Read Ngowili Yekpei Numu Kpɛlɛɛ Va JƆN 2 Bible Online

JƆN 2 - Ngowili Yekpei Numu Kpɛlɛɛ Va bible

JƆN 2

¹Njii fele wooma, nyaha-gɔli-gomɛ yɛlɔ tei na hu ta toli a Kena, Galili lɔlei hu, tawao Yesu ngi nje i yɛ na lɔ.

²Ti Yesu bɛɛ loliilɔ yeekomɛi na hu tia ngi gaalopoisia.

³Kia ndɔi i gbɔyɔni, Yesu ngi nje i hugɛilɔ a ngie yɛ, “Ndɔ gbi ii yaa ti yeya.”

⁴Yesu i poteilɔ i nde ngi nje ma yɛ, “Yie, gbɛe bi mu loko wilima na hu? Nya watii ii yaa hitini lɛ yengeva.”

⁵Ngi nje ndeilɔ pɛlei na yeebɔilopoisia ma yɛ, “Na gbi lekee i ndengaa wu ma yɛ wu pie, wu pie.”

⁶Nja-vɛɛ waawaa wɛita yɛlɔ heini na Juuisia jɛli-yɛi houva hu, yeengila gbi a galɔŋ numu gbɔyɔngɔ ɔɔ numu gbɔyɔngɔ maahu puu hou.

⁷Yesu i ndeilɔ yeebɔilopoisia ma yɛ, “A fɛi jisia laave a njɛi.” Kɛ ti ti lavenga a lo te ti wu ma.

⁸Kɛ i ndenga yɛ, “A yee njɛi ji lɛɛnga wuli wu li la komɛ mahumɔi gama.” Kɛ ti ya la.

⁹Kia komɛi maahumɔi i njɛi gɔni, potengɔ yɛla na a ndɔi. Ii yɛ ngi gbuama gɔɔ kia bɛɛ bɔilopoi nasia ti njɛi wulini hu ti kɔɔngɔ. I nyaha gɔlimɔi loliilɔ

¹⁰i nde ngi ma yɛ, “Numu gbi a ndɔ yekpei yese pɛiŋ ve nungaa wɛ; ti kpolingaa na pandawanda, kɛ i yeengahangɔi venga; kɛɛ bia bi ndɔi yeekpekpei loomagbatɛnga haaŋ i tonga watii ji ma.”

¹¹Kabandei yeehaalaye lɔ Yesu pieni Kena, Galili lɔlei hu; i kɛilɔ kɛ ngɔlɔyɛi lɔ ngi hu, kɛ ngi gaalopoisia ti langa a ngie.

¹² Ji wooma Yesu tia ngi nje kɛɛ ngi ndewengeisia kɛɛ ngi gaalopoisia ti liilɔ Kapaniɔm, ti lɔwɔ lɛnga wie na.

¹³ Juuisia ti gomɛi na ta toli a Tewema Gomɛi lukpengɔ yɛla kpla kɛ Yesu i ya Jelusalɛm.

¹⁴I nungaa maleilɔ ta nikangɛisia majia kɛɛ mbalangɛisia kɛɛ powoisia Ngewɔ Wɛlei yeekatei hu, navoo maluveblɛisia bɛɛ ti heini ti tebiisia ma.

¹⁵Kɛ i gɔtei liimbanga a foma, i ti gbi gbɛ na tia mbalangɛisia kɛɛ nikangɛisia, i navoo maluveblɛisia ti tebiisia gulagula, yeenavoei kpɛlɛɛ i vaya.

¹⁶Kɛ i ndenga nasia ma ti yɛ powoisia majia yɛ, “A hanii jisia gbua mbei; a gbe a nya Kɛkɛ Wɛlei yɛlaa a felegɔma.”

¹⁷Na nyɛingɔ Ngewɔ Gɔlɛi hu tɛɛ, “Bi Wɛlei malii a nya mɔlɔ kia ngɔmbu” i hitɛilɔ ngi gaalopoisia wɛ.

¹⁸Juuisia ti ngi mɔlilɔ tɛɛ, “Kabande hindei yeegbɔɔ bi piema kɛva kɛ kpaya lɔ bi wɛ ji wieva?”

¹⁹ Yesu i kpɛmboilɔ yɛ, “A Ngewɔ Wɛlei ji wolo; nga tolɔ gbɔma njii sawa goohu.”

²⁰Kɛ Juuisia ti ndenga tɛɛ, “Ngewɔ Wɛlei ji lola i gunga a foo numu fele gbɔyɔngɔ maahu wɛita lɔ; bia ba tolɔ njii sawa goohu?”

²¹Kɛɛ Ngewɔ Wɛlei na Yesu i yɛ ma tamia a ngi gbuhɛi.

²²Faale ngi hiyengɔi hu hee hu, i hitɛilɔ ngi gaalopoisia wɛ kɛ i ji leilɔ; kɛ ti langa a Ngewɔ Gɔlɛi kɛɛ njɛpɛi nasia i yɛ ndeni.

²³Kia lɛ Yesu i yɛ Jelusalɛm a Tewema Gomɛi yeewatii, numu gboto ti lɛilɔ a ngie ji ti kabande hindei nasia lɔni i yɛ pie;

²⁴kɛɛ Yesu ii ta yekpe gbuani ndɔgbɔ ti wɛ, ajifa i yɛ nuuvu gbi gɔɔlɔ,

²⁵tawao ii yɛ gbeweni numu gbi va seli wuava nuuvui va ajifa i kɔɔlɔ gbɔɔ i ti liisia hu.