Read Ngowili Yekpei Numu Kpɛlɛɛ Va JƆN 18 Bible Online

JƆN 18 - Ngowili Yekpei Numu Kpɛlɛɛ Va bible

JƆN 18

¹Kia Yesu i kpɔyɔni a Ngewɔ vɛlilei ji, tia ngi gaalopoisia ti gbuɛilɔ yeehindei na ti li ti lɛmbui na huvo ta toli a Kidlɔn, ti li tuhani gbaala yila hu i yeehindei na.

²Judas na i Yesu veni i yɛ yeehindei na gɔɔlɔ ajifa Yesu tia ngi gaalopoisia ti yɛlɔ a gomɛ na pɛɛpɛ.

³Famia Judas i Roma sojangaa majɔɛilɔ kɛɛ Saagbuablaa Waawaisia tia Farisiisia ti polisisia tia tieni ti li na a lamboisia kɛɛ hɛmuisia kɛɛ kɔhakangaa.

⁴Yesu i yɛ hindei gbi gɔɔlɔ i yɛ wama ngi wiema, faale i wɛilɔ ti gama i ti mɔli yɛ, “Ye lɔ wu ngi gɔkɔlima?”

⁵Ti kpɛmboilɔ tɛɛ, “Yesu Nasalɛtimɔi.” Kɛ Yesu i ndenga ti ma yɛ, “Ta lɔ a nge.” Judas na i ngi veni i yɛ ti lia lɔ.

⁶Kia Yesu i ndeni ti ma yɛ, “Tamia a nge,” ti gbi ti yamɛilɔ a wooma wee ti gula ndɔmɛi.

⁷I gbɔma ti mɔlilɔ yɛ, “Ye lɔ wu ngi gɔkɔlima?” Kɛ ti ndenga tɛɛ, “Yesu Nasalɛtimɔi.”

⁸Yesu i ndeilɔ ti ma yɛ, “Ngi wilanga a ndela wu ma kɛ tamia a nge. Ina wu nya lɔ gɔkɔlima, a gbe jisia ma ti li.”

⁹(I ji leilɔ aako njɛpɛi na i wie i yɛ ndeni yɛ, “Nasia bi ti veni nya wɛ ngii yeengila bɛɛ loni hu.”)

¹⁰Kɔbowei i yɛlɔ Saimɔn Pita yeya. I ndalɛilɔ nga i Saa Gbuablɛisia ti gulɔmɔi luwɔi ŋɔna la, i ngi yejama wolii lewe na. Yeenduwɔi na laa wɔɔ a Malkɔs.

¹¹ Yesu ndeilɔ Pita ma yɛ, “Bi gɔ-bowɛi yama yeetei hu. Bi langɔe la kɛ ngɛɛ luma kpalɛi na aa la nya ma nya Kɛkɛ i hugbatɛnga nya va?”

¹²Kɛ Roma sojeisia kɛɛ ti mahumɔi kɛɛ Juuisia ti polisisia ti Yesu hounga ti ngi yili.

¹³Ti liilɔ a ngie Anas gama. Anas mblɛi mia wɔɔ a Kayafasi na Saagbuablɛisia ti gulɔmɔ wai yɛla foi na hu.

¹⁴ Kayafasi ji mia i yɛ nɛmahulewe veni Juuisia wɛ yɛ mahoungɔe numu yila i haa numui kpɛlɛɛ va.

¹⁵Saimɔn Pita kɛɛ kaalopo weka yila ti toilɔ Yesu wooma. Jifa kaalopo wekei ji tia Saagbuablɛisia ti gulɔmɔ wai ti gɔngɔ yɛla ma i wuailɔ Saagbuablɛisia ti gulɔmɔ wai gatei hu tia Yesu-ni.

¹⁶Pita ta i lo looni ngitii ya katei laa. Faale kaalopoi na tia Saagbuablɛisia ti gulɔmɔ wai ti gɔngɔ yɛla ma i gbuailɔ gbɔma i yɛpɛ nyapoi na gama i yɛ katei gbɔwu, i wuaa a Pita.

¹⁷Nyapoi na i yɛ katei gbɔwu i Pita mɔlilɔ yɛ, “Taamɔi ji gaalopoisia yeengila yaa a bia bɛɛ?” Pita kpɛmboilɔ yɛ, “Ngi gaalopo yaa a nge.”

¹⁸Jifa kɔlɛi i yɛ wa, Saagbuablɛisia ti gulɔmɔ wai bɔilopoisia tia polisisia ti kpunyɛ yɔmbui lailɔ, ti lo ti kaala ta gɛwo. Pita bɛɛ i liilɔ, i lo ti lia, a gɛwo.

¹⁹Kɛ Saagbuablɛisia ti gulɔmɔ wai i Yesu mɔlimɔlinga kɔlooni ngi gaalopoisia ma kɛɛ kaai na i yɛ nungaa gaa la.

²⁰Yesu i kpɛmboilɔ yɛ, “Watii gbi nga yɛpɛ wɔɔ nungaa gama fofo hu lɔ; watii gbi nga nungaa gaa wɔɔ komɛ wɛleisia bu lɔ kɛɛ Ngewɔ Wɛlei, mia nungaa gbi ta yandɔɔ na; wɔɔ gba ngii yaa njɛpɛ gbi leni ndɔwuma.

²¹Gbɛe bi nya mɔlima? Nasia ti nya woo mɛninga, ti mɔli gbɔɔ ngi ndeni ti ma; ti kɔɔlɔ gbɔɔ ngi ndeni.”

²²Kia Yesu i ji leni, kɛ polisi nasia ti yɛ looni ngi gbla yeengila i ngi baahu gbolɛnga yɛ, “Gbɛe ba yɛpɛ hii Saagbuablɛisia ti gulɔmɔ wai gama?”

²³Yesu i ndeilɔ ngi ma yɛ, “Ina ngi njia nyamu lɔ lenga, hugɛ lɛ a numui kpɛlɛɛ ti looni bei. Kɛɛ ina na ngi ndeni kama lɔnyangɔe gbɛe hɔɔ bi nya leweni?”

²⁴Kɛ Anas i Yesu venga ti li a ngie Saagbuablɛisia ti gulɔmɔ wai Kayafasi gama, ngi yilingɔ lɔɔ.

²⁵Pita i yɛ loonilɔ lɔɔ a gɛwo. Kɛ nungaa wekei nasia lɛɛnga ti yɛ looni na ti ngi mɔlinga tɛɛ, “Taamɔi ji gaalopoisia yeengila yaa a bie?” Pita i mawalilɔ yɛ, “Ngi gaalopo yaa a nge.”

²⁶Saagbuablɛisia ti gulɔmɔ wai bɔilopo yila, ngi lenyɔu a taamɔi na Pita i yɛ ngi wolii leweni na, i Pita mɔlilɔ yɛ, “Ngii bi lɔni wua Yesu-ni tuhani gbalei hu?”

²⁷Pita i gbɔma mawalilɔ; kɛ tɛhinɛi i gokolenga ngaama.

²⁸A ngenda tɛtei Juuisia ti mahublɛisia ti gbuɛilɔ a Yesu Kayafasi gatei hu ti li a ngie Gɔvinei gatei yeekootii hu. Tia vulii tii wuaani kɔtii goohu ajifa ti longɔ yɛla ti lo sɛwɛsɛwɛya hu Ngewɔ yaama aako ti gu a Tewema Gomɛi yeemɛhɛi mɛla.

²⁹Famia Paileti i liilɔ ti gama yɛ, “Gbɔɔ nyamu le taamɔi ji pienga?”

³⁰Ti kpɛmboilɔ tɛɛ, “Muii yɛ wa a ngie bi gama ina ii hinda nyamu wieni.”

³¹Paileti ndeilɔ ti ma yɛ, “A li hɔɔ a ngie wua yekpe wu ngi gbɛmbo kia wu nda jawei i na.” Juuisia ti poteilɔ tɛɛ, “Sawei ii lumani mu wɛ numu hɛlɛva.”

³²(Ji i wieilɔ aako njɛpɛi na i wie Yesu i yɛ ndeni kɛva hee yeelasii na i wama piema krɔsii ma.)

³³Paileti i yamɛilɔ gbɔma Kotii hu, i pie ti wa a Yesu, i ngi mɔli yɛ, “Bia lɔ Juuisia ti mahɛi a bie?”

³⁴Yesu i kpɛmboilɔ yɛ, “Na bi kɔɔnga kɔloongɔ nya ma ta lɔ i wanga a mɔli ji ɔɔ nungaa wekangaa lɔ ti ji leni bi ma nya va.”

³⁵Paileti i poteilɔ yɛ, “Juumɔ lɔ a nge? Bi gbɔugbɔu bondeisia tia Saagbuablaa Waawaisia mia ti bi venga nya wɛ; gbɔɔ bi pienga?”

³⁶Yesu i kpɛmboilɔ yɛ, “Nya mahayɛi dunyei ji hu mahaya ii le; kiaa dunyei ji hu mahaya mia a nya mahayɛi, nya bɔilopoisia ti yɛ lapilɔ aako taa nya ve Juuisia wɛ; kɛɛ nya mahayɛi ii gbɔkuni dunyei ji hu.”

³⁷Faale Paileti i ngi mɔlilɔ yɛ, “Kɛ maha lɔ hɔɔ a bie?” Yesu i kpɛmboilɔ yɛ, “Bia vulii lɔ bi ndenga bɛɛ maha lɔ a nge. Sabu yakpei ji va lɔ ngi wani dunyei hu, ti nya le aako ngi tɔnyɛi hugɛ. Numu gbi lekee i tɔnyɛi wooma a nya woo mɛnilɔ.”

³⁸Kɛ Paileti i ngi mɔlinga yɛ, “Gbɔɔ tɔnyɛi le?” Kia Paileti i mɔli ji wuaani, i gbuɛilɔ i li Juuisia gama gbɔma i nde ti ma yɛ, “Ngii sabu gbi lɔni taamɔi ji lɛɛva.

³⁹Kɛɛ kia kɛngɔ la wu jawei hu Kɛ kpeima gbi tewema gomɛi hitea ma, nga gbe lɔ gbama kpindi wɛlɛbu mɔ yila ma. Faale wu longɔ ngi gbe Juuisia ti mahɛi ma wu wɛ?”

⁴⁰Ti yele waa gulailɔ gbɔma tɛɛ, “Sawo! Taamɔi ji ii le; mu longɔ bi gbe Barabasi ma.” Kapumɔ waa lɔ wɔɔ a Barabasi ji.