Read Ngowili Yekpei Numu Kpɛlɛɛ Va TOBLEISIA TI WIEHINDEISIA 12 Bible Online

TOBLEISIA TI WIEHINDEISIA 12 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 12

¹A watii na Mahɛi Hɛlɔd i tɔtoilɔ a kpalɛ lala Yesu mableisia lɛɛnga ma.

²I pielɔ ti Jɔn ndewei Jemisi waa a kɔbowei.

³Kia i tɔni kɛ ji nɛngɔe Juuisia wɛ, i gbɔma pielɔ ti Pita bɛɛ hou. Ji i wieni a Bledii Gbama Gomɛi yeewatii lɔ.

⁴ Ji ti Pita houni, ti ngi loko wuailɔ soja wu naani naani heima naani yeya ngi mahugbeva a tewei. I yɛ Hɛlɔd lii hu lɔ Pita lɛɛva Kotii hu ji Tewema Gomɛi a lewe.

⁵Faale ti Pita wuilɔ kpindiwɛlei bu, kɛɛ Yesu mableisia ti yɛlɔ a Ngewɔ vɛli waa ngi va.

⁶Kpindi na ngele i yɛ woma Hɛlɔd i wa a Pita numui gbi gama, Pita i yiini soja fele luahu lɔ. Ngi yilingɔ yɛla a jɔwɔ fele, yeengila yilingɔ sojei yeeji ma, yeepekei yilingɔ sojei yeena ma, tawao soja wekangaa ti yɛlɔ looni ta kpindiwɛlei yeendamɛi kɛɛ yeekatei yeendamɛisia manɛɛ.

⁷Pita i Ndemɔi malikei lɔilɔ lekee fulo i looni lomui na hu i yɛ na, kɛ foofo i voonga na. Malikei i loko wɛleilɔ Pita gbakima, i ngi jɛɛjia, i ngi wu yɛ, “Hiye kaakaa!” Ngaama kɛ jɔwɔisia ti vulonga Pita lokoisia ma.

⁸Kɛ malikei i ndenga yɛ, “Bi liayili, bi bi sipasiisia wuaa gɔwɔhu.” Pita i jisia wielɔ kɛ malikei i ndenga yɛ, “Bi bobani wu bi to nya ma.”

⁹Pita i toilɔ ngi ma ti gbua kpindiwɛlei bu. Na hu gbi, ii yɛ kɔɔ ina na malikei i piema tɔnya vulii le; i giliilɔ yɛ henga mia i piema.

¹⁰Ti leweilɔ sojei yeehaalayeisia ma. Ti lewe yeefelei ma kɛ ti gɛlɛnga kɔtu gata-laamɛi na ti ndawongaa ta li tei hu. Kata-laamɛi na i lawoilɔ ti gulɔ a ngi nyɛkɛ kɛ ti gbuanga. Ti yeilɔ a tiitii kɛ malikei i longahu fulo.

¹¹Pita i kɔɛilɔ na gbɔɔ i wienga kɛ i ndenga yɛ, “Ngi kɔɔnga na kɛ tɔnya vulii lɔ! Ngewɔ mia i ngi malikei loni tawao i nya bawonga Hɛlɔd gbayei yeya kɛɛ na kpɛlɛɛ i yɛ Juuisia nɛmahu pieva.”

¹²Kia i kɔɔni gbɔɔ vulii i wienga, i liilɔ Jɔn Maaki ngi nje Meri yeepɛlɛbu. Numu gboto ti gomɛngɔ yɛla na ta Ngewɔ vɛli.

¹³Pita i pɛlei laaleweilɔ kɛ nyahalo yila, ngi laa a Roda, i wanga tɔma ye mia.

¹⁴Kia i kɔɔni kɛ Pita mia, i leweilɔ a piimɛ i yaama pɛlei bu a kohunɛ waa, ii pɛlei vulii lawoni Pita gulɔ, i nde ngeleya yɛ Pita mia i looni pɛlei laa.

¹⁵Ti ndeilɔ ngi ma tɛɛ, “Bi gbowangɔe!” Kɛɛ i liigbɛilɔ hu yɛ tɔnya vulii le. Faale ti ndeilɔ tɛɛ, “Pita malikei mia.”

¹⁶Na hu gbi Pita yɛlɔ lekee a pɛlei laalewe. Kɛlɛmɛi ti pɛlei lawoilɔ tawao ji ti Pita lɔni i gualɛilɔ waa ti ma.

¹⁷I ndeilɔ ti ma a loko yɛ ti maa i yɛ louŋ, i hugɛ a tie Ndemɔi i yee ngi gbuani kpindiwɛlei bu. I ndeilɔ yɛ, “A ji hugɛ a Jemisi kɛɛ mu ndewe wekeisia. Kɛ i gbuanga i li hinda weka.”

¹⁸Kia ngele i woni, sojei nasia Pita loko i yɛ ti yeya ti wuhu i wuilɔ kpu tawao ti luwɛilɔ hulewengɔ; gbɔɔ i Pita wienga?

¹⁹Hɛlɔd ndeilɔ yɛ ti ngi gɔkɔli, kɛɛ tii ngi lɔni. Faale Hɛlɔd i sojeisia mɔlimɔlilɔ, i nde yɛ ti ti waa. Ji wooma Hɛlɔd i gbuɛilɔ Judia, i li i lɛmbi kulo Siisaria.

²⁰Hɛlɔd liilewengɔ waa yɛla nungei nasia ma ti yɛ Taya kɛɛ Saidɔn; faale ti liilɔ a ngoyila Hɛlɔd lɔva. Ti lapilɔ pɛiŋ ti gu Blastɔs ma i lewe ti wooma; tamia Mahɛi wɛlei loko i yɛ ngi yeya. Kɛ ti ya Hɛlɔd gama ti nde ngi ma tɛɛ tia tieni ti hugbatɛ ti hei ndiilɛli hu, taa yia, ajifa ti mɛhɛɛ a gbua Mahɛi nda lɔlei hu lɔ.

²¹Lɔwɔi na ma ta ngi Hɛlɔd i ndani, i maha-mayii waa wielɔ, i hei ngi maha-heimi, i yɛpɛ nungeisia gama.

²²Nungaa ti yɛlɔ a yelei gula tɛɛ, “Nuuvu yaa ji aa yɛ yɛpɛma, ngewɔɛisia yilayee mia!”

²³Ngaama kɛ Ngewɔ malikei i pienga Hɛlɔd i heegbɛ ajifa ii pieni nungeisia taa mbɛlɛhei ve Ngewɔ wɛ kɛ ta. Kpolingɛisia ti wuilɔ ngi hu, ti ngi mɛ, kɛ i haanga.

²⁴Ngewɔ yiɛi na Yesu mableisia ti yɛ nde i vayɛilɔ hu tawao nasia ti yɛ la la ti maa yɛlɔ lekee a to.

²⁵Banabasi taa Sɔɔl ti ti yengei na gbɔyɔilɔ ti wani piema kɛ ti gbuanga Jelusalɛm ti yaama Antiɔk, ti pie taa Jɔn Maaki-ni ti li.