Mua wueni muɛɛ yaa njɛpɛ gboto le, ajifa dunyei ji yeemahɛi lɔ wama. Kpaya ii ngi wɛ nya maahu;

³¹kɛɛ na Kɛkɛi a nde ta mia nga pie, aako dunyei i kɔɔ kɛ nya longɔe a Kɛkɛi. “A hiye mu gbua hindei ji mu li.