Read Ngowili Yekpei Numu Kpɛlɛɛ Va JƆN 5 Bible Online

JƆN 5 - Ngowili Yekpei Numu Kpɛlɛɛ Va bible

JƆN 5

¹Ji wooma, Juuisia ti Yewɔ hindei yeekomɛ i yɛlɔ na kɛ Yesu i ya Jelusalɛm.

²Jelusalɛm yeekata-lamɛi na ta toli a Mbala Gata-Laamɛi, Popa gbatengɔ yɛlɔ na gblanga ta toli Hibu yiɛi hu a Bɛtsata, sɛmɛɛ laalongɔ lɔɔlu i looni ma.

³Heegbɛblaa vaha waa ti yɛlɔ wuni yeesɛmɛi jisia bu-pumublaa, nɛmublaa kɛɛ kpɔɔkpɔblaa ti ti lia. [Ta njɛi jɛɛjialɛi mawulo.

⁴Ajifa Ndemɔi malikei i yɛlɔ na a njɛi jɛɛjia; tawao njɛi jɛɛjia ngɔi hu numui na lekee wɔɔta yese a wili hu, heegbɛ lasi gbi i yɛ ngi ma a bawolɔ.]

⁵Taamɔ yila yɛlɔ na, ngi heegbɛngɔ foo numu gbɔyɔngɔ maahu puu maahu wayakpa va.

⁶Kia Yesu ngi lɔni, i kɔɛilɔ kɛ i lɛmbinga waa laani yeehindei na, kɛ i ndenga ngi ma yɛ, “Bi longɔe bi bawo?”

⁷Heegbɛmɔi i kpɛmboilɔ yɛ, “Kaamɔ, numu gbi ii nya yeya aa nya wili njɛi hu ji a jɛɛjia; nga lo limaa kɛ numu wekei i wilinga hu nya gulɔ.”

⁸Yesu i ndeilɔ ngi ma yɛ, “Hiye, bi bi yalɛi wumbu, bi jia.”

⁹Ngaamɛi na, taamɔi i bawoilɔ, i ngi yalɛi wumbu, i tɔtoo a jialaa. Foloi na ji i wieni i yɛni a Juuisia ti lɛɛvu volei lɔ,

¹⁰ faale Juuisia yeetokulɔisia ti ndeilɔ taamɔi na ma i bawoni tɛɛ, “Mu lɛɛvu volo lɔ tawao mu jawei mia bi nyaninga ji bi bi yalɛi wumbunga bi jiama la.”

¹¹Taamɔi i kpɛɛmboilɔ yɛ, “Numui na i nya bawoni tamia i ndeni nya ma yɛ ngi nya yalɛi wumbu ngi jia.”

¹²Ti ngi mɔlilɔ tɛɛ, “Ye lɔ a numui na i ndeni yɛ bi ji wie?”

¹³Kɛɛ taamɔi na i bawoni ii yɛ Yesu gɔɔ ajifa faha lɔ i yɛ yeehindei na, tawao Yesu lingɔ yɛla.

¹⁴Na wooma Yesu i ngi maleilɔ Ngewɔ Wɛlei bu i nde ngi ma yɛ, “Wote mbei, bi bawonga na; gbe jumbu wielei ma, ina na ii le, hinda a bi wielɔ nyamungɔ tewengɔ ji ma.”

¹⁵Kɛ taamɔi i ya i hugɛ a Juuisia yeetokulɔisia yɛ Yesu mia i ngi bawoni.

¹⁶Faale ti tɔtoilɔ a Yesu yakpɛlaa a nyamu jifa i yɛlɔ a nungaa bawo Ndɛvu Volei ma.

¹⁷Kɛɛ Yesu i kpɛmboilɔ ti ma yɛ, “Nya Kɛkɛ lɔ yengema watii gbi faale mahoungɔ nya bɛɛ ngi yenge.”

¹⁸Kpɛmboi ji va vulii lɔ na Juuisia yeetokulɔisia ti yɛ pele gɔli kpɔtu ngi waava jifa ii gɛlɛni lekee Ndɛvu Volei yeesawei nyanila ma, i Ngewɔ lolinga a ngi Kɛkɛ, a ta yekpe huma Ngewɔ ma.

¹⁹Yesu ndeilɔ ti ma yɛ, “Gbɛɛ ngi tɔnyɛi hugɛ a wue, nya, Hindoloi a nge, ɛɛ gu a hinda gbi wiela a ngi wuma wee kɛ na lekee a tɔ Kɛkɛi a pie; ajifa na lekee a pie, nyɔkɔ lɔ Hindoloi bɛɛ a pie.

²⁰Gbamaile Kɛkɛi longɔe a ngi Hindoloi faale na gbi lekee ta vulii a pie a kɛlɔ a ngie tawao a hinda waawangaa gɛlɔ a ngie tewengɔ ji ma, i wu gbi wuhu wu.

²¹Kia lɔɔ nya Kɛkɛ a nungaa wu hee hu i ndɛvui ve ti wɛ, hii lɔɔ nya nya Hindoloi a ndɛɛvui ve nasia wɛ a nɛɛ ngi wɛ feva ti wɛ.

²²Nya Kɛkɛ ɛɛ numu gbi gbɛmbo; i nungaa gbɛmbolei yeekpayɛi venga ngi Hindoloi wɛ.

²³Nya Kɛkɛ i ji wienga aako numui gbi ti baagɔɔ Hindoloi ma kia lɔɔ ti baa gɔngɔ la ngi ma. Numui na ii baagɔɔ Hindoloi ma, ii baagɔɔ Kɛkɛi na ma i ngi loni.

²⁴“Gbɛɛ ngi tɔnyɛi hugɛ a wue, numui na a nya layie mɛni, i la a nya lomɔi, kunafɔ lɛɛvui lɔ ngi hu kpɛmbo gbi ii ngi ma jifa i wilanga gbuala hee hu i wilinga ndɛvui hu.

²⁵Gbɛɛ ngi tɔnyɛi hugɛ a wue; watii lɔ hitima, tawao yeewatii hitingɔe na bɛɛ, haableisia ta Ngewɔ Hindoloi woi mɛnilɔ tawao nasia ta mɛni ta wulɔ.

²⁶Gbamaile kia ndɛvui i Kɛkɛi vulii hu, hii i pienga ndɛvui i ngi Hindoloi bɛɛ hu,

²⁷tawao i kpaya venga ngi wɛ numui gbi gbɛmbova, ajifa Nuuvu Hindoloi lɔ a ngie.

²⁸Ji aa wu wuhu wu, ajifa watiilɔ hitima nasia gbi ti kambɛi hu ti ngi woi mɛni,

²⁹ti gbua ti gambɛisia hu; nasia ti kpekpe wienga ta hiye lɔ, nasia ti nyamu wienga, ta hiyelɔ ti ti gbɛmbo ti ti lɛɛ.

³⁰“Ngɛɛ gu a hinda gbi wiela a nya nda gbaya; nga nungaa gbɛmbolɔ lekee kia Ngewɔ a nde la nya ma, faale nya kiti lewengɔi wɔnangɔe, ajifa ngii lapima na wieva nya longɔ la, kɛ na lekee nya lomɔi longɔ la.

³¹“Ngi seli wuaangaa nya yekpe va, nungaa tɛɛ la a nya jeli wuaangɔi lɔnyala;

³²numu weka lɔ na a seli wuaa nya va, tawao ngi kɔɔlɔ kɛ seli na a nguaa nya va tɔnyangɔe.

³³ Wu nungaa loilɔ Jɔn gama tawao i tɔnyɛi hugɛilɔ kɔlooni nya ma.

³⁴Tii yɛma nya gbewengɔe huɛɛŋ nuuvu jeli wuaangɔ va; kɛɛ ngi ji lemaa aako wu bawo.

³⁵Na Jɔn i ndeni piengɔ kia lambo, i pieilɔ wu goohu i nɛɛ tawao wu lumɛilɔ ngi layieisia, ti wiengɔ kia foofo, ti wu goohu nɛɛ watii wulo va.

³⁶Kɛɛ seli wuaangɔ lɔ na nya va tewengɔ Jɔn jeli wuaangɔi ma; tia mia a kabande yengei nasia ngi piema ajifa tia lɔ ti selima kɛ nya Kɛkɛ lɔ i nya loni.

³⁷ Tawao nya Kɛkɛ na i nya loni, ta vuli lɔ i seli wuaanga nya va. Wuii yaa wɔɔ gba ngi woi mɛnini, wuii yaa wɔɔ gba ngi yɛyii lɔni;

³⁸tawao wɛɛ ngi layieisia lamagbatɛ wu liisia hu, ajifa nya i nya loni wuii lani a numui na i toni.

³⁹Wa Ngewɔ Gɔlɛi gaalɔ, ajifa wu langɔ la kɛ wa kunafɔ lɛɛvui majɔɔ ti hu lɔ; tawao ta vulii lɔ a nya hinda yeetɔnyɛi hugɛ;

⁴⁰na hu gbi wu gangangɔe a wala nya gama aako wu ndɛvui majɔɔ.

⁴¹“Ngii gbeweni nuuvu lato va.

⁴²Ngi kɔɔlɔ kɛ ndoma gbi ii wu lii hu Ngewɔ va.

⁴³Ngi wanga nya Kɛkɛ gbayei hu lɔ kɛɛ wuii yaa loko heini nya bu; kɛɛ numu weka i wangaa ta yekpe ngi gbayei hu, ta lɔ wa loko hei ngi bu.

⁴⁴Wua wa tato gɔli wu nyɔunyɔ ma, wɛɛ tatoi na gɔli a gbua Ngewɔ yakpei gama, wa yee gu wu la a nge?

⁴⁵Na hu gbi, waa gili la kɛ nya mia ngi wama wu mayia gɛma a nya Kɛkɛ Mojisi na wu lii longɔ ngi ma, ta vulii mia a wu mayia gɛ.

⁴⁶Kiaa wu yɛ lɛilɔ vulii a Mojisi a tɔnya, wu yɛ lalɔ a nge ajifa i kɔlɔ nyɛilɔ kɔloongɔ nya ma.

⁴⁷Kɛɛ kia lekee wuii lani a ngi gɔlɔ nyɛingɔi, wa yee gu wu la a nya layieisia?”