Read Ngowili Yekpei Numu Kpɛlɛɛ Va JƆN 19 Bible Online

JƆN 19 - Ngowili Yekpei Numu Kpɛlɛɛ Va bible

JƆN 19

¹Kɛ Paileti i pienga sojeisia ti li a Yesu ti ngi vogba nyamungɔ waa.

²Yeesojeisia ti ngali lekee huvɛlɛilɔ a maha bɔlei, ti njei a ngi wui, ti bobani gbɔugbɔu wu ngi ma.

³Ti yɛlɔ a wombi gbakpa ngi gɔwɔbu tɛɛ, “Hooyoo, Juuisia ti Mahɛi!” ta ngi gbolɛ a loko.

⁴Paileti i gbɔma gbuɛilɔ i nde fahii ma yɛ, “A tɔ lɛɛ, nya wama a ngie mbei wu gama aako wu kɔɔ kɛ ngii nyamu gbi lɔni ngi hu.”

⁵Faale Yesu i gbuɛilɔ i wa ti gama ngali bɔlei i ngi wumba, bobani gbɔugbɔi i ngi ma. Kɛ Paileti i ndenga yɛ, “A taamɔi lɔ lɛɛ!”

⁶Kia Saagbuablaa Waawaisia kɛɛ ti polisisia ti Yesu lɔni, ti yelei gulɛilɔ tɛɛ, “Ngi gbakpa krɔsii ma! Ngi gbakpa krɔsii ma!” Paileti i ndeilɔ ti ma yɛ, “Wua yekpe a li a ngie wu ngi gbakpa krɔsii ma, ajifa ngii ngi nyamu gbi lɔni.”

⁷Juuisia ti poteilɔ tɛɛ, “Sawa lɔ mu yeya tawao yeesawei na yɛ mahoungɔ i haa ajifa i ta yekpe lolinga a Ngewɔ Hindoloi.”

⁸Kia Paileti i njɛpɛi ji mɛnini, i luwɛilɔ na hulewengɔ.

⁹I wuailɔ gbɔma Kotii hu i Yesu mɔli yɛ, “Bi gbuanga mindo lɔ?” Kɛɛ Yesu ii kpɛmboni.

¹⁰Faale Paileti ndeilɔ ngi ma yɛ, “Bɛɛ yepe nya gama? Bii kɔɔ kɛ kpaya lɔ nya wɛ gbeva bi ma ɔɔ bi gbakpava krɔsii ma?”

¹¹Yesu i poteilɔ i nde ngi ma yɛ, “Kpaya lɔ bi wɛ nya maahu ajifa lekee Ngewɔ lɔ i feni bi wɛ. Faale jumbui yeembawai i numui na lɔ ma i nya veni bi wɛ.”

¹²Kia Paileti i ji mɛnini, i lapilɔ pele gɔliva gbeva Yesu ma kɛɛ fahii ti yele waa gulɛilɔ tɛɛ, “Bi gbengaa taamɔi ji ma kɛ Roma Maha Wai ndiamɔ yaa a bie; numu gbi lekee a nde yɛ maha lɔ a ngie kɛ i gangangalɔ a Maha Wai.”

¹³Kia Paileti i njɛpɛi jisia mɛnini i gbuɛilɔ a Yesu ti gama, i hei kiti lewe heimi hindei na na gbomgbongɔ a gaŋa gɔtu lɛɛvɛisia, ta na loli a Gabata Hibu yiɛi hu.

¹⁴Fologundiei yɛla na tawao yeefoloi na lɔ Juuisia ta ti magbatɛ Tewema Gomɛi va sina. I ndeilɔ Juuisia ma yɛ, “Wu Mahɛi gbe!”

¹⁵Ti yelei gulɛilɔ tɛɛ, “Ngi waa, ngi waa, ngi gbakpa krɔsii ma!” Paileti i ti mɔlilɔ yɛ, “Wu longɔe ngi wu Mahɛi gbakpa krɔsii ma?” Saagbuablaa Waawaisia ti poteilɔ tɛɛ, “Maha weka ii mu yeya Roma Maha Wai wooma.”

¹⁶Kɛ i Yesu venga ti wɛ ngi gbakpava krɔsii ma. Sojeisia ti gbuɛilɔ a Yesu Paileti gatei hu,

¹⁷ti gbua a ngie tei hu, ngi gbakpa-wulii laani ta yekpe gbakima, ti li hindei na ta na loli Hibu yiɛi hu a Gɔlgɔta, yeembui mia a Ngugoko Yiyei.

¹⁸Namia ti Yesu gbakpani na krɔsii ma tia hindo fele wekangaa, yeengila i ngi yejahui, yeena i ngi gɔwɔhui, ta i ti luahu.

¹⁹Njiɛi na ti pɛlɛni ngi ma, ti ngi gbakpani fa krɔsii ma, Paileti i nyɛilɔ gbembele-gɛkɛlɛi ma yɛ, “Yesu Nasalɛtimɔi lɔ, Juuisia ti Mahɛi,” ti yeegbembele-gɛkɛlɛi gbakpa Yesu wukɔɔ krɔsii ma.

²⁰Numu gboto ti yeekɔlɔ nyɛingɔi ji gaailɔ, ajifa hindei na ti Yesu gbakpani na hugutungɔ yɛla a taa wai hu; tawao nyɛingɔ yɛla Hibuyiɛi hu kɛɛ Romayiɛi kɛɛ Glikiyiɛi.

²¹Kɛɛ Saagbuablaa Waawaisia ti ndeilɔ Paileti ma tɛɛ, “Baa nyɛi bɛɛ ‘Juuisia ti Mahɛi,’ nyɛi bɛɛ, ‘Taamɔi ji i ndeilɔ yɛ Juuisia ti Mahɛi mia a ngie.’ ”

²²Paileti i poteilɔ yɛ, “Na ngi nyɛinga, ngi nyɛinga.”

²³Kia sojeisia ti kpɔyɔni a Yesu gbakpala krɔsii ma, ti ngi maguleisia gɔlɛilɔ na naani soja naani ma. Kɛɛ ngi loma-bu-lomɛi vɛlɛngɔ yɛla a kula-hakpa yakpe lɔ, heiheingɔ ii yɛla nga.

²⁴Faale ti ndeilɔ ti nyɔunyɔ ma tɛɛ, “Maa ndomɛi ji blambla, a mu kpɔyei gɔ fa, numui na a paa i mbumbu.” Ji i wieilɔ aako na i wie nyɛingɔ Ngewɔ Gɔlɛi hu tɛɛ, “Ti nya maguleisia gɔlɛkɔlɛilɔ tia yekpe ma, ti kpɔyei gɔ nya loma-bu-lomɛi va.” Ji mia sojeisia ti pieni.

²⁵Nasia ti yɛ looni krɔsii gbla tia mia a Yesu ngi nje kɛɛ ngi nje ndewei Meri, Klopas nyahɛi kɛɛ Meri Magdalamɔi.

²⁶Kia Yesu i ngi nje lɔni kɛɛ kaalopoi na ngi longɔ yɛla la ti looni ngi gbla, i ndeilɔ ngi nje ma yɛ, “Yie, bi loi lɔ!”

²⁷Kɛ i ndenga kaalopoi ma yɛ, “Bi nje lɔ!” I hiye watii na ma kaalopoi na i liilɔ a Meri ngi nda wɛlei bu.

²⁸ Ji wooma, Yesu i kɔɔngɔ kɛ hindei gbi i gbɔyɔnga, tawao aako Ngewɔ Gɔlɛi la i hou, i ndeilɔ yɛ, “Nya bolohu bengɔi.”

²⁹Ndɔ baa yeingɔ gboto i yɛlɔ haaka hu na; numu yila i njavɔɛfɔɛ-hani lɔmbuilɔ yeendɔi hu, i nguaa ngulu guhɛi ya, i tɛ Yesu laagulisia gama.

³⁰Yesu i yeendɔi gboleilɔ, kɛ i ndenga yɛ, “I gbɔyɔnga!” Na wooma Yesu i ngi wui hitɛilɔ kɛ i haanga.

³¹Kɛ Juuisia ti mahublɛisia ti ndenga Paileti ma tɛɛ i luma ti numu gbakpangɔisia ti gɔwɔisia yaingai, i gbɔma luma ti gbua krɔsiisia ma. Ti ji huvɛliilɔ ajifa Ndɛvu Volei bobu yɛla tawao tii yɛ loni ti gbuhɛisia ti lo krɔsiisia ma Ndɛvu Volei i hiti ajifa yeendɛɛvu Volei ji ta folo waa yɛla.

³²Faale sojeisia ti wɛilɔ ti numu felei nasia ti gɔwɔisia yaingai ti tia Yesu-ni gbakpani.

³³Kɛɛ kia ti foni Yesu ma ti maleni i wilanga a haala, faale tii ngi gɔwɔisia yaingaini.

³⁴Na hu gbi sojeisia yilayee i Yesu gakamɛi gbuteilɔ a sɔlii, kɛ ŋamɛi tia njɛi ti gbuanga na.

³⁵Numui na i ji hulɔni i wieni ta mia i hugɛnga aako bia bɛɛ bi la la. Na i ndeni tɔnya le, tawao i kɔɔlɔ kɛ tɔnyɛi mia i ndema.

³⁶ Ji i wieilɔ aako Ngewɔ Gɔlɛi layie i lewema ji i ndeni yɛ, “Ngi gaalɛi yeengila bɛɛ ɛɛ yali.”

³⁷Ngewɔ Gɔlɛi yeehinda weka i ndeilɔ gbɔma yɛ, “Nungaa ta numui na gbelɔ ti ngi gbutani a sɔlii.”

³⁸Na wooma Josɛfi Arimatiamɔi, Yesu Woomamɔ a ngie kɛɛ hulɔwungɔ jifa a luwa Juuisia ma, i Yesu womɛi huvɛliilɔ, kɛ Paileti i lumanga. Faale i yamɛilɔ i li a Yesu womɛi kpɔwuva.

³⁹ Nikodimɔsi na wɔɔ i lini Yesu gama a kpindi, ta bɛɛ tia Josɛfi lɔ ti lini a halei na ta sia pomɛi ma ɛɛ luula, yeeminiyii gungɔ a pauŋ hɔndɔɔ yila, i ngi yeya.

⁴⁰Numu felei jisia ti Yesu womɛi wumbuilɔ, ti mbeembee kula gole nina hu, halei jiangɔ yeekulɛi na hu, kia Juuisia ti yɛ pomɛi magbatɛ la kpɔwuva.

⁴¹Hindei na ti Yesu gbakpani na, tuhani gbaala i yɛlɔ na, kamba nina i yeekpalɛi na hu, tii yaa wɔɔ gba numu gbi gbɔwuni hu.

⁴²Jifa folo wekei na a yɛ a Ndɛvu Volei lɔ tawao jifa gbɔma kambɛi magutungɔ yɛla, ti Yesu womɛi lɛilɔ na.