Read Ngowili Yekpei Numu Kpɛlɛɛ Va ROMABLEISIA 13 Bible Online

ROMABLEISIA 13 - Ngowili Yekpei Numu Kpɛlɛɛ Va bible

ROMABLEISIA 13

¹Mahoungɔ wu gbi wu golo ndɔlɔ mahubleisia wɛ, ajifa mahumɔ gbi ɛɛ yɛ na ina Ngewɔ ii lumani ma, tawao mahumɔi na i na kiahuna, Ngewɔ lɔ i ngi wunga na.

²Faale numu gbi lekee a lapi a ndɔlɔ mahumɔi na i na kiahuna, i lapima a Ngewɔ hinda hugbatɛngɔi lɔ, tawao numu gbi a na wie, a pielɔ mahubleisia ti kpalɛ la ngi ma.

³Gbamaile maa ii houni nasia ta hinda yekpe wie ti luwa mahubleisia ma kɛlee nasia ta hinda nyamu wie. Wuii lonilɔ wu luwa mahumɔ ma, kɛ a hinda yekpe wie, kɛ mahumɔi vuii i wu latonga.

⁴Gbamaile Ngewɔ yengemɔ mia a ngie, i yengema bi nda gbekpeyei valɔ. Kɛɛ bi hinda nyamu wiengaa, luwa mahumɔi ma, ajifa nimisei na a pie i nimisei la numu ma ii ngi yeya gbama. Ngewɔ yengemɔ mia a ngie tawao ta lɔ a Ngewɔ nimisei yeekpɛi gbua nasia ma ta hinda nyamu wie.

⁵Sabui ji va mahoungɔ wu golo ndɔlɔ mahubleisia wɛ - Ngewɔ nimisei lekee va ii le, kɛɛ jifa gbɔma wu lii a nde wu ma yɛ mahoungɔ wu pie.

⁶ Sabui ji va lɔ gbɔma mahoungɔ wu pawɛi gula, ajifa mahubleisia ti yengema Ngewɔ lɔ wɛ ji ta mahayengeisia wie.

⁷A ti gbɛi na gbua hɔɔ a yɛ wu ma; wu wu wui yeepawei gula kɛɛ wu jɔɔhani yeepawei, tawao wu bagɔma kɛɛ mbɛlɛhei ve nasia ti gbi wɛ.

⁸Numu gbi ngi gba aa yɛ wu ma; kpɛi na lekee mahoungɔ i yɛ wu ma ta lɔ a lola a wu nyɔunyɔ. Numu gbi lekee ngi longɔ a ngi mbaa nuuvu, i sawei hounga.

⁹ Sawei nasia ti ndeni tɛɛ, “Baa pue gbua; baa numu waa; baa huma wie; baa mani nyamu wie bi heinyɔui yeya-hani ma,” sawei ji kpɛlɛɛ kɛɛ pekanga ti wooma ti jɔsɔngɔe sawa yakpei ji hu, “Lo a bi mbaa nuuvui kia bi longɔ a bia yekpe.”

¹⁰Numu gbi lekee ngi longɔ a ngi mbaa nuuvui ɛɛ hinda nyamu wie a ngie kunafɔ. Kɛ lola a bi mbaa nuuvui ta lɔ hɔɔ sawei gbi houla le.

¹¹I gbua ji ma wu kɔɔlɔ kɛ, watii i hitinga kɔɔ wu wu njii hu. Gbamaile watii na Ngewɔ a mu bawo i lukpenga naa kpla i lewe watii na ma mu lani a Yesu Kristi a nina.

¹²Kpindi i longa te i gbɔyɔ, ngele i longa te i wo. A mu gbe a kpindihu hindeisia wiela, mu kɔhaakeisia wumbu lapiva fofoi hu.

¹³A mu mua yekpe mahugbe pandawanda kia nungei nasia ti heini fofoi hu; maa loko wili ndɔ gbolila hulewengɔ hu ɔɔ ndɔhou ɔɔ ngawufema hinda ɔɔ wɔji hinda ɔɔ ndapi ɔɔ tolo gbuala.

¹⁴Kɛɛ a Ndemɔi Yesu Kristi gɔ-haakeisia wumbu, wu gbe a wotela wu lii na gama a wa a jumbui, kɔɔ wu ngi liima hindeisia wie.