Read Ngowili Yekpei Numu Kpɛlɛɛ Va JƆN 9 Bible Online

JƆN 9 - Ngowili Yekpei Numu Kpɛlɛɛ Va bible

JƆN 9

¹Kia Yesu i yɛ lima, i taamɔ yila lɔilɔ ti ngi leni ngi wumungɔ.

²Ngi gaalopoisia ti ngi mɔlilɔ tɛɛ, “Kaamɔ, ye jumbu lɔ i pieni ti taamɔi ji leni ngi wumungɔ, ta ɔɔ ngi lebleisia?”

³Yesu i kpɛmboilɔ yɛ, “Taamɔi ji tia ngi lebleisia ti jumbu ii le aa wa a pumui ji, kɛɛ aako wu Ngewɔ gbayei lɔ i yenge ngi hu.

⁴Mahoungɔe mu nya lomɔi yengei wie kia lɛ foloi i na; kpindi lɔ wama tawao numu gbi ɛɛ gu aa yenge.

⁵ Kia lɛ ngi dunyei hu, nya lɔ dunyei yeefofoi a nge.”

⁶Ji lengɔi wooma Yesu i ndayɛi wuilɔ ndɔmɛi, i pɔlɛi lɔgbɔ la, i yeepɔlei jia taamɔi yaama,

⁷yɛ ngi ma, “Li bi bi yaamɛi wua Popɛi na hu kpatɛngɔ ta toli a Sailoam” (mbiyɛi ji yeembui lɔ a Njooyongɔ.) Faale taamɔi i liilɔ, i ngi yaama wa, i yama a hinda lɔ.

⁸Ngi heinyɔuisia kɛɛ nasia ti yɛ a ngi lɔ ngovama a fɛlii wie, ti ndeilɔ tɛɛ, “Taamɔi ji ii le i yɛ heini a fɛlii wie?”

⁹Nungaa lɛɛnga ti ndeilɔ tɛɛ, “Tamia,” kɛɛ pekeisia ti ndeilɔ tɛɛ, “Sawo, ta yaa na, ngi gbuaye mia.” Faale taamɔi vulii i ndeilɔ yɛ, “Nya mia.”

¹⁰Faale ti ngi mɔlilɔ tɛɛ, “I yee na ba gu a hinda lɔla na?”

¹¹I kpɛmboilɔ yɛ, “Taamɔi na ta toli a Yesu i pɔlɛi lɔ yɔmbɔni i sia nya yaama, i nde nya ma yɛ ngi li ngi nya yaamɛi wa Sailoam wopɛi hu. Faale ngi liilɔ tawao kia lekee ngi nya yaama wuani kɛ ngi gunga a hinda lɔla.”

¹²Kɛ ti ngi mɔlinga tɛɛ, “Taa mindo?” I kpɛmboilɔ yɛ, “Ngii ngi yɛma gɔɔ”

¹³Ti ndeilɔ taamɔi na ma ti ngi leni wɔɔ ngi wumungɔ tɛɛ tia tieni ti li Farisiisia gama.

¹⁴Ndɛvu Volei ma yɛla Yesu i pɔlɛi yɔmbɔni i taamɔi yamɛisia bawo la.

¹⁵Farisiisia ti ngi mɔlilɔ gbɔma tɛɛ i yee pieni i hinda lɔni. Kɛ i ndenga ti ma yɛ, “I pɔlɛi lɔ jiani nya yaamɛi ma, ngi nya yaamɛi wua, kiahuna nga gulɔ a hinda lɔla.”

¹⁶Farisiisia lɛɛnga ti ndeilɔ tɛɛ, “Taamɔi na i ji wieni ii gbuani Ngewɔ gama ajifa ɛɛ Ndɛvu Volei yeesawei hou.” Kɛɛ pekeisia ti ndeilɔ tɛɛ, “Numui na jumbumɔ a ngie a yee gu a kabande hinda bondei jisia wiela?” Kɛ ti blanga.

¹⁷Faale ti gbɔma pumumɔi mɔlilɔ tɛɛ, “Ji i bi yamɛisia bawonga, gbɔɔ bi nɛmahu ngi va?” I kpɛmboilɔ yɛ, “Ngewɔ lutu mia a ngie.”

¹⁸Juuisia tii yɛ lani la kɛ taamɔi ji wumungɔe wɔɔ, i gunga na a hinda lɔla, kɛ ji ti ngi lebleisia lolini,

¹⁹ti ti mɔli tɛɛ, “Wu loi lɔ? Wɛɛ wu ngi leni ngi wumungɔ; kɛɛ gbɛe a gu na a hinda lɔla?”

²⁰Ngi lebleisia ti kpɛmboilɔ tɛɛ, “Mu kɔɔlɔ kɛ mu loi lɔ, tawao mu ngi leni ngi wumungɔ,

²¹kɛɛ i yee pienga a hinda lɔ na, muii kɔɔ, tawao muii kɔɔ ye lɔ i ngi yamɛisia bawoni. A ngi mɔli; ngi lakpangɔe, a yɛpɛlɔ ta yekpe va.”

²²Ngi lebleisia ti ji lɔ leni jifa ti luwangɔ yɛla Juuisia ma gbamaile hugbatɛngɔ yɛla Juuisia yeya kɛ numu gbi i ndengaa yɛ Ngewɔ Maha Heingɔi mia a Yesu, ta ngi gbɛlɔ hɛɛ wɛlei bu.

²³Famia ngi lebleisia ti ndeni tɛɛ, “Ngi lakpangɔe, a ngi mɔli.”

²⁴Faale ti pumumɔ wovei loliilɔ heima yeefelei ti nde ngi ma tɛɛ; “Tɔnyɛi le Ngewɔ va; mua mu kɔɔlɔ kɛ jumbumɔ mia a taamɔi na.”

²⁵I poteilɔ yɛ, “I yɛni a jumbumɔ lɔ, ii yɛni a jumbumɔ, ngii hugɔɔ; hinda yakpe lekee ngi kɔɔngɔ tamia a ji nya wumungɔ wɔɔ, kiahuna nga hinda lɔ.”

²⁶Ti ngi mɔlilɔ tɛɛ, “Gbɔɔ i pieni a bie? I yee bi yamɛisia lawoni?”

²⁷I kpɛmboilɔ yɛ, “Ngi wilanga a hugɛla a wue kɛɛ wuii lumani waa wolo ma. Gbɛe wu longɔ gbɔma wu mɛni? Wua bɛɛ wu loni wu yɛ a ngi woomablaa?”

²⁸Kɛ ti ngi yɛlinga tɛɛ, “Bia bi yɛni a taamɔi na Woomamɔ lɔ, kɛɛ mua Mojisi woomablaa mia a mue.

²⁹Mu kɔɔlɔ kɛ Ngewɔ i yɛpɛilɔ Mojisi gama; kɛɛ taamɔi ji ta, muii mia vulii gɔɔ i hiyenga na.”

³⁰Taamɔi i poteilɔ i nde ti ma yɛ, “Kabande hinda waa lɔ a ji. Wuii mia gɔɔ i hiyenga na, kɛɛ na hu gbi ta lɔ i nya yamɛisia bawoni.

³¹Mu kɔɔlɔ kɛ Ngewɔ ɛɛ wolo jumbubleisia ma, kɛɛ numu i yɛngalɔ a Ngewɔ vɛlimɔ, a Ngewɔ liima hindei wie, a wolo lɔ ngi ma.

³²Kia wɔɔ gba dunyei ji lɔtoni, numu gbi ii yaa mɛnini kɛ numu gbi i gunga a piela numui na ti ngi leni ngi wumungɔ i hinda lɔ.

³³Ina taamɔi ji ii hiyeni Ngewɔ gama, ii yɛ gu a hinda gbi wiela.”

³⁴Ti poteilɔ ti nde ngi ma tɛɛ, “Jumbui i bi magbolingɔe i hiye bi le-gbelei ma; bi longɔ bi mu gaa?” Kɛ ti ngi gbɛnga hɛɛ wɛlei bu tɛɛ aa yaa wuaa na.

³⁵Yesu i mɛnilɔ kɛ ti taamɔi gbɛnga hɛɛ wɛlei bu kɛɛ kia ti lɔni, i ngi mɔlilɔ yɛ, “Bi langɔe a Nuuvu Hindoloi?”

³⁶Taamɔi i kpɛmboilɔ yɛ, “Ye lɔ a ngie aako ngi la a ngie?”

³⁷Yesu i ndeilɔ ngi ma yɛ, “Bi wilanga a ngi lɔla, ajifa tamia a numui ji wua ta wu yɛpɛma kiahuna.”

³⁸Kɛ taamɔi i ndenga yɛ, “Ndemɔi, nya langɔe a ngie;” kɛ i wombi gbakpanga ngi gɔwɔbu.

³⁹Kɛ Yesu i ndenga ngi ma yɛ, “Ngi wɛilɔ dunyei ji hu aako nuuvungaa ti jumbuisia maa i gɛ, kɔɔwɔi pumublɛisia ti hinda lɔ tawao nasia ta hinda lɔ ti wumu.”

⁴⁰Farisii nasia lɛɛnga ti yɛ ngi gblanga ti ji mɛnilɔ, kɛ ti ngi mɔlinga tɛɛ, “Mua bɛɛ mu wumungɔe?”

⁴¹Yesu i kpɛmboilɔ yɛ, “Kiaa wu wumungɔe, tii yɛ wu lɛɛ jumbu wieva, kɛɛ kiahuna wa nde wɛɛ wuaa hinda lɔma, ti wu lɛɛnga wu jumbuisia va.”