Read Ngowili Yekpei Numu Kpɛlɛɛ Va TOBLEISIA TI WIEHINDEISIA 2 Bible Online

TOBLEISIA TI WIEHINDEISIA 2 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 2

¹ Ji foloi na ti yɛ toli a Pɛntikɔsti i hitini sɔ, nasia kpɛlɛɛ ti langɔ yɛla a Yesu ti yɛ hinda yakpe lɔ.

²Ngaama kɛ ti sɔlɛwoo mɛninga ngelei ma kia vivii vɛfɛ gbayangɔ waa a yɛ vɛma, yeesɔlɛwoi i gu pɛlei bu gbi.

³Kɛ ti hani lɔnga kia ngɔmbuvo mumungaa, ti gbuangɔ a numu nɛi. Yeenɛisia ti hu i voomboilɔ yeengila gbi i hei numu yila ma.

⁴Ngewɔ Yafei i ti gbi laveilɔ, kɛ ti tɔtonga a kɛnyɛyia wekeisia humɛnila, ta nde, kia Ngewɔ Yafei i kpaya wuaani ti hu pieva.

⁵Juungaa ti yɛlɔ heini Jelusalɛm Ngewɔ hinda madi houblaa a tie, ta gbua kɛnyɛi gbi hu dunyei hu.

⁶Ji ti sɔlɛwoi ji mɛnini, faha waa ti lɛilɔma. Ti wuhu i wuilɔ kpu ajifa numui gbi i mɛnilɔ nasia ti langɔ a Yesu ta ngi gɛnyɛyiɛi le.

⁷Ti wuhu wungɔ yɛla, ti kitingɔ, kɛ ti ndenga tɛɛ, “Nungɛi jisia gbi ti yɛpɛma hii, Galiliblɛisia mia a tie!

⁸Gbɛe na ta yɛpɛ mu gbi mu gɛnyɛyiɛisia hu ma mɛni?

⁹Paatiablɛisia lɔ mbei kɛɛ Midiableisia kɛɛ Ilamblɛisia kɛɛ Mesɔpɔtemiableisia kɛɛ Judiablɛisia kɛɛ Kapadosiablɛisia kɛɛ Pɔtɔsblɛisia kɛɛ Esiablɛisia

¹⁰kɛɛ Frijiablɛisia kɛɛ Pamfiliablɛisia kɛɛ Ijiptblɛisia kɛɛ nasia ti gbuani Libia yeetatei na hu i tei na gblanga ta tolia Sairini. Numui lɛɛngaa ti gbuanga Rom lɔ,

¹¹Juungaa kɛɛ kɛnyɛblaa wekei nasia ti Juu Yewɔ Hindei guluni; tawao numui lɛɛngaa ti gbuanga Kliti lɔ kɛɛ Arebia na hu gbi mu kpɛlɛɛ lɔ mɛnima ta yɛpɛ mu gɛnyɛyiɛisia hu kɔlooni hinda waawai nasia ma Ngewɔ i pienga!”

¹²Jifa ti wuhu wungɔ yɛla, ti kitingɔ, ti yɛlɔ lekee a ti nyɔunyɔ mɔli tɛɛ, “Ji kpɛlɛɛ yeembui a gbɔɔ?”

¹³Kɛɛ nungaa lɛɛngaa ti yɛlɔ a Yesu womableisia gbafa tɛɛ, “Ndɔhou mia i nungei jisia ma.”

¹⁴Kɛ Pita i hiyenga i lo toblaa puu maahu yileisia lia i tɔtoo a yɛpɛlaa ngeleya fahii gama yɛ, “Nya mbaa Juuisia, kɛɛ wu gbi wu heini Jelusalɛm, a wolo pandawanda nya ma ngi ji yeembui gɛ a wue.

¹⁵Ndɔhou gbi ii nungei jisia ma kia wu gilima la, jifa ngenda-volei hulɔ gbama.

¹⁶Tɔnyɛi a ji lɔ kɛ ji i wienga tamia wɔɔ Ngewɔ lutui Joɛl i yɛpɛni kɔlooni ma yɛ,

¹⁷ ‘Ngewɔ yɛ, Nga ji lɔ wie kɛlɛma voleisia ma: Nga nya Yafei yeilɔ nungeisia kpɛlɛɛ ma. Wu hingaleengeisia kɛɛ wu nyahaleengeisia ta nya layie lelɔ; wu gɔngɛisia ta hindangaa hulɔlɔ, tawao wu gena woveisia ta hengangaa wielɔ.

¹⁸A tɔnya nga nya Yafei yeilɔ nya bɔilopoisia vulii bɛɛ ma, yeehingaa kɛɛ yeenyahangaa, tawao ta nya layieisia lelɔ.

¹⁹Nga kabande hindangaa wielɔ ngelei ma wu maahu, kɛɛ nguhubaa hindangaa ngelebu. Ŋamɛi a yɛlɔ na kɛɛ ngɔmbui kɛɛ ndulii waa;

²⁰foloi a gbindilɔ, ngalui i gbɔu kia ŋamɛi i na, pɛiŋ Ndemɔi Volo wai na i yaa wa.

²¹Yeewatii na, numu gbi lekee a Ndemɔi manɛnɛ a bawolɔ.’

²²“Isrɛlbleisia, a wolo njɛpɛi jisia ma. Ngengei na Ngewɔ feni Yesu Nasalɛtimɔi wɛ, i gɛilɔ a wue leeŋ kabande hindei nasia hu Ngewɔ i yɛ pie kɛɛ tɔmaseli nasia i yɛ ti gɛ a ngi loko; wua vulii wu ji gɔɔlɔ ajifa i wieni wu lia lɔ mbei.

²³ Ngewɔ vulii lɔ i nɛni ngi wɛ hugbatɛva ngovama a ngi nɛmahulewei kɛ ta Yesu ji velɔ wu wɛ; tawao wua lɔ wu ngi waani a ji wu ngi veni jumbubleisia wɛ ti ngi gbakpa krɔsii ma.

²⁴Kɛɛ hee yeekpalɛi na kia ndo-le-goohugbalɛ, Ngewɔ i kpuɛilɔ ngi ma, i pie i hiye hee hu ajifa kpaya gbi ii yɛ hee wɛ gbava ngi maahu haableisia ti yɛmɛi.

²⁵Ajifa Devidi i yɛpɛilɔ kɔloongɔ ngi ma yɛ, ‘Ngi yɛlɔ a Ndemɔi lɔ nya gulɔ kpele gbi; taa nya gbla a nya yejahu wee, aako numu gbi aa gu i nya vawɔli.

²⁶Nya goohu nɛngɔe ji va nya gahu gbuangɔ waa ji nga yɛpɛ; tawao nya, kia bɛɛ haamɔ a nge, nga heilɔ nya lii looni Ngewɔ bi ma,

²⁷ajifa bɛɛ gbe nya yafei ma aa lo haableisia ti yɛmɛi; bɛɛ luma bi bɔilopo magayemangɔi womɛi aa lula kambɛihu!

²⁸Bi pelei nasia gɛnga a nge ndɛvui hu womɛi aa lula! Nge nga jia la ngi vulu, tawao jifa bi nya gbla nya goohu nɛngɔ waa le.’

²⁹“Nya ndeengɛisia, mahoungɔe ngi yɛpɛ wu gama gbalauŋ kɔlooni mu maada Devidi ma. I haailɔ, ti ngi gbɔwu, tawao ngi gambɛi lɔ mbei mu lia i to foloi ji ma.

³⁰Ngewɔ lutu mia wɔɔ a ngie tawao i yɛ Lahei na gɔɔlɔ Ngewɔ mbumbuni ngi gama; Ngewɔ Lahei wumbuilɔ yɛ a Devidi bɔɔsɔɛisia yilayee yɛlɔ a maha waa, kia lɔɔ ta ngi Devidi i yɛ na.

³¹Devidi tɔilɔ gbɔɔ Ngewɔ i wama piema, faale i yɛpɛilɔ kɔlooni Ngewɔ Maha Heingɔi hiyelei ma hee hu ji i ndeni yɛ, ‘Ngewɔ ii gbeni ngi ma lova haablaa ti yɛmɛi; ngi womɛi ii lulani.’

³²Ngewɔ i yee-Yesu ji vulii wumbunga hee hu, tawao ngi hiyelei hee hu yeeselisia lɔ a mu gbi.

³³Ngewɔ i pienga i lɛnga ngelegoohu, i heinga ngi yejei hu, i Ngi Yafei venga ngi wɛ kia wɔɔ i Lahei wumbuni pieva; tawao yee-Ngafei ji i njeinga mu ma, tamia haa wu hulɔma, wu mɛnima.

³⁴Ajifa Devidi vulii ii lɛni ngelegoohu; tawao ta Devidi vulii i ndeilɔ yɛ, ‘Ngewɔ ndeilɔ nya Lemɔi ma yɛ, Hei mbei nya yejahui,

³⁵haaŋ ngi kpɔyɔ pɛiŋ a bi gɔnyɔuisia wuaala bi gɔɔbu.’

³⁶“Mahoungɔe hɔɔ wua wu Isrɛlbleisia gbi wu kɔɔ pandawanda kɛ Yesu ji wu kpakpani krɔsii ma, tamia Ngewɔ i ngi yɛnga a Ndemɔi kɛɛ Ngewɔ Maha Heingɔi!”

³⁷Ji nungeisia ti ji mɛnini, ti lii i nyanilɔ waa, kɛ ti Pita tia toblaa wekeisia mɔlinga tɛɛ, “Mu ndeengɛisia, gbɔɔ ma pie?”

³⁸Pita ndeilɔ ti ma yɛ, “A wounve wu jumbuisia ma, wu gbi a ngilangila, ti wu wua, wu la a Yesu Kristi, aako Ngewɔ i wu jumbuisia lufe, i wu mawaa a Ngi Yafei.

³⁹Ajifa Lahei na Ngewɔ i mbumbuni, i mbumbuni wua wu leengeisia gama lɔ, kɛɛ nasia gbi ti maguhangɔ nasia Ndemɔi mu Yewɔɛi a ti loli ti wa ngi gama.”

⁴⁰Pita i Ngewɔ yia gboto leilɔ nasia ma ti yɛ looni ta wolo, a Yesu hinda hugɛ a tie, a ti laahii kpaukpaungɔ yɛ, “Ti tia yekpe mabawo kpalɛi nasia yeya ti wama hinda nyamu wieblɛi jisia maahu ti ndɔlei ji hu.”

⁴¹Numu gboto ti lɛilɔ a Pita woowili, ti ti wua; ti gungɔ yɛla a numu tauji sawa tawao ti gbɛɛlɔ tobleisia ma a foloi na.

⁴²Watii gbi lekee ti yɛlɔ a wolo hindei nasia ma tobleisia ti yɛ ti gaa la, tia tieni ta mɛhɛɛ mɛ, ta Ngewɔ vɛli a ngoyila.

⁴³Kabande hinda gboto lɔ Ngewɔ i yɛ pie a tobleisia ti loko tawao i numui gbi wuhu wuilɔ.

⁴⁴ Nasia gbi ti langɔ yɛla a Yesu ti yɛ ngooyila yekpeyekpe lɔ hu, ta ti yeyahanisia gbi gɔlɛkɔlɛ ti nyɔunyɔ ma.

⁴⁵Ti yɛ ti yeyahanisia majialɔ kɛɛ ti jɔhanisia ta yeenavoei gɔlɛkɔlɛ numui gbi ma kia ti hamiyii i yɛ na.

⁴⁶Folo gbi ti yɛlɔ a gomɛ Ngewɔ Wɛlei bu, ta mɛhɛɛ mɛ a tewei ti wɛleisia bu a kohunɛ kɛɛ ndiigole,

⁴⁷ta Ngewɔ lato. Ti hinda nɛngɔ yɛla numui kpɛlɛɛ wɛ tawao folo gbi Ndemɔi yɛlɔ a ti mato a nasia i yɛ ti bawoma.