Read Ngowili Yekpei Numu Kpɛlɛɛ Va ROMABLEISIA 12 Bible Online

ROMABLEISIA 12 - Ngowili Yekpei Numu Kpɛlɛɛ Va bible

ROMABLEISIA 12

¹Faale naa, nya ndeengɛisia, Ngewɔ manuma wai va mu gama, nyaa wu manɛnɛma: a wua yekpe ve a saahanii vulungɔ Ngewɔ wɛ, na Kayemangɔ tawao hinda nɛingɔ le Ngewɔ wɛ. Hɛɛ yeetɔnyangɔi a ji lɔ mahoungɔ wu pie.

²Waa hindei na wokɔɔ dunyablaa ti piema, kɛɛ a pie Ngewɔ i ndii ninangaa ve wu wɛ, i wu nɛmahui yeenina ve. Na wiengaa wa gulɔ a Ngewɔ liima hindei gɔɔla na kpekpengɔ, a ngi liilɛli tawao magbuama ii ma.

³Kɛ ngauwandei va Ngewɔ pienga ngi majɔɔngɔ, ngɛɛ wu kpɛlɛɛ ma: waa wua yekpe lɛ nɛmahu aa lewe na ma mbɛngɔ ma. Kia aa yɛ hii, a wua yekpe mayei nɛmahu, numu gbi i kiti lewe ta yekpe ma kia ngi layii i na a Ngewɔ.

⁴ Mbeke gboto lɔ mu gbuha yilei ma, tawao yeembeke gbi ngi yengei i gba pekeisia ti ndɛisia ma.

⁵Hii lɔɔ mu na, kia bɛɛ mu vahangɔ, kpuha yila lɔ a mue mua Kristi-ni, tawao mu wilingɔe mu nyɔunyɔ hu kia kpuha yilei yeembekeisia ti na.

⁶Faale mahoungɔ numu gbi i yenge a ngauwandei na Ngewɔ i fenga ngi wɛ gbama. Ina mu nda yengei a Ngewɔ wowili lelaa lɔ, mu pie kia mbɛngɔ mu layii ma a Ngewɔ.

⁷Ina kpɔma wiela le, mu kpɔma wie. Ina nungaa gaala le, mu ti gaa.

⁸Ina nungaa wekangaa ti lii nɛpɔ va le, mu pie. Numui na lekee a nungaa gɔ na hu i ngi yeya, i pie a pandawanda; numui na lekee tokulɔ a ngie, i yenge kpayangɔ; numui na lekee a manuma hindeisia wie a nungaa wekeisia, i pie a kohunɛ.

⁹Wu longaa a nungaa, a lo vulii a tie a wu lii gbi. A lolo a hinda nyamu, wu hɛlɛ a na kpekpengɔ.

¹⁰A lo a wu nyɔunyɔ kia njekohungaa, wu baa gɔɔ wu nyɔunyɔ ma a wu lii gbi.

¹¹A yenge kpayangɔ, waa hawa wie. A yenge Ndemɔi wɛ a wu lii gbi.

¹²Wu liilomɛi i pie wu yɛ kohunɛ hu, a liilo hinda gbɔugbɔisia hu wu yɛ a Ngewɔ vɛli kpema gbi.

¹³A Ngewɔ mableisia gɔ ti vɛlingɔ, a ti gɔ a wu yeya-hanisia, wu wu wɛleisia lawo hotangɛisia gulɔ.

¹⁴ A Ngewɔ manɛnɛ i nasia luba ta hitɛ wu wooma nyamuva a wue; a tɔnya, a ngi manɛnɛ i ti luba, baa ti jondu.

¹⁵Nasia ti goohunɛngɔ, wua tieni a goohunɛɛ, wu wɔɔ wua nasia ta yɛ wɔɔma.

¹⁶A gbewe numui gbi va mahɔngɔ. Waa mamani wie, tawao a luma ngenge na wiela ma bagɔma ii ma. Waa gili a wua yekpe kɛ wu nɛmahulewengɔe.

¹⁷Numu i hinda nyamu wiengaa a bie, baa hunyɔu ngi ma a hinda nyamu. A lapi wu na wie numui gbi ta nde tɛɛ kpekpengɔe.

¹⁸A hinda gbi wie wa gu ma, wua nungaa gbi wu yɛ ndiilɛli hu.

¹⁹Baa hinda nyamu hunyɔu numu ma a hinda nyamu kunafɔ, nya ndiamɔisia, kia waa na wie, a gbe ma Ngewɔ liilewei ta i pie. Ajifa Ngewɔ Gɔlɛi yɛ, “ ‘Nya lɔ nga hinda nyamu hunyɔu, nya lɔ nga yee kpɛi gbua,’ hii Ndemɔi ndeni.”

²⁰ Kia waa hinda nyamu hunyɔu a hinda nyamu, Ngewɔ Gɔlɛi yɛ, sao, “Ndɔlei yaa bi juwui ma, ngi gɔ a mɛhɛɛ; ngi bolohu i bengaa, ngi gɔ a njɛi i kpɔle; ajifa bi ji wiengaa kɛ bia teka gbandi waa heima ngi wumba.”

²¹Baa luma hinda nyamu aa wɛlɛ bi mahu, wɛlɛ hinda nyamu mahu a hinda yekpe wiela.