Read Ngowili Yekpei Numu Kpɛlɛɛ Va JƆN 20 Bible Online

JƆN 20 - Ngowili Yekpei Numu Kpɛlɛɛ Va bible

JƆN 20

¹Sɔndei ma a ngenda tɛtei, pɛiŋ hu i yaa wo, Meri Magdalamɔi i liilɔ kambɛi gama tawao i maleni kɔtii gbuangɔ kambɛi laa.

²Kɛ i ya a piimɛ Saimɔn Pita gama kɛɛ Yesu gaalopo wekei na ngi longɔ yɛla la, i nde ti ma yɛ, “Ti Ndemɔi gbuanga kambɛi hu, tawao muii mia gɔɔ ti ngi langa na.”

³Kɛ Pita tia kaalopo wekei ti ya kambɛi gama.

⁴Ti veenjɔɔ ti yɛlɔ a wiimɛ kɛɛ kaalopo wekei na i leweilɔ Pita ma, ta yese i foo kambɛi gama.

⁵I mawɛɛlɔ, i hugbee, i kula golei lɔ i laani na kɛɛ ii wuaani kambɛi goohu.

⁶Na wooma Saimɔn Pita bɛɛ i foeilɔ, i wuaa kambɛi goohu, i kula golei lɔ laani na,

⁷kɛɛ yeena ti ngilini Yesu wui ma kotongɔ i laani gba.

⁸Kɛ kaalopo wekei na ta yese i foni kambɛi gama i wuaanga kohu ta bɛɛ, i tɔ, kɛ i langa la; (

⁹ajifa kiahuna tii yɛ Ngewɔ Gɔlɛi na gɔɔ i ndeni yɛ a hiyelɔ huɛɛŋ hee hu.)

¹⁰Kɛ kaalopoisia ti yamanga ti yeekuwuhuisia.

¹¹Meri yɛlɔ looni kambɛi gbla a wɔɔ. I loni wɔɔmaa, i mawɛlɛ, i kambɛi hugbee;

¹²kɛ i malika fele lɔnga, kula golei i ti ma, ti heini mia Yesu womɛi i yɛ laani na, yeengila i wukɔɛi, yeena i kɔɔyahui.

¹³Ti ngi mɔlilɔ tɛɛ, “Nyapoi, gbɛe bi wɔɔma?” Kɛ i ndenga ti ma yɛ, “Ajifa ti nya Lemɔi womɛi wumbunga, tawao ngii mia gɔɔ ti ngi langa na.”

¹⁴Kia i ji leni, i woteilɔ kɛ i Yesu lɔnga i looni kɛɛ ii kɔɔni kɛ Yesu mia.

¹⁵Yesu i ngi mɔlilɔ yɛ, “Nyapoi, gbɛe bi wɔɔma? Ye lɔ bi ngi gɔkɔlima?” Meri ta i yɛ tɔ yɛ katei na yeengengemɔi mia, famia i ndeilɔ ngi ma yɛ, “Kɛkɛ, ina bia lɔ bi ya a ngie, hugɛ a nge mia bi ngi langa na aako ngi li ngi gi wumbu.”

¹⁶Yesu i ngi lɛi loliilɔ yɛ, “Meri.” I woteilɔ i nde Yesu ma Hibuyiɛi hu yɛ, “Raboni!” (yeembui lɔ a nya Kaamɔ.)

¹⁷Yesu ndeilɔ yɛ, “Baa vɛmbɛ a nge, ajifa ngii yaa lɛni lɛ nya Kɛkɛ gama; kɛɛ li nya ndewengeisia gama bi nde ti ma bɛɛ nyaa lɛma nya Kɛkɛ gama, wua bɛɛ wu Kɛkɛ, nya Yewɔɛi, wua bɛɛ wu Yewɔɛi.”

¹⁸Meri Magdalamɔi i liilɔ i nde kaalopoisia ma yɛ, “Ngi Ndemɔi lɔnga;” kɛ i na gbi hugɛnga Yesu i ndeni ngi ma.

¹⁹Sɔnde yakpei na yeekpɔkɔi, Yesu gaalopoisia ti pɛlei na gbi gbɔwuilɔ ti yɛ mbu ajifa ta luwa Juuisia ti mahublɛisia ma. Yesu i weilɔ, i lo ti lia, i nde ti ma yɛ, “Ndiilɛli i yɛ wu ma.”

²⁰Kia i ji leni, i ngi lokoisia gɛilɔ a tie kɛɛ ngi gakamɛi. Kɛ kaalopoisia ti goohu i nɛnga ji ti Ndemɔi lɔni.

²¹Yesu i ndeilɔ gbɔma ti ma yɛ, “Ndiilɛli i yɛ wu ma. Kia Kɛkɛi i nya loni, hii ngi wua bɛɛ loma.”

²²Kia i ji leni, i fɛfɛi wuilɔ ti ma yɛ, “A Ngewɔ Yafei majɔɔ.

²³ Wu manungaa numu gbi jumbuisia ma, Ngewɔ a maanulɔ ti ma; wu numu gbi jumbuisia longaa ngi ma, ta lolɔ ngi ma fɔ.”

²⁴Yesu gaalopo puu maahu yileisia yilayee ta toli a Tɔmɔsi, na Flɛi yɛla, ii yɛ na Yesu i wani.

²⁵Famia kaalopo wekeisia ti hugɛilɔ a ngie tɛɛ, “Mu Ndemɔi lɔnga.” Kɛɛ i ndeilɔ ti ma yɛ, “Kɛlee ngi lɔndimɛi yeepoi lɔ ngi lokoisia ma, ngi nya lokoyiwoi wuaa yeendoweisia hu kɛɛ ndowei yeena i ngi gakabui, ngɛɛ la la fɔ.”

²⁶Njii wayakpa wooma Yesu gaalopoisia ti yɛlɔ gbɔma yeepɛlei na bu tia Tɔmɔsi-ni. Pɛlei gbi gbɔwungɔ yɛla, Kɛɛ Yesu i wɛilɔ i lo ti lia, i nde ti ma yɛ, “Ndiilɛli i yɛ wu ma.”

²⁷Kɛ i ndenga Tɔmɔsi ma yɛ, “Bi lokoyiwoi wuaa mbei bi nya lokoisia lɔ, bi bi lokoyiwoi wuaa nya gakabui yeendowei bɛɛ hu. Gbua na kitii hu bi la a nge.”

²⁸Tɔmɔsi i ndeilɔ Yesu ma yɛ, “Nya Lemɔi lɔ a bie kɛɛ nya Yewɔɛi!”

²⁹Yesu ndeilɔ ngi ma yɛ, “Bi langa na la jifa bi nya lɔnga? Kohunɛ lɔ nungei nasia ma ti langa a nge kia bɛɛ ti yaa nya lɔni.”

³⁰Yesu i kabande hinda weka gboto wielɔ ngi gaalopoisia yaama, nyɛingɔ ii le bukui ji hu;

³¹kɛɛ jisia ti nyɛingɔe aako wu la la kɛ Yesu lɔ Ngewɔ Maha Heingɔi le, Ngewɔ Hindoloi, tawao wu langaa a ngie, wa kunafɔ lɛɛvui majɔɔ lɔ.