Read Ngowili Yekpei Numu Kpɛlɛɛ Va TOBLEISIA TI WIEHINDEISIA 20 Bible Online

TOBLEISIA TI WIEHINDEISIA 20 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 20

¹Ji sɔlɛ wai na i gɔlɛni, Pɔɔl i Yesu mableisia lɛilɔ ma a lenga i ndii vulu yɛpɛnga le ti ma, kɛ i vɛlinga ti ma. Na wooma, i gbuɛilɔ i li Masidonia lɔlei hu.

²I liilɔ a yeetatei nasia hu wee i gu na nungeisia ma ti nɛpɔva a ngowili yia gbotongaa. Na wooma, i wailɔ Glis,

³i ngawu sawa gbɔyɔu na. I yɛ kinɛiŋ ngi magbatɛmaa liva Siira lɔɔɛi hu kɛ i humɛninga kɛ Juublaa lɔ hinda hula ma ngi va; faale i ngi lii huyiilɔ i gahɛi i yama Masidonia.

⁴Sopeta, Pairɔs hindoloi, na gbuani Beria, i toilɔ Pɔɔl ma ti li. Hii mia Aristakɔs tia Sekɔndɔs-ni ti pieni, nasia ti gbuani Tɛsalonika; Gayɔs, na gbuani Daabi, kɛɛ Timoti bɛɛ; kpɛingɔ Taikikɔsi ma taa Trofimɔs, ti gbuani Esia plɔvinsi hu.

⁵Ti gbuɛilɔ kulɔ ti ti mu mawulo Toasi.

⁶Mua mu gbuɛilɔ Filipai ji bledii gbama mɛ gomɛi leweni, jii lɔɔlu woma kɛ mu hukpɔnga a tie Toasi, mia mu yɛ na hoki yila va.

⁷Haala voloi ma hoki hu, mu yandɔɛilɔ a lenga kayema mɛhɛɛ mɛva. Pɔɔl i yɛpɛilɔ nungeisia gama, i lo yɛpɛma kpindi i fo gundia, gbɛva ngi longɔ yɛla i lewe na ma i li folo wekei ma.

⁸Lambo gbotongaa ti yɛlɔ a vo ngeleya wɛlei yeelomui hu mu gomɛngɔ yɛla na.

⁹Foninge lakpao yila ngi laa a Utikɔs yɛ heilɔ a wundela we jii i lewenga a ngie ji Pɔɔl yɛ yɛpɛma. Kia jii i ngi houni pandawanda, i gbendɛilɔ ngeleya wɛlei yeesawei hu kɛ i gbanjinga ndɔma, aa yɛ ti mbumbu, ngi haangɔ.

¹⁰Kɛɛ Pɔɔl i yeilɔ ndɔmɛi i vombo ngi maahu i ngi gulu yakahu, kɛ i ndenga yɛ, “Wu lii aa hɛlɛ, ndɛvui lɔ lɛ ngi hu!”

¹¹Kɛ i yamanga i lɛ ngeleya wɛlei hu i bledii yali kɛ i mɛnga. I loilɔ yɛpɛma ti gama haaŋ gele i wo, kɛ i gbuanga na i li.

¹²Nungeisia ti yee foninge wumbuilɔ ti li a ngie ngi vulungɔ, tawao ji ti lii nɛpɔilɔ wa.

¹³Mu liilɔ gulɔ ndɛndɛi hu mu li Asɔs, mia mu yɛ Pɔɔl wumbuma na. I yɛ ndenga mu ma ji wieva jifa i yɛ lima na a gɔɔma welɔ.

¹⁴Ji i mu maleni Asɔs, mu ngi wumbuilɔ ndɛndɛi hu kɛ mu ya Mitileen.

¹⁵Folo wekei ma mu gbuɛilɔ na kɛ mu fonga Siɔs yalengahu. Jii yila woma mu wɛilɔ Samas, yee ngele wongɔ wekei ma kɛ mu fonga Mailetɔsi.

¹⁶Pɔɔl i yɛ kiliya wienga leweva Ɛfisɔs ma kɔwɔi aa ndɛmbihu wie Esia plɔvinsi hu, jifa ngi magbɛlingɔ yɛla fova Jelusalɛm Pɛntikɔsti volei ma, ina i guilɔ a bɛla ma.

¹⁷Pɔɔl i loni Mailetɔsi lɔ i ngowili yoyoo Sɔsii gbakoloisia gama Ɛfisɔs kɔɔ ti wa ti ngi male.

¹⁸Ji ti wani, i ndeilɔ ti ma yɛ, “Wu kɔɔlɔ ngi yɛ yeeluvala watii ngi yɛ wu gama, i hiye haala voloi ma ngi wani Esia yakei ma.

¹⁹Ngi nya mayeilɔ tawao ngaya gboto i wu nya ma hinda gbɔugbɔisia hu Juubleisia ti yɛ hula ta nda nya ma Ndemɔi magbeei gbuala hu.

²⁰Wu kɔɔlɔ kɛ kpemɛi ngi yɛ ngowili yie le wu ma wu yeekuwuhungaa kɛɛ nga wu gaala, ngii gbɛogbɛ hulɔwuni wu ma aa yɛ a kpɔma wu va.

²¹Ngi ndahii kpɔtu wuailɔ Juublaa yeya kɛɛ nasia yeya Juublaa yaa tie ngɛ ti wounve ti jumbuisia ma ti wote Ngewɔ gama ti la a mu Lemɔi Yesu.

²²Faale na, a koloya hu wee Ngewɔ Yafei gama, nya liileilɔ Jelusalɛm, tao ngii kɔɔ gbɔɔ i ma nya malema na.

²³Ngi kɔɔlɔ lekee kɛ taawa gbi hu ngi ma na Ngewɔ Yafei i nya lahiinga kpɔtu kɛ kpindiwɛleibu yiila kɛɛ kpundɛngaa lɔ nya mawulo ma.

²⁴ Kɛɛ ngii nya lɛɛvui wumbuni a gbɛ o gbɛ la, aako ngi tɔ lekee ngi fo nya jiei yeekɛlɛmɛi ngi kpɔyɔ a ngengei Ndemɔi Yesu i feni nya wɛ pieva, na yɛni a Ngewɔ yauwandei yee Ngowili Yekpe lelalɔ.

²⁵“Ngi jianga wu kpɛlɛɛ mahu, nga lewea ngoowili yie le kɔloongɔ Ngewɔ Mahayɛi ma. Tawao kiahuna ngi kɔɔlɔ kɛ wu yilayee gbi ɛɛ yaa gbɔma nya lɔ.

²⁶Faale ngi nde haa wu ma kpɔtu a foloi ji kɛ, wu yilayee gbi i longaa hu, ɛɛ lɛ kulo bɛɛ nya wumba.

²⁷Ajifa Ngewɔ liima hinde kpɛlɛɛ ngi koohu lɔwuni wu ma.

²⁸Waa yɛ ngandeemahu wua yekpe va kɛɛ mbalangɛisia kpɛlɛɛ va Ngewɔ Yafei i ti wuaanga wu lokohu. A yɛ a mbaala mahugbeblaa Ngewɔbleisia maahu, nasia Ngewɔ ti wumawoni a ngi Hindoloi haalei hu wee.

²⁹Ngi kɔɔlɔ kɛ nya lingɔi woma fula haningaa ta wuaalɔ wu lia, tawao tɛɛ ndohu kulo bɛɛ va mbalangɛisia wɛ.

³⁰Watii lɔ hitima wama nungaa lɛnga ta gbuaa wu lia ta ndɛɛ gula nasia wɛ ti langɔ a Yesu aako ti ti yaka tova ti woma.

³¹Faale waa lema, kɛɛ a nda wu nɛmahu kɛ foo sawa lɔ, a folo kɛɛ kpindi, nga wu gaa tao ngaya gboto a wu nya ma.

³²“Kiahuna na, ngi wu wuaanga Ngewɔ lokohu kɛɛ ngi woowili yeengauwandei, na a gu i wu loo la wu poohani jɔɔ nasia lia ti sɛnɛya majɔnga.

³³Ngii yaa mani wieni numu gani-gole va, ngi gani-gbɔu ɔɔ ngi magula bɛɛ va.

³⁴Wua vuuli bɛɛ wu kɔɔlɔ kɛ ngi yengeni a nya gbɔgbɔ lokoisia lɔ nga gu na gbi lee ma nya kɛɛ nya mbaangɛisia yeemagbewe mu houngɔ.

³⁵Ngi kɛnga a wue kɛ hinda gbi lee hu ngenge kpaukpau ji nyɔkɔ hu wee mia mahoungɔ mu kpɔma gbuana ma pie fɛliblaa ma, ma ya gili a njɛpɛ woisia Ndemɔi Yesu Ndeni, yɛ, ‘baayi waa lɔ numu gɔla ma i lewe tokohu gokola ma.’ ”

³⁶Ji Pɔɔl i kpɔyɔni, i wombi gbakpailɔ tia tieni kpɛlɛɛ ti hɛɛ.

³⁷Ti kpɛlɛɛ ngaya wuilɔ ti ma ta ngi mahouhou kɛɛ ta ngi laagɔmi,

³⁸ndii nyani va i ti hou ji i ndeni yɛ tɛɛ yaa gbɔma ngi lɔ. Na wooma, ti liilɔ ti ngi laalo ndɛndɛi ma.