Read Ngowili Yekpei Numu Kpɛlɛɛ Va ROMABLEISIA 10 Bible Online

ROMABLEISIA 10 - Ngowili Yekpei Numu Kpɛlɛɛ Va bible

ROMABLEISIA 10

¹Nya ndeengɛisia, mani lɔ nya ma hulewengɔ gbo ngɛɛ Ngewɔ i Juuisia gbi bawo. Nyaa Ngewɔ vɛlima a nya lii gbi wu va.

²Nga ti jelilɔ kɛ tia Ngewɔ hindei madi houma waa, kɛɛ madihoui ii lɔtoni yeetɔnyangɔi ma.

³Jifa tii yaa pelei na gɔɔni Ngewɔ a numu yɛ la a pɔnamɔ, i tia ta luahu gbatɛ, tawao ti lapima a ti nda wele lavalɔ; faale tii toni Ngewɔ nda welei na ma na a numu yɛ la a pɔnamɔ.

⁴Ajifa Kristi i pienga kpaya gbi ii yaa Sawei hu, aako numu gbi lekee a la a Ngewɔ, Ngewɔ a ngi yɛlɔ a pɔnamɔ, i tia ta luahu gbatɛ.

⁵ Ji lɔ Mojisi nyɛini kɔlooni numu taa yɛva a pɔɔnamɔ sawei houlei va yɛ, “Numu gbi lekee a na wie Sawei i ndeni, a ndɛvui majɔɔ Sawei hu lɔ.”

⁶ Kɛɛ jimia ndengɔ Ngewɔ gɔlɛi hu kɔlooni numu taa Ngewɔ ti luahu gbatɛlɛi ma a ji numu yɛva a pɔɔnamɔ a la a Ngewɔ: “Baa nde bia yekpe ma bɛɛ, Ye lɔ a lɛ aijɛnɛ?” (yeembui lɔ a, yeeva a Kristi.)

⁷“Baa ji bɛɛ le baa yɛma, Ye lɔ a yei ndɔwu?” (yeembui lɔ a, Kristi wumbuva hee hu.)

⁸Na Ngewɔ Gɔlɛi i ndema ta lɔ: “Ngewɔ wooyili lɔ wu gbla kɛɛ wu laagulisia ya kɛɛ wu lii hu” na i ma ta lɔ a ngowili ji ma nde kɔloongɔ lala ma a Ngewɔ.

⁹Bi ndengaa leiŋ a bi laagulisia bɛɛ “Yesu lɔ Ndemɔi le,” bi la la bi lii hu kɛ Ngewɔ i ngi vuluilɔ i ngi wumbu hee hu, ba bawolɔ.

¹⁰Ajifa mu langɔe la mu liisia hu tawao Ngewɔ i mu yɛnga a pɔɔnablaa i mua tieni luahu gbatɛnga; mu ndeilɔ leiŋ a mu laagulisia tawao mu bawongɔe.

¹¹ Ngewɔ Gɔlɛi lɔ ndema yɛ, “Numu gbi lekee i langaa a ngie ngi yaa ɛɛ wufe.”

¹²Numu gbi ii gbuani ji ma ajifa nduahugɛ gbi ii Juuisia luahu tia nasia Juublaa yaa tie; Ngewɔ lɔ numui gbi ti Lemɔi le, tawao a nasia gbi lubalɔ waa ta ngi loli kpɔma va.

¹³Kia Ngewɔ Gɔlɛi ndeni la yɛ, “Numu gbi lekee a Ndemɔi biyɛi loli, a bawolɔ.”

¹⁴Kɛɛ ta yee ngi loli, ina tii yaa lani a ngie? Tawao ta yee la a ngie ina tii yaa ngowili mɛnini kɔlooni ngi ma? Tawao ta yee ngowili mɛni kɔɔlooni ngi ma ina tii ndeni ti ma?

¹⁵ Tawao ngowili a yee le ti ma ina tii tutungaa vayani hu? Kia Ngewɔ Gɔlɛi i ndeni la yɛ, “Nasia ta wa a ngowili yekpe, ti wangaa la i gabandeni kpa!”

¹⁶Kɛɛ numui kpɛlɛɛ ii le taa loko hei Ngowili Yekpei bu. Aisaya vulii i ndeilɔ yɛ, “Ndemɔi, ye lɔ i lani a mu wowili?”

¹⁷Faale na, lanaya a gbua ngowili mɛnila hu lɔ, tawao humɛnila a gbua ngowili lɔ hu kɔlooni Kristi ma.

¹⁸Kɛɛ gbɛɛ ngi mɔli, tɔnya le kɛ tii ngowili mɛnini? A tɔnya vulii ti mɛniilɔ kia Ngewɔ Gɔlɛi i ndeni la yɛ: “Ti woisia ti liilɔ ngeebu gbi; ti layieisia ti foeilɔ dunyei gɛlɛmɛi gbi.”

¹⁹ Gbɛɛ gbɔma ngi mɔli, tɔnya le kɛ Isrɛlbleisia tii kɔɔni? Mojisi vulii lɔ haalamɔ le i mɔli ji gbɛmboni yɛ, “Nga pielɔ wu lolo a nungei nasia kɛnyɛwu yaa a tie; nga pielɔ wu liilewe kɛnyɛi na ma yeenungeisia ti gbowangɔ.”

²⁰Aisaya i ngaulewei mato wieilɔ ji i ndeni yɛ, “Nungei nasia tii yɛ a nya gɔkɔli ti nya lɔilɔ, ngi gɛilɔ a nasia tii yɛ a nya hinda humɔli.”

²¹Kɛɛ Isrɛlbleisia tia ti va i ndeilɔ yɛ, “Ngi nya lokoisia lamboilɔ folo kpɛiŋ nungei nasia gama tɛɛ golo tawao ti gangangɔ.”