Read Ngowili Yekpei Numu Kpɛlɛɛ Va JƆN 17 Bible Online

JƆN 17 - Ngowili Yekpei Numu Kpɛlɛɛ Va bible

JƆN 17

¹Kia Yesu i kpɔyɔni a njɛpɛi jisia lela, i ngelema gbeilɔ tiŋ yɛ, “Kɛkɛ, watii i hitinga; bi Hindoloi wɔlɔyei gɛ, bi Hindoloi bɛɛ i bi wɔlɔyei gɛ.

²Ajifa bi kpayei gbi venga ngi wɛ nuuvui gbi maahu kunafɔ lɛɛvui veva nasia gbi wɛ bi ti venga ngi wɛ.

³Tawao kunafɔ lɛɛvui lɔ a ji ta bi gɔɔ, bia tɔnya Yewɔ yakpei a bie, kɛɛ Yesu bi Maha Heingɔi, na bi njooyonga dunyei hu.

⁴Ngi bi wɔlɔyei gɛilɔ dunyei hu ngi kpɔyɔnga a ngengei na bi feni mbɛ pieva.

⁵Kɛkɛ, nya wɔlɔyei gɛ na mia bi na, ngɔlɔyɛi na wɔɔ i yɛ nya ma bi gama pɛiŋ dunyei i yaa gbatɛ.

⁶“Ngi bi gɛnga a hingei jisia bi ti veni nya wɛ dunyabla lia, bi woo mia wɔɔ a tie, tawao bi ti veilɔ nya wɛ tao ti bi layie hounga.

⁷Ti kɔɔlɔ na kɛ hanii gbi bi fenga nya wɛ i gbuanga bi gama lɔ;

⁸ajifa ngi njɛpɛi nasia lenga ti ma bi ndeni nya ma, tawao ti loko heinga mbu, ti kɔɔngɔ a tɔnya kɛ ngi gbuani bi gama lɔ; tawao ti langa la kɛ bia lɔ bi nya loni.

⁹“Nyaa bi vɛlima ti va; ngii bi vɛlima dunyablaa gbi va kɛlee nasia bi ti venga nya wɛ, ajifa bi woo lɔ a tie.

¹⁰Na kpɛlɛɛ lekee nya woo le bi woo le tawao na bi woo le nya woo le tawao nya wɔlɔyei i gɛnga ti hu.

¹¹Nya na wama bi gama; kiahuna ngii yaa gbɔma dunyei hu kɛɛ tia tiaa dunyei hu. Kɛkɛ, bia mahoungɔ mu hɛɛ bi ma, ti mahugbe a bi gbayei, kpayei na bi fenga nya wɛ, aako ti wili hu ti yɛ yakpe kia lɔɔ mua bie mu wilingɔ hu mu yakpe.

¹² Kia lɛ wɔɔ ngi ti lia, ngi ti mahugbeilɔ a bi gbayei na bi fenga nya wɛ; ngi ti mahugbenga, yeengila bɛɛ ii loni hu kɛlee yeena i ta yekpe jukuluni, aako Ngewɔ layie na i ngi Gɔlɛi hu i wie.

¹³Kiahuna na nya wama bi gama; kɛɛ nyaa njɛpɛi jisia lema kia lɛ ngi ti lia aako Kohunɛ na i nya ma, ti majɔɔ i ti liisia laave.

¹⁴Ngi bi wowili hugɛnga a tie, famia dunyableisia ti lolonga a tie, ajifa ti gba dunyableisia ma kia lɔɔ ngi gba dunyableisia ma.

¹⁵Ngii bi vɛlima aako bi ti gbua dunyei hu, kɛɛ aako bi ti mahugbe numui na yeya ta toli a nyamumɔi.

¹⁶Ti gba dunyableisia ma, kia lɔɔ ngi gba dunyableisia ma.

¹⁷Ti yɛ a bi woo a bi layie gbayei; bi layie lɔ tɔnyɛi le.

¹⁸Kia bi nya yoyoni dunyei hu, hii ngi ti longa dunyei hu.

¹⁹Ngi nya yekpe venga bi wɛ ti va aako tia bɛɛ ti tia yekpe ve bi wɛ a tɔnya.

²⁰“Ngii bi vɛlima jisia lekee va; ngi bi vɛlima nasia bɛɛ lɔ va ta la a nge nya wowili na va ta nde ti ma.

²¹Nyaa bi vɛlima aako ti gbi ti wili hu ti yɛ yakpe. Kɛkɛ, pie ti wili mu hu kia lɔɔ bi wilingɔ nya hu, nya bɛɛ nya wilingɔ bi hu. Pie ti wili hu ti yɛ yakpe aako dunyableisia ti la la kɛ bia lɔ bi nya loni.

²²Ngɔlɔya yakpei na bi feni nya wɛ ta mia ngi feni ti wɛ aako ti wili hu ti yɛ yakpe,

²³kɔɔ dunyableisia ti kɔɔ kɛ bia lɔ bi nya loni tawao kɛ bi longɔe a tie kia bi longɔ la a nge.

²⁴“Kɛkɛ, nya longɔ jisia bɛɛ bi ti venga nya wɛ mua tieni mu yɛ mia nga yɛ na, aako ti ngɔlɔyɛi na lɔ bi feni nya wɛ bi lova a nge pɛiŋ dunyei i yaa gbatɛ.

²⁵Oo pɔɔna Kɛkɛi, dunyableisia tii bi gɔɔ kɛɛ nya ngi bi gɔɔlɔ, tawao jisia ti kɔɔlɔ kɛ bia mia bi nya loni.

²⁶Ngi pienga ti bi biyɛi gɔnga, tawao nga pielɔ ti kɔɔ kɛ ndomɛi na bi piengɔ a nge a yɛlɔ ti hu, nya bɛɛ ngi ti hu.”