Read Ngowili Yekpei Numu Kpɛlɛɛ Va TOBLEISIA TI WIEHINDEISIA 24 Bible Online

TOBLEISIA TI WIEHINDEISIA 24 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 24

¹Jii lɔɔlu lewengɔ woma Saagbuablɛisia ti gulɔmɔ wai Ananayas i liilɔ tia kpakoloisia lɛnga kɛ lɔya yila ngi laa a Tatulus miando Siisaria. Ti gbueilɔ Gɔvinei Fɛlisi gɔɔbu ti Pɔɔl mayiangɛ na.

²Ji ti Pɔɔl lolini i wani, Taatulus i tɔɔtoilɔ a ngi yia hugɛla yɛ: “Gbimamɔ Wai! Tokulɔya yekpei i bi hu pangɔi a ndiilɛli mu va watii huguhangɔ va, tawao ndigulɔma hinda gbotongaa lɔ wiema mu lɔlei gbekpe va.

³Ji mu gahu gbuangɔi a pelei gbi hu wee tao mia lee gbi mu na, ma bi jiɛ gbualɔ kpoto ji va.

⁴Ngii loni ngi bi magbee wa nyani, kɛɛ na hu gbi, gili bi gbekpeyei va bi wolo njɛpɛ gutu ma i mu laa.

⁵Mu ndakpaoi ji mabɛɛngɔ a kpundɛ gulamɔ lɔ, a lewe a sɔleisia gula Juublaa lia dunyei hu gbi, tawao tokulɔ mia a ngie Nasaleinbleisia ti gakamɛi.

⁶Gbɔma i lapilɔ gɛ Ngewɔ wɛleibu yolava, kɛ mu ngi hounga. [Mu yɛ gɛ jiamaa a ngie kia mu jawei ndeila,

⁷kɛɛ kɔmahɛi Lisias i wuailɔ hu gbagbanja i ngi gbua mu yeya.

⁸Kɛ i ndenga yɛ mahoungɔe Pɔɔl mayiangɛiblaa ti njia ti fo bi ma.] Bi ndakpaoi ji hugbɛkpɛngaa, ba gulɔ bi kɔɔ a ngie gbɔɔ kpɛlɛɛ nyamungaa le mu pɛlɛnga ngi woma.”

⁹Juuisia ti pɛlei lɔ hu kpɛlɛɛ a lenga ti nde tɛɛ njiɛi gama lɔnyangɔi.

¹⁰Gɔvinei i loko yɛlɔ miamia Pɔɔl gama yɛ i yɛpɛ; kɛ Pɔɔl i tɔtonga yɛ: “Ngi kɔɔlɔ kɛ bi yɛnga a nyamei ndɔlei ji maahu foo gboto va, famia kɛngɔ nya ma a kohunɛ nya yekpe mavale va bi gulɔ.

¹¹Ba gulɔ a gɔfɛ gbuala bia yekpe wɛ kɛ ii yaa leweni jii puu mahu fele ma a gbua watii ma gɛ ngi lini Jelusalɛm Ngewɔ vɛlima.

¹²Nya yiablaa tii nya maleni nga yɛ ndabla gbuama a numu gbi Ngewɔ wɛleibu ɔɔ ngaa yɛ faha wuhu nyani ma Juuisia ti hɛɛ wɛleisiabu ɔɔ hinda gbi lekee taawai hu.

¹³Tawao tɛɛ gu ta kɛ a bie kɛ nya lɛɛ le nyamui jisia ma ti wangala nya maahu.

¹⁴Na hu gbi, ngi kulungɔi ma bi yaama kɛ maadani ti Yewɔɛi lɔ nga fɛli, nga to Pelei na ma tɛ kava le. Tawao nya langɔe gbɔma a hindeisia kpɛlɛɛ ti nyɛingɔ Mojisi Jawei hu kɛɛ tutuisia ti gɔlɛi.

¹⁵Nya liilomɛi Ngewɔ ma i yakpe ma jisia, kɛ Adamɛi kpɛlɛɛ, yeekpekpe kpɛlingɔ yeenyamu ma, ta vululɔ ti hiye hee hu.

¹⁶Kɛ famia watii gbi va nga lapi a sɔbɛ wa aako ndii gole i yɛ nya hu Ngewɔ va kɛɛ nuuvu.”

¹⁷ “Malalangɔ kungɔ a foo gboto ngi gbuani Jelusalɛm, ngi yamɛilɔ na a navoo wulo feva nya nungaa wɛ kɛɛ saa kpuava na.

¹⁸Ngi loni yeehugbatɛi jilɔ wiema kɛ ti nya malinga Ngewɔ wɛleibu ngi kpɔyɔnga a wuaala sɛsɛɛ gomɛi hu. Faha ii yɛ nya woma, tawao sɔlɛ ii yɛ na.

¹⁹Kɛɛ Juungaa lɛnga ti yɛlɔ na ti gbuani Esia gakei ma; mahoungɔ vuii tia yekpe ti yɛ mbei ti nyamungaa loo nya ma ina nya nyamu gbi lɔ ti ma.

²⁰Ɔɔ jisia ti mbei ti ndelɛ nyamui yeegbɔɔ ti tɔni nya hu ji gɛ ngi looni kotii gulɔ

²¹ i gbua na ma lekee ngi ndeni ngeleya ti yaama ngɛ: Nya haa looni kpɛmbo hu jifa nya langɔ la kɛ haablaa ta vululɔ ti hiye hee hu.”

²²Kɛ Fɛlisi, na yɛ Pelei hinda magɔngɔ pandawanda i njiɛ lukpenga woma yɛ ti ma, “Nga wu yiɛi lewelɔ ji kɔmahɛi Liisias a wa.”

²³Kɛ i ndenga sojei ma yɛ Pɔɔl i yɛ makpa lokohu kɛɛ ti laha wulo ve ngi wɛ ngi ndiamɔisia ta ngi gɔ a ngi magbewe ma hanisia.

²⁴Lɔwɔ lɛnga woma Fɛlisi wɛilɔ tia ngi nyahɛi Dɔsila, na Juumɔ a ngie. I Pɔɔl mani wielɔ i wa a wolo ngi ma a yɛpɛ kɔlooni lala ma Yesu Kristi.

²⁵Kɛɛ kia Pɔɔl i lini a yɛpɛ kpɛmbɛnjɛɛ kɔlooni pɔɔna wiela ma, ndiihou kɛɛ too voloi ngi walei ma, Fɛlisi magbɛilɔ i nde yɛ, “Li lɛ kiahuna. Ngi gungaa gbɔma watii yekpe ma, nga bi lolilɔ bi wa.”

²⁶Ngi lii gbɔma yɛlɔ ma kɛ Pɔɔl a navoo wulo liigbalɔ ngi ma, famia i yɛlɔ a too wie Pɔɔl gama pɛpɛɛ a wa ta hei ta yɛpɛ.

²⁷Foo fele lewengɔ woma, Pɔsiɔs Fɛstɔs i Gɔvinayei mɛilɔ a Fɛlisi womɛi; kɛɛ jifa Fɛlisi longɔ yɛla ngi hinde i nɛɛ Juubleisia wɛ, i Pɔɔl loilɔ kpindiwɛleibu i li.