Read Ngowili Yekpei Numu Kpɛlɛɛ Va JƆN 6 Bible Online

JƆN 6 - Ngowili Yekpei Numu Kpɛlɛɛ Va bible

JƆN 6

¹Ji wooma Yesu tia ngi gaalopoisia ti liilɔ Galili Wopɛi wooma (ta toli gbɔma a Taibirias Wopɛi).

²Ke faha waa i tonga ngi ma ajifa ti kabande welei lɔilɔ i yɛ heegbɛbleisia bawo la.

³Yesu i lɛilɔ ngiye yila hu i hei na tia ngi gaalopoisia.

⁴Juuisia ti gomɛi na ta toli a Tewema Gomɛi, tukpengɔ yɛla kpla.

⁵Yesu i yaama jiɛilɔ hu kɛ i faha waa lɔnga ta wa ngi gama, kɛ i Filipi mɔlinga yɛ, “Mi lɔ ma mɛhɛɛ yeya na a gu numui ji kpɛlɛɛ ti goo ve?”

⁶I ji leilɔ lekee Filipi hugɔɔva kɛɛ ta vulii i yɛ kɔɔlɔ gbɔɔ a pie.

⁷Filipi kpɛmboilɔ yɛ, “Kani gbaa gɔpɔ hɔndɔ fele ɛɛ gu i bledii yeya aako numui ji gbi ti kulokulo jia laa.”

⁸Yesu gaalopoi yeepekei, Andru, Saimɔn Pita ndewei, i hugɛi lɔ a Yesu yɛ,

⁹“Hiilopo yilalɔ mbei bledii gbuha lɔɔlu i ngi yeya kɛɛ nyɛɛ fele, kɛɛ gbɔɔ a na faha bondei ji va?”

¹⁰Yesu i ndeilɔ ti ma yɛ, “A pie nungaa ti hei.” Kpiti gboto yɛlɔ yeehindei na; faale nungeisia ti heiilɔ, hingeisia lekee ti gungɔ a Tauji lɔɔlu.

¹¹Kɛ Yesu i blediisia wumbunga, i siɛgbua Ngewɔ ma, i kɔlɛkɔlɛ nasia ma ti yɛ heini; hii i pieni a nyɛi bɛɛ, numui gbi ti mɛhɛɛi na mɛ ti goo i ve vulii kpaŋ.

¹²Kia nungeisia ti goo i veni, Yesu ndeilɔ ngi gaalopoisia ma yɛ, “A yeengaingaingɔi yeemɔnii lɛma, hani gbi aa nyani.”

¹³Yeengaingaingɔi na nungaa ti gbahani ma, ti teilɔ ma i samba puu maahu fele laave na mɔnuni bledii gbuha lɔɔlui hu nungaa ti mɛni.

¹⁴Kia nungeisia ti kabande hindei ji hulɔni Yesu i pieni, ti ndeilɔ tɛɛ, “Ngewɔ lutui na vulii ngi walaa i hu wɔɔ dunyei hu ta lɔ!”

¹⁵Yesu i tɔilɔ kɛ ti longɔ ti ngi hou ti ngi yɛ a mahɛi a kpaya, faale i gbuɛilɔ, ta yakpe, i lɛ ngiyei hu gbɔma.

¹⁶Kia kpɔkɔ i wɛlɛni, ngi gaalopoisia ti yeilɔ Popɛi laa,

¹⁷ti wili ndɛndɛ yila hu, ti tɔtoo a yamala Kapaniɔm a njɛi ya wee. Kpindi wɛlɛngɔ yɛla na tawao Yesu ii yɛ lɛ wani ti gama.

¹⁸Vivii waa i gulɛilɔ kɛ njɛi i lumbenga.

¹⁹Kia ti maili sawa ɔɔ naani gani njɛi ya, ti Yesu lɔilɔ a jia Popɛi ya a lukpe ndɛndɛi gbla kɛ ti luwanga,

²⁰kɛɛ i ndeilɔ ti ma yɛ, “Nya mia; waa luwa.”

²¹Ti goohu i nɛɛlɔ ngi wumbuva ndɛndɛi hu tawao ngaamɛi na kɛ ndɛndɛi i fonga ti limɛi.

²²Folo wekei ma, nungei nasia ti loni Popɛi wooma gbengi, ti liiheilɔ ma kɛ ndɛndɛ yakpe lɔ i yɛ na tawao kɛ Yesu gaalopoisia lekee lɔ ti lini hu, Yesu ii yɛ ti lia.

²³Na hu gbi ndɛndɛngaa ta hiye Taibirias ti wɛilɔ hindei na gbla fahii i mɛhɛɛ mɛni na ji Yesu i siɛgbuani Ngewɔ ma.

²⁴Faale kia nungeisia ti tɔni kɛ Yesu tia ngi gaalopoisia tii na, tia bɛɛ ti wililɔ yeendɛndɛisia hu ti li Kapaniɔm ta ngi gɔkɔli.

²⁵Ji ti ngi maleni Popɛi wooma Kapaniɔm yakɛi ma, ti ngi mɔlilɔ tɛɛ, “Kaamɔ, migbe lɔ bi fonga mbei?”

²⁶Yesu kpɛmboilɔ yɛ, “Gbɛɛ ngi tɔnyɛi hugɛ a wue, wa nya gɔkɔli, kabande hindei nasia wu hulɔni ti va ii le wua yɛ nya gɔkɔlima, kɛɛ jifa wu bledii mɛni wu goo i ve.

²⁷Waa mɔnɛ mɛhɛɛi na va a jukulu, kɛɛ a mɔnɛ mɛhɛɛi na va a lo numu goohu i kunafɔ lɛɛvui ve ngi wɛ, tawao Nuuvu Hindoloi mia a yeemɛhɛi ve wu wɛ, ajifa ta lɔ Ngewɔ i ngi gɛnga yɛva a ngi jɔngɔ.”

²⁸Kɛ ti ngi mɔlinga tɛɛ, “Gbɔɔ mahoungɔ mu pie aako mu Ngewɔ liima yengei wie?”

²⁹Yesu i kpɛmboilɔ yɛ, “Na Ngewɔ longɔ wu pie tamia a ji wa la a numui na i njooyonga dunyei hu.”

³⁰Kɛ ti ngi mɔlinga tɛɛ, “Kabande hindei yeegbɔɔ ba pie?

³¹ Mu maadani tia mu mamani ti yɛ wɔɔ pele hu ndɔgbɔ lambɛi ma ti yɛ mɛhɛɛi na lɔ mɛ ta toli a mana, kia Ngewɔ Gɔlɛi i ndeni la yɛ, ‘Ngewɔ i yɛlɔ a mɛhɛɛ ve ti wɛ a gbua ngele goohu.’ ”

³²Kɛ Yesu i ndenga ti ma yɛ, “Gbɛɛ ngi tɔnyɛi hugɛ a wue, Mojisi ii le aa mɛhɛɛi na ve wu wɛ i gbuani ngelegoohu; nya Kɛkɛ lɔ a mɛhɛɛi yeetɔnyangɔi na ve a gbua ngelegoohu.

³³Gbamaile mɛhɛɛi na Ngewɔ a fe tamia a numui na i gbuanga ngelegoohu i yeinga kunafɔ lɛɛvui veva dunyablaa wɛ.”

³⁴Ti ndeilɔ ngi ma tɛɛ, “Ndemɔi, mɛhɛɛi ji ve mu wɛ kpelema gbi.”

³⁵Yesu ndeilɔ ti ma yɛ, “Nya lɔ ndɛvu ve mɛhɛɛi a nge; numui na a wa nya gama ndɔlɛ ɛɛ ngi lɔ, tawao numui na a la a nge ngi bolohu ɛɛ be.

³⁶Kɛɛ ngi ndeilɔ wu ma ngɛɛ wu nya lɔnga kɛɛ wuii lani a nge.

³⁷Numu gbi lekee nya Kɛkɛ a ngi ve nya wɛ, a vɛfɛlɔ nya ma; tawao numui na a wa nya gama ngɛɛ ngi gbɛ kulo bɛɛ.

³⁸Ajifa ngi gbuanga aijɛnɛ ngi yeinga Ngewɔ na i nya loni ngi liimɛi lɔ wieva, nya ndɛi ii le;

³⁹tawao nya lomɔi liimɛi lɔ a ji nasia gbi i ti venga nya wɛ ngɛɛ yeengila bɛɛ lohu, ngi pie ti gbi ti vulu ti hiye hee hu kɛlɛma volei ma.

⁴⁰Ajifa nya Kɛkɛi liimɛi lɔ a ji numu gbi lekee a nya gɔɔ kɛ Ngewɔ Hindoloi lɔ a nge, i la a ngie, i kunafɔ lɛɛvui majɔɔ; tawao nga ngi vululɔ ngi ngi wumbu hee hu kɛlɛma volei ma.”

⁴¹Juuisia ti tɔtoilɔ a gbonyɛla a ngie ajifa i ndeni yɛ, “Nya lɔ mɛhɛɛi na a nge i gbuani ngelegoohu.”

⁴²Ti ndeilɔ tɛɛ, “Yesu yaa a ji, Josɛf loi, mu ngi kɛkɛ tia ngi nje gɔngɔ? Gbɛe na i ndema yɛ, ‘Ngi hiyenga ngelegoohu lɔ?’ ”

⁴³Yesu i kpɛmboilɔ yɛ, “Waa gbonyɛ wu nyɔunyɔ gama.

⁴⁴Numu gbi ɛɛ gu aa wa nya gama kɛlee nya Kɛkɛi a ngi laala; tawao nga ngi vululɔ ngi ngi wumbu hee hu kɛlɛma volei ma.

⁴⁵ Nyɛingɔe Ngewɔ lutuisia ti Gɔlɛi hu tɛɛ, ‘Ngewɔ a ti gbi gaalɔ.’ Numu gbi lekee a nya Kɛkɛi woo mɛni, i kaa wumbu ngi ma, a vɛfɛlɔ nya ma.

⁴⁶Na ii kɛni kɛ numu gbi i nya Kɛkɛi lɔnga; iiyɛ numui na i hiyenga Ngewɔ gama, ta yakpe lɔ i nya Kɛkɛi lɔnga.

⁴⁷Gbɛɛ ngi tɔnyɛi hugɛ a wue, numui na a la a nge tamia a kunafɔ lɛɛvui majɔɔ.

⁴⁸Bledii na a ndɛvui ve tamia a nge.

⁴⁹Wu maadani ti mɛhɛɛi na mɛilɔ vulii ta toli a mana ndɔgbɔ lambɛi ma, kɛɛ ti haailɔ.

⁵⁰Ji lɔ bledii na le a gbua ngelegoohu na numu gbi ta mɛ, tɛɛ haa.

⁵¹Nya lɔ bledii vulungɔi a nge ngi gbuani ngelegoohu ngi yei; numu gbi i yeebledii ji mɛngalɔ, a vululɔ kunafɔ va. Bledii na nga fe ngi wɛ tamia a nya luwui na ngi wama fema aako dunyablaa gbi ti kunafɔ lɛɛvui majɔɔ.”

⁵²Kɛ Juuisia ti tɔtonga a ndablaa wiela a ti nyɔunyɔ tɛɛ, “Taamɔi ji a yee ngi luwui ve mu wɛ mɛva?”

⁵³Faale Yesu i ndeilɔ ti ma yɛ, “Gbɛɛ ngi tɔnyɛi hugɛ a wue, wuii Nuuvu Hindoloi luwui mɛilɔ, waa ngi ŋamɛi gboli, ndɛvu gbi ɛɛ yɛ wu hu;

⁵⁴numui na a nya luwui mɛ, i nya ŋamɛi gboli, kunafɔ lɛɛvui a yɛlɔ ngi hu, tawao nga ngi vululɔ kɛlɛma volei ma.

⁵⁵Ajifa nya luwui vulii lɔ mɛhɛɛ le tawao nya ŋamɛi vulii lɔ kpɔle-hani le.

⁵⁶Numui na a nya luwui mɛ, i nya ŋamɛi gboli, a yɛ nya hu lɔ, nya bɛɛ ngi ngi hu.

⁵⁷Kia ndɛvu ve Kɛkɛi i nya loni tawao ngi sabui hu lɔ ndɛvu i nya bɛɛ hu, hii numu gbi lekee a nya mɛ, a ndɛvu majɔɔ nya sabui hu.

⁵⁸Ji lɔ bledii na le i gbuani ngele goohu i yei, ii wieni kia bledii na i na wu maadani ti mɛni, ti haa lɔɔ. Numui na a bledii ji mɛ, a vululɔ kunafɔ va.”

⁵⁹Yesu i ji lɔ leni ji i yɛ nungaa gaama Kapaniɔm hɛɛ wɛlei bu.

⁶⁰Kia ngi gaalopo gboto ti ji mɛnini, ti ndeilɔ tɛɛ, “Kaai ji kpaukpaungɔ waa le; ye lɔ a gu i wolo ji ma?”

⁶¹Numu gbi ii hugɛni a Yesu gbɔɔ ngi gaalopoisia ti yɛ nde kɛɛ i kɔɛilɔ, kɛ i ndenga ti ma yɛ, “Ji i piemaa wu gbe a lala a nge?

⁶²Gbɔɔ hɔɔ a wie ina wu Nuuvu Hindoloi lɔilɔ a lɛ mia wɔɔ i yɛ na?

⁶³Ngewɔ Yafei mia a ndɛvui ve nuuvungaa wɛ; nuuvu gbayei ii gbekpeni kulo bɛɛ. Njɛpɛi nasia ngi ndenga wu ma a pielɔ wu Ngewɔ Yafei majɔɔ na a ndɛvui ve.

⁶⁴Na hu gbi wu lɛɛnga lɔ na wuii lani a nge.” Ajifa Yesu i yɛ kɔɔlɔ i hiye watii na ma i tɔtoni a nungaa gaala yeeni lɔ ta la a ngie kɛɛ ngi gaalopoi yeena a ngi ve.

⁶⁵Kɛ i ndenga yɛ, “Ji vamia ngi ndeni wu ma ngɛɛ numu gbi ɛɛ gu aa wa nya gama kɛlee Kɛkɛi i luma ngi wɛ.”

⁶⁶Na wooma ngi woomablaa gboto ti yamɛilɔ, tii yaa hitɛni ngi wooma.

⁶⁷Faale Yesu i ngi gaalopo puu maaha feleisia mɔlilɔ yɛ, “Wua bɛɛ wu longɔe wu li?”

⁶⁸ Saimɔn Pita i kpɛmboilɔ yɛ, “Ndemɔi, ye lɔ ma li ngi gama? Njɛpɛi nasia ta kunafɔ lɛɛvui ve numu wɛ ti bia lɔ yeya;

⁶⁹tawao mu langa na a bie, ajifa mu kɔɔnga kɛ bia lɔ Ngewɔ i bi yoyonga.”

⁷⁰Yesu i poteilɔ yɛ, “Nya lɔ ngi wu puu maahu felei jisia wɔyɔ ni. Nya ii le? Na hu gbi seitana lɔ a wu yilayee!”

⁷¹I njɛpɛi ji leni Judas va lɔ, Saimɔn Kɛriɔtmɔi loi; ajifa kia bɛɛ kaalopo puu maahu feleisia yilayee lɔ wɔɔ a Judas, tamia i wama Yesu vema.