Read Ngowili Yekpei Numu Kpɛlɛɛ Va TOBLEISIA TI WIEHINDEISIA 10 Bible Online

TOBLEISIA TI WIEHINDEISIA 10 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 10

¹Taamɔ yila yɛlɔ Siisaria ngi laa a Kɔniiliɔs, Kugba a ngie soja hɔndɔɔ yila maahu ti kɔwui na hu ti yɛ toli a “Itali Gɔ-wui.”

²Ngewɔ hinda madi houmɔ waa lɔ wɔɔ a ngie, tia ngi wɛlɛbubleisia gbi ta Ngewɔ vɛli. I navoo gboto veilɔ gbɔva Juu yeefɛlingɔisia ma tawao i yɛlɔ a Ngewɔ vɛli hu ɛɛ lewe.

³Bi tɔaa bɛɛ hawei yeesawei ma yɛla a kpɔkɔvolei i hengani, i Ngewɔ malikei lɔ gbalauŋ i wuaa ngi gama i ngi loli yɛ, “Kɔniiliɔs!”

⁴I ngi yaamɛi gbakpailɔ malikei ma, ngi luwangɔ waa, yɛ, “Gbɛe?” Malikei i kpɛmboilɔ yɛ, “Ngewɔ i bi hɛɛwoi gulunga kɛɛ kpekpei nasia ba pie, tawao bi hinda i hitɛnga ngi wɛ.

⁵Faale hiingaa lɛɛngaa lo Jɔpa ti taamɔ yila loli, ngi laa yakpangɔi a Saimɔn Pita.

⁶Taa hua-kɔlɔ yengemɔ yila gama ngi laa a Saimɔn, ngi wɛlei i gboyei gbla.”

⁷Kɛ malikei na i yɛpɛni Kɔniiliɔs gama i ya. Kɔniiliɔs na i ngi yeengengeblaa fele loliilɔ kɛɛ yeesoja yila na yɛ ngi magbewe gbua tawao, Ngewɔ hinda madihoumɔ waa a ngie,

⁸i malikei layie gbi hugɛ a tie, i ti lo Jɔpa.

⁹Ngele wongɔi hu, kia ti yɛ lima pelei hu ti foni Jɔpa gbla, Pita i lɛilɔ pɛlei wumba a fologundiei Ngewɔ vɛliva.

¹⁰Ndɔlei i yɛ ngi ma lɔ, ngi longɔ i mɛhɛɛ mɛ; kɛ ti loni mɛhɛɛ yilimaa kɛ i henganga.

¹¹I tɔilɔ ngelegoohu lawongɔ, hani a yei kpuangɔ a kula waa, bi tɔaa bɛɛ nungaa mia ti njeima ti houni yeetɔɔhu naani ma.

¹²Fuuhani yeelasii gbi ti yɛ hu lɔ: ndalahanisia kɛɛ gɔwɔnaanisia kɛɛ ngelema ŋɔningɛisia.

¹³Kɛ ngoo i ndenga ngi ma yɛ, “Hiye Pita, bi fuuhani jisia waa bi ti mɛ.”

¹⁴Kɛɛ Pita i ndeilɔ yɛ, “Ngɛɛ pie, Ndemɔi! Kia wɔɔ gba ngii yaa hani gbi mɛni mu jawei ndeni yɛ nɔhɔngɔi ɔɔ hani na numu ɛɛ mɛ.”

¹⁵Ngoi i ndeilɔ gbɔma ngi ma yɛ, “Hani na Ngewɔ i ndenga yɛ sɛwɛsɛwɛngɔe, bia baa nde baa yɛma nɔhɔngɔe.”

¹⁶Ngewɔ i ji leni ngi ma heima sawa; kɛ ti kulei laalanga ti yaama la ngelegoohu.

¹⁷Pita i giliilɔ kaka gbɔɔ hengei ji yeembui le. I loni yeekilii ji wiemaa nungei nasia Kɔniiliɔs i ti loni ti Saimɔn wɛlei gama gɔɔnga, ti wa ti lo yeekatei laa.

¹⁸Ti mɔlilɔ ngeleya tɛɛ, “Hota lɔ mbei ngi laa a Saimɔn Pita?”

¹⁹Pita i loni lapimaa hengei ji yembui gɔvaa Ngewɔ Yafei i ndeni ngi ma yɛ, “Wolo! Hindo sawa ti bi gɔkɔlima tiaa mbei.

²⁰Faale bi magbatɛ bi hitɛ pɛlei ji hu tawao baa seka wua tieni wu liva ajifa nya mia ngi ti longa.”

²¹Kɛ Pita i hitɛnga pɛlei hu i nde yeenungeisia ma yɛ, “Nya mia wu nya gɔkɔlima. Gbɛe wu waa?”

²²Ti kpɛmboilɔ tɛɛ, “Kugbei Kɔniiliɔs mia i mu longa. Numu yekpe lɔ a ngie, a Ngewɔ hindei madihou tawao Juuisia ti baa gɔɔlɔ waa ngi ma. Ngewɔ malikei mia ndeni ngi ma yɛ i bi loli ngi yeepɛlɛbu, aako i mɛni gbɔɔ ba nde.”

²³Pita i yeenungeisia loliilɔ ti wua pɛlei bu, i pie tia tieni ti yii na. Kia ngele i woni, i ngi magbateilɔ tia tieni ti li, tawao ngi mbaa Yesu mableisia nasia ti yɛ Jɔpa ti lɛɛngaa ti toilɔ ngi ma tia tieni ti li.

²⁴Folo wekei ma i foeilɔ Siisaria tawao i maleni Kɔniiliɔs tia ngi bondeisia kɛɛ ngi ndiamɔi nasia i ti lolini ta ngi mawulo.

²⁵Kia Pita i yɛ wuaama pɛlei bu, Kɔniiliɔs i wɛilɔ i ngi male, i mawɛɛ ngi gɔɔbu.

²⁶Kɛɛ Pita i pieilɔ Kɔniiliɔs i hiye, a ji i ndeni ngi ma yɛ, “Hiye bi lo ajifa nya bɛɛ nuuvu gbama lɔ a nge.”

²⁷Pita i loni yɛpɛmaa Kɔniiliɔs gama i wuaa pɛlei bu, i numu gboto male ti gomɛngɔ na.

²⁸I ndeilɔ ti ma yɛ, “Wua vulii wu kɔɔlɔ pandawanda Juuisia ti Yewɔ hindei i sawa lɛilɔ Juu gbi ma wuava kɛnyɛmɔ weka gbi yeepɛlɛbu ɔɔ tia ta ti hinda gbi wie. Kɛɛ Ngewɔ i kɛnga a nge kɛ maa ii houni ngi gili la kɛ numu gbi manɔhɔngɔe Ngewɔ yaama.

²⁹Famia kia bi numu loni nya lolima, ngi wɛilɔ ngii gangani. Nya na bi mɔlima, gbɛe bi numu loni nya lolima?”

³⁰Kɛ Kɔniiliɔs i ndenga yɛ, “Watii ji bonda yɛla kinɛiŋ, njii sawa i lewenga na, ngi yɛ nya yeepɛlɛbu lɔ nga Ngewɔ vɛli hawei yeesawei ma a kpɔkɔvolei. Ngi hindo yila lɔilɔ lekee i looni nya gulɔ, ngi magulɛi golengɔ, a voo.

³¹Kɛ i nya lolinga yɛ, ‘Kɔniiliɔs! Ngewɔ i bi hɛɛwoi mɛninga tawao kpekpeyei nasia ba pie i hitɛnga ngi wɛ.

³²Numu lo Jɔpa i taamɔ yila loli ngi laa yakpangɔi a Saimɔn Pita. Taa hotaya hu Saimɔn huakɔɔ yengemɔi yeepɛlɛbu gboyei gblanga.’

³³Famia ngi numu loni bi lolima kaakaa, tawao bi hinda yekpe waa wienga wava. Mu gbi lɔ na mbei Ngewɔ gulɔ mu mawuloma na gbi mɛniva Ndemɔi i hugɛnga a bie ndeva mu ma.”

³⁴ Pita i tɔtoilɔ a yɛpɛla yɛ, “Ngi kɔɔnga na kɛ Ngewɔ ɛɛ numu huwɔyɔ.

³⁵Numu gbi lekee a luwa ngi ma tawao a pɔɔna hindei wie, a ngi gululɔ, ngi gbewe gbi ii hu kɛnyɛ mɔi yeegbɛ lɔ a ngie.

³⁶Bi ngi woowili na gɔɔlɔ i njoyoni Isrɛlbleisia gama, a Ngowili Yekpei le ti ma kɔlooni ndiilɛli na ma numu a majɔɔ Yesu Kristi gbayei hu, Yesu na nuuvu gbi ti Lemɔi a ngie.

³⁷Bi hinda wai na gɔɔlɔ i wieni Isrɛl lɔlei hu gbi, i lɔto Galili, Jɔn numu wualei wooma.

³⁸Bi Yesu Nasalɛtimɔi hinda hugɔɔlɔ, kia Ngewɔ i ngi Yafei yeini ngi ma kɛɛ kpayei. I jɛsiɛlɔ hu gbi, a hinda yekpe wie, a nasia kpɛlɛɛ bawo Seitana i ti wuaanga ngi gbayei hu, ajifa Ngewɔ i yɛ ngi wooma lɔ.

³⁹Hindei kpɛlɛɛ i pieni Juuisia ti lɔlei hu kɛɛ Jelusalɛm, mua lɔ yeeselisia a mue. Ti ngi gbakpailɔ Krɔsii ma i lo na i haa.

⁴⁰Kɛɛ Ngewɔ pieilɔ i vulu i hiye hee hu lɔwɔi yeesawei ma,

⁴¹ii gɛni a numu kpɛlɛɛ kɛɛ i yɛlɔ a gɛ a mua lekee selisia a mue Ngewɔ i wilanga a loko lola wɔɔ mu ma. Mua tieni mu yɛlɔ a mɛhɛɛ mɛ, ma ndɔ gboli ngi hiyengɔi wooma hee hu.

⁴²Tawao i vɛlilɔ mu ma yɛ mu Ngowili Yekpei le nungaa ma, mu yaama mu seli wuaa kɛ ta lɔ Ngewɔ i loko longa ngi ma a kiti-lewemɔ fubleisia kɛɛ haableisia va.

⁴³Ngewɔ lutuisia gbi ti ngi yɛpɛ leilɔ tɛɛ numu gbi lekee a la a ngie Ngewɔ a manulɔ ngi jumbuisia ma ta ngi Yesu ngi sabui hu.”

⁴⁴Pita loni yɛpɛmaa kɛ Ngewɔ Yafei i yeinga nasia gbi ma ti yɛ wolo ngi layie ma.

⁴⁵Juu nasia ti langɔ yɛla a Yesu, tia Pita-ni ti gbuani Jɔpa ti wani, i gualɛilɔ ti ma tɔva Ngewɔ i ngi Yafei yei nasia bɛɛ ma Juublaa yaa tie.

⁴⁶Ajifa ti mɛnilɔ yeekɛnyɛblɛisia ta kɛnyɛyia wekeisia le, ta Ngewɔ wɔlɔla lato. Pita i yɛpɛilɔ ngeleya yɛ,

⁴⁷“Nungei jisia ti Ngewɔ Yafei majɔnga, kia lɔɔ mua bɛɛ mu pieni. Numu gbi a gulɔ na i ti wualaa hunyani?”

⁴⁸Kɛ i pienga ti ti wua Yesu Kristi biyɛi hu. Kɛ ti ndenga ngi ma tɛɛ tia tieni ti yii fele.