Read Ngowili Yekpei Numu Kpɛlɛɛ Va JƆN 3 Bible Online

JƆN 3 - Ngowili Yekpei Numu Kpɛlɛɛ Va bible

JƆN 3

¹Farisiisia ti mahumɔ yila yɛlɔ na, ngi laa a Nikodimɔsi, Farisiimɔ a ngie.

²Kenɛi ji i wɛilɔ Yesu gama a kpindi i nde ngi ma yɛ, “Kaamɔ, mu kɔɔlɔ kɛ Kaamɔ lɔ a bie ba gbua Ngewɔ gama; ajifa numu gbi ɛɛ gu aa kabande hindei jisia wie bi piema ina Ngewɔ i yɛ ngi wooma.”

³Yesu ndeilɔ ngi ma yɛ, “Gbɛɛ ngi tɔnyɛi hugɛ a bie, kɛlee ti numu le a nina, ɛɛ gu a wuaala Ngewɔ mahayɛi hu.”

⁴Nikodimɔsi i ngi mɔlilɔ yɛ, “Ta yee gu ti numu wovangɔ le gbɔma? A yamalɔ gbɔma ngi nje goohu i ngi le?”

⁵Yesu kpɛmboilɔ yɛ, “Gbɛɛ ngi tɔnyɛi hugɛ a bie, numu gbi ɛɛ gu aa wuaa Ngewɔ mahayɛi hu kɛlee ta ngi le a njɛi kɛɛ Ngewɔ Yafei.

⁶Numui na nuuvu a ngi le, nuuvu mia kɛɛ numui na Ngewɔ Yafei a ngi le ngafa le.

⁷Bi wuhu aa wu ji ngi ndeni bi ma ngɛɛ, ‘ta wu le lɔ a nina.’

⁸Fɛfɛi a vɛlɔ a li mia ngi longɔ i li na; ba ngi vɛwoi mɛnilɔ kɛɛ bii ngi hiyemɛi gɔɔ ɔɔ ngi limɛi; hii numui na gbi Ngewɔ Yafei a ngi le i na.”

⁹Nikodimɔsi i ngi mɔlilɔ yɛ, “Ji a yee gu i wie?”

¹⁰Yesu i kpɛmboilɔ yɛ, “Isrɛl yeekaamɔ waa lɔ a bie, na hu gbi bii ji yeembui gɔɔ?

¹¹Gbɛɛ ngi tɔnyɛi hugɛ a bie, na mu kɔɔngɔ ta mia ma yɛpɛ kɔlooni ma, mu na gona mu hulɔnga, kɛɛ wuɛɛ mu layie gulu.

¹²Ina ngi dunyama hindangaa hugɛnga a wue kɛɛ wuii lani la, wa yee gu wu la la ina ngi ngelegoohu hindangaa hugɛilɔ a wue?

¹³Numu gbi ii yaa wɔɔ gba lɛni ngelegoohu kɛlee numui na i gbuani ngele goohu i yei, tamia a Nuuvu Hindoloi.”

¹⁴ Tawao kia Mojisi i kalii hɛlɛni ngulii ma ndɔgbɔ lambɛi ma, hii lɔɔ ta Nuuvu Hindoloi hɛlɛ,

¹⁵aako numu gbi lekee a la a ngie i kunafɔ lɛɛvui majɔɔ.

¹⁶Ajifa Ngewɔ i loilɔ a dunyablaa hulewengɔ, famia i ngi Hindolo yakpei veni aako numu gbi lekee a la a yee-Ndoi na aa jukulu, i kunafɔ lɛɛvui majɔɔ.

¹⁷Ajifa Ngewɔ ii ngi Hindoloi yoyoni dunyei hu dunyablaa lɛɛva kɛɛ aako ngi sabui hu ti bawo kunafɔ hee yeya.

¹⁸Numu gbi lekee a liilo ngi ma ɛɛ ndɛɛ majɔɔ kɛɛ numu gbi lekee ɛɛ liilo ngi ma, i wilanga a ndɛɛ majɔɔla ajifa ii liiloni Ngewɔ Hindoloo yakpei ma.

¹⁹Hii Ngewɔ a dunyablaa gbɛmbo, a ji i ngi hindei yeetɔnyɛi yeefofoi yoyonga dunyei hu kɛɛ nuuvungaa tii loni a fofoi kɛlee kpindi ajifa ti wiehindeisia ti nyamungɔ.

²⁰Numu gbi lekee a hinda nyamuisia wie, ngi lolongɔe a fofoi tawao ɛɛ lukpe kpla, ajifa ii loni ngi wiehindeisia ti maa i gɛ.

²¹Kɛɛ numu gbi lekee a hinda yekpe wie, a walɔ fofoi gama aako ngi wiehindeisia ti kɛ kɛ ngi golongɔe Ngewɔ wɛ.

²²Ji wooma, Yesu tia ngi gaalopoisia ti liilɔ Judia yeetatei hu ti lɔwɔ lɛɛnga wie na, a nungaa wua.

²³Jɔn bɛɛ i yɛlɔ a nungaa wua Iinɔn, Salim gblanga, ajifa njɛi gbotongɔ yɛla yeehindei na, tawao nungaa ti yɛlɔ a wa ngi gama a ti wua.

²⁴ (Yeewatii na tii yɛ lɛ Jɔn wuni kpindi-wɛlei bu.)

²⁵Jɔn gaalopoisia kɛɛ Juumɔ yila ti ndablaa wieilɔ kɔlooni nguɛi ma.

²⁶Faale ti wɛilɔ Jɔn gama ti nde ngi ma tɛɛ, “Kaamɔ, numui na gɛ wua ta wu yɛ Jɔdan wooma, na bi ngi yɛpɛ leni, taa na nungaa wuama tawao numui gbi lɔ yeima ngi ma.”

²⁷Jɔn i poteilɔ i nde ti ma yɛ, “Numu gbi ɛɛ hani gbi majɔɔ iiyɛ Ngewɔ i fe ngi wɛ.

²⁸ Wua vulii wa nya jelilɔ kɛ ngi ndeilɔ ngɛɛ nya ii le nga yɛ a Ngewɔ Maha Heingɔi, tawao ngɛɛ ngi gulɔyia lemɔ lɔ a nge.

²⁹Numui na a nyahɛi majɔɔ ta lɔ nyahamɔi le; kɛɛ nyahamɔi ndiamɔi na a yɛ looni a wolo, ngi goohu a nɛɛlɔ waa ji a nyahamɔi yɛpɛ woi mɛni. Faale nya nda goohunɛɛi ji laa i venga na kpaŋ.

³⁰Ngi hinda i wɔlɔmaa, nya nya hinda maa i yei.”

³¹Numui na a gbua aijɛnɛ i wa, i leweni numui gbi ma. Numui na ti ngi leni dunyei ji hu dunyamamɔ mia a ngie tawao a dunyama hindei yeenjɛpɛ lɔ le; kɛɛ numui na a gbua aijɛnɛ i wa, i leweni numu gbi ma.

³²Hindei nasia a hulɔ tawao a mɛni aijɛnɛ, tamia a hugɛ kɛɛ numu gbi ɛɛ la a ngi layie.

³³Kɛɛ numui na a la a ngi layie, i kɛnga kɛ Ngewɔ lɔnyangɔe.

³⁴Numui na Ngewɔ i ngi loonga a Ngewɔ layie lɔ le, Ngewɔ i ngi lavenga kpaŋ a ngi Yafei.

³⁵ Kɛkɛi Ngewɔ longɔe a ngi Hindoloi tawao i hindei gbi loko wuaanga ngi yeya.

³⁶Numui na a la a Hindoloi a kunafɔ lɛɛvui majɔɔlɔ; numui na ɛɛ golo Hindoloi wɛ, ɛɛ kunafɔ lɛɛvui majɔɔ tawao Ngewɔ a kpalɛ waa yeilɔ ngi ma.