Read Ngowili Yekpei Numu Kpɛlɛɛ Va ROMABLEISIA 16 Bible Online

ROMABLEISIA 16 - Ngowili Yekpei Numu Kpɛlɛɛ Va bible

ROMABLEISIA 16

¹Nya longɔ ngi hugɛ a wue kɛ mu mbaa Kristi nyahaloi Fibi na ngengemɔ a ngie Sɔsiiblei nasia lia ti Sɛnkia teihu, numu yekpe waa lɔ a ngie.

²A va ngi ma Ndemɔi biyɛi hu, kia mahoungɔ Ngewɔ nungeisia ti pie, wu kpɔma gbi wie ngi ma a gbewe fa wu yeya; ajifa ta vulii ngi gbekpengɔ waa le a numu gboto kɛɛ nya vulii.

³ Nga va Plisila ma taa Akuila, nya mbaa ngengeblaa Yesu Kristi yengei hu;

⁴ti ti lɛɛvui yɛni a saa nya va nyaa siɛ gboto gbuama ti ma nya yaangɔ ii le, maa nasia Juublaa gbi yaa tie ti langɔ a Yesu.

⁵Nga va gbɔma Sɔsiiblei nasia ma ta gomɛ ti wɛlei bu. Nga va nya liima ndiamɔi Ipinɛtɔs ma, na haalamɔ yɛla Esia lɔlei hu i lani a Kristi.

⁶Nga va Meri ma, na i yengenga kpayangɔ waa wu wɛ.

⁷Nga va Andrɔnikɔs ma taa Junias, nya mbaa Juu nasia maa tieni mu yɛ kpindiwɛlei bu; toblɛisia ti yɛ ti gɔɔlɔ pandawanda, tawao tia yese ti yɛla a Kristimablaa nya gulɔ.

⁸Nga va kaka Amplietɔs ma, nya liima ndiamɔi na ngi wilingɔ Ndemɔi hu.

⁹Nga va Ɔɔbanɔs ma, mu mbaa ngengemɔi Kristi yengei hu, kɛɛ Stekis, nya liima ndiamɔi.

¹⁰Nga va kaka Apɛlis ma, na ngi goloyii magɛngɔ leeŋ a Kristi wɛ. Nga va Aristɔbulɔs bondɛisia ma.

¹¹Nga va kaka Hɛrɔdiɔn ma, nya mbaa Juu, kɛɛ Nakisɔs bondɛi nasia ti langɔ a Ndemɔi.

¹²Nga va kaka Trafina taa Traifosa ma, nasia ti yengema Ndemɔi wɛ, kɛɛ nya liima ndiamɔi Paasis, na i ngenge gboto wienga Ndemɔi wɛ.

¹³ Nyaa fama gboto yoyoma Rufɔsi wɛ, Ndemɔi yenge gugbei na, kɛɛ ngi nje, na a hindei gbi wie a nge kia nga lola.

¹⁴Nga va Asinkritɔs ma kɛɛ Flɛgɔn kɛɛ Hamis kɛɛ Patrɔbas kɛɛ Hamas kɛɛ naa mu mbaa Kristimablaa wekei nasia gbi taa tieni ti hinda yila.

¹⁵Nyaa fama yoyoma Failɔogɔs gama taa Julia, kɛɛ Niliɔs taa ngi ndewenyahaloi, kɛɛ Olimpas kɛɛ Ngewɔ nungei nasia kpɛlɛɛ taa tieni ti hinda yila.

¹⁶A va wu nyɔunyɔ ma a ndoma-lii. Kristimableisia kpɛlɛɛ tia fama gboto yoyoma wu wɛ.

¹⁷Nyaa wu manɛnɛma, nya mbaa Kristimableisia wu wu mahugbe a nasia ta nungaa luahu nyani, ta nasia yaka ti langɔ a Ngewɔ, ta kaa weka gɛ i gba kaa na ma ti wu gaani la; waa lukpe ti gbla.

¹⁸Ajifa nasia ta hinda bondɛi nasia wie tii yengema mu Lemɔi Kristi wɛ, ti gbewengɔ lekee tia yekpe valɔ. Ti layia nɛnɛisia kɛɛ ndɛ latoi ta nungaa lato la a pielɔ ti nungaa wɛlɛ.

¹⁹Numui gbi ti kɔɔlɔ kia wu golongɔ tawao wu longɔ a Ngowili Yekpei tawao sabui ji va lɔ wu hinda i nya goohu nɛngɔ. Nya longɔ wu nɛmahulewe wie hindei na gɔɔva kpekpengɔ, waa nyamu wiela hugɔɔ.

²⁰Tawao Ngewɔ na ndiilɛli a gbua ngi gama, a Seitana wɔpɔnyɛlɔ wu gɔɔbu hugutungɔ. Mu Lemɔi Yesu Kristi yauwandei i yɛ wu ma.

²¹ Nya mbaa ngengemɔi Timoti yɛ a va wu ma kaka. Nya mbaa Juuisia Lusiɔs kɛɛ Jesin kɛɛ Sosipeta tia bɛɛ ta va wu ma.

²²Nya nya Tatiɔs, ngi Pɔɔl layie jisia nyɛima nga va wu ma kaka kia wu mbaa Kristimamɔɔ i na.

²³Nya hotakɛi Gayɔs, na Kristimableisia ta gomɛ ngi yeepɛlɛbu, ta vama wu ma kaka; Ilastɔs na navoo lamagbatɛmɔi a ngie tia mu mbaa Kristimɔi Kuaatɔs tɛɛ ta va wu ma kaka. [

²⁴Mu Lemɔi Yesu Kristi yauwandei i yɛ wu gbi ma. Amiina.]

²⁵A mu Ngewɔ wɔlɔ! Na a pie wu lo kpaŋ wu lalei hu a ngie kia nga nde la Ngowili Yekpei na hu nga nde, Ngowili kɔloongɔ Yesu Kristi ma kɛ gbɔma na tɔnya lɔwungɔi i kɛnga, tɔnyɛi na ndɔwungɔ wɔɔ foo gboto-gboto va.

²⁶Kiahuna na yeetɔnyɛi i gbuanga fofoya Ngewɔ lutuisia ti gɔlɔ nyɛingɔisia hu, tawao na kunafɔ Yewɔɛi i ndeni i pienga kɛnyɛi kpɛlɛɛ ti yeetɔnyɛi na gɔnga aako ti gbi ti la a Ngewɔ, ti golo ngi wɛ.

²⁷Ngewɔ na yakpe nɛmahulewei ngi wɛ, ngɔlɔya i yɛ ngi ma kunafɔ va Yesu Kristi sabui hu! Amiina.