Read Ngowili Yekpei Numu Kpɛlɛɛ Va TOBLEISIA TI WIEHINDEISIA 28 Bible Online

TOBLEISIA TI WIEHINDEISIA 28 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 28

¹Ji mu foni ngeyeima a mu lɛɛvui, mu magɔɛilɔ kɛ tii na hu laa mia a Mɔlta.

²Yeetaalisia ti ndiamɔya waa gɛilɔ a mue. Njei yɛ tɔtonga a wuala tawao kɔlɛi a wa, faale ti ngɔmbui yateilɔ ti gahu gbua mu kpɛlɛɛ ma.

³Kia Pɔɔl i kpangbanyaasia lɛni ma i yɛ ti wuma ngɔmbui ya, kali i gbuɛilɔ hu pu ngɔmbu luindui va i gbakpa ngi lokoi ma.

⁴Ji taableisia ti kali lɔni hɛlɛngɔ Pɔɔl lokoi ma, ti ndeilɔ ti nyɔunyɔu ma tɛ, “Numu waamɔ lɔ a ndakpao ji, tawao ngi hinda nyamui mia ngi yakpɛ ma kia bɛɛ ii loni njei hu.”

⁵Kɛɛ Pɔɔl i ngi lokoi jɛsielɔ kali i gbuama i gula ngɔmbui ya gbɛogbɛ ii ngi wieni.

⁶Ti yɛlɔ looni ta ngi mawulo ti lii i ma tɛɛ i vemaa vɔɔlu kɛ i windɛnga wumahu i gula. Kɛɛ kia ti lɛmbi haaŋ looni watii huguhangɔ va tɛɛ tɔ funyɛ bɛɛ aa pie, ti ti wui vivii lɔ ti nde tɛ, “Ngewɔ mia a ngie!”

⁷Hu ii guhani a mia ti yɛ na, tii na hu mahɛi yɛlɔ na ngi laa a Pɔblɔs, ndɔma vahawa ngi yeya. I gahu gbuɛilɔ mu ma pandawanda tawao mu yɛlɔ ngi gɔɔma jii sawa va.

⁸I bɛi malɔ Pɔblɔsi ngi kɛkɛ gahu nyamungɔ yɛla i laani heegbɛ yalema a kɔlɛ wumɛi kɛɛ ŋamagboi. Pɔɔl i wuailɔ ngi gama, i hɛɛ ngi va, i loko wɛlɛ ngi ma kɛ i bawonga.

⁹Ji hulɔngɔ lekee, heegbɛblaa wekei nasia ti yee tii na hu ti wailɔ ngi gama kɛ i ti bawonga.

¹⁰Ti mu gɔilɔ a hani gbotongaa, tawao ji mu yɛ gbuama na, ti hani nasia wuilɔ ndɛndɛi maahu magbewe a mu hou njeiya va.

¹¹Ngawu sawa woma mu liilɔ njeiya ndɛndɛwa yila hu na gbuani Alɛksanda ta toli a “Fila Yewɔɛisia,” na yɛ longa haaŋ tii na hu kɔlɛ yawui i gbɔyɔnga.

¹²Mu wɛilɔ Silakɔs mu jii sawa wie na.

¹³Kɛ mu gbuanga na mu li Rejiɔm. Kia ngele woni fɛfɛi i gbuɛilɔ a kpundɔhu yaka we, jii fele woma kɛ mu fonga Putioli.

¹⁴Nalɔ mu Yesu mableisia maleni na kɛ ti mu mɔlinga heiva ti gɔɔma hoki yila va. Nawooma mu liilɔ Rom.

¹⁵Kristimablei nasia ti Rom ti mu malɔwɔi mɛnilɔ, kɛ ti wanga mu gulɔ ti fo fa Apiɔs Makitiihu kɛɛ Hotangaa ti yii Wɛlɛ Saweisia la. Ji Pɔɔl i yaama wɛlɛni ti ma, i siɛgbuɛilɔ Ngewɔ ma ngi lii i nɛpɔ.

¹⁶Kia mu foni Rom, ti lumailɔ Pɔɔl wɛ i ngi wuma heima soja yila ngi maahu ngi yabɛɛva.

¹⁷Jii sawa lewengɔ woma Pɔɔl i Juuisia ti mahubleisia lolilɔ a lenga ti gomɛ. Kia ti gomɛni, i ndeilɔ ti ma yɛ, “Nya ndewengeisia, kia bɛɛ ngii yaa nyamu gbii gani a mu nungeisia tawao ngii yaa mu maadani ti wiehinda woveisia gblaninga, Juublaa ti yɛlɔ a sabu ti nya hou Jelusalɛm ti nya wuaa Romableisia yeya.

¹⁸Kia ti nya hugbɛkpɛni ti longɔ yɛla ti gbe nya ma, ajifa tii nyamu gbi lɔni nya hu ngaa ka na ta gu ti nya waa poma.

¹⁹ Kɛɛ Juubleisia ti gangɛilɔ tɛ tɛɛ kuluma, na va mia nya bɛɛ i mini nya ma ngɛ ngi gbuama Roma Maha Wai gulɔ kia bɛɛ ii yɛni a njia lɔ nga lola feva nya nungeisia wɛ.

²⁰Famia ngi wu mamani wienga aako ngi wu lɔ ngi yɛpɛ wu gama; ajifa jɔwɔ gulangɔi nya hama numui na va Isrɛlbleisia ti lii valangɔ ngi ma.”

²¹Kɛ ti potenga tɛ ngi ma, “Muii yaa bi magɔlɔ majɔɔni aa gbua Judia lɔlei hu aa wa, tawao mu ndewe yila bɛɛ ii yaa wani a vaa nyamu gɛ ɔɔ njia kɔloongɔ bi ma.

²²Kɛɛ mu longɔe mu bi nɛmahu vaa gɔɔ; gbɛva mu kɔɔlɔ kɛ hinda gbi lekee nungaa lɔ njɛpɛ-a-ngie lema kɔlooni komɛi ji ma yeemamɔ a bie.”

²³Faale ti lɔwɔ gɛilɔ a Pɔɔl ngi maleva, tawao ti wani a faha waa lɔ mia Pɔɔl yɛ na. I gbua ngende hu i too kpindi ma, Pɔɔl i yɛlɔ a ngowili yiɛi le kɔloongɔ Ngewɔ Mahayɛi ma, a yeefasai wuaa ti gama. I lapilɔ ti kabande va ti la a Yesu, a ngi mafasai gbua Mojisi Jawei hu kɛɛ tutuisia ti gɔlɛisia hu.

²⁴Ti lɛnga ti lailɔ a ngi layiesia, pekeisia lɔ na tii lani la.

²⁵Ti gbuɛilɔ ta li a mawali hou a ti nyɔunyɔ ji Pɔɔl i layia yakpe wilini ti wolihu yɛ, “A tɔnya mia wɔɔ Ngewɔ Yafei i ndeni wu maadani ma a tutui laa we Aisaya yɛ:

²⁶ ‘Li nungei jisia gama bɛɛ ti ma, wa humɛilɔ fo kɛɛ wuɛɛ yeembui gɔɔ; wa kpe lɔ ndimaa kɛɛ wuɛɛ tɔ.

²⁷Gbamaile nungei jisia ti wotengɔe a ndiiyahablaa, ti wolisia hugbɔndangɔi, ti yamɛisia ti liiwingɔ ma. Kiaa na ii le, ta kulɔ lɔlɔ, ti wolisia ti njia humɛni, ti liisia ti mbugɔɔ, kɛɛ ti wotea nya gama, ngi ti bawo.’ ”

²⁸Faale Pɔɔl i gakpueilɔ yɛ, “Mahoungɔ wu hugɔɔ kiahuna kɛ Ngewɔ i ngi bawoyɛi yoyonga nasia gama Juubla yaa tie, tawao ta humɛni lɔ huɛɛŋ!” [

²⁹Ji Pɔɔl i ji leni, Juusia ti gbuɛilɔ ta li a ndabla gbua gagbalɛngɔ a ti nyɔunyɔu.]

³⁰Pɔɔl i heilɔ mia foo fele va, lomui ngi yeya a pawa wuaa na va. Tawao i yɛ gahu gbualɔ nasia ma ti yɛ wa ngi lɔma.

³¹I yɛlɔ a ngowili yiɛi le kɔlooni Ngewɔ mahayɛi ma, a kaa gɛ a ngi nyɛkɛ kpawama leeŋ kɔloongɔ Yesu Kristi ma.