Read Ngowili Yekpei Numu Kpɛlɛɛ Va TOBLEISIA TI WIEHINDEISIA 17 Bible Online

TOBLEISIA TI WIEHINDEISIA 17 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 17

¹Ti jiɛilɔ ti li yakpe ti Amfipɔlis blandia kɛɛ Apolonia, ti wa Tɛsalonika, Juuisia ti hɛɛ wɛlei i yeetei na hu.

²Kia kungɔ yɛla Pɔɔl hu, i liilɔ yeehɛɛ wɛlei bu tawao Ndɛvu Volo sawa va i yɛlɔ a Ngewɔ Gɔlɛi gaa na tia nungeisia ta yɛpɛ kɔlooni na ma i yɛ kaa,

³a yeembui gɛ a tie, a yeemiasia gɛ ndengɔ na ngovama kɛ mahoungɔ yɛla kpalɛ i la Ngewɔ Maha Heingɔi ma, i vulu i hiye hee hu. Pɔɔl ndeilɔ yɛ, “Yesu ji ngi ngi hinda hugɛma a wue na, ta lɔ Ngewɔ Maha Heingɔi le.”

⁴Ti lɛɛngaa ti lɛilɔ la kɛ na Pɔɔl ndeni tɔnya le, ti lewe Pɔɔl tia Sailas wooma; hii Glikiblaa gboto, Ngewɔ vɛliblaa a tie, ti pieni kɛɛ mbɛɛma nyahangaa gboto.

⁵Kɛɛ Juuisia ti tolo gbuɛilɔ ji numu gboto bondei na ti lani a Pɔɔl, ti taitaiblaa gbaamɛisia lɛma hinda yila ti wote a faha wufulongɔ waa. Ti sɔlɛ waa gulɛilɔ taa wai hu gbi, ti tɔtoo a Jeesin wɛlei nyanila aako ti Pɔɔl tia Sailas lɔ, ti gbua a tie nungeisia gama.

⁶Kɛɛ kia tii ti lɔni, ti Jeesin gɛndɛilɔ kɛɛ Yesu mablaa wekangaa lɛɛnga ti li a tie taa wai yeemahangeisia gama ta yelei gula tɛɛ, “Nungɛi jisia ti kpundɛ gulanga hu gbi! Ti wanga na mu laa wai ji hu,

⁷Jeesin i ti lɔwunga ngi wɛlei bu. Ti gbi tiaa Rom Maha Wai jaweisia nyanima, ta nde tɛɛ maha weka lɔ na ngi laa a Yesu.”

⁸Kia ti ji leni, ti pieilɔ fahii gbi kɛɛ taa wai yeemahangeisia ti sɔlɛ waa gula.

⁹Mahangeisia ti pielɔ Jeesin tia yeepekeisia ti navoei na ve mahoungɔ ti fe gbeva ti ma, kɛ ti gbenga ti ma ti li.

¹⁰Kia lekee kpindi i wɛlɛni, Sɔsiibleisia gbi ti yɛ Tɛsalonika ti Pɔɔl tia Sailas yoyeilɔ Beria. Kia ti foni, ti liilɔ Juuisia ti hɛɛ wɛlei bu.

¹¹Beriablɛisia tia ti lumangɔ yɛla wolova Pɔɔl-ni ma i lewe Tɛsalonikablɛisia ma. Mani wa yɛlɔ ti ma Ngowili Yekpei na mɛniva i Pɔɔl laa, tawao folo gbi ti yɛlɔ a Ngewɔ Gɔlɛi gaa pandawanda tɔvaa ina na Pɔɔl i yɛ nde tɔnya vulii le.

¹²Ti gbotongɔ ti lɛilɔ a Ndemɔi Yesu, tawao Gliki nyaha gboto, mbɛɛmablaa a tie kɛɛ Gliki hindo gboto bɛɛ ti lɛilɔ a Ngewɔ layiɛi.

¹³Kɛɛ kia Juu nasia ti yɛ Tɛsalonika ti mɛnini kɛ Pɔɔl i Ngewɔ yiɛi lenga Beria bɛɛ, ti wɛilɔ na ti tɔtoo a sɔlɛ gulablɛisia ti lii gbemgbala.

¹⁴Kɛ Sɔsiibleisia ti Pɔɔl yoyonga gboyei gbla, kɛɛ Sailas tia Timoti ti veenjɔɔ ti loilɔ Beria.

¹⁵Hingɛi nasia ti lini a Pɔɔl, tia tieni ti liilɔ ti foo Atɛns. Kɛ ti yamanga Beria, Pɔɔl i vɛli ti ma yɛ Sailas tia Timoti ti lapi ti humbu a wa ngi gama.

¹⁶Ji Pɔɔl i yɛ Sailas tia Timoti mawuloma Atɛns, ngi lii i nyanilɔ waa ji i liiheini ma kɛ tei lavengɔe a nɔmɔliisia.

¹⁷Faale ti njɛpɛ gboto leilɔ kɔlooni Yesu ma hɛɛ wɛlei bu tia Juuisia kɛɛ nasia Juublaa yaa tie ti yɛ Ngewɔ vɛli, a gbɔma yɛpɛ folo gbi faha gomɛmɛi tia nasia ti yɛ a wa na.

¹⁸Ɛpikiurɔs tia Toɛk ti woomableisia yeekaamɔ lɛɛngaa tia bɛɛ tia Pɔɔl-ni ti mawali gboto houilɔ. Ti lɛɛngaa ti ndeilɔ tɛɛ, “Taamɔi ji ii gbɛogbɛ gɔɔ kɛɛ a kɛ kɛ ngi gaangɔ waa le; gbɔɔ i lapima ndeva mu ma?” Pekeisia ti ndeilɔ tɛɛ, “Bi tɔaa bɛɛ kɛnyɛ wekangaa ti yewɔngaa mia i yɛpɛma kɔloongɔ ti ma.” Ti ji kpɛlɛɛ leilɔ ajifa Pɔɔl i yɛ Ngowili Yekpei le kɔlooni Yesu ma kɛɛ ji i vuluni i hiye hee hu.

¹⁹Faale ti pieilɔ tia tieni ti li ngiyei Ariɔpagɔs wumba, mia taa wai yeetokuloisia ti gomɛngɔ yɛla na ti nde tɛɛ, “Mu longɔ mu kaa ninɛi ji gɔɔ bi yɛpɛma kɔlooni ma.

²⁰Njɛpɛi lɛɛnga ma mɛni ba nde muii yaa wɔɔ gba mɛnini tawao mu longɔ mu yeembui gɔɔ.”

²¹(Ajifa Atɛns yeetaalisia kɛɛ nasia Juublaa yia tie ti heini na ta ti magbewe nyanilɔ hinda ninɛi na i gɛlɛnga ma a wiela, ti mɛni ɔɔ ti hugɛ a ti nyɔunyɔ.)

²²Faale Pɔɔl i hiyeilɔ i lo numui na gbi gulɔ ti gomɛngɔ yɛla Ngiyei Ariɔpagɔs wumba yɛ, “Atɛnsiblɛsisia! Ngi tɔnga kɛ wa wu yewɔɛisia hinda madi houlɔ waa.

²³Ajifa ji ngi yɛ jiama wu laa wai ji hu nga miasia gbe wa hɛɛ na, ngi saa gbuama yila lɔilɔ nyɛingɔ ma tɛɛ, ‘Ngewɔ na gama numu ii ngi gɔɔ.’ Kɛ Ngewɔ na hɔɔ wu hɛɛma ngi ma tamia ngi ngi hinda hugɛma na a wue.

²⁴ Ngewɔ na i dunyei gbatɛni kɛɛ hani gbi i hu, ta lɔ ngelegoohu kɛɛ dunya yee Ndemɔ le, tawao ii heini hɛɛ wɛlɛngaa bu nuuvungaa ta to.

²⁵Tawao ii gbeweni hinda gbi va nuuvungaa ta gu a piela ngi wɛ ajifa ta vulii lɔ a ndɛvui ve numui gbi wɛ kɛɛ fɛfɛi kɛɛ hani wekeisia gbi.

²⁶Numu yakpei lɔ i kɛnyɛi kpɛlɛɛ yeenuvuisia gbuani ngi hu, i pie ti vaya dunyei hu gbi. Ta vulii lɔ i loni kulɔma i lɔwɔisia la i ndɔlei yeengila gbi va kɛɛ ngi heimisia ti gɛlɛyii.

²⁷I ji wieilɔ aako ti ngi gɔkɔli, tawao tɛngaa ti ngi lɔ ji ta yɛ hɔwɔhɔwɔmahu aako ti ngi lɔ. Kɛɛ Ngewɔ maa ii guhani vulii a mu yilayee bɛɛ;

²⁸Kia numu yila i ndeni la yɛ: ‘Tamia a pie mu vulu, mu lewetewe, mu yɛ na.’ Wu wule nyɛiblɛisia lɛɛngaa bɛɛ ti ndeilɔ tɛɛ, ‘Mu kpɛlɛɛ ngi leengeisia lɔ a mue.’

²⁹Faale jifa Ngewɔ leengeisia mia a mue maa ii houni mu gili la kɛ ngi yɛyii gbuangɔ a nɔmɔli lɔ kpatɛngɔ a kanigbɔlu ɔɔ kanigole ɔɔ kɔtu, magbatɛngɔ a mbɛli-loko.

³⁰Ngewɔ i punga lii hu manuva nungaa ma nyamui na va ti pieni watii na tii yɛ hugɔɔ, kɛɛ kiahuna na taa ndema numui gbi ma dunyei hu gbi yɛ ti wounve pele nyamui nasia ma ti jiama wɔɔ la.

³¹Ajifa i lɔwɔ langa a dunyablaa gbi gbɛmbo ma tawao i loko longa numu yila ma yeekpɛmboi va. I ji yeetɔmaseli gɛnga a numui gbi a ji i pieni yeenumui i vulu i hiye hee hu!”

³²Ji ti mɛnini Pɔɔl i lali numu hiyelei ma hee hu, ti lɛɛnga ti yɛlɔ a hɛlɛ ngi ma, kɛɛ pɛkɛisia ti ndeilɔ tɛɛ, “Mulongɔe mu njɛpɛi ji mato mɛni gbɔma bi laa.”

³³Hii ti gɛlɛni kɛ Pɔɔl i gbuanga komɛi hu.

³⁴Numu lɛɛngaa ti leweilɔ ngi wooma ti la a Yesu; Dayɔnisɔs, taa wai yeekpakoloisia yilayee, i yɛ ti lia lɔ kɛɛ nyaapo yila ngi laa a Damaris kɛɛ pekangaa.