Read Ngowili Yekpei Numu Kpɛlɛɛ Va TOBLEISIA TI WIEHINDEISIA 1 Bible Online

TOBLEISIA TI WIEHINDEISIA 1 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 1

¹ Nya liimamɔi Tiofilɔs. Nya gɔlɛi yeehaalayei na ngi nyɛini bi gama, ngi ngengei na kpɛlɛɛ wuilɔ hu Yesu i pieni kɛɛ kaai na i yɛ nungaa gaa la i hiye watii na ma i ngi yengei lɔtoni,

²i to foloi na ma Ngewɔ pieni i lɛ ngelegoohu. Pɛiŋ i yaa lɛ ngelegoohu i pieilɔ Ngewɔ Yafei i sawangaa ve nungei nasia wɛ i ti wɔyɔni yɛva a Tobleisia.

³Njii numu fele gbɔyɔngɔ goohu ngi haangɔi wooma, i gɛilɔ a tie kpoto, a kɛ a tie kengelee kɛ kia i vulunga i hiyenga hee hu, ngi vulungɔe keya. Ti yɛlɔ a ngi lɔ leeŋ, a yɛpɛ ti gama kɔlooni Ngewɔ Mahayɛi ma.

⁴ Watii yila kia tia tieni ti yɛ hinda yila, i vɛlilɔ ti ma yɛ, “Waa gbua Jelusalɛm waa li hinda gbi, a mawaa-hani na mawulo nya Kɛkɛ i Lahei wumbuni faa, na ngi yɛ yɛpɛi wu gama kɔlooni ma.

⁵Jɔn i yɛ nungaa wua a njɛi lɔ kɛɛ lɔwɔ sɛkɛngɔ goohu Ngewɔ a ngi Yafei yeilɔ wu ma i wu wua.”

⁶Watii weka yila ma kia Yesu i gɛni a tie, ti ngi mɔlilɔ tɛɛ, “Ndemɔi, bi piemaa Isrɛlbleisia ti gbɔma hei tia yekpe va kiahuna?”

⁷Yesu i ndeilɔ ti ma yɛ, “Nya Kɛkɛ yakpe mia kpaya i ngi wɛ kiti lava hindei jisia ti wielei ma tawao maa ii houni wu kɔɔ migbe lɔ ta wie.

⁸ Kɛɛ ji Ngewɔ Yafei a yei wu ma, Ngewɔ a wu lavelɔ a kpaya yɛva a Selingaa nya va nungaa gbi gama ti Jelusalɛm kɛɛ Judia lɔlei hu gbi kɛɛ Samelia kɛɛ dunyei yeesɔkui hu gbi.”

⁹ Kia i kpɔyɔni a ji lela, i wumbuilɔ ndɔma i lɛ ngelei ma, ti lo ngi gbema a lɛ haaŋ i lohu njagbili hu.

¹⁰Ti yaamɛi gbakpangɔ yɛla Yesu ma a lɛ ngelei ma kɛ hindo fele, ndoma goweisia ti ti ma, ti longa ti lia

¹¹tɛɛ, “Wua wu Galiliblɛi jisia, gbɛe wu looni mbei wu yaamɛi gbakpangɔ lekee ngelei ma? Yesu yakpei ji Ngewɔ i ngi hounga wu yeya i pienga i lɛnga ngelegoohu, a walɔ gbɔma kia lɔɔ wu tɔnga i lɛnga ngelegoohu.”

¹²Hindei jisia ti wieni Ɔlivi Yiyei wumba lɔ. Na wooma tobleisia ti ngiyei yeilɔ ti yaama Jelusalɛm, yeenduahui yɛngɔ lekee a mɛli yeekɛkɛlɛ.

¹³ Ti wuailɔ taa wai hu, ti lɛ ngeleya lomui na hu ti yɛ yii na. Nasia ti yɛ yee komɛi hu tia mia a Pita, Jɔn, Jemisi, Andru, Filip, Tɔmɔsi, Batɔlɔmiu, Matiu, Jemisi (Afiɔs loi) kɛɛ Saimɔn (na ti yɛ toli a ndɔlɔ hinda madi houmɔi) kɛɛ Judas (Jemisi loi).

¹⁴Ti kpɛlɛɛ ti yɛlɔ a gomɛ pɛɛpɛ ta Ngewɔ vɛli tuuŋ a ngoyila folo gboto va tia Yesu ndeehingeisia kɛɛ nyaha gboto tia Yesu ngi nje Meri-ni.

¹⁵Lɔwɔ lɛɛngaa wooma komɛ i yɛlɔ na nasia va ti langɔ yɛla a Yesu tawao ti guilɔ a numu hɔndɔɔ yila kaalɛ numu gbɔyɔngɔ. Kɛ Pita i hiyenga i yɛpɛ ti gama yɛ,

¹⁶“Nya ndeengɛisia, mahoungɔ yɛla Ngewɔ laayie na i ngi Gɔlɛi hu la i hou, na Ngewɔ i puni Devidi laa kɔlooni Judas na ma i loni nungei nasia gulɔ ti lini ti Yesu houni.

¹⁷Judas i yɛni wɔɔ a mu yilayee lɔ, Ndemɔi i ngi wumbu yɛva a tomɔɔ kia lɔɔ i mu wumbuni la.”

¹⁸ (Kɛɛ navoo va lɔ i nyamui na gani, i ndɔlɔma yeya a yeenavoei, kɛ i gulanga gbeleiŋ a wumba wee yeendɔlɔmɛi na, ngi goi i bla fa, ngi wulii gbi i gbua.

¹⁹Nungaa gbi ti yɛ Jelusalɛm ti ngi haalei ji humɛnilɔ, famia ti yeendɔlɔmɛi na lolini ti layie hu a Akɛldama, yeembui a “Ŋama Lɔlɔmɛi.”)

²⁰Kɛ Pita i ndenga yɛ, “Ajifa nyɛingɔe Juuisia ti Wule Gɔlɛi hu tɛɛ, ‘Ngi heimi a lombolɔ, numu gbi ɛɛ hei na.’ yɛ gbɔma ‘Numu weka a ngi yengei wumbulɔ.’

²¹“Faale mahoungɔe mu numu yila wumbu, a gu a selilaa, kia mu na, kɛ Ndemɔi i hiyeilɔ hee hu. Yeenumui na a gbua nungei nasia lɔ lia mua tieni mu yɛ lewe watii na hu kpɛlɛɛ mua Ndemɔi Yesu-ni mu yɛ lɛ ma yei, i lɔto watii na ma Jɔn i yɛ nungaa wua i to watii na ma Ngewɔ i ngi houni mu yeya i pie i lɛ ngelegoohu.”

²³Kɛ ti numu fele laa gɛnga, Josɛf na ti yɛ toli a Basabas (ta gbɔma toli a Jɔstɔs) kɛɛ Matayas.

²⁴Faale ti Ngewɔ vɛlilɔ tɛɛ, “Ndemɔi, bi numu gbi lii huvaa gɔɔlɔ, faale numui na gɛ a mue numu felei jisia lia bi loko longa ngi ma

²⁵tomɔɔ yengei na wieva Judas i wounveni ma liva mia ngi bɛngɔ na.”

²⁶Faale ti tɔtɔ gbɛilɔ kɛ tɔtɔi i Matayas gɛnga, kɛ ti ngi gbɛɛnga toblaa puu maahu yileisia ma.