Read Ngowili Yekpei Numu Kpɛlɛɛ Va JƆN 7 Bible Online

JƆN 7 - Ngowili Yekpei Numu Kpɛlɛɛ Va bible

JƆN 7

¹Ji wooma Yesu i jɛsiɛlɔ Galili lɔlei hu; ii yɛ loni i jɛsia Judia lɔlei hu ajifa Juuisia ti mahublɛisia ti longɔ yɛla ti ngi waa.

² Juuisia ti gomɛi na ta bafɛisia lo fa, ta luva na ta yii na, ta toli a Bafa Gomɛi, tukpengɔ yɛla kpla;

³faale Yesu ndewehingeisia ti ndeilɔ ngi ma tɛɛ, “Gbua tatei ji hu bi li Judia lɔlei hu aako bi woomableisia ti kabande hindei nasia lɔ bi piema.

⁴Ajifa numu gbi ɛɛ hindei nasia lɔwu i piema ina ngi longɔ nungaa ti ngi hinda hugɔɔ kpawama. Kia bi hinda bondei jisia wiema, bia yekpe gɛ a dunyabla.”

⁵Ngi ndewehingeisia ti ji leilɔ lekee kɛɛ tia vulii tii yɛ lani a ngie.

⁶Yesu ndeilɔ ti ma yɛ, “Nya lilɔwɔi ii yaa hitini lɛ. Lɔwɔ gbi bɛngɔe wua wu ma.

⁷Dunyablaa tɛɛ gu ti lolo a wue, kɛɛ ti lolongɔe a nge ajifa nga luva ndema ti ma kɛ ti wiehindeisia ti nyamungɔe.

⁸Wua a li Komɛi ji hu; nya ngii lima na ajifa nya lɔwɔi yeekpekpei ii yaa hitini.”

⁹Kia i ji leni, i loilɔ Galili lɔlei hu watii wulo va.

¹⁰Kia ngi ndewehingeisia ti lini Komɛi hu, kɛ ta bɛɛ i ya na ndɔwu hu, foofo hu ii le.

¹¹Juuisia ti mahublɛisia ti yɛlɔ a ngi gɔkɔli Komɛi hu, ta mɔli tɛɛ, “Taa mindo?”

¹²Nungaa ti yɛlɔ a ndondoyia gboto le ndalongɔ ngi ma. Kia ti lɛɛnga ti yɛ nde tɛɛ, “Numu yekpe lɔ a ngie,” hii pekeisia ti yɛ nde tɛɛ, “Sawo, taa nungeisia yakama.”

¹³Kɛɛ numu gbi ii yɛ ngi yɛpɛ le ngeleya ajifa ti luwangɔ yɛla Juuisia ti mahublɛisia ma.

¹⁴Ti foeilɔ kinɛiŋ Komɛi yeendiɛi Kɛ Yesu i wuaanga Ngewɔ Wɛlei bu i nungaa gaa.

¹⁵Juuisia ti mahublɛisia ti wuhu i wuilɔ tɛɛ, “Taamɔi ji i yee pieni i kaa bondei ji majɔɔni, kia wɔɔ gba ii yaa lini kaa-wɛlɛ bu?”

¹⁶Faale i poteilɔ i nde ti ma yɛ, “Na nga nungaa gaa la nya woo ii le; Ngewɔ na i nya loni ta lɔ ngi woo le;

¹⁷numu gbi i longaa i na gɔɔ Ngewɔ longɔ la, a kɔɔlɔ ina nya numu gaalɛi i gbuanga Ngewɔ gama lɔ ɔɔ ina ngi yɛpɛma a nya nda gbayei lɔ.

¹⁸Numui na a yɛpɛ a ngi nda gbayei a tɔwɔi lɔ gɔkɔli nungaa gama; kɛɛ numui na a ngi lomɔi lɔwɔi gɔkɔli ngi lɔnyangɔe tawao ndɛɛ gualala gbi ii ngi hu.

¹⁹Mojisi ii le aa Sawei ve wu wɛ? Na hu gbi numu yakpe bɛɛ ii wu lia aa Sawei hou. Gbɛe wu lapima nya waava?”

²⁰Nungeisia ti kpɛmboilɔ tɛɛ, “Ngafa nyamu lɔ bi hu! Ye lɔ i lapima bi waava?”

²¹Yesu i ti mɔli gbɛmboilɔ yɛ, “Ngi kabande hinda yila lɔ wieni i wu gbi wuhu wu.

²² Mojisi lɔ i Sawei veni wu wɛ yɛ wu wu hingaleengeisia hei biliya (kia bɛɛ Mojisi ii le aa kpɔku kɛ wu maadani), tawao wa bili heilɔ Ndɛvu Volei ma.

²³Ina wa numu heilɔ bili ya Ndɛvu Volei ma aako Mojisi jawei aa nyani, wu lii lewengɔe nya ma jifa ngi numu yila ngi gbuhɛi gbi bawoni Ndɛvu Volei ma?

²⁴Waa kiti lewe nungaa ma ti yɛyii na va wa tɔ, kɛɛ a kitii lewe a pɔɔna.”

²⁵Faale Jelusalɛmblɛisia lɛɛnga ti ndeilɔ tɛɛ, “Taamɔi ji ii le mahangeisia ta yɛ kɔkɔlima paava?

²⁶Ta gbe i yɛpɛma faha waa hu kɛɛ tɛɛ laali ngi ma! Ti kɔɔlɔ vulii hɔɔ kɛ Ngewɔ Maha Heingɔi lɔ a ngie?

²⁷Na hu gbi mu ngi hiyemɛi gɔɔlɔ; kɛɛ watii na Ngewɔ Maha Heingɔi a wa, numu gbi ɛɛ ngi hiyemɛi gɔɔ.”

²⁸Famia kia Yesu i yɛ nungaa gama Ngewɔ Wɛlei bu i ndeilɔ ngeleya yɛ, “Wu nya gɔɔlɔ vulii, tawao wu mia gɔɔlɔ ngi hiyeni na. Kɛɛ ngii wani a nya wuma wee; nya lomɔi lɔnyangɔe liilova ngi ma kɛɛ wuii ngi gɔɔ.

²⁹Nya ngi ngi gɔɔlɔ, ajifa ngi hiyenga ngi gama lɔ, tawao ta lɔ i nya loni.”

³⁰Kɛ tiaa lapima gbundɛva ngi ma kɛɛ numu gbi ii guni aa loko la ngi ma ajifa ngi watii ii yɛ hitini lɛ.

³¹Na hu gbi numu gboto ti lɛilɔ a ngie tɛɛ, “Watii na Ngewɔ Maha Heingɔi a gbua nga, a kabande hindangaa wielɔ i lewe nasia ma taamɔi ji i pienga?”

³²Farisiisia ti ndondoyiɛi na mɛnilɔ fahii i yɛ nde kɔlooni Yesu ma, kɛ Saagbuablaa Waawaisia tia Farisiisia ti kugbangaa longa ngi houva.

³³Kɛ Yesu i ndenga yɛ, “Mua wueni mu yɛmaa na watii wulo va, kɛ ngi ya nya lomɔi gama;

³⁴wa nya gɔkɔlilɔ kɛɛ wɛɛ nya lɔ ajifa mia nga yɛ na wɛɛ gu a wuala na.”

³⁵Juuisia ti mahublɛisia ti ti nyɔunyɔ mɔlilɔ tɛɛ, “Mindo lɔ i taamɔi ji nɛmahu liva na muɛɛ gu a ngi lɔla? Taa ngi nɛmahu liva Gliki lɔlei yeetei nasia hu mu bondeisia ti heini na i Glikiblɛisia gaa?

³⁶Gbɔɔ ngi lii i ma ji i ndema yɛ. ‘Wa nya gɔkɔlilɔ kɛɛ wɛɛ nya lɔ’ kɛɛ gbɔma, ‘mia nga yɛ na wɛɛ gu waa wua na?’ ”

³⁷Komɛi yeekɛlɛma volei ma, foloi yeembawai, Yesu i hiyeilɔ, i lo, i nde ngeleya yɛ, “Numui na gbi lekee ngi bolohu bengɔ, i wa nya gama i njɛi gboli.

³⁸Kia Ngewɔ Gɔlɛi i ndeni la, numu gbi lekee a la a nge, njeiyɛi nasia ta ndɛvui ve ta gbualɔ ngi hu.”

³⁹Yesu i ji leni Ngewɔ Yafei va lɔ, na nungei nasia ti langɔ a ngie ti wama majɔɔma; ajifa watii na Ngewɔ ii yɛ lɛ ngi Yafei yoyoni dunyei hu gbamaile ii yɛ lɛ Yesu lɛni ngelegoohu aa ngi wɔlɔyei ve.

⁴⁰Nungaa lɛɛnga ti yɛ fahii na hu ti njɛpɛi jisia mɛnilɔ Yesu i ndeni kɛ ti ndenga tɛɛ, “Ngewɔ lutui vulii lɔ a ji.”

⁴¹Pekeisia ti ndeilɔ tɛɛ, “Ngewɔ Maha Heingɔi lɔ a ngie.” Kɛɛ ti lɛɛnga ti mɔlilɔ tɛɛ, “Ngewɔ Maha Heingɔi ɛɛ gbua Galili.

⁴²Ngewɔ Gɔlɛi yɛ a gbua Devidi beembee hu lɔ, ti ngi le Bɛtlihɛm, fulei na wɔɔ Devidi i yɛ heini na.”

⁴³Nungeisia ti luahu i gɔlɛilɔ kɔloongɔ ngi ma.

⁴⁴Ti lɛɛnga ti longɔ yɛla ti ngi hou, kɛɛ numu gbi ii loko lani ngi ma.

⁴⁵Polisisia ti yamɛilɔ Saagbuablaa Waawaisia gama kɛɛ Farisiisia. Kɛ ti ti mɔlinga tɛɛ, “Gbɛe wuii wani a ngie?”

⁴⁶Polisisia ti kpɛmboilɔ tɛɛ, “Kia wɔɔ gba numu gbi ii yaa yɛpɛni kia taamɔi na i na!”

⁴⁷Farisiisia ti ti mɔlilɔ tɛɛ, “Wua bɛɛ ti wu yakanga?

⁴⁸Wu mɛninga kɛ tokulɔ gbi ɔɔ Farisiimɔ i langa wɔɔ gba a ngie?

⁴⁹Kɛɛ fahii jisia tii Mojisi jawei gɔɔ faale Ngewɔ i ti jondunga.”

⁵⁰ Nikodimɔsi na i lini Yesu gama ngovama tawao Farisiisia yilayee a ngie, i ndeilɔ pekeisia ma yɛ,

⁵¹“Mu jawei a numu lɛɛlɔ ina muii hugbɛkpɛni pɛiŋ gbɔɔ i pienga ɔɔ gbɔɔ a nde ta yekpe magaova?”

⁵²Ti kpɛmboilɔ tɛɛ, “Bia bɛɛ bi gbuanga Galili lɔ? Ngewɔ Gɔlɛi hugbee, ba tɔlɔ kɛ Ngewɔ lutu gbi ɛɛ gu i gbua Galili.” [

⁵³Numui gbi ti liilɔ ti yeekuwuhuisia.