Read Ngowili Yekpei Numu Kpɛlɛɛ Va TOBLEISIA TI WIEHINDEISIA 14 Bible Online

TOBLEISIA TI WIEHINDEISIA 14 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 14

¹Hinda yakpei ji lɔ i wieni Aikoniɔm: Pɔɔl tia Banabasi ti liilɔ Juuisia ti hɛɛ wɛlei bu ti yɛpɛ na na hii ti yɛpɛwoi i pie faha waa, Juublaa kɛɛ nasia Juublaa yaa tie, ti wote a Yesu mablaa.

²Kɛɛ Juu nasia ti gangani a lala a Yesu ti pieilɔ nasia Juublaa yaa tie ti lii i lewe, ti yeendilewei wote Yesu mableisia maahu.

³Tobleisia ti lɛmbilɔ na lɔwɔ huguhangɔ va. Ti yɛlɔ a yɛpɛ a ndiilo kɔloongɔ Ndemɔi Yesu ma, tawao ta ngi Ndemɔi kɛilɔ kɛ tɔnya lɔ a na ti yɛ nde kɔloongɔ ngi gbekpeyei ma a ji i kpaya wuaani ti hu kabande hinda waawangaa wieva.

⁴Taa wai na hubleisia gbi ti blɛilɔ: ti lɛɛngaa ti Juuisia wooma, yeenasia ti tobleisia wooma.

⁵Kɛ nasia Juu yaa tie tia Juuisia kɛɛ ti lokulɔisia ti hugbatɛnga nyamuva a tobleisia tawao ti ti hɔwɔhɔwɔ.

⁶Kia tobleisia ti ji hugɔɔni, ti wilɛilɔ ti li Listra kɛɛ Daabi, Likaonia lɔlei hu, kɛɛ tatei na i yɛ tei jisia galangɔ.

⁷Na lɔ ti Ngowili Yekpei leni na kɔlooni Ndemɔi Yesu ma.

⁸Taamɔ yila yɛlɔ Listra ngi gɔwɔisia ti gbɔkpɔngɔ; hii i yɛ na ti ngi leni tawao ii yaa guni wɔɔ gba a jiala.

⁹I yɛ heini na lɔ a wolo Pɔɔl layieisia ma. Pɔɔl tɔilɔ kɛ ngi langɔe a Yesu tawao a gulɔ i bawo, faale i yaama gbakpailɔ ngi ma

¹⁰i nde ngi ma ngeleya yɛ, “Hiye bi lo leeŋ!” Taamɔi i hiyeilɔ sa i tɔtoo a jiala nahui na.

¹¹Kia fahii ti na lɔni Pɔɔl pieni, ti tɔtoilɔ a yelei gulala Lakaonia yiɛi hu tɛɛ, “Ngewɔisia ti wotenga a nuuvungaa ti yeinga mu gama!”

¹²Ti Siɔs biyɛi veilɔ Banabasi wɛ, ti Hamis biyɛi ve Pɔɔl wɛ, ajifa Pɔɔl mia i yɛ ti yɛpɛi le.

¹³Ti yewɔɛi Siɔs na ngi hɛɛ wɛlei i yɛ looni tei gbla yee saagbuamɔi i wɛilɔ a nika hinangaa kɛɛ flawaisia tei yeekatei laa. Ta kɛɛ fahii ti longɔ yɛla ti saa gbua tobleisia ma.

¹⁴Kia Banabasi tia Pɔɔl ti mɛnini gbɔɔ nungaa ti longɔ ti pie, ti ti magulɛisia blɛilɔ ti wa fahii lia a piimɛ ta yelei gula tɛɛ,

¹⁵ “Nungeisia, gbɛe wu ji wiema? Hiingaa gbama lɔ a mue, nuuvungaa kia wu na! Mu wanga mbei Ngowili Yekpei lɔ hugɛma a wue kɔlooni Ndemɔi Yesu ma, mu pie wu wounve baaba hani jisia ma wu wote Ngewɔ vulungɔi gama, na i ngelegoohu gbatɛni kɛɛ dunya kɛɛ gboyei kɛɛ hanii na kpɛlɛɛ i ti hu.

¹⁶Wɔɔ, i gbeilɔ kɛnyɛblaa gbi ma ti li a ti nda weleisia.

¹⁷Kɛɛ taa wɔɔ gba ngi hinda hugɛma leeŋ a kpekpei nasia a pie: a njɛi ve mu wɛ a gbua ngelegoohu, tuhanisia ta wua ti watiisia ma; a mɛhɛɛ ve wu wɛ, i pie wu goohu i nɛɛ waa.”

¹⁸Njɛpɛi ji kpɛlɛɛ tobleisia ti ndeni kpaukpaungɔ yɛla pieva fahiisia ti loko gbua saa gbualei hu ti ma.

¹⁹Juu lɛɛngaa ti wɛilɔ ta hiye Antiɔk na i Pisidia, kɛɛ Aikoniɔm; ti guilɔ fahiisia ma ti lewe ti wooma, ti Pɔɔl hɔwɔhɔwɔ, ti ngi gɛndɛ ti ngi gbua tei hu, ta tɔ tɛɛ i haanga.

²⁰Kɛɛ kia Yesu mableisia ti yandɔni ti ngi gaala, i hiyeilɔ i yaama tei hu. Kia ngele i woni tia Banabasi ti liilɔ Daabi.

²¹Pɔɔl tia Banabasi ti Ngowili Yekpei leilɔ Daabi, ti gu numu gboto ma yɛva a Yesu mablaa. Kɛ ti yamanga Listra, ti lewe ti li Aikoniɔm, ti gbɔma lewe ti li Antiɔk, Pisidia lɔleihu.

²²Ti kpaya wuailɔ Yesu mableisia hu, ti ti liilo lova kpaŋ, taa gbaha a lala a Yesu. Ti yɛlɔ a ti gaa tɛɛ, “Kpundɛ gboto mia ma huvo huɛɛŋ aako mu wuaa Ngewɔ mahayɛi hu.”

²³Yesu mablaa kpɛlɛɛ ti yɛ heini taa yila hu, Pɔɔl tia Banabasi ti loko loilɔ kpakoleisia ma ti va; tawao kia ti Ngewɔ vɛlini, ti sui hou, ti ti loko wuailɔ Ndemɔi yeya, na ti liivalanga ngi ma.

²⁴Kia ti Pisidia lɔlei vooni, ti wɛilɔ Pamfilia.

²⁵Ti Ngowili Yekpei leilɔ Paaga kɛ ti yeinga Atelia,

²⁶ti gbua na ti wili njaya-lɛndɛi hu ti yaama Antiɔk, mia wɔɔ ti ti loko wuaani na Ngewɔ yeya ti mahugbeva ngengei na va ti kpɔyɔnga na.

²⁷Ji ti foni Antiɔk ti Yesu mableisia kpɛlɛɛ lɛilɔma, ti gona ti ma a na gbi Ngewɔ i pieni a ti loko, kɛɛ ji i pelei lawonga nasia wɛ Juublaa yaa tie lava a Ndemɔi Yesu.

²⁸Ti ngalu gboto gbɔyɔilɔ na tia Yesu mableisia.