Read Ngowili Yekpei Numu Kpɛlɛɛ Va JƆN 8 Bible Online

JƆN 8 - Ngowili Yekpei Numu Kpɛlɛɛ Va bible

JƆN 8

²Kia ngele i woni, i humbuilɔ Ngewɔ Wɛlei bu. Numui gbi ti yandɔɛilɔ ti ngi gala, kɛ i heinga i tɔtoo a ti gaala.

³Sawei Yeekaamɔisia tia Farisiisia ti wuailɔ na a nyaha yila ti wuni ti ma tia hindo gbamɛi, ti ngi lo ti gbi gulɔ.

⁴Kɛ ti ndenga Yesu ma tɛɛ, “Kaamɔ ti nyapoi ji hounga tia hindo gbamɛi ta la vulii.

⁵ Mojisi i ndeilɔ mu ma Sawei hu yɛ ma lo yeenumu bondei ji hɔwɔhɔwɔmaa a kɔtii i haa. Bia bɛɛ gbɛ ngi va?”

⁶Ti ji leilɔ ngi tɛguva aako ti njia wɛlɛ ngi ma. Yesu i ma wɛleilɔ a kɔlɛi nyɛi ndɔmɛi a ngi lokoyiwoi.

⁷Kɛɛ kia ti nɔɔni ngi mɔlila ma, i hiyeilɔ, i lo, i nde ti ma yɛ, “Numui na wu lia jumbu gbi ii ngi ma, ta yese i kɔtii wili nyapoi ji ma.”

⁸Kɛ i wɛlɛnga gbɔma a kɔlɛi nyɛi ndɔmɛi a ngi lokoyiwoi.

⁹Kia ti ji mɛnini, ti gbi, i lɔto kpakoleisia ma, ti gbuɛilɔ a ngilangila ti li, ti Yesu yakpe lo kɛɛ nyapoi i looni ngi gulɔ.

¹⁰Yesu i ngi wui wumbuilɔ, i ngi mɔli yɛ, “Nyapoi, tiaa mindo? Numu gbi ii bi lɛɛni?”

¹¹Nyapoi i kpɛmboilɔ yɛ, “Numu gbi ii nya lɛɛni, Ndemɔi.” Kɛ Yesu i ndenga yɛ, “Nya bɛɛ ngii bi lɛɛma; li, kɛɛ baa yaa jumbu hinda wie.”]

¹² Yesu i gbɔma yɛpɛilɔ Farisiisia gama yɛ, “Dunyei yeefofoi lɔ a nge; numu gbi lekee a to nya ma ɛɛ jia kpindi hu, tawao a fofoi na majɔɔlɔ a ndɛvui ve dunyableisia wɛ.”

¹³ Kɛ Farisiisia ti ndenga ngi ma tɛɛ, “Biaa yɛpɛma kɔloongɔ bia yekpe ma tawao seli gbi ii na aa bi layieisia wooma nikpɔ; na bi ndema ii lɔnyani.”

¹⁴Yesu i poteilɔ ti ma yɛ sawo, “Kiaa bɛɛ nya yekpe nga nya jelilɔ, nya jeli wuaangɔi lɔnyangɔe, ajifa ngi mia gɔɔlɔ ngi hiyenga na kɛɛ mia ngi lima na, kɛɛ wua wuii mia gɔɔ ngi hiyeni na ɔɔ mia ngi lima na.

¹⁵Wua wa kiti lewe nungaa ma a ti yɛyii na lɔ wa tɔ ajifa nuuvungaa a wue, nya ngɛɛ kiti lewe numu gbi ma.

¹⁶Kɛɛ kiaa bɛɛ nga kiti lewelɔ numu ma, nya kiti lewengɔi lɔnyangɔe ajifa ngii ji wiema a nya wuma wee; nya Kɛkɛi na i nya loni, mua ta le hinda gbi hu nga pie.

¹⁷Nyɛingɔe wu jawei hu kɛ numu fele ti jeli wuaangɔi lɔnyangɔe.

¹⁸Nya yekpe lɔ nga nya jeli tawao nya Kɛkɛi na i nya loni a nya jeli wuaangɔi wooma nikpɔlɔ.”

¹⁹Faale ti ngi mɔlilɔ tɛɛ, “Bi Kɛkɛ i mindo lɔ?” Yesu i kpɛmboilɔ yɛ, “Wuii nya gɔɔ tawao wuii nya Kɛkɛ bɛɛ gɔɔ; kiaa wu yɛ nya gɔɔlɔ, wu yɛ nya Kɛkɛ bɛɛ gɔɔlɔ.”

²⁰Yesu i njɛpɛi jisia gbi lɔ leni ji i yɛ nungaa gaama Ngewɔ Wɛlei bu, lomui na hu ta navoo gaŋaisia heima gbatɛ na, kɛɛ numu gbi ii ngi houni ajifa ngi watii i yɛ hitini lɛ.

²¹Yesu i gbɔma ndeilɔ ti ma yɛ, “Nga lilɔ tawao wa nya gɔkɔlilɔ kɛɛ wa haalɔ wu jumbusia hu. Wɛɛ gu a walaa mia ngi lima na.”

²²Kɛ Juuisia ti ti nyɔunyɔ mɔlinga tɛɛ, “Ji i ndema yɛ ‘Mia ngi lima na wɛɛ gu a walaa na’, kɛ a ta yekpe waalɔ?”

²³Yesu ndeilɔ ti ma yɛ, “Wua wu gbuanga mbui lɔ dunyei ji hu, nya ngi gbuanga mahui lɔ ngelegoohu; wua dunyei ji hublaa mia a wue, nya dunyei ji humɔɔ yaa a nge.

²⁴Ngi ndeilɔ wu ma ngɛɛ wa haalɔ wu jumbuisia hu, tawao wa haalɔ wu jumbuisia hu kɛlee wu la la kɛ nya mia a na ngi ndeni ngɛɛ tamia a nge.”

²⁵Kɛ ti ngi mɔlinga tɛɛ, “Ye lɔ a bie?” Yesu i kpɛmboilɔ yɛ, “Numui na vulii ngi hugɛni wɔɔ a wue i hiye tɔto-gbelei ma ngɛɛ ta mia a nge.

²⁶Hinda gboto lɔ na ndeva ndalongɔ wu ma kɛɛ hinda gboto wu lɛɛva fa. Kɛɛ nya lomɔi lɔnyangɔe tawao na lekee nga mɛni ngi laa tamia nga nde dunyablaa ma.”

²⁷Na i ndeni ti ma kɔlooni Kɛkɛi ma tii yeembui gɔni.

²⁸Faale i ndeilɔ yɛ, “Watii na wa Nuuvu Hindoloi hɛlɛ krɔsii ma, yeewatii namia wa kɔɔ kɛ nya mia a na ngi ndeni ngɛɛ tamia a nge tawao wa kɔɔlɔ kɛ ngɛɛ hinda gbi wie a nya nyɛkɛ; na lekee Kɛkɛi a nde nya ma ndeva tamia nga nde.

²⁹Numui na i nya loni mua ta le Tuuŋ; ii yaa gbeni nya yakpe ma, ajifa nga ngi liima hindei lɔ wie kpema gbi.”

³⁰Numu gboto ti njɛpɛi jisia mɛnini ti lɛilɔ a Yesu.

³¹Kɛ Yesu i ndenga Juu nasia ma ti lani a ngie yɛ, “Wu golongalɔ kaai ji bu nga kɛ, kɛ nya woomableisia vulii lɔ a wue,

³²tawao wa tɔnyɛi gɔɔlɔ, yeetɔnyɛi na a wu gbualɔ nduwɔyɛi hu.”

³³ Ti poteilɔ tɛɛ ngi ma, “Ebraham bɔɔsɔɛisia lɔ a mue tawao muii yaa yɛni wɔɔ nduwɔya hu numu gbi yeya. Gbɛe bi ndema bɛɛ ‘Wa yɛlɔ a nasia nduwɔ yaa tie?’ ”

³⁴Yesu i ti mɔli gbɛmboilɔ yɛ, “Gbɛe ngi tɔnyɛi hugɛ a wue, numu gbi lekee i jumbu hinda wiengalɔ, jumbui luwɔ mia a ngie.

³⁵Nduwɔi ɛɛ lo ngi luwɔkɛi yeepɛlɛbu kunafɔ kɛɛ nduwɔkɛi hindoloi ta a lo na lɔ kunafɔ va.

³⁶Faale yeehindoloi i wu gbuangaa nduwɔyɛi hu, wa yɛlɔ fɔ a nasia nduwɔ yaa tie.

³⁷Ngi kɔɔlɔ kɛ Ebraham bɔɔsɔɛisia mia a wue, na hu gbi wuaa pele gɔima nya waava ajifa nya layie ɛɛ heima gbi jɔɔ wu lii hu.

³⁸Na ngi tɔnga nya Kɛkɛ gama, tamia nga yɛpɛ kɔloongɔ ma, kɛɛ wua wa na lɔ wie wa mɛni wu kɛkɛ laa.”

³⁹Ti poteilɔ tɛɛ ngi ma, “Mu kɛkɛ mia a Ebraham.” Kɛɛ Yesu poteilɔ, “ina vuii Ebraham leengeisia mia a wue, a nasia wie i yɛ a pie.”

⁴⁰kɛɛ kiahuna wuaa pele gɔima nya waava, nya hii ngi tɔnyɛi na hugɛnga a wue ngi mɛnini a Ngewɔ; ji ii le Ebraham aa pie.

⁴¹“Na wu kɛkɛ pieni tamia wu piema.” Kɛ ti ndenga ngi ma tɛɛ, “Pue-leengaa yaa a mue; mu kɛkɛ i yakpe, tamia a Ngewɔ.”

⁴²Yesu i ndeilɔ ti ma yɛ, “Kiaa wu Kɛkɛ vulii mia a Ngewɔ, waa lolɔ a nge, ajifa ngi gbuanga Ngewɔ hu lɔ ngi wanga mbei; ngii wani a nya nyɛkɛ, ta mia i nya loni.

⁴³Gbɛe wɛɛ na hugɔɔ ngi ndema? Ajifa ɛɛ gu wu hu wolova nya layie ma.

⁴⁴Wu gbuanga wu kɛkɛ Seitana hu lɔ, tawao wu liima hindei lɔ a wu kɛkɛ liimɛisia wiela. Numu waamɔ mia wɔɔ gba a ngie i hiye tɔto-gbelei ma tawao ngi loko gbi ii tɔnyɛi hinda hu, ajifa tɔnya gbi ii ngi hu. I ndɛi gualangaa, na kungɔ ngi hu tamia a nde, ajifa ndɛi kpɛlɛɛ ti kɛkɛ mia a ngie.

⁴⁵Kɛɛ jifa nga tɔnyɛi le, wuii lani a nge.

⁴⁶Ye lɔ wu lia a nde yɛ ngi jumbu hinda yakpe bɛɛ wienga? Ina nga tɔnyɛi lɔ le, gbɛe wuii lani a nge?

⁴⁷Numui na i gbuani Ngewɔ hu a wololɔ Ngewɔ layieisia ma; ji wuii gbuani Ngewɔ hu faamia wɛi wolo ngi layieisia ma.”

⁴⁸Juuisia ti poteilɔ tɛɛ ngi ma, “Ji mu ndeni muɛɛ Sameliamɔ lɔ a bie tawao muɛɛ ngafa nyamu lɔ bi hu, tɔnya ii le?”

⁴⁹Yesu i kpɛmboilɔ yɛ, “Ngafa nyamu gbi ii nya hu, kɛɛ nga nya Kɛkɛ lɔ bɛlɛ hei, tawao wua wa baa baalɔ nya ma.

⁵⁰Na hu gbi ngii lapima nya yekpe nya bɛlɛhei goliva; Numu lɔ na nya bɛlɛhei gɔliva tawao ta lɔ a yɛ a kiti lewemɔi.

⁵¹Gbɛɛ ngi tɔnyɛi hugɛ a wue, numu gbi i golongalɔ nya layieisia bu, ɛɛ haa kunafɔ.”

⁵²Juuisia ti ndeilɔ ngi ma tɛɛ, “Kiahuna mia mu langa la vulii kɛ ngafa nyamu lɔ bi hu. Ebraham i haailɔ; Ngewɔ lutuisia ti haailɔ; kɛɛ bia bɛɛ ‘Numu gbi i golongalɔ nya layieisia bu ɛɛ haa kunafɔ.’

⁵³Bi leweni mu maada Ebraham ma, i haani? Ngewɔ lutuisia ti haailɔ! Bia ta ye lɔ a bie?”

⁵⁴Yesu i kpɛmboilɔ yɛ, “Nya bɛlɛ heii ii yɛni a gbɛogbɛ; nya Kɛkɛ na wa nde wuɛɛ wu Yewɔɛi mia, tamia a nya bɛlɛ hei.

⁵⁵Kɛɛ wua wuii yaa ngi gɔni; nya ngi ngi gɔɔlɔ. Ina ngi ndeilɔ ngɛɛ ngii ngi gɔɔ, nga yɛ a ndɛmɔ lɔ kia wu na; kɛɛ ngi ngi gɔɔlɔ tawao nga ngi layie houlɔ.

⁵⁶Wu kɛkɛ Ebraham goohu i nɛɛlɔ ajifa Ngewɔ lumani ngi wɛ nya wa-gbelei lɔva; i tɔilɔ tawao ngi goohu i nɛɛlɔ.”

⁵⁷Kɛ Juuisia ti ndenga ngi ma tɛɛ, “Bii yaa guni lɛ a foo numu fele gbɔyɔngɔ maahu puu; bi Ebraham lɔnga?”

⁵⁸Yesu i ndeilɔ ti ma yɛ, “Gbɛɛ ngi tɔnyɛi hugɛ a wue, pɛiŋ wɔɔ ti yaa Ebraham le, nyaa na.”

⁵⁹Kɛ ti kɔtiisia wumbunga ngi hɔwɔva la; kɛɛ Yesu i lɔwuilɔ i gbua Ngewɔ Wɛlei bu a ti lia wee.