Read Ngowili Yekpei Numu Kpɛlɛɛ Va TOBLEISIA TI WIEHINDEISIA 11 Bible Online

TOBLEISIA TI WIEHINDEISIA 11 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 11

¹Tobleisia tia Yesu mableisia nasia ti yɛ Judia lɔlei hu gbi ti humɛniilɔ kɛ nasia Juu yaa tiaa bɛɛ ti langa a Ngewɔ layie.

²Kia Pita i lini Jelusalɛm, nasia ti yɛ nde tɛɛ mahoungɔ ti nasia Juublaa yaa tie hei biliya ti ngi magbuɛilɔ tɛɛ,

³“Bi hotaya mɛilɔ nasia gɔɔma Juublaa yaa tie tawao wua tieni wu yɛlɔ a loko hitɛ vulii mɛhɛɛ hu!”

⁴Faale Pita i tɔtoilɔ i na gbi hugɛ i wieni yɛ,

⁵“Ngi yɛ Ngewɔ vɛlima taa wai na hu ta toli a Jɔpa kɛ ngi henganga. Ngi hani lɔilɔ a gbua ngelegoohu a yei kia kula waa i na, bi tɔaa bɛɛ tiaa houni yeetɔɔhui naani ma ta njei, tawao i gɛlɛni nya gblanga lɔ.

⁶Ngi kohu gbeilɔ tiŋ kɛ ngi fuuhanisia lɔnga: gɔwɔnaaningaa kɛɛ ndalahaningaa kɛɛ ngelema ŋɔningɛisia.

⁷Kɛ ngi ngoo mɛninga a nde nya ma yɛ, ‘Hiye, Pita, bi ti waa bi ti mɛ!’

⁸Kɛɛ ngi ndeilɔ ngɛɛ, ‘Ngɛi na wie, Ndemɔi! Mɛhɛɛ gbi lekee mu jawei ndeni yɛ nɔhɔngɔe ɔɔ numu ɛɛ mɛ, ii yaa wɔɔ gba wuaani nya lɛi ji hu.’

⁹Ngoi i yɛpɛilɔ gbɔma a gbua ngelegoohu yɛ, ‘Hani na Ngewɔ ndenga yɛ sɛwɛsɛwɛngɔe, bia baa nde baa yɛma nɔhɔngɔe.’

¹⁰Ngewɔ i ji leni nya ma heima sawa kɛ ti kulei laalanga ti yaama la ngelegoohu.

¹¹Ngaamɛi na yakpe, kɛ hindo sawa ti ti loni nya gama ta gbua Siisaria, ti longa pɛlei na laa ngi yɛ na.

¹²Ngewɔ Yafei i ndeilɔ nya ma yɛ mua tieni mu li, ngaa ganga. Mu ndeengaa wɛitei jisia bɛɛ ti gbuɛilɔ Jɔpa mua tieni mu li Siisaria tawao mu gbi mu wuaani Kɔniiliɔs yeepɛlɛbu lɔ.

¹³I hugɛilɔ a mue kia malikei i gbuani la ngi yaama pɛlei bu, i nde ngi ma yɛ, ‘Numu lo Jɔpa i taamɔ yila loli, ngi laa yakpangɔi mia a Saimɔn Pita.

¹⁴A njɛpɛngaa hugɛlɔ a bie na a pie wua bi bondeisia wu bawo.’

¹⁵Tawao kia ngi lini na ngi tɔtoo a yɛpɛla, Ngewɔ Yafei i yeilɔ ti ma kia lɔɔ i yeini wɔɔ mu ma.

¹⁶ Kɛ Ndemɔi layia yila i hitɛnga nya wɛ, ji i ndeni yɛ, ‘Jɔn i yɛ nungaa wua a njɛi lɔ kɛɛ wua, ta wu wua a Ngewɔ Yafei lɔ.’

¹⁷I lailɔ ke kɛ Ngewɔ lɔ i mawaa hani yakpei na veni nasia wɛ Juublaa yaa tie i feni wɔɔ mu wɛ ji mu lani a Ndemɔi Yesu Kristi; gbɔɔ a nge nga gbekpa Ngewɔ gulɔ!”

¹⁸Kia ti ji mɛnini, ti gbeilɔ a ngi magbuala ti Ngewɔ lato tɛɛ, “Kɛ Ngewɔ i pele venga nasia bɛɛ wɛ Juublaa yaa tie wounveva ti jumbuisia ma ti bawo!”

¹⁹ Ngagbalɛma hindei nasia ti hitɛni la Yesu mableisia wooma Stivin waangɔi wooma i ti huvayailɔ. Ti lɛɛngaa ti liilɔ haaŋ ti foo Fonisia kɛɛ Saipɔs kɛɛ Antiɔk ta Ngowili Yekpei le Juuisia lekee ma.

²⁰Kɛɛ Yesu mablaa yeehingaa lɛɛngaa ti hiyeni Saipɔs kɛɛ Sairini ti liilɔ Antiɔk ti Ngowili Yekpei hugɛ a nasia bɛɛ Juublaa yaa tie kɔlooni Ndemɔi Yesu ma.

²¹Ndemɔi i yɛ ti wooma lɔ gbɔva ti ma tawao faha waa ti lɛilɔ a Ndemɔi ti wote ngi gama.

²²Yee hindei ji yee njɛpɛwo i foilɔ Yesu mablei nasia ma ti yɛ Jelusalɛm, kɛ ti Banabasi loonga Antiɔk.

²³Kia i foni na, i kpekpei na lɔ Ngewɔ i pienga a nungei nasia, ngi goohu i nɛɛlɔ waa; tawao i nɔɔilɔ ti ma yɛ ti la a Ndemɔi, ti lɔnya a ngie a ti lii gbi.

²⁴Numu yekpe mia wɔɔ a Banabasi, ngi langɔ a Ndemɔi tawao Ngewɔ Yafei i ngi hu. I pielɔ numu gboto ti wa Ndemɔi gama.

²⁵Na wooma Banabasi i liilɔ Taasɔs Sɔɔl gɔkɔlima.

²⁶Kia i ngi lɔni, i pieilɔ taa ta ti wa Antiɔk. Foo yila ndavengɔ kpauŋ va numu felei jisia ti yɛlɔ Yesu mableisia gama ta faha waa gaa. Antiɔk yese mia wɔɔ ti Yesu mableisia lolini na a Kristimableisia.

²⁷Yee watii na ma Ngewɔ lutu lɛɛngaa ti gbuailɔ Jelusalɛm ti li Antiɔk.

²⁸ Ngewɔ Yafei i pieilɔ numu yila, ngi laa a Agabɔs, i hiye i lo, i kulɔmayia le yɛ ndɔlɛ waa yɛkɛ i gula dunyei hu gbi. (Yee ndɔlei i gulani a watii na lɔ Klɔdiɔs i yɛni a Rom Maha Wai.)

²⁹Yesu mableisia ti hugbatɛilɔ tɛɛ numu gbi i na yoyo a gu ma gbɔva ti ndeengɛi nasia ma ti yɛ Judia.

³⁰Ti yeenavoi lɛilɔma, ti njooyo a Banabasi taa Sɔɔl Yesu mablaa yee kpakoleisia gama.