Read Ngowili Yekpei Numu Kpɛlɛɛ Va ROMABLEISIA 2 Bible Online

ROMABLEISIA 2 - Ngowili Yekpei Numu Kpɛlɛɛ Va bible

ROMABLEISIA 2

¹ Nya ndiamɔisia, wa nungaa wekeisia gbɛmbolɔ? Kɛ wu gbuawee gbi ii na kulo bɛɛ, wu yee yɛ na gbi. Gbamaile wu nungaa wekeisia lɛɛngaa kɛɛ wa hinda yakpei nasia wie ta pie, kɛ wu wua yekpe lɛɛnga.

²Mu kɔɔlɔ kɛ Ngewɔ lɔnyangɔe ji a nungei nasia lɛɛ ta hinda nyamui jisia nyɔkɔ wie.

³Kɛɛ, nya ndiamɔisia, hindei jisia vulii wa nungaa wekeisia lɛɛ faa, wua vulii wa pielɔ! Wu langɔe la vulii kɛ Ngewɔ ɛɛ njia wɛlɛ wu ma?

⁴Gbamaile kɛnga wu lɛɛngɔi ngi gbekpeyeisia hu, ndanɛi va a kpua a wue kɛɛ ndihou va i hu, aako kɔɔ kɛ ngi gbekpeyei lɔ a pie wu wounve wu.

⁵Kɛɛ wu woohu gbɔndangɔe hulewengɔ gbo, tawao wu lii ɛɛ tɔnyɛi gulu. Faale na, kpalɛi na i wama lama wu ma wuaa ngawɔlɔma Foloi na ma kɛyila Ngewɔ a yɛ wu gbɛmboma a ndiilewe tawao a pie a tɔnyeilɔ.

⁶ Ajifa Ngewɔ a numui gbi pawalɔ kia ngi wiehindeisia ti na.

⁷Numui lɛɛnga ta nɔɔlɔ kpekpei wielei ma a nungaa, ta ngɔlɔya gɔli kɛɛ mbɛlɛhei kɛɛ kunafɔ lɛɛvui: Ngewɔ a jisia gɔlɔ a kunafɔ lɛɛvui.

⁸Kɛɛ nungaa wekeisia ti gbewengɔ lekee tia yekpe lɔ va ta gbele pɔɔna-hindei ma hindei na wieva kpulangɔ nga; Ngewɔ liilewengɔ a yɛla ti ma tawao a kpalɛ lalɔ ti ma.

⁹Ngewɔ a ndiimavɔni gbalɛ lalɔ nungei nasia kpɛlɛɛ ma ta jumbu hindei wie, Juuisia yese kɛɛ nasia Juublaa yaa tie.

¹⁰Kɛɛ Ngewɔ a ngɔlɔya kɛɛ mbɛlɛhei kɛɛ ndiilɛli velɔ nungei nasia gbi wɛ ta kpekpe wie, Juuisia yese kɛɛ nasia Juublaa yaa tie.

¹¹ Ajifa numui gbi ti gbɛmboyii i yakpe, Ngewɔ ɛɛ topooma wie.

¹²Mojisi Jawei ii nasia yeya Juublaa yaa tie; ta jumbui wielɔ ti juku ajifa sawei ii tima. Sawei lɔ Juuisia yeya; ta jumbui wielɔ Ngewɔ i ti gbɛɛmbo a yeesawei.

¹³Gbamaile Sawei humɛnilei ii le aa yɛ nungaa yɛma a pɔɔnamɔ i tia Ngewɔ luahu gbatɛ;

¹⁴Sawei ii nasia ti yeya Juublaa yaa tie; kɛɛ watii gbi lekee ti na wiengaa a ti nyɛkɛ Sawei i ndeni, kɛ ti kɛnga gbɔɔ mahoungɔ i wie ɔɔ aa wie, kia bɛɛ Sawei ii ti yeya.

¹⁵Ti wiehindei a kɛlɔ kɛ na Sawei i ndeni nyɛingɔe ti liisia hu. Ti lii bɛɛ a selilɔ kɛ tɔnya lɔ a ji, ajifa watii lɛɛngaa ti lii a ndelɔ ti ma ina ti nyamu wienga ɔɔ ina ti kpekpe wienga.

¹⁶Faale na, kia nga nde la Ngowili Yekpei ji hu nga nde nungaa ma, hii lɔɔ a wie Foloi na ma Ngewɔ a nuuvuisia ti gili lɔwungɔngɔisia gbɛmbo a Yesu loko.

¹⁷Ɔɔ bia? Ba bia yekpe loli a Juu; bi hɛlɛngɔe a Sawei tawao ba yonga lewelɔ kɛ Ngewɔ longɔe a wu bembei;

¹⁸bi kɔɔlɔ gbɔɔ Ngewɔ longɔ bi pie, tawao bi kaanga Sawei hu na gɔva pɔɔnangɔ:

¹⁹bi langɔe la vulii kɛ pele gɛmɔ lɔ a bie a pumublɛisia kɛɛ foofo, nasia va ti kpindi hu

²⁰kɛɛ kaamɔi nasia va ti lii haangɔ kɛɛ kavɛliblɛisia. Bi langɔe vulii la kɛ nɛmahulewei gbi kɛɛ tɔnyɛi gbi i Sawei hu lɔ.

²¹Ba nungaa wekeisia gaalɔ. Gbɛe bɛɛ bia yekpe gaa? Ba Ngewɔ yiɛi lelɔ nungaa ma bɛɛ, “Baa huma wie.” Kɛɛ bia vulii ba humɛi wielɔ?

²²Ba ndelɔ bɛɛ, “Baa puegbua gbi.” Kɛɛ ba puei gbualɔ? Bi lolongɔe a nɔmɔlii nasia nungaa ta hɛɛ ma. Kɛɛ ba ti huma pɛlei nasia bu ta hɛɛ na ti ma?

²³Ba lawolɔ bɛɛ Ngewɔ Jawei lɔ bi yeya. Kɛɛ ba Ngewɔ yawufelɔ a ji ba sawei nyani?

²⁴ Ngewɔ Gɔlɛi i ndeilɔ yɛ, “Wua wu Juuisia mia wu pienga nasia Juublaa yaa tie ta njia nyamu le Ngewɔ ma.”

²⁵Wu Sawei houngaa, baa a yɛlɔ bili na ma ta wu heinga; kɛɛ wuii Sawei houilɔ, aa nyandelɔ wu lo pɔnɔyɛi hu.

²⁶Nasia Juublaa yaa tie, kia bɛɛ ti heingɔ ii le bili ya, kɛɛ ti jiangaa a na Sawei ndeni, Ngewɔ ɛɛ ti wumbu bi tɔaa bɛɛ ti heingɔ bili ya?

²⁷Kɛɛ nasia Juublaa yaa tie, kia bɛɛ ti ti leni ti pɔnɔngɔ, ti jiangaa a na Sawei i ndeni, ti wiehindei na ɛɛ pie Ngewɔ aa wu lɛɛ, wua hii Sawei yeenyɛingɔi i wu yeya tawao wu heingɔ bili ya kɛɛ wa Sawei nyani?

²⁸Kɛ ye lɔ Juu vulii le ngi heingɔ vulii bili ya? Numui na ii le Juu a ngie ngi luwui ma tawao ti ngi heini bili ya a kpekɛi.

²⁹Juu yeekpekpei a numui na lɔ ngi heingɔ bili ya a ngi luwui goohu wee, ngi lii wotengɔ Ngewɔ gama; tawao Ngewɔ Yafei lɔ a pie, Sawei yeenyɛingɔi ɛɛ gu a ji wiela. Ngewɔ lɔ a yeenumui ji lato, nuuvugaa ii le.