Read Ngowili Yekpei Numu Kpɛlɛɛ Va TOBLEISIA TI WIEHINDEISIA 22 Bible Online

TOBLEISIA TI WIEHINDEISIA 22 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 22

¹“Kɔɔngɛisia, ndewengeisa wua kɛkɛ-ni, a wolo nya ma ngi nya mavale wu gulɔ.”

²Ji ti mɛnini a yɛpɛ ti gama Hibu yiɛi hu, hu i yɛlɔ gili kɛ i ya gulɔ a ndela yɛ,

³ “Juumɔ mia a nge, ti nya leni Taasɔs lɔ Silisia lɔlei hu; kɛɛ ngi gbuani hu mbeilɔ Jelusalɛm ngi kaalopoya mɛ Gameliɛl bu. Ngi gaalɔ veiŋ maadani ti jawei hu, tawao Ngewɔ hinde gbewengɔ yɛla nya ma kia lɔ wu gbi wu na haa mbei.

⁴Ngi juwuya hitɛilɔ nungaa woma nga ti yakpe i too ti lɛɛvu nyanila ma, nasia ti yɛ to pelei ji woma. Ngi hingeisia kɛɛ nyahangeisia houilɔ a pienyamublaa nga ti wili kpindiwɛlɛbu.

⁵Saagbuablaa ti gulɔmɔ wai tia koti lebleisia kpɛlɛɛ ta walɔ ti seli kɛ tɔnya yia mia ngi ndema. Ngi kɔlɔngaa majɔɛilɔ a tie livala ti ndewengeisia gama Damaskɔs, faale ngi liilɔ na nungeisia houma ngi jɔwɔisia gula ti ma ngi wa a tie ti yamɔnɛ va Jelusalɛm.

⁶“Kia ngi yɛ pelei hu i loni kulo te fova Damaskɔs, foloi yɛ kinɛiŋ fomaa ngundia kɛ maimai vofo waa i tewenga hu a gbua ngeleima i nya magaala.

⁷Ngi gulɛilɔ ndɔma kɛ ngi ngoo mɛninga yɛ nya ma, ‘Bia Sɔɔl, bia Sɔɔl! Gbɛɛ juwuya lɔ bi hitɛnga nya woma?’

⁸Kɛ ngi humɔlinga ngɛ, ‘Yelɔ a bie Ndemɔi?’ Kɛ i kpɛmbonga yɛ, ‘Nya Yesu, Nasalɛtimɔi, nya mia bi juwuya hitɛnga nya woma.’

⁹Nya mbaangɛisia ti fofoi ji lɔilɔ kɛɛ tii numui na yia woi mɛnini i yɛpɛni nya gama.

¹⁰Kɛ ngi mɔlinga ngɛ, ‘Nga gbɔɔ wie Ndemɔi?’ Kɛ Ndemɔi i kpɛmbonga yɛ, ‘Hiye bi li Damaskɔs, nalɔ hu a gɛ na a bie gbɔɔ hubatɛngɔ bi va pieva.’

¹¹Nya mbaangɛisia ti houilɔ nya lokolaa ti li a nge Damaskɔs, ajifa fofoi ngi tɔni ngi gbalaunyii i nya wumuilɔ ngɛɛ hinda lɔ.

¹²“Kena yila yɛlɔ na ngi laa a Ananayas, sawa houmɔ yekpe wa a ngie tawao bagɔma wa ngi ma Juubleisia kpɛlɛɛ yaama ti yɛ heini Damaskɔs.

¹³I wailɔ nya gama i loo nya maahu kɛ i ndenga yɛ, ‘Nya ndewei Sɔɔl, hinda lɔ gbɔma!’ Ngaama nya yaamɛi vooilɔ kɛ ngi ngi lɔnga.

¹⁴Kɛ i ndenga yɛ, ‘Mu maadani ti Yewɔɛi i loko loonga lɔ bi ma ngi liima hinde hugɔlɔva, bi ngi Bɔilopo na lɔ ngi wɔnangɔ tawao bi njɛpɛngaa mɛni ta gbua ngi laa.

¹⁵Gbamaile bi yɛma a seli-wuaamɔ lɔ ngi va hugɛva a nungeisia kpɛlɛɛ na bi hulɔni kɛɛ na bi humɛnini.

¹⁶Faale na, gbɛ yekalɔ gbɔma bi mawulo ma? Hiye ti bi wua aako bi jumbuisia ti wua bi ma a ngi biyɛi lolila hu wee.’ ”

¹⁷“Ngi yamailɔ Jelusalɛm, tawao kia ngi yɛ hɛɛma Ngewɔ Wɛleibu, ngi heengeilɔ,

¹⁸ngi Ndemɔi lɔ a nde nya ma yɛ, ‘Humbu a mavula bi gbua kaaka Jelusalɛm, gbamaile nungeisia ti heini na tɛɛ la a ngowili na ba nde kɔlooni nya ma.’

¹⁹Kɛ ngi potenga ngɛɛ ngi ma, ‘Ndemɔi, ti hugɔɔlɔ pandawanda kɛ ngi yɛlɔ a lewe hɛɛ wɛleisia la nga nasia hou ti langɔ a bie nga ti lewe.

²⁰ Tawao kpelemɛi na ti bi jeeli wuamɔi waani Stivin, ngi yɛ looni nalɔ nya lumangɔ ngi haalei ma kɛɛ nga nasia ti ngi waani ti magulɛisia mahugbe.’

²¹Kɛ Ndemɔi i ndenga nya ma yɛ, ‘Li, gbamaile ngi bi yoyoma kuhama lɔ poloŋ nasia gama Juublaa yaa tie.’ ”

²²Nungeisia ti woo yɛlɔ Pɔɔl ma kɛ lekee na lengɔ wooma; ti wuilɔ sɔlɛ lakpawa hu ta yele gula a ti wumba wee tɛ, “A kpɔyɔ a ngie! A paa! Maa ii hou i yɛ na!”

²³Ti yɛlɔ a kpoo gula, ta ti magulɛisia huvomgba, ta fufulei lɛ ngeleima.

²⁴Kɔmahɛi Rom i ndeilɔ ngi sojeisia ma yɛ ti wuaa a Pɔɔl gɔlɛi goohu ti ngi lewe aako ti ngi hugbɛkpɛ ti kɔɔ gbɛva Juubleisia ti boo bonde ji lolinga ngi ma.

²⁵Kɛɛ kia ti ngi yilini ti yatɛni ngi leweva, Pɔɔl i ndeilɔ kugbei ma looni yɛ, “Taa sawa hu wu yeya Rom yeetaali leweva na tii yaa ngi lɛɛni nyamu gbi maahu?”

²⁶Ji kugbei i ji mɛnini, i liilɔ kɔmahɛi gama i ngi mɔli yɛ, “Gbɔɔ bi longɔ bi pie? Ndakpao na taali mia a ngie Rom!”

²⁷Faale, kɔmahɛi i liilɔ Pɔɔl gama i ngi mɔli yɛ, “Nde lɛ nya ma, taali mia a bie Rom?” Kɛ Pɔɔl i kpɛmbonga yɛ, “Mmm, tamia a nge.”

²⁸Kɔmahɛi i ndeilɔ Pɔɔl ma yɛ, “Nya ta ngi navoo jɛmbɛ lɔ veni nga ya a wotela.” Kɛ Pɔɔl potenga yɛ ngi ma, “Kɛɛ nya ti nya leilɔ la.”

²⁹Ngaama kɛ kɔɔngɛisia ti yamanga woma ti yɛ lima a Pɔɔl ngi hugbɛkpɛva. Kɔmahɛi vuii ngi magbɛlilɔ ji i hugɔɔni kɛ taali mia a Pɔɔl Rom i gbegbanga a gɔɔ ta gulala ngi hama.

³⁰Kɔmahɛi longɔ yɛla i hugbɛkpɛ wie pandawanda i kɔɔlɔ gbɔɔ Juuisia ti njia wɛlɛnga Pɔɔl woma fa; faale kia ngele woni i pielɔ ti gɔɔtei vulo ngi ma kɛ i ndenga Saagbuablaa Waisia ma tia kotilebleisia kpɛlɛɛ yɛ ti gomɛ. Kɛ i Pɔɔl gbuanga i ngi loo ti gulɔ.