Read Ngowili Yekpei Numu Kpɛlɛɛ Va JƆN 15 Bible Online

JƆN 15 - Ngowili Yekpei Numu Kpɛlɛɛ Va bible

JƆN 15

¹“Nya lɔ ngua-wulii yeetɔnyangɔi a nge, tawao nya Kɛkɛ lɔ kpala yengemɔi le.

²Mbeke gbi lekee ii wɛilɔ, a tewelɔ, kɛɛ mbeke gbi lekee i wuangaa, a magbatɛlɔ aako i wua i lewe na ma.

³Njɛpɛi nasia ngi ndenga wu ma i wilanga a wu yɛla sɛwɛ.

⁴A yɛ nya hu, nya bɛɛ ngi wu hu. Kia ngulu bekei ɛɛ gu a wuala a ngi wuma wee, kɛlee i yɛ looni ngulu gbuhɛi ma, hii wua bɛɛ wɛɛ gu a wuala kɛlee wu yɛ nya hu.

⁵“Nya lɔ ngulu gbuhɛi a nge, wua lɔ mbekeisia a wue. Numui na a yɛ nya hu, nya bɛɛ ngi ngi hu, tamia a wua kpotongɔ waa, ajifa wuɛɛ gu a gbɛogbɛ wiela nya wooma.

⁶Numui na ɛɛ yɛ nya hu, ta ngi wililɔ kia ngulu beke i na, i be; ta yeembeke bondei jisia lɛlɔ ma, ti ti wili ngɔmbui hu, ti mɔ.

⁷Wu yɛngaa nya hu, nya layiesia ti lo wu hu, hinda gbi lɛkee wa Ngewɔ vɛli fa a wielɔ wu wɛ.

⁸Ji wa wua kpotongɔ waa ta mia a nya Kɛkɛ wɔlɔyei gɛ, kɛ a yee kɛyii ji hulɔ wa wotea nya ngalopoisia.

⁹Kia Kɛkɛi i longa a nge, hii ngi longa a wue; wuaa nya lomɛi hunyani.

¹⁰Wu nya jaweisia houngaa, nya lomɛi a yɛlɔ wu hu, kia lɔɔ ngi nya Kɛkɛi jaweisia hounga, ngi lomɛi a yɛ nya hu.

¹¹“Ngi hindei jisia hugɛnga a wue aako nya goohunɛɛi i yɛ wu hu tawao wu goohunɛɛi lavengɔ i yɛla.

¹² Ji lɔ nya jawei le: a lo a wu nyɔunyɔ kia nya longɔ a wue.

¹³Ndoma gbi ii na numu aa kɛ ngi ndiamɔisia va aa lewe ji ma a ngi lɛɛvui ve ti va.

¹⁴Nya ndiamɔisia a wua lɔ ina wu nya jaweisia houilɔ.

¹⁵Ngɛɛ yaa gbɔma wu loli a bɔilopongaa, ajifa bɔilopoi ii kɔɔ gbɔɔ ngi lemɔi i piema; ngi wu lolinga a nya ndiamɔisia ajifa na gbi nya Kɛkɛ i hugɛnga a nge, ngi hugɛnga a wue.

¹⁶Wua ii le wua nya mahou; nya lɔ ngi wu mahouni, ngi loko lo wu ma ngɛɛ wu li wu ngenge yekpe gboto wie, ngenge yekpei na a lɛmbi; aako na gbi lekee wa Kɛkɛi vɛli fa nya biyɛi hu, i fe wu wɛ.

¹⁷A lo a wu nyɔunyɔ; nya jawei lɔ a ji wu va.

¹⁸“Dunyei i lolongaa a wue, i hitɛ wu nɛmahu kɛ i loloni pɛiŋ a nge i yaa lolo a wue.

¹⁹Kiaa dunyei wolɔ a wue, aa lolɔ a wue jifa ngi woo lɔ a wue. Kɛɛ ngi wu mahouilɔ dunyablei jisia lia, tawao wuii yaa yɛni a dunyei woo, na va mia dunyei lolongɔ a wue.

²⁰ A gili a njɛpɛi na ngi ndeni wu ma: ‘Nduwɔi ii leweni ngi luwɔkɛi ma.’ Ina ti nya yakpɛilɔ a nyamu, ta juwuyalɔ a wua bɛɛ yakpɛla a nyamu; ina ti goleilɔ nya layieisia bu, ta gololɔ wu ndɛi bɛɛ bu.

²¹Kɛɛ ta ji kpɛlɛɛ wie a wue nya va lɔ, ajifa tii numui na gɔɔ i nya loni.

²²Kiaa ngii wani nga yɛpɛ ti gama, jumbu ii yɛ yɛ ti ma; kɛɛ kiahuna na tɛɛ gu a ndela tɛɛ tii yɛ kɔɔ kɛ na ti pieni jumbu mia.

²³Numui na ngi lolongɔ a nge, ngi lolongɔe a nya Kɛkɛ bɛɛ.

²⁴Kiaa ngii kabande hindei nasia wieni ti lia numu weka gbi ii yaa wɔɔ pieni, jumbu ii yɛ yɛ ti ma; kɛɛ kiahuna na, ti na lɔnga ngi pieni kɛɛ ti lolonga a mua nya Kɛkɛ veenjɔɔ kpɛlɛɛ.

²⁵ Ji aa wielɔ huɛɛŋ aako na i wie nyɛingɔ Sawa Gɔlɛi hu tɛɛ, ‘Ti loloilɔ a nge sabu gbii ma.’

²⁶“Kɛɛ watii na Kpɔmamɔi a wa, na nga njooyo wu gama tɔnyɛi hugɛva kɔlooni Kɛkɛi ma, tɔnya Yafei na a gbua Kɛkɛi gama, a nya jelilɔ;

²⁷tawao wua bɛɛ nya jelisia lɔ a wue ajifa wuaa wɔɔ gba nya wooma i hiye nya yengei ji lɔto-gbelei ma.