Read Ngowili Yekpei Numu Kpɛlɛɛ Va TOBLEISIA TI WIEHINDEISIA 13 Bible Online

TOBLEISIA TI WIEHINDEISIA 13 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 13

¹Ngewɔ lutu lɛɛngaa kɛɛ kaamɔngaa ti yɛlɔ Yesu mablei nasia lia ti yɛ Antiɔk. Tia mia a Banabasi kɛɛ Simiɔn (ti yɛ toli a Tɛlimɔi) kɛɛ Lusiɔs (na i gbuani tei na hu ti yɛ toli a Sairini) kɛɛ Manaɛn (na tia Gɔvinei Hɛlɔd ti makɛni hinda yila) kɛɛ Sɔɔl.

²Kia lɛ ti yɛ hɛɛma Ndemɔi ma, ta sui hou, Ngewɔ Yafei i ndeilɔ ti ma yɛ, “A Banabasi taa Sɔɔl gbua wu ma ngengei na wieva ngi ti lolinga ma.”

³Ti sui houilɔ, ti Ngewɔ vɛli, ti ti lokoisia wɛlɛ ti wumba, ti gbe ti ma ti li.

⁴Kia Ngewɔ Yafei i vɛlini Banabasi tia Sɔɔl ma, ti yeilɔ Silusia, gboyei ma, ti wili njaya-lɛndɛ yila hu ti li tii na hu ta toli a Saipɔs.

⁵Kia ti foni Salamis, yeetii na hu, ti Ngewɔ yiɛi leilɔ nungaa ma Juuisia ti hɛɛ wɛleisia bu. Tia Jɔn Maaki-ni yɛla, a gbɔ ti ma yeengengei hu.

⁶Ti jiɛilɔ ti tii blandia ti li Pafɔs, ti njosololimɔ yila male na ngi laa a Baa Yesu, Juumɔ a ngie tawao a nde yɛ Ngewɔ lutu mia a ngie.

⁷Tii na yeegɔvinei Sagiɔs Pɔɔlɔs nɛmahu lewengɔ yɛla tawao ngi ndiamɔi mia wɔɔ a Baa Yesu ji. Gɔvinei i Banabasi tia Sɔɔl loliilɔ ti wa ngi gama ajifa ngi longɔ i Ngewɔ yiɛi mɛni a tie.

⁸Kɛɛ njosoloolimɔi, Ɛlimas (ngi biyɛi mia Glikiyiɛi hu), i jɔlɛilɔ ti layie hu a lapi pieva Gɔvinei aa la a Yesu.

⁹Kɛ Ngewɔ Yafei i yeinga Sɔɔl ma — ta ngi loli gbɔma a Pɔɔl; i yaama gbakpailɔ njosololimɔi ma

¹⁰yɛ “Bi Seitana goohu loi! Bi juwuyangɔe a hinda yekpe gbi; hinda nyamu laasii kpɛlɛɛ wiela lɔ kungɔ bi hu, tawao biaa lapima Tuuŋ Ndemɔi lɔnyɛisia woteva a ndɛɛ!

¹¹Ndemɔi i loko wɛlɛma bi ma kiahuna; ba wumulɔ, bɛɛ gu a foloi yeefofoi lɔla watii lɛɛnga va.” Ngaama kɛ lugbu lɛilɛi i wɛlɛnga ngi yaama, a lewe a hɔwɔhɔwɔ hu, a numu gɔli houva ngi lokoi ma i pele gɛ a ngie.

¹²Kia Gɔvinei i na lɔni i wieni, i lɛilɔ a Yesu, kaa na ti ngi gaani la kɔloongɔ Ndemɔi ma i ngi yama houilɔ waa.

¹³Pɔɔl tia ngi mbaangɛisia ti gbuɛilɔ Pafɔs ndɛndɛi hu ti wa Paaga, Pamfilia lɔlei hu; kɛɛ Jɔn Maaki i ti loni na lɔ i yaama Jelusalɛm.

¹⁴Ti gbuɛilɔ Paaga ti wa Antiɔk yeena i Pisidia lɔlei hu, tawao Ndɛvu Volei ma ti wuailɔ hɛɛ wɛlei bu ti hei.

¹⁵Kia hɛɛ wɛlei bu mahubleisia ti kpɔyɔni a Mojisi Jawei gaala kɛɛ Ngewɔ lutuisia ti gɔlɔ nyɛingɔisia, ti ngowili wililɔ Pɔɔl tia Banabasi gama tɛɛ, “Mu ndewengeisia, mu longɔ wu yɛpɛ nungeisia gama ina ngowili lɔ wu laa ti lii vuluva.”

¹⁶Pɔɔl i hiyeilɔ i lo, i ngi lokoi lɛnga aako hu i yɛ louŋ, i tɔtoo a yɛpɛlaa yɛ, “Mu mbaa Juuisia kɛɛ nasia Juublaa yaa tie wu mbei wa Ngewɔ vɛli, a wolo nya ma.

¹⁷ Isrɛlbleisia jisia ti Yewɔɛi i loko loilɔ mu maadani ma, i yeenungeisia wote a kɛnyɛ waa watii na ti yɛ heini hotaya hu Ijipt lɔlei hu. Ngewɔ i ti gbuɛilɔ Ijipt a ngi gbaya wai,

¹⁸ tawao i ngi lii houilɔ ti va ndɔgbɔ lambɛi ma foo numu fele gbɔyɔngɔ va.

¹⁹I kɛnyɛ wɔfla nyanilɔ Kenaan lɔlei hu i yeendɔlei ve ngi nda nungeisia wɛ

²⁰foo hɔndɔɔ naani kaalɛ numu fele gbɔyɔngɔ maahu puu nyɔkɔ va. “Na wooma Ngewɔ i samanga veilɔ ti wɛ lova ti gulɔ haaŋ i to Ngewɔ lutui Samuɛl watii ma.

²¹Tawao watii na ti wɔɔni maha va, Ngewɔ i Sɔɔl veilɔ ti wɛ, kenɛi Kis loi, Bɛnjami bondei humɔ, yɛva a ti mahɛi foo numu fele gbɔyɔngɔ va.

²²Ji Ngewɔ i pieni Sɔɔl i gbua mahayɛi ma, i Devidi lɔ yɛni a ti mahɛi. Ngewɔ i ji lɔ leni kɔlooni Devidi ma yɛ, ‘Ngi tɔnga kɛ Devidi, Jɛsi loi, i yɛni a numu laasii na lɔ nya longɔ la, numui na a na wie nya longɔ i pie.’

²³Yesu yɛla, Devidi bɔɔsɔɛi, Ngewɔ i ngi yɛni a Isrɛlbleisia ti bawomɔi kia wɔɔ i Lahei wumbuni la pieva.

²⁴ Pɛiŋ Yesu i yaa ngi yengei lɔto, Jɔn i Ngewɔ yiɛi leilɔ Isrɛlbleisia gbi ma yɛ ti wounve ti jumbuisia ma, i ti wua.

²⁵Tawao kia Jɔn i yɛ ngi yengei gbɔyɔma, i ndeilɔ nungeisia ma yɛ, ‘Wu langɔ la ye lɔ a nge? Numui na wu ngi mawuloma ta yaa a nge. Kɛɛ a wote mbei! Taa wama nya wooma tawao ngii gbekpeni ngi sipasiisia vulii gbuava ngi gɔwɔhu.’

²⁶“Nya ndeengɛisia, Ebraham leengeisia kɛɛ wua kpɛlɛɛ wu mbei Juublaa yaa wue wa Ngewɔ vɛli: Ngewɔ i ngowili ji yoyonga mua lɔ gama kɔlooni ngi numu bawoyii ma!

²⁷Ajifa nungei nasia ti heini Jelusalɛm tia ti lokulɔisia tii kɔɔni kɛ ta lɔ mbawomɔi le, tawao Ngewɔ lutuisia ti layie nasia ta kaa Ndɛvu Volo gbi ma, tii yeembui gɔɔni. Na hu gbi ti pielɔ Ngewɔ lutuisia ti laayiɛisia i bɛma ji ti Yesu lɛɛni, ti pie ti ngi waa.

²⁸ Tawao kia bɛɛ tii sabu gbi majɔɔni kiti leweva ngi waala ma ti Paileti manɛnɛilɔ tɛɛ i pie ti ngi waa.

²⁹ Tawao kia ti kpɔyɔni a na gbi wiela Ngewɔ Gɔlɛi ndeni kɔlooni ngi ma, ngi ndiamɔisia ti ngi womɛi gbuɛilɔ krɔsii ma ti nda kambɛi hu.

³⁰Kɛɛ Ngewɔ pieilɔ i vulu i hiye hee hu,

³¹tawao lɔwɔ gboto va i yɛlɔ a gɛ a nasia ngi vulungɔihu tia tieni ti yɛ jia ta gbua Galili ta li Jelusalɛm. Tia mia na ngi jelisia a tie Isrɛlbleisia gama.

³²Tawao mua mbei aako mu wa a Ngowili Yekpei wu gama: na Ngewɔ i Lahei wumbuni mu maadani gama yɛ a pie, i pienga na mu wɛ, mua ti leengeisia a mue, a ji i pieni Yesu i vulu i hiye hee hu. Kia Ngewɔ layie nyɛingɔ la Juuisia ti Wulei yeefele Gɔlɛi hu yɛ, ‘Nya Hindoloi lɔ a bie; foloi ji lɔ ngi yɛnga a bi Kɛkɛ.’

³³

³⁴Ji lɔ Ngewɔ i ndeni kɔlooni Yesu wumbulei ma hee hu tawao kunafɔ aa gbɔma haa yɛ, ‘Nga bi lubalɔ a nya lubɛi na ngi Lahei wumbuni faa Devidi gama.’

³⁵Kia lɔɔ i ndeni la ngule wekei hu yɛ, ‘Bɛɛ luma bi bɔilopo lɔnyangɔi aa haa aa lula.’

³⁶Ajifa Devidi i Ngewɔ liima hindeisia wielɔ ngi nda watii ma; kɛ i haanga, ti ngi gbɔwu ngi maadani gbla, i lula.

³⁷Kɛɛ numui na Ngewɔ i pieni i vulu i hiye hee hu ii loni kambɛi hu tawao ii lulani.

³⁸Nya ndeengɛisia, mahoungɔe wu gbi wu kɔɔ vulii kɛ Yesu wiehindei wooma lɔ mu Ngowili ji lema wu ma kɔlooni manuma ma jumbui va; maahoungɔ wu kɔɔ kɛ numu gbi lekee a la a ngie a gbualɔ jumbui yeenjiɛi na kpɛlɛɛ hu Mojisi Jawei ɛɛ gu i wu gbua hu.

³⁹

⁴⁰A wu mahugbe hɔɔ aako na aa wu wie Ngewɔ lutuisia ti ndeni tɛɛ,

⁴¹‘A wote mbei, wua wu lɛɛngɔ Ngewɔ layie hu! wu wuhu i wu, wu haa! Ajifa ngengei ji ngi piema wu voloima i yɛni a hinda lɔ wɛɛ la la, numu i fasai bɛɛ wu ma!’ ”

⁴²Kia Pɔɔl tia Banabasi ti yɛ gbuama hɛɛ wɛlei bu, nungeisia ti ndeilɔ ti ma tɛɛ ti wa gbɔma Ndɛvu Volei yeepekei ma ti hindei jisia mato hugɛ a tie.

⁴³Kia nungeisia ti vayani hɛɛ wɛlei bu, Juu gboto ti toilɔ ti ma kɛɛ nasia Juublaa yaa tie ti wotenga kpɔtu a Juungaa. Pɔɔl tia Banabasi ti yɛpɛilɔ ti gama ti nɔɔ ti ma lii falava Tuuŋ Ngewɔ gbekpeyei ma.

⁴⁴Ndɛvu Volei yeepekei ma numui gbi jɔngɔ tei hu ti wɛilɔ Ndemɔi yiɛi mɛniva.

⁴⁵Kia Juuisia ti fahiisia lɔni, tolei i ti lii laveilɔ; ti yɛlɔ a njɛpɛi na magbua Pɔɔl i yɛ nde, ta ngi yɛli.

⁴⁶Kɛɛ Pɔɔl tia Banabasi ti yɛpɛilɔ a ndiilo waa tewengɔ yeengovei ma tɛɛ, “Mahoungɔ yɛla Ngewɔ yiɛi i le wua yese ma. Kɛɛ kia wu gbelenga ma tawao wuii gilini la kɛ wu gbekpengɔe kunafɔ lɛɛvui va, ma gbelɔ wu ma mu li nasia gama Juublaa yaa tie.

⁴⁷ Gbamaile sawei a ji lɔ Ndemɔi i fenga mu wɛ yɛ, ‘Ngi wu yɛnga a foofo nasia va Juublaa yaa tie, wu yɛ a sabu dunyei gbi ti mbawo jɔɔ.’ ”

⁴⁸Ji nasia Juublaa yaa tie ti ji mɛnini, ti goohu i nɛɛlɔ, ti Ndemɔi woowili lato; tawao nasia Ngewɔ i loko loni ti ma ti bawova ti lɛilɔ a Yesu.

⁴⁹Ndemɔi woowili i vayɛilɔ tatei na hu gbi.

⁵⁰Kɛɛ Juuisia ti pieilɔ tei na yeekpakoloisia kɛɛ nasia Juublaa yaa tie yeenyaha gbatɛngɔi nasia ti yɛ Ngewɔ vɛli ti lii i lewe Pɔɔl tia Banabasi ma. Ti tɔtoilɔ a ti yakpɛla a nyamu, ti pie ti gbua tatei na hu gbi.

⁵¹ Toblei jisia ti fufulei gbukpulɛilɔ gɔwɔma kɛva kɛ ti gbahailɔ taa wai na hubleisia ma wounvevaa ti jumbuisia ma, kɛ ti ya Aikoniɔm.

⁵²Yesu mablei nasia ti yɛ Antiɔk ti goohu i nɛɛlɔ hulewengɔ tawao Ngewɔ Yafei i yɛlɔ waa ti wooma.