Read Ngowili Yekpei Numu Kpɛlɛɛ Va JƆN 16 Bible Online

JƆN 16 - Ngowili Yekpei Numu Kpɛlɛɛ Va bible

JƆN 16

¹“Ngi ji hugɛnga a wue gbɔva wu ma aako wu lalei a nge aa nyani.

²Ta wu gbɛlɔ hɛɛ wɛleisia bu; a tɔnya watii a hitilɔ na hii numu gbi lekee a wu waa, a gili lɔ yɛ taa Ngewɔ yengei wiema.

³Nungaa ta hindei jisia wielɔ a wue ajifa tii mua nya Kɛkɛ veenjɔɔ kpɛlɛɛ gɔɔ.

⁴Kɛɛ ngi hindei jisia kpɛlɛɛ hugɛnga a wue aako yeewatii i hitingaa, a hitɛlɔ wu wɛ kɛ ngi ndeilɔ pɛiŋ wu ma. “Ngii hindei jisia hugɛni a wue tɔtomɛi ajifa ngi yɛlɔ wu lia.

⁵Kɛɛ kiahuna naa nyaa lima nya lomɔi gama; na hu gbi wu yilayee bɛɛ ii nya mɔlini aa yɛma ‘Bi lima mindo lɔ?’

⁶Kɛɛ jifa na ngi yeehindei jisia hugɛnga a wue, wu lii i nyaninga waa.

⁷Na hu gbi gbɛɛ ngi tɔnyɛi hugɛ a wue: nya lila a fisalɔ wu va, ajifa ngii liilɔ Kpɔmamɔi ɛɛ wa wu gama; kɛɛ ngi yalɔ, nga ngi yoyolɔ wu gama.

⁸Tawao i wangaa, a kɛlɔ leeŋ a dunyablaa kɛ ti kpulanga wienga pelei na hu ti gilima a jumbui yeembui kɛɛ Ngewɔ wɔnayii kɛɛ dunyei gbɛmbolei.

⁹Ti kpulanga wienga kɔloongɔ jumbui ma ajifa ti ganganga a lala a nge;

¹⁰ti kpulanga wienga kɔlooni pɔɔna hinda ma ajifa nyaa lima nya Kɛkɛ gama tawao wɛɛ yaa gbɔma nya lɔ kia ngi na;

¹¹ti kpulanga wienga kɔloongɔ dunyei gbɛmbolei ma ajifa Ngewɔ i wilanga a dunyei ji yeemahɛi lɛɛla.

¹²“Hinda weka gboto lɔ na hugɛva a wue kɛɛ wɛi gu kpɛlɛɛ bu kiahuna.

¹³Watii na Ngewɔ Yafei a wa, na a tɔnyɛi hugɛ kɔloongɔ Ngewɔ ma, a pielɔ wu tɔnyɛi hugɛ kɔloongɔ Ngewɔ ma. Kɛɛ a ngi wuma gbaya ii le kɛ lekee na a mɛni Kɛkɛi laa, tawao a hindangaa hugɛlɔ a wue ti wama wiema.

¹⁴A nya wɔlɔyei hugɛlɔ a wue gbamaile na nga nde, tamia a mbumbu i hugɛ a wue.

¹⁵Na gbi i nya Kɛkɛ yeya nya woo le; famia ngi ndeni ngɛɛ na nga hugɛ a Ngewɔ Yafei tamia a nde wu ma.

¹⁶“I longa kulo, wɛɛ yaa nya lɔ gbɔma, tawao gbɔma a lo kulo na wooma, wa nya lɔlɔ.”

¹⁷Ngi gaalopoisia lɛɛnga ti ti nyɔunyɔ mɔlilɔ tɛɛ, “Gbɔɔ i ngi nɛmahu ji i ndema yɛ, ‘I longa kulo wɛɛ yaa nya lɔ, tawao gbɔma a lo kulo na wooma kɛ wu nya lɔnga;’ tawao yɛ gbɔma, ‘Ajifa nyaa lima Kɛkɛi gama’?”

¹⁸Ti gbɔma mɔlilɔ tɛɛ, “Gbɔɔ ngi lii i ma ji i ndema yɛ, ‘I longa kulo’? Muii kɔɔ gbɔɔ ngi lii i ma.”

¹⁹Yesu i kɔɛilɔ kɛ ti longɔ ti ngi mɔli; famia i ndeilɔ ti ma yɛ, “Ji ngi ndeni ngɛɛ ‘I longa kulo wuɛ yaa nya lɔ, tawao a lo kulo na wooma kɛ wu nya lɔnga.’ ”

²⁰Gbɛɛ ngi tɔnyɛi hugɛ a wue, wa wɔlɔ, wu ngaya wu, kɛɛ dunyei ta a goohunɛɛlɔ; wu lii a nyanilɔ kɛɛ wu liinyani a wotelɔ a kohunɛɛ.

²¹Ndo-le-goohugbalɛi i nyaha houngaa, ngi lii nyaningɔ a yɛla ajifa ngi lo le-gbelei i hitinga; kɛɛ i ndoi lengaa na, kpalɛi na kpɛlɛɛ ɛɛ yaa hitɛ ngi wɛ; ngi goohu nɛngɔ a yɛla ajifa i ndoo lenga dunyei hu.

²²Faale, wu lii nyaningɔe kiahuna, kɛɛ nga wu lɔlɔ gbɔma kɛ wu goohu i nɛnga, tawao numu gbi ɛɛ yeekohunɛɛ na hunyani wu yeya.

²³“A foloi na wuɛɛ nya vɛli a hani gbi. Gbɛɛ ngi tɔnyɛi hugɛ a wue, wu hani gbi vɛlingaa Kɛkɛi ma nya biyɛi hu a felɔ wu wɛ.

²⁴Kia wɔɔ gba wuii yaa hani gbi vɛlini Ngewɔ ma nya biyɛi hu; a fɛli, wa majɔɔlɔ, aako wu goohunɛi laa i ve.

²⁵“Ngi jisia gbi hugɛnga a wue sale hu, kɛɛ watii lɔ hitima ngɛɛ yaa yɛpɛ wu gama sale hu; nga Kɛkɛi hinda hugɛlɔ a wue gbalauŋ.

²⁶Watii na i hitingaa, wa Ngewɔ vɛli nya biyɛi hu lɔ; ngii ndeni nga yɛma nya lɔ nga ngi vɛli wu va.

²⁷Ajifa Kɛkɛi vulii ngi longɔe a wue ajifa wu longɔ a nge tawao wu langa la kɛ ngi hiyeni Ngewɔ gama lɔ.

²⁸Ngi hiyeni vulii Kɛkɛi gama lɔ ngi wanga dunyei hu; nyaa gbɔma gbuama dunyei hu ngi li Kɛkɛi gama.”

²⁹Ngi gaalopoisia ti ndeilɔ ngi ma tɛɛ, “Biaa na yɛpɛma gbalauŋ, bii ndema sale hu.

³⁰Mu kɔɔnga na kɛ bi hindei gbi hugɔɔlɔ tawao bii gbeweni numu gbi va hugɛva a bie gbɔɔ a yɛ nungaa nɛmahu. Ji lɔ i pienga mu langa la kɛ bi hiyenga Ngewɔ gama lɔ.”

³¹Yesu i ti mɔlilɔ yɛ, “Wu langa na vulii a nge?

³²Watii lɔ hitima, tawao hitingɔe na bɛɛ, wu gbi wu hu a vayalɔ, numu gbi i li ngi yeekuwuhu, nya yakpe ngi lo. Kɛɛ nya yakpe ɛɛ yɛla vulii, ajifa mua nya Kɛkɛ a yɛla.

³³Ngi ji hugɛnga a wue aako wu ndiilɛli jɔɔ ji mua wueni ma wili hu. Kpalɛ a lalɔ wu ma dunyei hu; kɛɛ a liilo ngi temaya majɔɔnga dunyei maahu.”