Read Ngowili Yekpei Numu Kpɛlɛɛ Va ROMABLEISIA 11 Bible Online

ROMABLEISIA 11 - Ngowili Yekpei Numu Kpɛlɛɛ Va bible

ROMABLEISIA 11

¹ Gbɛɛ ngi mɔli hɔɔ: Ngewɔ a gbelelɔ ngi gbɔugbɔu nungeisia ma? Sawo, ɛɛ pie! Nya vulii Isrɛlmɔ lɔ a nge, Ebraham bɔɔsɔ, nga gbua Bɛnjami bembei hu.

²Ngewɔ ii yaa gbeleni ngi nungei nasia ma i ti wumbuni a ngi liimablaa pɛiŋ i ya a dunyei gbatɛ. Wu Ngewɔ Gɔlɛi yeemia gɔɔlɔ Ilaija i gbonyɛni a Isrɛlbleisia Ngewɔ ma yɛ,

³ “Ndemɔi, ti bi lutuisia waanga, ti bi jaa-gbuamɛisia wongonga: nya yakpe lɔ ngi longa tawao tia lapima nya waava.”

⁴Ngewɔ i gbɔɔ leni ngi ma? I ndeilɔ yɛ, “Ngi numu Tauji wɔfla lamagbatɛnga nya yekpe va, nasia tii yaa hɛɛni ndɛɛ-Yewɔɛi Baal ma.”

⁵Hii lɔɔ hindei i na kiahuna: Nungaa wulohii lɔ na Ngewɔ i ti wumbunga a ngi yauwandei va.

⁶Ngi numu wumbulei i gbuani ngi yauwandei hu lɔ, ti wiehinda va ii le. Gbamaile ina Ngewɔ numu wumbulei i gbuama ti wiehindei hu lɔ, kɛ ngi yauwandei ɛɛ yɛ a ngauwanda yekpe.

⁷Faale naa Isrɛlbleisia tii na lɔni ti yɛ a kɔkɔli. Nungaa huwɔyɔngɔi nasia Ngewɔ i ti wumbuni tia mia ti tɔni; Ngewɔ i pieilɔ yeemɔniisia ti wolii hu i lutu, tii ngi loliwoi mɛnini.

⁸ Kia Ngewɔ Gɔlɛi i ndeni la yɛ, “Ngewɔ i pienga tɛɛ gu a hinda gbi hugɔɔlaa; i to foloi ji vulii ma tɛɛ gu a hinda lɔlaa a ti yaamɛisia tawao tɛɛ njia mɛni a ti wolisia.”

⁹Devidi ndeilɔ yɛ, “Ngewɔ i ti gomɛisia yɛ a mani ti gɔwɔla, i pie ti gula, i kpalɛ la ti ma!

¹⁰I pie ti yaamɛisia ti liwi kɔɔ taa gu a hinda lɔla; i pie ti mɔnɛisia ti gboto kpele gbi.”

¹¹Nyaa hɔɔ mɔlima: Ji Juuisia ti lugbani, ti gulailɔ ti juku? Na ii wieni kulo bɛɛ! Jifa ti jumbui wieni, mbawoyei i wanga nasia Juublaa yaa tie ti gama, aako Juuisia ti tolo gbua ti ma.

¹²Juuisia ti jumbui i wailɔ a kpekpeya waawaa gboto dunyei hu, tawao jifa tii temaya majɔɔni, i wailɔ a kpekpeya waawaa gboto nasia Juublaa yaa tie ti gama. Yeekpekpeyei ji a gboto kpa ji Juuisia nasia kpɛlɛɛ ta mbawo majɔɔ!

¹³Ngi yɛpɛma naa wualɔ gama Juublaa yaa wue: ina lekee nyaa tomɔyɛi hu wu gama wua Juublaa yaa wue, nga mata gbualɔ a nya yengei.

¹⁴Tɛnga nga gulɔ ngi pie nya nda gɛnyɛblɛisia ti tolo gbua, nya wiehindei na i pie Ngewɔ i ti lɛɛngaa bawo.

¹⁵Ajifa watii na Ngewɔ i gbeleni ti ma, Ngewɔ pieilɔ dunyablaa wekeisia ti yɛ a ngi ndiamɔngaa. A yee yɛ na hɔɔ ji Ngewɔ a ti gulu? A wielɔ lɔɔ kia haablaa ta yɛ vuluma ta hiye hee hu!

¹⁶Ti bledii na tii yaa a mɔni yaingaingaa ma, ti yeengaingɔmɛi yeehaalayei ve Ngewɔ wɛ, kɛ ngi woo lɔ a yeekpuhɛi bɛɛ na ta mɔɔ kpɛlɛɛ; tawao ti ngulii yeehapiisia vengaa Ngewɔ wɛ, kɛ ngi woo lɔ a yeembekeisia bɛɛ.

¹⁷Ti ɔlivi wulu hingɔi yeembekeisia lɛɛnga yaingainga ti ndɔgbɔhuyei yeembekei longa nga. Nasia Juublaa yaa tie wu wiengɔe kia ndɔgbɔhu ɔlivi wulii na, Ngewɔ pielɔ nasia Juublaa yaa tie ti kpekpei na majɔɔ fɛngɔ Juuisia wɛ.

¹⁸Faale na waa lɛɛ nasia hu ti ti yaini nga kia ngulu-bekengaa. Wa yee gu wu mamani wie? Ngulu-beke lekee mia a wue; wua ii le waa yɛ ngulu hapii gɔma hapii mia a wu gɔ.

¹⁹Kɛɛ ba ndelɔ bɛɛ, “Tɔnya le, kɛɛ ti mbekeisia yaliilɔ nga aako ti nya lomɛi majɔɔ.”

²⁰Ji lɔnyangɔe. Ti mbekeisia yaliilɔ ajifa tii yɛ lani a Ngewɔ, bia bi loilɔ bi lomɛi jifa bi langɔ a Ngewɔ, kɛɛ baa mamani wie ti lomɛi wumbuva; kia baa lawo, luwa bi bi mahugbe.

²¹Ngewɔ ii manuni Juuisia ma, tia hii mbekei nasia a tie Ngewɔ kpatɛni; wu langɔ la a manulɔ wu ma?

²²Mu tɔnga ji hu kia Ngewɔ hindawandangɔ kɛɛ kia ngi yagbalɛngɔ. Ngi yagbalɛngɔe a nasia ti jumbu wienga, kɛɛ ngi gbekpengɔ a wue — ina wuii gbeni a hindei nasia wiela a gbekpe a wue fa; kɛɛ wu gbengaa a ti wiela, Ngewɔ a wua bɛɛ yalilɔ nga.

²³Juuisia ti gbengaa a gangalaa a lala a Ngewɔ, Ngewɔ a ti yamalɔ ti loma wovei, ajifa a gulɔ a ti yamala na gbɔma.

²⁴Nasia Juublaa yaa tie wu wiengɔe kia ndɔgbɔhu ɔlivi wulii yeembekei na ta ngali nga, na kpuangɔ Ngewɔ nda welei ma, ti too ɔlivi wulu hingɔe ya. Juuisia ti wiengɔe kia ɔlivi wulu hingɔi ji; tawao bɛwɛbɛwɛngɔ waa le Ngewɔ wɛ mbeke yaingaingɔi jisia yamava ti nda wuliisia ya.

²⁵Tɔnya lɔwungɔ lɔ na, nya ndeengɛisia, na nya longɔ wu kɔɔ. A pielɔ wu gbe a gilila a wu nɛmahu leweyii. Ta lɔ a ji: Isrɛlbleisia ti woohugbɔndɛi ɛɛ lɛɛmbi kunafɔ va, a yɛlɔ lekee na i lo hu nasia Juublaa yaa tie ti kpɛlɛɛ ti mbawo majɔɔ.

²⁶ Tawao hii Isrɛlbleisia kpɛlɛɛ ta bawo. Kia Ngewɔ Gɔlɛi i ndeni la yɛ, “Mbawomɔi a gbua Jayɔn lɔ, i pienyamuisia kpɛlɛɛ gbule Jacɔpi bɔɔsɔɛisia gama,

²⁷ tawao ji lɔ nya hinda yangilingɔi le a tie, ji nga ti jumbuisia gbua ti ma.”

²⁸Ajifa Juuisia ti gbelenga Ngowili Yekpei ma, Ngewɔ juwunga lɔ a tie wu va, wua Juublaa yaa wie. Kɛɛ jifa Ngewɔ i ti wumbunga, ngi ndiamɔisia mia a tie ti maadani va.

²⁹Ajifa Ngewɔ ɛɛ ngi nɛmahu wote kɔlooni nasia ma a ti wumbu i ti luba.

³⁰Wua Juublaa yaa a wie, wu gangailɔ a Ngewɔ wɔɔ; kɛɛ kiahuna na Ngewɔ i manunga wu ma ajifa Juuisia ti gangani.

³¹Na hu yakpe mia Ngewɔ manumɛi na wu majɔɔni, Juuisia ti falianga na a Ngewɔ, aako tia bɛɛ ti Ngewɔ manumɛi majɔɔ.

³²Ngewɔ i nuuvui kpɛlɛɛ wunga jɔɔwɔ ya ajifa ta ganga a ngie; i ji wielɔ aako i manuma gɛ a ti kpɛlɛɛ.

³³Ngewɔ gbatei i wɔlɔni kpa! Ngi nɛmahulewei kɛɛ ngi hindahugɔɔlei hu i bɔni kpa! Kitii nasia a nda, ye lɔ a gu i fasai? Ye lɔ a gu a ngi wiehindeisia yee piele hugɔɔla?

³⁴Kia Ngewɔ Gɔlɛi ndeni la yɛ, “Yelɔ i Ndemɔi nɛmahu va gɔngɔ? Yelɔ a gu a ngi laahiila?

³⁵Yelɔ wɔɔ i hani gbi venga ngi wɛ, aako yeekpɛi i yɛ ngi ma kpuava?”

³⁶Ajifa Ngewɔ lɔ i hani gbi gbatɛni, tamia a pie hani gbi ti yɛ na tawao ngi vamia ti na. Ngɔlɔya i yɛ Ngewɔ wɛ kunafɔ va. Amiina.