Read Ngowili Yekpei Numu Kpɛlɛɛ Va ROMABLEISIA 14 Bible Online

ROMABLEISIA 14 - Ngowili Yekpei Numu Kpɛlɛɛ Va bible

ROMABLEISIA 14

¹ A numui na gulu ngi lalei a Ngewɔ hugbɛɛngɔ tawao wua tieni waa ndabla wie kɔlooni ngi nda nɛmahui ma.

²Numu yila lalei a Ngewɔ a lumalɔ ngi wɛ hani mɛva, kɛɛ numui na ngi lalei a Ngewɔ hugbɛɛngɔ ɛɛ hua mɛ kɛ hakpɛi lekee.

³Numui na a hani gbi mɛ, aa lɛɛ numui na hu ɛɛ hani gbi mɛ tawao numui na ɛɛ hani gbi mɛ aa numui na magbua a hani gbi mɛ, ajifa Ngewɔ i ngi gulunga.

⁴Ye lɔ a bie ba kiti lewe numu wekei luwɔi hinda ma? Ngi nda luwɔkɛi lɔ a kiti lewe ina taa kpekpe wiema ɔɔ ɛɛ gu. Tawao a gulɔ i kpekpe wie ajifa Ndemɔi a gulɔ i pie i kpekpe wie.

⁵Numu yila a gililɔ yɛ baa i folo yila ma i lewe yee pekeisia ma, numu wekei a gili lɔ yɛ foloisia kpɛlɛɛ ti yakpe. Mahoungɔe numu gbi i la la vulii pɛiŋ kɛ na i gilima la pɔɔnangɔe.

⁶Numui na lekee a folo yila hinda wɔlɔ, i piemaa aako i Ndemɔi bɛlɛhei; numu gbi lekee i hani gbi mɛngaa, i piemaa aako i Ndemɔi bɛlɛhɛi, ajifa a siɛgbualɔ Ngewɔ ma yeemɛhɛɛ va. Numu gbi lekee i gangangaa a hani lɛɛngaa mɛlaa, i piemaa aako i Ndemɔi bɛlɛ hei, tawao a siɛgbualɔ Ngewɔ ma.

⁷Numu gbi ii na aa yɛ na ta yekpe lekee va, tawao numu gbi ii na aa haa ta yakpe lekee va.

⁸Mu vulungɔ yɛngaa la, kɛ Ndemɔi vamia mu vulungɔ, tawao mu haangaa, kɛ Ndemɔi vamia mu haani. Faale mu vulu-o, ɔɔ mu haa-o, Ndemɔi woo lɔ a mue.

⁹Gbamaile Kristi i haailɔ, i vulu i hiye hee hu aako i yɛ a fuublaa kɛɛ haablaa ti Lemɔi.

¹⁰ Gbɛe wa wu mbaangaa gbɛmbo? Tawao gbɛe hɔɔ wa lɛɛ wu mbaangɛisia hu? Gbamaile mu kpɛlɛɛ ma loolɔ Ngewɔ gulɔ i mu gbɛɛmbo.

¹¹ Ajifa Ngewɔ Gɔlɛi ndeilɔ yɛ, “Kia lɔɔ nya vulungɔ, hii Ndemɔi i ndenga, numui gbi ta wombi gbakpalɔ nya gulɔ, tawao numu gbi a ndelɔ fofoi hu leiŋ kɛ nyalɔ Ngewɔ a nge.”

¹²A ngila ngila, numu gbi a ngi wiehindeisia hugɛlɔ Ngewɔ gulɔ, i sabui nasia gɛ i ti wieni fa.

¹³Faale naa, a mu gbe a mu nyɔunyɔ gbɛmbo la. Kia maa na wie, ji mia mahoungɔ wu wu huyili pieva: waa hinda gbi wie a pie wu mbaa Kristimamɔ i yaka ɔɔ i jumbu hinda wie.

¹⁴Ji mua Ndemɔi Yesu mu wilini hu, tamia i pienga ngi kɔɔngɔ vulii kɛ mɛhɛɛ gbi ii nɔhɔni Ngewɔ yaama a ngi wuma wee; kɛɛ ina numu langɔe la kɛ mɛhɛɛ gbi nɔhɔngɔe, kɛ ngi liima le kɛ nɔhɔngɔe ngi va Ngewɔ yaama.

¹⁵Bi bi mbaa Kristimamɔ gbalɛngaa ajifa bi nɔɔngɔ hani lɛɛngaa mɛla ma bɛɛ kpekpengɔe, kɛ bii yaa jiama a ndoma welei. Baa pie mɛhɛɛ na ba mɛ i numui na nyani Kristi haani ngi va.

¹⁶Faale, baa pie bi hinda yekpei aa yɛ a hinda nyamu nungaa wekangaa gama.

¹⁷Ajifa Ngewɔ mahayɛi ii yɛni a mɛhɛɛ mɛlaa kɛɛ ndɔ gbolila, kɛlee pɔɔnɛi kɛɛ ndiilɛli kɛɛ Kohunɛ na Ngewɔ Yafei a fe.

¹⁸Tawao numu gbi lekee i yengengaa Kristi wɛ a pelei ji, a pielɔ Ngewɔ goohu i nɛɛ, nuuvugaa ti ngi lato.

¹⁹Faale naa, a mu hindei nasia gɔkɔli ta wa a ndiilɛli, ta gbɔma gbɔ mu ma mu nyɔunyɔ gbayava.

²⁰Mɛhɛɛ va, waa na nyani Ngewɔ i pienga. Mɛhɛɛ gbi numu a mɛlɔ kɛɛ kpulangɔ le hani gbi mɛva na a pie numu weka i jumbu hinda wie.

²¹Na pɔnangɔ pieva ta lɔ a gbela a huɛi mɛla, ndɔi gbolila kɛɛ hani weka gbi lekee wiela na a pie bi mbaa Kristimamɔ i jumbu hinda wie.

²²Na bi langɔ la kɔlooni mɛhɛɛ mɛlɛi kɛɛ ndɔ gbolilei ma i yɛ wu luahu wua Ngewɔ. Kohunɛ a yɛlɔ numui ma ngi lii yahupungɔ i le kɔlooni na ma a luma i mɛ.

²³Kɛɛ ina numu gbi hukitingɔe kɔlooni na ma a mɛ, Ngewɔ a njia wɛlɛlɔ ngi ma ji a yeemɛhɛɛ na mɛ, ajifa ii pieni lanaya hu; tawao numu i hinda wienga ii lani la kɛ pɔɔnangɔe, kɛ jumbui mia.