Read Ngowili Yekpei Numu Kpɛlɛɛ Va TOBLEISIA TI WIEHINDEISIA 23 Bible Online

TOBLEISIA TI WIEHINDEISIA 23 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 23

¹Pɔɔl i koti lebleisia yaama gbeilɔ tiiŋ kɛ i ndenga yɛ, “Nya ndewengeisia, nya liihu golengɔ fo kɔloongɔ nya luvayii ma Ngewɔ gulɔ i to ma foloi ji ma.”

²Ji gbuangɔ laa lekee kɛ Saagbuablɛisia ti gulɔmɔ wai Ananayas i ndenga nasia ma ti yɛ looni a Pɔɔl fɔɔ yɛ ti ngi woohu gbolɛ.

³ Kɛ Pɔɔl i potenga yɛ ngi ma, “Ngewɔ lɔ a bi woohu gbolɛ, bi hojo wɛlɛ magbongbongoi! Biaa heini mia ba nya gbɛmbo a sawa welei ma we kɛɛ bia vuii sawei gbe lɛ bi nyaninga a ndela ti ma ti nya woohu gbolɛ!”

⁴Nasia ti yɛ looni a Pɔɔl fɔɔ ti ndeilɔ ngi ma tɛ, “Bia mia ba liilo ba Ngewɔ Jaagbuablɛisia ti gulɔmɔ wai yɛli?”

⁵ Pɔɔl i poteilɔ i nde yɛ, “Nya ndewengeisia, ngii yɛ hugɔ kɛ Ngewɔ Jaagbuablɛisia ti gulɔmɔ wai mia a ngie; gbɛva Ngewɔ gɔlɛi yɛ, ‘Baa njɛpɛ wote a tokuloi na i bi nungeisia maahu.’ ”

⁶ Ji Pɔɔl i lii heini ma kɛ Sadusiisia mia a nungaa lɛnga kɛɛ Farisiisia a pekeisia, i ndeilɔ ngele ya kotii hu yɛ, “Nya ndewengeisia, Farisiimɔi mia a ngɛ kɛɛ yeekohuloi. Nyaa mbei kotii gulɔ jifa nya langɔ la kɛ haableisia ta hiyelɔ ti vulu!”

⁷Pɔɔl ji lengɔ lekee kɛ Farisiiblaa tia Sadusiisia ti tɔtonga a yiala, kɛ ti blanga fa ti luahu i kuɛlɔ.

⁸ (Gbɛva Sadusiisia ti yɛlɔ a nde tɛ nungaa tɛɛ hiye heehu ta vulu tawao malikangaa tia ngafangaa tii na; kɛɛ Farisiisia tia ti langɔ yɛla a jisia jaangɔ kpɛlɛɛ.)

⁹Sɔlɛ woi yagbalɛilɔ waa, kɛ sawei yeekaamɔisia lɛnga ti Farisiisia ti gakeima ti hiyenga ti lumbe tɛɛ, “Muii nyamu gbi lɔni ndakpaoi ji hu! A yɛ vuii kɛnga a ngafa lɔ ɔɔ malika i yɛpɛnga ngi gama!”

¹⁰Ndablei i gbengbailɔ hulewengɔ gboŋ kɛ kɔmahɛi i luwanga yɛ ta loma ta Pɔɔl hou ta ngi hunyivinyivi. Faale i ndeilɔ ngi sojeisia ma yɛ ti yei ti Pɔɔl gbua fahii lia ti wuaa a ngie gɔlɛi goohu.

¹¹Kpindi wekei ma Ndemɔi i wɛilɔ i loo Pɔɔl maahu i nde ngi ma yɛ, “Bi lii yɛ kpao! Kia bi nya wowili lenga mbei Jelusalɛm, himia huɛɛŋ mahoungɔ bi ndela Rom bɛɛ.”

¹²Ngele wekei wongɔi hu Juublaa ti hinda hulailɔ ti jondu kpo tɛ mɛhɛɛ ɔɔ nja ɛɛ wuaa ti laa kɛ pɛiŋ ta Pɔɔl waa.

¹³Ti lewengɔ yɛla numu fele gbɔyɔngɔ ma ti gomɛni ti ji hugbatɛni a lenga.

¹⁴Nawooma ti liilɔ Saagbuablaa Waawaisia gama kɛɛ kpakoloisia tɛ ti ma, “Mu jondungɔe kpo kɛ hani gbi ɛɛ wuaa mu laa kɛ pɛiŋ ma Pɔɔl waa.

¹⁵Kɛ faale, bia wua kotilebleisia a ngoo gbua wu jooyo kɔmahɛi gama Rom wa va a Pɔɔl mbei wu gulɔ, kɛngɔ bɛ tɔnyɛi yeekpekpe mia wu longɔ wu mɛni a ngie kɔloongɔ ngi yiɛi ma. Kɛɛ mu magbatɛngɔ a yɛla ngi waa va pɛiŋ a ya fo mbei.”

¹⁶Kɛɛ ji Pɔɔl ndewe nyahaloi nda goohu loi yeehindoi i sua wulei ji mɛnini, i liilɔ yakpe i wuaa gɔlɛi goohu i hugɛ a Pɔɔl.

¹⁷Kɛ Pɔɔl i soja nuwai yeengila lolinga i nde ngi ma yɛ, “Li a foninge lakpaoi ji kɔmahɛi gama; njɛpɛ lɔ ngi laa hugɛva a ngie.”

¹⁸Kɛ soja nuwai i hounga foninge lokolaa i li a ngie kɔmahɛi gama i nde ngi ma yɛ, “Pɔɔl na kpindiwɛleibu tamia i nya lolini kɛɛ i nya mɔlinga wa va a foningee lakpaoi ji bi gama, gbamaile njɛpɛ lɔ ngi laa hugɛva a bie.”

¹⁹Kɔmahɛi i houilɔ ngi lokolaa, i li a ngie ti loo i ngi mɔli yɛ, “Gbɔɔ bi laa hugɛva a nge?”

²⁰Foninge i poteilɔ yɛ, “Juuisia ti mahubleisia ti heinga woto gɔwɔ yila ma ta bi mɔli liva a Pɔɔl kotii gulɔ sina voloi ma, kɛngɔ bɛ kotii mia dongɔ i tɔnya yia jɔɔ a ngie kɔloongɔ ngi yiɛi ma.

²¹Baa wolo ti ma, ajifa ti lewengɔi numu fele gbɔyɔngɔ ma ta yɛ suɛi hu ti Pɔɔl mawulo ma. Ti jondunga kpo tɛ mɛhɛɛ tia nja ɛɛ wuaa ti laa kɛ pɛiŋ ta Pɔɔl waa. Ti magbatɛngɔi kiahuna ji wieva, tawao bi lumalɛi mia ti mawuloma.”

²²Kɛ kɔmahɛi i ndenga ngi ma yɛ, “Baa lali ma numu gbi gblanga kɛ bi ji hugɛnga a nge.” I gbeilɔ ngi ma yɛ i li.

²³Kɛ kɔmahɛi i ngi soja waawaa felengaa lolinga i nde ti ma yɛ, “A soja hɔndɔ fele lɛma liva Siisaria, kɛɛ sojiablaa numu sawa gbɔyɔngɔ mahu-puu, kɛɛ sɔli-wiliblaa hɔndɔ fele ti ti magbatɛ gbuava mbei haawɛi yee taalu ma a kpindi ji.

²⁴A Pɔɔl gɔ a soi i hei mahu, wu li a ngie wu fo fa Gɔvinei Fɛlisi ma gbɛogbɛ a ngi wie.”

²⁵Kɛ Kɔmahɛi i kɔlɛi nyɛinga yɛ:

²⁶“Nya Kulɔdiɔs Lisias, nyaa ngi kɔlɛi ji nyɛima Gbimamɔi bi gama, Gɔvinei Fɛlisi: Famɛi kaka.

²⁷Juubleisia mia gɛ ti ndakpaoi ji houni ti longɔ kinɛiŋ ti ngi waa. Ngi magɔɛilɔ kɛ taali mia a ngie Rom, faale ngi nya sojeisia wumbuilɔ mu li mu ngi gbua ti yeya.

²⁸Nya longɔ yɛla ngi kɔɔ gbɔɔ nyamu le i pienga ti wɛlɛnga ngi woma; faale ngi liilɔ a ngie mia ti kotii hu.

²⁹Ngi kɔwukpueilɔ ngi tɔ kɛ nyamu ii le a ka na a gu a wa a ngi lɛɛvu nyanila poma ɔɔ ngi wula kpindiwɛlɛbu: nyamui ti toni ngi ma hɛlɛngɔ a mɔlingaa lɔ kɔloongɔ ti jawa hinda ma.

³⁰Tawao ji ngi mɛnini kɛ Juubleisia lɛnga lɔ hinda mavɛɛma ngi va, ngi kiti wumbuilɔ ngi yoyova yakpe bi gama. Gbɔma ngi ndeilɔ ngi mayiangɛblaa ma ngɛ ti ngi mayiɛi waa bi ma.”

³¹Sojeisia ti liilɔ ti yeejiɛi waa bi ma. Ti Pɔɔl wumbuilɔ a kpindi na ti li ti fo a ngie fa Antipatis.

³²Ngele wongɔi hu gɔɔma sojeisia ti gahɛilɔ ti yama gɔlɛi la, ti Pɔɔl lo so-mahugbebleisia ti lokohu liva a ngie gulɔ.

³³Ti liilɔ a ngie ti fo Siisaria, ti ngi magɔlɛi gona Gɔvinei ma ti ngi loko la ngi yeya.

³⁴Gɔvinei i kɔlɛi houilɔ i kaa, kɛ i Pɔɔl mɔlinga ndɔlei yekakei yeegbɛmaa i gbuanga na. Ji i kɔɔni kɛ i gbuani Silisia lɔ,

³⁵i ndeilɔ ngi ma yɛ, “Nga na mɛnilɔ bi laa ji bi yiangɛblaa ta wa.” Na wooma kɛ i ndenga yɛ ti Pɔɔl wu makpa lokohu Hɛlɔd gatei hu.