Read Ngowili Yekpei Numu Kpɛlɛɛ Va ROMABLEISIA 15 Bible Online

ROMABLEISIA 15 - Ngowili Yekpei Numu Kpɛlɛɛ Va bible

ROMABLEISIA 15

¹Mua mu lanayei gbayangɔ mahoungɔ mu gbɔ nasia ma tii gbayani hinda gbangɔi nasia hu ta ti male. Maa ii houni mu mua yekpe liilɛli.

²Kia maa na wie, mahoungɔ numu gbi i na wie a ngi mbaa-Kristimamɔi liilɛli kɛɛ tawao kpekpengɔ ngi va aako bi gbɔ ngi ma yɛva a Kristimamɔ gbayangɔ ngi lanayei hu.

³ Ajifa na kpɛlɛɛ Kristi i pieni, ii pieni ta yekpe goohunɛɛva, kia Ngewɔ Gɔlɛi i ndeni la yɛ, “Ngɛlii na kpɛlɛɛ ti Ngewɔ yɛlini la ti yɛni a nya yɛlingaa lɔ.”

⁴Hani gbi nyɛingɔ Ngewɔ Gɔlɛi hu, nyɛingɔe mu gaava, aako mu liiloma majɔɔ, ajifa Ngewɔ Gɔlɛi a pielɔ mu mawulo wie, mu lii i gba.

⁵Ngewɔ na mawulo-lii kɛɛ ndiigbɛi a gbua ngi gama, i pie wu giliyii i yɛ yakpe a wu nyɔunyɔ a ji wa Yesu Kristi wokɔɔ,

⁶aako wu kpɛlɛɛ wu mu Lemɔi Yesu Kristi kɛɛ Ngewɔ wɔlɔ a ngoo yila.

⁷A wu nyɔunyɔ gulu hɔɔ kia Kristi i wu guluni la aako nungaa ti Ngewɔ lato.

⁸Gbamaile, ngi nde wu ma, kɛ Kristi i yɛlɔ a Juuisia ti yengemɔ kɛva kɛ Ngewɔ i Lahei wumbungaa, hu ɛɛ nyani, pieva kɔɔ Ngewɔ Lahei nasia i mbumbuni mu maadani gama ti wie,

⁹ tawao gbɔma aako i pie nasia Juublaa yaa tie ti Ngewɔ wɔlɔ ngi manumɛi va. Kia Ngewɔ Gɔlɛi i ndeni yɛ, “Faale nga bi latolɔ nasia Juublaa yaa tie ti lia, tawao nga bi biyɛi latolɔ kaka ngule hu.”

¹⁰ I ndeilɔ gbɔma yɛ, “A goohunɛ, nasia Juublaa yaa tie wu gbi, wua Ngewɔ nungaa!”

¹¹Yɛ gbɔma, “A Ndemɔi lato, nasia Juublaa yaa tie; tawao nungaa gbi ti ngi lato!”

¹²Gbɔma, Aisaya ndeilɔ yɛ, “Jɛsi goohu lo a walɔ, Ngewɔ a ngi lɛlɔ i yɛ a nasia Juublaa yaa tie ti mahɛi tawao ta lii valalɔ ngi ma.”

¹³Ngewɔ na wu lii valangɔ ngi ma, i wu gɔ a kohunɛi waa kɛɛ ndiilɛli kia wu langɔ a ngie, aako Ngewɔ Yafei ngi gbayei i pie wu liivalamɛi maa i yaa a to.

¹⁴Nya mbaa Kristimableisia nya vulii ngi kɔɔlɔ kɛ wu gbekpengɔ waa le, tawao wu gaangɔ waa nahi wa gulɔ a wu nyɔunyɔ gaala.

¹⁵Ngi ndiilo ji wielɔ jifa ngi hinda lɛɛngaa hitɛnga wu wɛ kɔlɛi ji hu, ngauwandei va Ngewɔ fenga nya wɛ,

¹⁶yɛva a Yesu Kristi yengemɔ aako ngi yenge nasia Juublaa yaa tie ti wɛ. Nga saagbua yengei lɔ wie a ji nga Ngowili Yekpei na le a gbua Ngewɔ gama aako nasia Juublaa yaa tie ti wie kia saahanii na a Ngewɔ goohu nɛɛ ajifa Ngewɔ Yafei i wu yɛnga sɛwɛ.

¹⁷Faale, ajifa mua Yesu Kristi mu wilingɔ hu, nga gulɔ ngi mata gbua ajifa ngi yengema Ngewɔ wɛ.

¹⁸Nga yɛpɛlɔ naa a ndiilo, tawao a na lekee Kristi i pienga nyahu kɔɔ nasia Juublaa yaa tie ti golo Ngewɔ wɛ, a nya layie hu kɛɛ nya wiehindeisia hu wɛ,

¹⁹tɔmaselisia kɛɛ kabandeisia ti gbayei hu kɛɛ Ngewɔ Yafei gbayei. Faale naa, ji ngi yɛ jiama nga gbua Jelusalɛm nga wa Ilirikɔm lɛihu, ngi Ngowili Yekpei leilɔ vulii pandawanda hu gbi kɔlooni Kristi ma.

²⁰Na yeemani i nya ma wɔɔ gba ta mia a ji nga Ngowili Yekpei le hindei nasia tii yaa Kristi hinda mɛnini na ngovama, aako ngaa numu weka nda yenge lɔtongɔi yakpua.

²¹ Kia Ngewɔ Gɔlɛi i ndenila yɛ, “Nungei nasia tii ngi yɛpɛ leni ti ma ta tɔlɔ, tawao nasia tii yaa mɛnini ta yeembui gɔɔlɔ.”

²² Ngengei nasia va ti yɛ nya ma, ngii yaa a guni wava wu gama.

²³Kɛɛ kiahuna naa ngi nya yengei gbɔyɔnga tatei jisia hu tawao kia foo gboto va nya longɔ wɔɔ ngi wa wu gama,

²⁴nya lii lɔ ma kɛ nga gulɔ naa a wala wu gama. Nya longɔ mua wueni mu lɔ ji nga yɛ lewema liva Sipeiŋ lɔleihu, wu gbɔ nya ma ngi li na, ji mua wueni ma kohunɛma hinda wie pɛiŋ kulo.

²⁵Ngaamɛi ji naa nyaa lima Jelusalɛm a njoyo-hani Ngewɔ nungeisia wɛ.

²⁶Ajifa Kristimablei nasia ti Masidonia kɛɛ Akaya lɔleihu ti hugbatɛnga a ti wuma wee hani veva gbɔva nyaniblɛi nasia ma ti Ngewɔ nungei nasia lia Jelusalɛm.

²⁷ Tia yekpe vulii lɔ ti ji hugbatɛni. Kɛɛ, a tɔnya, kpa lɔ ti ma gbɔva nyaniblaa ma; Juuisia ti nasia Juublaa yaa tie gɔilɔ hani yekpei nasia hu ti majɔɔni a Ngewɔ ti yafeisia va, faale mahoungɔ nasia Juublaa yaa tie ti langɔ a Kristi ti gbɔ Juu nasia ma ti langɔ a Kristi a ti yeya-hani nasia ta gbewe fa folo gbi.

²⁸Ngi yeengengei ji gbɔyɔngaa, navoei na ti tɛni ma ti va ngi fe ti wɛ ndavengɔ, nga pele houlɔ liva Sipeiŋ, tawao nga folɔ wu ma yeepelei hu.

²⁹Ngi wangaa wu gama, ngi kɔɔlɔ kɛ nga walɔ a Kristi luba lavengɔi.

³⁰Nyaa wu manɛnɛma, nya mbaa Kristimableisia, mu Lemɔi Yesu Kristi sabui hu kɛɛ naa ndomɛi na Ngewɔ Yafei i punga mu lii hu, wu gbɛɛ nya ma mu Ngewɔ vɛli nya va.

³¹A Ngewɔ vɛli aako Judiablɛi nasia tii lani a Yesu Kristi taa nya gbalɛ, tawao Ngewɔ nungei nasia ti Jelusalɛm ti ngengei na gulu ngi piema ti wɛ.

³²Faale ina Ngewɔ lumailɔ nga walɔ wu gama a kohunɛ waa, tawao mua wueni mu lɔla i pie nya goohu i nɛɛ tawao ngi lɛɛvu.

³³Ngewɔ na ndiilɛli a gbua ngi gama, i yɛ wu kpɛlɛɛ gbla. Amiina.