Read Ngowili Yekpei Numu Kpɛlɛɛ Va ROMABLEISIA 1 Bible Online

ROMABLEISIA 1 - Ngowili Yekpei Numu Kpɛlɛɛ Va bible

ROMABLEISIA 1

¹Nya Pɔɔl, Yesu Kristi Ngewɔ i loko loni nya ma, i nya loli yɛva a tomɔ, i nya gbua toblaa wekeisia ma Ngowili Yekpei na leva Ngewɔ i njooyoni, nya mia ngi kɔlɛi ji nyɛima.

²Ngewɔ i Lahei wumbunga wɔɔ kpɔɔ, i punga ngi lutuisia laa kia nyɛingɔ la Ngewɔ Gɔlɛi hu.

³Yeengowili Yekpei ji i ngi Hindoloi lɔ hinda hugɛma, mu Lemɔi Yesu Kristi; nuuvuyei hu, ti ngi leni Mahɛi Devidi bembei hu lɔ;

⁴kɔlooni ngi hiyelei ma Ngewɔ gama kɛɛ ji jumbu gbi ii yɛ ngi ma, Ngewɔ i ngi gɛilɔ a kpaya waa kɛ ngi Loi mia a ngie a ji i pieni i vulu i hiye hee hu.

⁵Kristi sabui hu lɔ Ngewɔ i ngauwanda veni mbɛ yɛva a tomɔ aako gbɔma ngi pie kɛnyɛ gbi lekee yeenungeisia ti la la, ti golo Kristi wɛ.

⁶Wua yeenungei jisia a wue, wua wu Rom, Ngewɔ i wu lolinga yɛva a Yesu Kristi woo.

⁷Faale nyaa kɔlɛi ji nyɛima wu kpɛlɛɛ gama wu Rom Ngewɔ longɔ a wue tawao i wu lolinga yɛva a ngi nda nungeisia: Nyaa mu Kɛkɛ Ngewɔ vɛlima kɛɛ mu Lemɔi Yesu Kristi aako ti ngauwandei kɛɛ ndiilɛli ve wu wɛ.

⁸Haala, ngi siɛgbua nya Yewɔɛi ma Yesu Kristi sabui hu wu kpɛlɛɛ va; ajifa dunyei gbi lɔ mɛnima kia wu langɔ a Yesu.

⁹Ngewɔ kɔɔlɔ kɛ na nga nde tɔnya le, Ngewɔ na ngi yengema ngi wɛ a nya lii gbi a ji nga Ngowili Yekpei hugɛ a nungaa kɔlooni ngi Hindoloi ma. Ngewɔ kɔɔlɔ kɛ wu hinda lɔ tuuŋ nya nɛmahu

¹⁰watii gbi nga yɛ hɛɛma. Nyaa Ngewɔ vɛlima ngɛɛ i pie ngi gu a fola wu ma.

¹¹Ajifa nya longɔ waa le mua wueni mu lɔ aako wu kpekpeyei na majɔɔ Ngewɔ a fe a ngi Yafei loko aako i wu yafeisia gbaya.

¹²Na nya lii i ma ta lɔ a ji mua wueni ma kpɔma majɔɔ a lenga a ji ma mu nyɔunyɔ lii gba ajifa wu nya layii gɔɔlɔ a Kristi, nya bɛɛ ngi wu layii gɔngɔ a ngie.

¹³ Nya longɔ wu ji gɔɔ, nya ndeengɛisia; watii gboto ngi hugbatɛnga fova wu ma, kɛɛ hinda wulo a pielɔ lɔɔ ngɛɛ gu. Nya longɔ ngi gu nungaa ma wua bɛɛ lia ti la a Yesu Kristi kia ngi pienga la a nasia Juublaa yaa tie.

¹⁴Ajifa mahoungɔ ngi li kɛnyɛwekɛisia gama, nasia ti kɔlɔ gɔngɔ kɛɛ nasia tii kɔlɔ gɔɔ.

¹⁵Faale na, nya longɔ waa le ngi Ngowili Yekpei hugɛ a wua bɛɛ wu Rom.

¹⁶ Nya liilɛlingɔ waa le a Ngowili Yekpei; i Ngewɔ gbaye hulɔ kɔ nasia gbi ta laa a ngie i ti bawo, Juuisia yese kɛɛ nasia Juublaa yaa tie.

¹⁷ Ajifa Ngowili Yepkei lɔ a hugɛ kia Ngewɔ a yee nuuvu yɛ a pɔɔnamɔ i tia ta luahu gbatɛ: yeepelei lɔ a lala a Ngewɔ i too kɛlɛmɛi. Kia Ngewɔ Gɔlɛi ndeni la yɛ, “Numui na Ngewɔ a tia ta luahu gbatɛ ngi lalei va, a ngi yɛlɔ a pɔɔnamɔ tawao a ndɛvu majɔɔlɔ.”

¹⁸Ngewɔ i kɛnga, kɛ ngi liilewengɔ waa, kia i wama njia wɛlɛma nuuvungaa ma nyamui nasia kpɛlɛɛ va ti pienga a ngie kɛɛ jumbui nasia ti ngulinga nuuvuisia ma; nasia ti hinda nyamuisia ta nungeisia maabali a tɔnyɛi gɔla kɔloongɔ Ngewɔ ma.

¹⁹Ngewɔ a kpalɛ lalɔ ti ma, ajifa na nungaa ta gu a kɔɔla kɔloongɔ Ngewɔ ma tia ti kɔɔlɔ gbalauŋ, Ngewɔ vulii lɔ i hu yɛni gbalauŋ.

²⁰Kia wɔɔ gba Ngewɔ i dunyei gbatɛni, ngi gbayei na kɛlɛma gbi ii ma kɛɛ ngi Yewɔyɛi nungaa ta gulɔ a kɔɔla gbalauŋ. Nungaa ta gulɔ a hindei jisia gɔla kɔloongɔ Ngewɔ ma hani nasia va i ti gbatɛnga. Faale ti gbuawee gbi ii na ti wiehindeisia yeenjiɛi hu.

²¹ Ti kɔɔlɔ kɛ Ngewɔ lɔ na kɛɛ ti ganganga a ngi yaateenga bɛlɛhei vela ngi wɛ tawao tɛɛ luma a siɛgbualaa ngi ma. Kia taa na wie, ta baaba gili lekee lɔ wie tawao ti nɛmahuisia wopongɔe, tɛɛ kili yekpengaa gbi wie.

²²Ta ndelɔ tɛɛ ti nɛmahu lewengɔe kɛɛ kpowablaa lɔ a tie.

²³Kia taa hɛɛ kunafɔ Yewɔɛi ma, ta hɛɛ nuuvu hani gbatɛngɔi nasia lɔ ma kpuangɔ a nuuvu ɔɔ ŋɔningaa ɔɔ fuuhanisia ɔɔ ndala-vuuhanisia.

²⁴Jifa nuuvugaa ti gbowangɔ hii, Ngewɔ i gbenga ti ma manɔhɔ hindei nasia wieva nɛngɔ ti wɛ, tawao ta sɔɔ hinda mawufengɔngaa wie a ti nyɔunyɔ.

²⁵Ta gangalɔ a lala a tɔnyɛi kɔloongɔ Ngewɔ ma, ta la a ndɛi; ta hɛɛlɔ Ngewɔ gbatɛhanisia ma ta golo ti wɛ kia taa hɛɛ hanii gbi gbatɛmɔi vulii ma, na mahoungɔ nungaa ti ngi lato kunafɔ va! Amiina.

²⁶Jifa nungaa ta ji wie, Ngewɔ i gbenga ti ma sɔɔ hinda mawufengɔngaa wieva. Nyahangɛisia vulii bɛɛ tiaa sɔɔ hinda nyamui wiema a ti nyɔunyɔ kpuangɔ Ngewɔ nda welei ma.

²⁷Hii lɔɔ hingeisia ti gbenga nyaha-hindei yeena ma Ngewɔ i pilini, ta ti nyɔunyɔ jɔɔ, hingeisia lɔ ngufema hindangaa wiema a ti nyɔunyɔu, faale Ngewɔ a kpalɛi na lalɔ ti ma mbɛngɔ ti ma nyamui na va ti pienga.

²⁸Jifa nuuvuisia tii lumani taa Ngewɔ gɔɔ, i gbenga ti ma aako ti yɛ a kili nɔhɔngɔ lekee wie, ta hindei nasia wie maa ii houni ti pie.

²⁹Ti liisia lavengɔe a pienyamu yeelasii gbi, ti haamingɔ nungaa wekeisia ti yeya-hanisia va, ta nyamui wie a ti nyɔunyɔ; ti liisia lavengɔe a tolo kɛɛ numu waala kɛɛ ndapi kɛɛ numu wɛlɛlaa kɛɛ kili nyamu wiela a nungaa wekeisia. Ta yɛpɛlɔ a ti nyɔunyɔ,

³⁰ta njia nyamuisia le ti nyɔunyɔ va, ti lolongɔ a Ngewɔ, ta ti nyɔunyɔu yɛli, ti mamaningɔ, ti yongangɔ; ta luva pele ninangaa gɔlima nyamu wieva: tɛɛ golo ti leblɛisia wɛ;

³¹ti gbowangɔ; na ta lahei wumbu pieva tɛɛ pie, tawao tɛɛ hindawanda wie, tɛɛ manu numu ma.

³²Ti kɔlɔ kɛ Ngewɔ jaa ndeilɔ yɛ numu nasia ta yee hindei nasia wie mahoungɔ ti haa. Tawao tii lema lekee a yeehindei jisia wiela, kɛɛ tia lɔɔ nungaa nɛpɔma ti wieva.