Read Ngowili Yekpei Numu Kpɛlɛɛ Va JƆN 21 Bible Online

JƆN 21 - Ngowili Yekpei Numu Kpɛlɛɛ Va bible

JƆN 21

¹Ji wooma Yesu i gɛilɔ a ngi gaalopoisia Taibirias Wopɛi laa tawao hii i wieni.

²Saimɔn Pita kɛɛ Tɔmɔsi na ti yɛ toli a Flɛi kɛɛ Nataniɛl na i gbuani Kena, Galili lɔlei hu kɛ Kenɛi Sɛbidi hingaleengaa feleisia kɛɛ ngi gaalopo weka fele ti yɛ hinda yila lɔ.

³ Saimɔn Pita i ndeilɔ yeenasia ma yɛ, “Nyaa lima nyɛɛ gbɛmɛi.” Kɛ ti ndenga ngi ma tɛɛ, “Mua wueni lɔ mu lima.” Kɛ ti wilinga ndɛndɛi hu ti li njɛi ya, kɛɛ kpindi na pii tii hani gbi houni.

⁴Kia ngele i yɛ woma, Yesu i yɛ looni njɛi laa lɔ kɛɛ ngi gaalopoisia tii yɛ kɔɔ kɛ tamia.

⁵Yesu i ti mɔlilɔ yɛ, “Ndeengɛisia, wu nyɛɛ gbi houilɔɔ?” Ti kpɛmboilɔ tɛɛ, “Sawo, muii yaa nyɛɛ yakpe bɛɛ houni.”

⁶ Kɛ i ndenga ti ma yɛ, “A mbomɛi wili a ndɛndɛi yeengejahui wee, wa nyɛi houlɔ.” Ti mbomɛi wililɔ kɛɛ ti gbahailɔ mbu tɛva ndɛndɛi hu ajifa ndavengɔ yɛla a nyɛngɛisia.

⁷Kaalopoi na Yesu longɔ yɛla la i ndeilɔ Pita ma yɛ, “Ndemɔi mia!” Kia Saimɔn Pita i mɛnini kɛ Ndemɔi mia, i ngi guleisia yiliilɔ ajifa ngi magbukangɔ yɛla ngengei va, i wili Popɛi hu.

⁸Kaalopo wekeisia tia ti wani ndɛndɛi hu lɔ, ta wa a mbomɛi laala, ndavengɔ a nyɛi, ajifa ti maa ii yɛ guhani a ngiyei ma, bi tɔa bɛɛ hou hɔndɔɔ yila.

⁹Kia ti gbuani ndɛndɛi hu ti hitɛ ngiyei ma, ti ngɔmbui lɔilɔ ndangɔ, nyɛi kɛɛ bledii ti laani yeetekei ya.

¹⁰Kɛ Yesu i ndenga ti ma yɛ, “A wa a nyɛi na lɛɛnga wu hounga.”

¹¹Kɛ Saimɔn Pita i yamanga ndɛndɛi hu, i mbomɛi laala, i tɛ ngiyei ma, ndavengɔ a nyɛɛ waawaa lekee kungɔ a hɔndɔ yila kaalɛ numu fele gbɔyɔngɔ maahu puu maahu sawa, tawao kia bɛɛ nyɛi gbotongɔ yɛla hii mbomɛi ii blani.

¹²Yesu i ndeilɔ ti ma yɛ, “A wa mu mɛhɛɛi mɛ.” Kaalopoisia yeengila bɛɛ ii liiloni aa ngi mɔli aa yɛma, “Ye lɔ a bie?” Ti yɛ kɔɔlɔ kɛ Ndemɔi mia.

¹³Yesu i liilɔ, i bledii wumbu, i fe ti wɛ; hii i pieni a nyɛi bɛɛ.

¹⁴Heima yeesawa lɔ na Yesu i gɛni a ngi gaalopoisia ji i hiyeni hee hu.

¹⁵Kia ti kpɔyɔni a mɛhɛɛ mɛla, Yesu i Saimɔn Pita mɔlilɔ yɛ, “Saimɔn, Jɔn loi, bi longɔe a nge i lewe jisia ti loyii ma a nge?” I kpɛmboilɔ yɛ, “Mmm, Ndemɔi, bi kɔɔlɔ kɛ nya longɔe a bie.” Yesu ndeilɔ ngi ma yɛ, “Nya woomableisia makɛ kia mbala leengaa.”

¹⁶I ngi mɔlilɔ gbɔma yɛ, “Saimɔn, Jɔn loi, bi longɔe a nge?” Pita i kpɛmboilɔ yɛ, “Mmm, Ndemɔi, bi kɔɔlɔ kɛ nya longɔe a bie.” Kɛ Yesu ndenga ngi ma yɛ, “Nya woomableisia mahugbe kia mbalangaa.”

¹⁷Yesu i Pita mɔlilɔ heima yeesawei yɛ, “Saimɔn, Jɔn loi, bi longɔe a nge?” Pita lii i nyanilɔ jifa Yesu i ngi mɔlini heima sawa yɛ, “Bi longɔe a nge?” Kɛ i kpɛmbonga yɛ, “Ndemɔi, bi hindei gbi hugɔɔlɔ; bi kɔɔlɔ kɛ nya longɔe a bie.” Yesu ndeilɔ ngi ma yɛ, “Nya woomableisia makɛ kia mbalangaa.

¹⁸Gbɛɛ ngi tɔnyɛi hugɛ a bie, kpemɛi na bi voningengɔ yɛla, bi yɛ bi mayililɔ ba li mia gbi lekee a nɛɛ bi wɛ; kɛɛ ji ba wova, ba bi lokoisia lambolɔ, tawao numu weka lɔ a bi maayili i li a bie mia bii loni bi li na.”

¹⁹(I ji leilɔ aako i hee yeelasii na gɛ Pita a pie kulɔma wava a ngɔlɔya Ngewɔ ma.) Kɛ Yesu i ndenga ngi ma yɛ, “To nya wooma.”

²⁰Pita i ngi wooma gbeilɔ kɛ i kaalopo wekei na lɔnga Yesu longɔ yɛla la, a to ti ma — na i yɛ ligbini Yesu gakahu kɛlɛma gbɔkɔ mɛhɛɛ tebii ma, i Yesu mɔlini yɛ, “Ndemɔi, ye lɔ i bi vema?”

²¹Kia Pita i ngi lɔni, i Yesu mɔlilɔ yɛ, “Ndemɔi, taamɔi ji hinda i yee na?”

²²Yesu i kpɛmboilɔ yɛ, “Ina i nɛɛlɔ nya wɛ ngɛɛ i lo na haaŋ ngi wa, bi nda i na ma a gbɔɔ? Bia to nya wooma!”

²³Faale njɛpɛi ji i vayɛilɔ Yesu gaalopoisia gbi maahu tɛɛ kaalopoi ji ɛɛ haa; kɛɛ ii ndeni ngi ma aa yɛma ɛɛ haa; i ndeilɔ yɛ, “Ina i nɛɛlɔ nya wɛ ngɛɛ i lo na haaŋ ngi wa, bi nda na ma a gbɔɔ?”

²⁴Yeekaalopoi ji mia i hindei jisia jelima, tawao tamia gbɔma i yeehindei jisia nyɛinga; tawao mu kɔɔlɔ kɛ ngi jeli wuaangɔi tɔnya le.

²⁵Kɛɛ hinda weka gboto lɔ na Yesu pieni; kiaa ti ti kpɛlɛɛ nyɛilɔ a ngilangila, nya langɔ la kɛ yeebukuisia taa mɔnulɔ dunyei vulii bɛɛ ma.