Read Ngowili Yekpei Numu Kpɛlɛɛ Va TOBLEISIA TI WIEHINDEISIA 7 Bible Online

TOBLEISIA TI WIEHINDEISIA 7 - Ngowili Yekpei Numu Kpɛlɛɛ Va bible

TOBLEISIA TI WIEHINDEISIA 7

¹Saagbuablɛisia ti gulɔmɔ wai i Stivin mɔlilɔ yɛ, “Tɔnya vulii lɔ a hindei ji kpɛlɛɛ ti tɛnga bi wumba?”

² Stivin i kpɛmboilɔ yɛ, “Nya ndeengɛisia kɛɛ kɛkɛ-ni! A wolo nya ma! Mahɛi Ngewɔ Waa i gɛilɔ a mu maada Ebraham watii lɛ i yɛ heini Mesɔpɔtemia pɛiŋ i yaa gule i li Heran,

³i nde ngi ma yɛ, ‘Bi bondeisia lo kɛɛ bi lɔlei, bi li ndɔlei na hu nga kɛ a bie.’

⁴ Faale i guleilɔ Kaldia lɔlei hu i li i hei Heran. Kia ngi kɛkɛ i haani, Ngewɔ pieilɔ i gule i wa ndɔlei ji hu wu heini na na.

⁵A watii na Ngewɔ ii yeendɔlɛi ji yeehinda gbi veni Ebraham wɛ a ngi woo, numu gɔwɔ-loma bɛɛ; kɛɛ Ngewɔ i Lahei wumbuilɔ yɛ a felɔ ngi wɛ, tawao a yɛlɔ a ngi woo kɛɛ ngi leengeisia ngi haangɔi wooma. Watii na Ngewɔ i Lahei ji wumbuni, ndo gbi ii yɛ Ebraham yeya.

⁶ Ngewɔ i ji lɔ leni ngi ma yɛ, ‘Bi bɔɔsɔɛisia ta hotaya mɛlɔ ndɔlɔ weka hu, ti wote na a nduwɔngaa, yeendɔlɔblei nasia ti nyamu waa a tie foo hɔndɔɔ naani va.

⁷Kɛɛ nga kpalɛ lalɔ ti luwɔkɛisia ma, tawao na wooma ta gbualɔ yeendɔlei na hu ti hɛɛ nya ma hindei ji.’

⁸Kɛ Ngewɔ i bili heilɛi venga Ebraham wɛ a ngi hinda yangilingɔi yeetɔmaseli. Faale Ebraham i Aisaki heiilɔ biliya ji ti ngi leni i gu a njii wayakpa; Aisaki i Jekɔpi hei biliya, Jekɔpi i mu maada puu maahu feleisia hei biliya.

⁹“Kɛɛ mu maadani ti loleilɔ a ti ndewei Josɛfi, ti ngi majia, ngi yeyablɛisia ti li a ngie Ijipt ti ngi yɛ a nduwɔ. Kɛɛ Ngewɔ i yɛ ngi wooma lɔ,

¹⁰i kpundɛi kpɛlɛɛ huvo a ngie. Ji Ijipt Mahɛi Fɛɛro i yaama wɛlɛni Josɛfi ma, Ngewɔ i ngi gɔilɔ a nɛmahulewe, i pie ngi hinda i nɛɛ waa Fɛɛro wɛ. Fɛɛro i Josɛfi yɛilɔ a maha Ijipt lɔlei kpɛlɛɛ maahu kɛɛ ngi wɛlɛbubleisia gbi.

¹¹Kɛ ndɔlɛ waa i gulanga Ijipt lɔlei hu gbi kɛɛ Kenaan, i nungaa liima vɔɔni waa. Mɛhɛɛ jɔma gbi ii yɛ mu maadani yeya.

¹²Faale kia Jekɔpi i mɛnini kɛ mɛhɛɛ lɔ Ijipt, i ngi hingaleengeisia loilɔ na, mu maadani, ti haala jia ga ti li na.

¹³Kia ti yamani na jiei yeefelei hu, kɛ Josɛfi i ta yekpe hinda hugɛnga a ngi ndeengɛisia, kɛ Fɛɛro i Josɛfi ngi bondeisia hinda hugɔɔnga.

¹⁴Faale Josɛfi i ngowili wiliilɔ ngi kɛkɛ Jekɔpi gama yɛ tia ngi bondeisia gbi ti wa Ijipt lɔlei hu: ti kpɛlɛɛ ti yɛ numu sawa gbɔyɔngɔ maahu puu maahu lɔɔlu.

¹⁵Na wooma Jekɔpi i liilɔ Ijipt, tawao ta kɛɛ mu maadani ti haani na lɔ.

¹⁶ Ti yamɛilɔ a ti womɛisia Sɛkɛm ti ti gbɔwu kambɛi na hu Ebraham i ngeyani wɔɔ Hemɔ bondeisia ma a navoo.

¹⁷“Lahei wɔɔ Ngewɔ i mbumbuni Ebraham gama, kia yeehindei wie-gbelei i lukpeni kpla, mu bondeisia ti gbotoilɔ waa Ijipt.

¹⁸Kɛlɛmɛi numu weka, na ii yɛ Josɛf hinda hugɔɔ i mahayɛi mɛilɔ Ijipt.

¹⁹I kava gulɛilɔ mu bondeisia ma, i nyamu waa wie a mu maadani, a kpɔnda ti ma ta ti loolaaisia gbua pɛleisia bu ta ti wili aako ti haa.

²⁰Yeewatii ji mia ti Mojisi leni, ngi nyandengɔ waa. Ngi lebleisia ti liilɔ a ngie ti yeepɛlɛbu ti ngi makɛ ngalu sawa va,

²¹kɛɛ kia ti ngi gbuani pɛlei bu ti ngi wilini, Fɛɛro nyahaloi lɔ i ngi woteni a ngi loi, i ngi gbuahu.

²²Ti ngi gaailɔ a Ijiptblɛisia ti nɛmahulewei gbi, i wote a numu waa ngi layie hu kɛɛ ngi wiehindei.

²³“Kia Mojisi voo i guni a numu fele gbɔyɔngɔ, i wuilɔ ngi lii hu liva i ngi ndeengɛisia, Isrɛlbleisia, ti yɛyii hulɔ.

²⁴I yeengila lɔilɔ Ijiptmɔ yila a ngi liima be, kɛ i gbɔnga Isrɛlmɔi ma, i Ijiptmɔi waa.

²⁵(I yɛlɔ ngi nɛmahu kɛ ngi nda nungeisia ta liiheilɔ ma kɛ ta lɔ Ngewɔ i piema i ti gbua nduwɔyɛi hu, kɛɛ tii liiheini ma.)

²⁶Folo wekei ma i Isrɛlblaa fele lɔilɔ ta lapi kɛ i lapinga ti luahu gɔlɛva. I ndeilɔ ti ma yɛ, ‘Ndakpeisia, a wolo lɛɛ, ndeengaa lɔ a wue; gbɛe wu nyamuma a wu nyɔunyɔ?’

²⁷Kɛ yeena i nyamui gani a ngi mbaa i Mojisi lukpenga, i ngi mɔli yɛ, ‘Ye lɔ i bi yɛni a maha kɛɛ kitilewemɔ mu maahu?

²⁸Bi longɔe bi nya waa kia bi Ijiptmɔi na waani la gbengi?’

²⁹ Kia Mojisi i ji mɛnini, i wilɛilɔ i gbua Ijipt i li i hei Midian lɔlei hu. Na lɔ i hindolo fele leni na.

³⁰“Kia foo numu fele gbɔyɔngɔ i gbɔyɔni, malika yila i gɛilɔ a ngie ngɔmbuvoi hu i houni ndawɛisia ma ndɔgbɔ lambɛi ma Sainai Yɛyei gblanga.

³¹Ji Mojisi i ngɔmbuvoi lɔni kpɔvɔi hu, ngi wuhu wuilɔ, kɛ i lukpenga yeendɔgbɔi gbla hubɛɛva pandawanda. Kɛɛ i Ndemɔi woi mɛnilɔ yɛ:

³²‘Bi maadani ti Yewɔɛi mia a nge, Ebraham kɛɛ Aisaki kɛɛ Jekɔpi ti Yewɔɛi.’ Mojisi i luwɛilɔ ngi maa a gbɛli tawao ii yaa liiloni na gbeva.

³³Ndemɔi ndeilɔ ngi ma yɛ, ‘Kɔɔwɛi na gbua bi gɔwɔhu ajifa nya woo mia gba a hindei na bi looni na.

³⁴Ngi ndiimavɔɔni nasia lɔnga i lama nya nungeisia ma Ijipt lɔlei hu tawao ngi yeinga ti bawova. Faale wa na, nyaa bi loma Ijipt.’

³⁵“Mojisi lɔ wɔɔ Isrɛlbleisia ti gbeeleni ma. Ti ngi mɔlilɔ tɛɛ, ‘Ye lɔ i bi yɛni a Maha kɛɛ nyama mu maahu?’ Ta lɔ Ngewɔ i ngi yoyoni a maha kɛɛ mbawomɔ, Malikei na i gɛni a ngie ngɔmbuvoi hu a gbɔ ngi ma.

³⁶Ta lɔ i gbuani a Isrɛlbleisia Ijipt lɔlei hu, i kabande hinda waawangaa wie yeendɔlei na hu kɛɛ njɛi na laa ti yɛ toli a Rɛd Sii (Nja Gbɔlii) kɛɛ ndɔgbɔ lambɛi ma foo numu fele gbɔyɔngɔ va.

³⁷Mojisi mia ndeni Isrɛlbleisia ma yɛ, ‘Ngewɔ a tutu yoyolɔ wu wɛ, kia lɔɔ i nya yooyoni, yeetutui na a gbua wu nda nungeisia hu lɔ.’

³⁸Mojisi lɔ Isrɛlbleisia ti yɛ ngi lokoya ji ti yandɔni ndɔgbɔ lambɛi ma: i yɛ na lɔ tia maadani Malikei na i yɛpɛni ngi gama ngiyei na hu ta toli a Sainai; ta lɔ i Ngewɔ woowili vulungɔi majɔɔni teweva mu gama.

³⁹“Kɛɛ mu maadani tii lumani taa golo ngi wɛ; ti ngi lukpeilɔ mia, ti wɔɔ yamava gbɔma ijipt.

⁴⁰Faale ti ndeilɔ Eerɔn ma tɛɛ, ‘Ngewɔ wekangaa gbatɛ mu wɛ ti lo mu gulɔ. Muii kɔɔ gbɔɔ i Mojisi na wienga i gbuani a mue Ijipt lɔlei hu.’

⁴¹Yeewatii na mia ti nɔmɔlii gbatɛni kia nika na, ti saangaa gbua yee nɔmɔli ma, ti komɛ waa ga tia yekpe ti gbatɛ-hani na va.

⁴² Kɛɛ Ngewɔ i wounveilɔ ti ma, i pie ti wote hɛɛla ma tumbekeisia ma ti ngelei ma, kia nyɛingɔ la Ngewɔ lutuisia ti gɔlɛi hu tɛɛ, ‘Isrɛlbleisia! Nya va ii le wu yɛ tohanisia waa wa kpua a saa foo numu fele gbɔyɔngɔ va ndɔgbɔ lambɛi ma.

⁴³Wu yewɔɛi Molɔk ngi gula-welei mia wu yɛ li la, kɛɛ wu yewɔɛi Rifan ngi lumbekei gbuayei; ti yɛni a nɔmɔlingaa lɔ wu kpatɛni hɛɛva ma. Faale, nga pielɔ ti li a wue Babilɔn yeepoma.’

⁴⁴“Kula-wɛlei na wɔɔ Ngewɔ a yɛ mbu tamia a yɛ wɔɔ mu maadani yeya ndɔgbɔ lambɛi ma. Mojisi i kpateilɔ kia Ngewɔ i hugɛni a ngie kpatɛva.

⁴⁵Na wooma mu maada nasia ti Ngewɔ gula-wɛlei majɔɔni a ti kɛkɛ-ni ti yɛlɔ a li la ji tia Jɔsua-ni ti lini ti ndɔlei hou kɛnyɛi nasia yeya Ngewɔ i ti gbɛni ti gulɔ. Tawao i loilɔ na haaŋ i to Devidi watii ma.

⁴⁶Devidi hinda i nɛɛlɔ Ngewɔ wɛ tawao i ndeilɔ yɛ Ngewɔ i luma ngi wɛ i pɛlɛ lo Jekɔpi Yewɔɛi wɛ.

⁴⁷Kɛɛ Sɔlɔmɔn lɔ i pɛlɛ loni ta ngi Ngewɔ wɛ.

⁴⁸“Kɛɛ Ngewɔ Yalɛngɔ Wai ii heini pɛlɛ bu nuuvungaa ta to, kia Ngewɔ i puni ngi lutui laa yɛ,

⁴⁹ ‘Ngelegoohu lɔ nya Maha heimi le, tawao dunyei lɔ nya gɔwɔ-lomɛi le. Pɛlei yeegbɛ nyɔkɔ lɔ bi longɔ bi too nya wɛ? Mindo lɔ nga lɛɛvu na?

⁵⁰Nya vulii ii le ngaa hani jisia kpɛlɛɛ gbatɛ?’

⁵¹“Wu woohu i gbɔndani kpa! Wu liisia ti yakani kpa Ngewɔ ma, wu wolihu i lutuni kpa Ngewɔ woowili va! Wu gbuangɔ lɔɔ a wu maadani lɔ: wua bɛɛ wu gangangɔe a wolola Ngewɔ Yafei ma!

⁵²Ngewɔ lutu i yɛlɔ na wɔɔ na wu maadani tii ngi yakpɛni a nyamu? Ti Ngewɔ lutui nasia waalɔ ti Ngewɔ Bɔilopo wɔnangɔi walei hugɛni wɔɔ. Kiahuna na wu ngi venga, wu ngi waanga.

⁵³Wua lɔ Ngewɔ i sawei na veni wu wɛ malikeisia ti feni Mojisi wɛ — na hu gbi wuii yeesawei houni!”

⁵⁴Kia Kotii lebleisia ti woloni na gbi ma Stivin i ndeni, ti lii i leweilɔ waa ngi ma, ti yaamɛi gbi gbunyɛngɔ.

⁵⁵Kɛɛ Ngewɔ Yafei i Stivin hu, i ngelema gbeilɔ tiŋ kɛ i Ngewɔ mahayɛi hulɔnga kɛɛ Yesu i looni Ngewɔ yejei hu.

⁵⁶Kɛ i ndenga yɛ, “A tɔ lɛɛ! Nyaa ngelegoohu lɔma ndawongɔ kɛɛ Nuuvu Hindoloi i looni Ngewɔ yeja gakei ma!”

⁵⁷Numui gbi ti yele waa gulɛilɔ, ti loko wuaa ti wolisia hu, ti wa Stivin maahu a leenga,

⁵⁸ti ngi gbua tei hu, ti ngi hɔwɔhɔwɔ. Selisia ti yɛ ti magulɛisia loko wuaa taamɔ yila lɔ yeya ngi laa a Sɔɔl.

⁵⁹Ti loni ngi hɔwɔhɔwɔmaa i Ndemɔi loli yɛ, “Ndemɔi Yesu, nya yafei wumbu!”

⁶⁰Kɛ i wombi gbakpanga, i yele gula a ngoo waa yɛ, “Ndemɔi, manu ti ma jumbui ji va!” Kia i ji leni kɛ ngi lii i wuaanga.