Read Ngowili Yekpei Numu Kpɛlɛɛ Va TOBLEISIA TI WIEHINDEISIA 5 Bible Online

TOBLEISIA TI WIEHINDEISIA 5 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 5

¹Kɛɛ taamɔ yila i yɛlɔ na ngi laa a Ananayas, ngi nyahɛi laa a Safaira. I ti yeyahani majiɛilɔ

²kɛɛ i yeenavoei tɛnga lɔwuilɔ, ngi nyahɛi i hugɔngɔ, i yeemɔnii loko wuaa tobleisia yeya.

³Pita i ngi mɔlilɔ yɛ, “Ananayas, gbɛe bi lumani Seitana i gu bi lii ma ndɛɛ gualava Ngewɔ Yafei wɛ a ji bi navoei na tɛngaa lɔwuni wu majɔɔni wu yeyahani na va wu majiani?

⁴Pɛiŋ wu yaa wu yeyahani na majia wua lɔ wu woo yɛla, tawao majiangɔi wooma wu woo mia a yeenavoei. Gbɛe naa i wuni bi lii hu hinda bondei ji wieva? Bii ndɛi na gualani nuuvu wɛ, bi kualanga Ngewɔ lɔ wɛ!”

⁵Kia lekee Ananayas i ji mɛnini kɛ i gulanga gbuluwulu i haa, kɛ nduwɛi i nasia gbi huvenga ti yeehindei ji humɛnini.

⁶Kɔɔngɛisia ti hiyeilɔ, ti Ananayas womɛi beembee kasangei hu, ti li la ti kpɔwu.

⁷Hawa sawa wooma ngi nyahɛi i wɛilɔ mia Pita i yɛ na kɛɛ ii yɛ na gɔɔ i ngi hinii wienga.

⁸Kɛ Pita i ndenga ngi ma yɛ, “Hugɛ lɛɛ a nge, navoei kpɛlɛɛ lɔ wua bi hinii wu majɔɔni wu yeyahani na va wu majiani?” I kpɛmboilɔ yɛ, “Mmm, kpɛlɛɛ mia.”

⁹Kɛ Pita i ngi mɔlinga yɛ, “Gbɛe i wuni wua bi hinii lii hu Ngewɔ Yafei wɛlɛva? Nungɛi nasia ti bi hinii gbɔwuni tiaa pɛlei laa kiahuna, tawao ta lilɔ a bia bɛɛ!”

¹⁰Ngaama kɛ i gulanga gbuluwulu Pita gulɔ i haa. Kia kɔɔngɛisia ti wuaani pɛlei bu, ti tɔilɔ kɛ ngi haangɔe, kɛ ti gbuanga a ngie ti ngi gbɔwu ngi hinii gblanga.

¹¹Nduwa waa i Yesu mableisia gbi huveilɔ kɛɛ nasia gbi ti ji mɛnini.

¹²Tobleisia ti kabande hinda gboto wieilɔ nungeisia lia. Yesu Mableisia gbi ti lɛilɔma hinda yila Sɔlɔmɔn wɛɛyasɛi hu.

¹³Numu gbama gbi ii liiloni aa wili ti lia kia bɛɛ nungeisia ti yɛlɔ a ti yɛpɛ yekpe le.

¹⁴Kɛɛ faha waa, hiingaa kɛɛ nyahangaa, ti yɛlɔ lekee a la a Yesu, ta gbɛɛ Ndemɔi mableisia ma.

¹⁵Kabande hindei nasia va tobleisia ti yɛ pie, nungeisia ti yɛ gbualɔ a heegbɛbleisia peleisia ma ta ti la kpukɔisia ma kɛɛ ngalɛisia aako Pita i yaa lewema ti gblanga ngi nɛnɛi lekee bɛɛ i wɛlɛ ti lɛɛnga ma.

¹⁶Faha gboto ti yɛlɔ a wa Jelusalɛm ta gbua fulei nasia gbi hu ti na galangɔ, ta wa a ti heegbɛbleisia kɛɛ nasia ngafa nyamuisia ti yɛ ti hu, tawao ti gbi ti bawoilɔ.

¹⁷Kɛɛ Saagbuablɛisia ti gulɔmɔ wai kɛɛ ngi woomablei nasia tia tieni ti yɛ Sadusii gakei ma, ti tolo waa gbuɛilɔ tobleisia ma, ti ti lii huyili hinda wieva a tie.

¹⁸Ti tobleisia houilɔ ti ti wu kpindiwɛlei na bu ti yɛ pienyamublɛisia wu na.

¹⁹Kɛɛ kpindi na Ngewɔ malikei i pieilɔ kpindiwɛlei yeendamɛisia ti lawo, i gbua a tobleisia, i nde ti ma yɛ,

²⁰“A li wu lo Ngewɔ Wɛlei bu, wu ndɛvu ninɛi ji gbi hinda hugɛ a nungei nasia ta yɛ na.”

²¹Tobleisia ti goleilɔ malikei layie bu, faale kia ngele i woni ti wuailɔ Ngewɔ Wɛlei bu ti tɔtoo a nunga gaala. Saagbuablɛisia ti gulɔmɔ wai tia ngi mbaangɛisia ti Juu gbakoloisia gbi lɛilɔma, ti Kotii gomɛ, ti polisisia lo kpindiwɛlei bu wava a tobleisia ti gulɔ.

²²Kɛɛ ji polisisia ti foni kpindiwɛlei laa, tii tobleisia maleni na; faale ti yamɛilɔ Kotii hu ti hugɛ tɛɛ,

²³“Ji mu foni kpindiwɛlei laa, mu maleni kpɔungɔ kpaŋ, sojeisia gbi ti looni yeendamɛisia, ta na manɛɛ; kɛ kia mu yeendamɛisia lawoni muii numu gbi lɔni kohu!”

²⁴Ji Ngewɔ Wɛlei mahugbe polisisia ti mahumɔi tia Saagbuablaa Waawaisia ti ji mɛnini, ti wuhu i wuilɔ, tii kɔɔ gbɔɔ i tobleisia wienga.

²⁵Kɛ taamɔ yila i wuaanga Kotii hu i nde ti ma yɛ, “A wolo lɛɛ! Nungɛi nasia wu ti wuni kpindiwɛlei bu tiaa looni Ngewɔ Wɛlei bu ta nungaa gaa!”

²⁶Kɛ polisisia ti gulɔmɔi tia ngi bublɛisia ti ya tia tobleisia ti yaama Kotii hu, kɛɛ tii wani a tie a kpaya ajifa ti luwangɔ yɛla tɛɛ nungaa taa ti hɔwɔhɔwɔ a kɔtii.

²⁷Tia tobleisia ti wuailɔ Kotii hu, ti pie ti lo Kotii gulɔ kɛ Saagbuablɛisia ti gulɔmɔ wai i ndenga ti ma yɛ,

²⁸ “Mu sawa lɛilɔ gɛ muɛɛ waa numu gbi gaa a na Yesu ji ndeni yɛ wu yɛ a nungaa gaa la, kɛɛ a tɔ lɛɛ gbɔɔ wu pienga! Wu yeekaai ji vayanga Jelusalɛm yeesɔkui hu gbi, tawao wu longɔ wu ngi haalei lɛ mu wumba!”

²⁹Pita tia toblaa wekeisia ti poteilɔ tɛɛ, “Mahoungɔe mu golo Ngewɔ wɛ kia maa golo nuuvu wɛ.

³⁰Ngewɔ na mu maadani ti yɛ fɛli i pieilɔ Yesu i vulu i hiye hee hu, ji wu wilani a ngi waala a ji wu ngi gbakpani krɔsii ma.

³¹Ngewɔ i pieilɔ i lɛ i hei ngi yejei hu, i ngi wote a Mahɛi kɛɛ Mbawomɔi, aako i Isrɛlbleisia gɔ a watii wounvevaa ti jumbuisia ma i manu ti ma.

³²Yeehindei jisia yeeselisia a mua lɔ — mua kɛɛ Ngewɔ yafei, na Ngewɔ a fe gbama nasia wɛ ta golo ngi wɛ.”

³³Kia Kotii lebleisia ti ji mɛnini ti lii i leweilɔ hulewengɔ, ti kiti la tobleisia waavaa.

³⁴Kɛɛ ti yilayee, Farisiimɔ a ngie ngi laa a Gameliɛl, Sawei Yeekaamɔ waa a ngie nungaa gbi ti baa gɔngɔ waa ngi ma, i hiyeilɔ i lo Kotii hu. I ndeilɔ yɛ polisisia ti gbua lɛɛ a tobleisia,

³⁵kɛ i ndenga Kotii lebleisia ma yɛ, “Isrɛlbleisia, a wu mahugbe kɔlooni na ma wu longɔ wu pie a nungei jisia.

³⁶Hu ii yaa guhani waa Tiudas i gbuɛilɔ nga, yɛ numu waa lɔ a ngie; tawao numu hɔndɔɔ naani ti toilɔ ngi wooma. Kɛɛ ti ngi waalɔ, ngi woomableisia ti hu i vaya, ngi hindei i lufe.

³⁷Na wooma, Judas Galilimɔi i gbuɛilɔ nga watii na gɔmɛtii yɛ numui gbi gbawama; faha waa ti toilɔ ta bɛɛ wooma; kɛɛ ti ta bɛɛ waalɔ kɛ ngi woomableisia gbi ti hu i vayanga.

³⁸Faale, hindei yeeji hu, nyaa ndema wu ma ngɛɛ waa hinda gbi wie a nungei jisia. A gbe ti ma ajifa hugbatɛi ji kɛɛ ti yengei ji ti piema, ina i yɛni a nuuvu hugbatɛ lɔ, a lufelɔ;

³⁹kɛɛ ina i gbuanga Ngewɔ gama lɔ, wɛɛ gu a ti huvayala. Wɛɛ loto wua yekpe lɔma wa lapi a Ngewɔ!” Kotii lebleisia gbi ti woloilɔ Gameliɛl laahii ma.

⁴⁰Ti tobleisia loliilɔ Kotii hu, ti pie polisisia ti ti lewe, ti sawa la ti ma tɛɛ kunafɔ taa gbɔma numu gbi gaa a na Yesu i ndeni yɛ ti yɛ a nungaa gaa la; na wooma kɛ ti gbenga ti ma.

⁴¹Tobleisia ti gbuɛilɔ Kotii hu ti goohu nɛngɔ hulewengɔ ajifa Ngewɔ i kɛnga kɛ ti mahoungɔe mbɛlɛnyani i ti male Yesu wooma.

⁴²Folo gbi lekee tobleisia ti yɛlɔ a nungaa gaa, ta Yesu, Ngewɔ Maha heingɔi woowili Yekpei le Ngewɔ Wɛlei bu kɛɛ nungeisia ti wɛleisia bu.