Read Ngowili Yekpei Numu Kpɛlɛɛ Va TOBLEISIA TI WIEHINDEISIA 26 Bible Online

TOBLEISIA TI WIEHINDEISIA 26 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 26

¹Kɛ Aglipa i ndenga Pɔɔl ma yɛ, “Kpaya vengɔe bi wɛ yɛpɛ va bia yekpe va.” Faale Pɔɔl i ngi lokoi leilɔ i tɔto a ngi mavale la yɛ:

²“Mahɛi Aglipa, ngi nya yekpe lɔma a hɛjamɔ walɔ a foloi ji loova bi gulɔ nya mavale va jiei kpɛlɛɛ hu Juubleisia ti pɛlɛnga nya ma.

³Ji gama lɔnyangɔi gbamaile bi Juuisia ti makɛi yɛyii gɔɔlɔ kɛɛ ndableisia ta kpua. Faale, nyaa bi manɛnɛ bi wolo nya ma.

⁴“Juubleisia kpɛlɛɛ ti kɔɔlɔ kia ngi yɛluvala i hiye nya lopogɔihu ma. Ti kɔɔlɔ kia haala ngi yɛ luvala nya nda lɔlei hu kɛɛ Jelusalɛm.

⁵ Ti hugɔɔlɔ, kiaa ta yɛlɔ lumama ti seli, kɛ haala hu vuii a mu Yewɔ vɛli welei yeekpaukpau ma we ngi yɛlɔ a luva kia Fariisimɔi na.

⁶Kɛɛ nya haa na looni mbeindo jia hɛlɛngɔ nya boma jifa nya lii valangɔ lahei na ma Ngewɔ i mbumbuni mu maadani gama

⁷lahei yakpei na kɛnyɛ wu puu mahu feleisia kpɛlɛɛ ti lii i ma sɔɔva, ji ta yɛ Ngewɔ vɛlima a folo kɛɛ kpindi. Tawao yeevalamɛi ji woma mia, ngi nde bima mahei, Juublaa ti jia hɛlɛnga nya boma!

⁸Gbɛe wu Juubleisia kpaukpaungɔ hii wu va lavala kɛ Ngewɔ a haableisia wumbulɔ hee hu i ti vulu?”

⁹ “Nya vuii i yɛlɔ nya magahu lapiva a nya gbayei gbi kɔɔ ngi Yesu Nasalɛtimɔi ngi biyɛi nyani.

¹⁰Tawao hii ngi pieni fɔ Jelusalɛm. Saagbuablaa Waawaisia ti kpaya wuailɔ nya hu ngi gu ngi Ngewɔblaa gbotoa laagbɔu; tawao ji ti kayee goleni ti haala ma, nɛngɔ yɛla mbɛ.

¹¹Watii gbotoma va ngi yɛlɔ a pie ta ti yamɔnɛ hɛɛ wɛleisia kpɛlɛɛ bu tawao nga gbɔnda ti ma mawali va ti lalei ma. Nya lii nyamuilɔ ti va, ngi hitɛ a juwuya ti woma taawaisia hu kɛnyɛisia ma.”

¹²“Sabui ji woma lɔ ngi lini Damaskɔs a kpaya guangɔ nya yeya kɛɛ ngoo kpaukpau a gbua Saagbuablaa Waawaisia gama.

¹³Nya Mahɛi, ngi loni pelei hulɔ foloi fongɔ ngundia kɛ ngi foofo lɔnga yeefoi jɛbɛngɔ tewengɔ foloi ma i gbua ngelei ma i nya gaala fio mua nasia mu yɛ njiama.

¹⁴Mu kpɛlɛɛ mu gulɛilɔ ndɔma, kɛ ngi ngoo mɛninga a nde nya ma Hibu yiɛi hu yɛ, ‘Bia Sɔɔl, bia Sɔɔl, gbɛe ba juwuya hitɛ nya woma? Bia bi yekpe gbalɛ ma a ngangala.’

¹⁵Kɛ ngi humɔlinga ngɛ, ‘Yemia a bie Ndemɔi?’ Kɛ Ndemɔi i kpɛmbonga yɛ, ‘Yesu mia, bi juwuya hitɛngɔ poma.

¹⁶Kɛɛ hiye bi loo bi gɔwɔisia ma; gbamaile ngi gbuangalɔ bi yama loko loova bi ma yɛva a ngengemɔ kɛɛ seli wuaamɔ nya va hindeisia maahu bi nya lɔnga hu kɛɛ yeenasia maahu nga gbuahu bi yaama.

¹⁷Nga bi bawolɔ Isrɛlbleisia yeya kɛɛ nasia yeya Juublaa yaa tie nga bi loo ti gama.

¹⁸Ba ti yamɛisia lawolɔ bi ti gbua kpindi hu ti wa fofo ya, ti gbua seitana gbayei bu ti wote Ngewɔ gama, aako lalei va ti piengɔ a nge ti manuma jɔɔ ti hinda nyamuisia va kɛɛ heima Ngewɔ nungaa huwɔyɔngɔisia lia.’ ”

¹⁹“Kɛ faale, Mahɛi Aglipa, ngii lɛɛni kulo bɛɛ heenge na hu ngi hulɔni i gbue ngelegoohu.

²⁰ Kɛɛ haala hu ngi liilɔ a nde nasia ma ti Damaskɔs, ngi gbua na ngi li Jelusalɛm kɛɛ Judia lɔlei hu, ngi na blandia fa ngi fo nasia ma Juublaa yaa tie, ngɛɛ koungɔe ti wounve ti jumbuisia ma ti yama Ngewɔ gama ta ya hindei nasia wie ta gu a kɛla kɛ ti wounvengɔe.

²¹Sabu ji valɔ Juublaa ti nya houni mia Ngewɔ Wɛlɛwai bu a lo te ti nya waa.

²²Kɛɛ kɛlɛngɔ hii a foloi ji, nya gbɔmi i Ngewɔ lɔ yeya, tawao famia ngi looni mbei nga ngowili yia le numui kpɛlɛɛ gama, bi yɛni a numu wulo lɔ ɔɔ numu waa. Gbɛogbɛ yeka ii le nga yɛ ndema a lewe na ma tutuisia tia Mojisi ni ti kpue wɔɔ laa ti ndeni tɛɛ huɛɛŋ ji a wielɔ:

²³ kɛ Ngewɔ Maha-Heingɔi a mɔnɛlɔ huɛɛŋ i yɛ a haalamɔ i hiye i vulu hee hu mbawoyei yeefofoi yeehee la va Juubleisia gama kɛɛ nasia gama Juublaa yaa tie.”

²⁴Kia Pɔɔl i lini a ta yekpe mavale, Fɛstɔs i gbandɛilɔ ngi laa yɛ, “Ndakpe Pɔɔl, bi wui gbuangɔi bi wumba! Kaa wai na bi wuhu ta bi gbowama!”

²⁵Pɔɔl i kpɛmboilɔ yɛ, “Kpowa ii le aa nya hou, Gbimamɔi Fɛstɔs. Gbɔɔ ngi ndema yɛni a tɔnyɛi lɔ, tawao nguhubaa yɛpɛ ii le.

²⁶Mahɛi i hinde jisia magɔɔlɔ, tawao na valɔ nga yɛpɛla ngi gama kia nya longɔ la. Ngi kɔɔlɔ nya lii hu kɛ yeehinde ji yila bɛɛ ii wieni ngi yaama woma, gbamaile sɔkuma hinda ii le a wie.

²⁷Mahɛi Aglipa, bi langɔe a tutuisia? Ngi kɔɔlɔ kɛ bi langɔe a tie.”

²⁸Kɛ Aglipa i ndenga Pɔɔl ma yɛ, “Bi gilingɔe la kɛ watii gutu wuloi ji hu mia ba gu ngi wote a Kristimamɔ?”

²⁹Kɛ Pɔɔl i potenga yɛ, “Maa i guha i gutu, nya Ngewɔ manɛnɛ ma ngi dae le bia bi gbɛlingɔ jisia kpɛlɛɛ ma wu wolo ma haa nya ma mbei, kɔɔ wu wie sia ngi na, kɛlee jɔwɔi jisia tia tii ma!”

³⁰Kɛ Mahɛi, kɛɛ Gɔvinei, kɛɛ Bɛnisi tia nasia kpɛlɛɛ ti yɛ heini ti hiyenga.

³¹Kia ti gbuani wuhitɛ ma, kɛ tia ndema ti nyɔunyɔu ma tɛ, “Ndakpaoi ji ii yaa gbɛogbɛ wieni mahoungɔ i haa poma ɔɔ ma ngi laagbɔu fa.”

³²Kɛ Aglipa i ndenga Fɛstɔs ma yɛ, “Ma yɛlɔ a gbe ndakpaoi ji ma i li gbama ina ii yɛ Roma Maha Wai mamai wie ngi yiɛi le va.”