Read Ngowili Yekpei Numu Kpɛlɛɛ Va ROMABLEISIA 3 Bible Online

ROMABLEISIA 3 - Ngowili Yekpei Numu Kpɛlɛɛ Va bible

ROMABLEISIA 3

¹Kɛ Juuisia ta kpekpeya majɔɔlɔ tewengɔ nasia ti ma Juublaa yaa tie a pele gbi hɔɔ? Ɔɔ kpekpeyei yeegbɔɔ Juuisia ta maajɔɔ ji ta ti hei bili ya?

²Kpekpeya gboto lɔ hu a pele gbi! Haalei, Ngewɔ i ngi wowili loko wuaani Juuisia lɔ yeya.

³Gbɔɔ a wie ina ti lɛɛnga tii lani a Ngewɔ wowili? Wu langɔe la kɛ Ngewɔ a ngi wowili hunyanilɔ sabui ji va?

⁴ Na ɛɛ wie kulo bɛɛ! Na Ngewɔ a nde yɛ a pielɔ, watii gbi a pielɔ huɛɛŋ kiaa bɛɛ numui gbi ta yɛlɔ a ndɛ gualablaa. Kia Ngewɔ Gɔlɛi i ndeni yɛ, “Ngewɔ, ba tɔnyɛi lɔ le kpema gbi bi yɛpɛngaa; ba temu lɔ majɔɔ ji nungaa ta bi mayia gɛ kotiihu.”

⁵Kɛɛ gbɔɔ a wie ina mu hinda nyamu wielei a Ngewɔ wɔna hinda wielei lɔ magɛ gbalauŋ? Gbɔɔ ma gu a ndela? Ma ndelɔ muɛɛ hinda nyamu mia Ngewɔ a pie ji a kpalɛ la mu ma? (Nyaa yɛpɛma kɔloongɔ ngi ma nuuvu layia hu.)

⁶Sawo, na ɛɛ wie! Ina Ngewɔ ii wɔnani, a yee gu i dunyableisia gbi gbɛmbo?

⁷Kɛɛ gbɔɔ a wie ina nya lɔnya-vɛlii i wailɔ a ngɔlɔya Ngewɔ ma a ji a pie ngi lɔnyala maa i gɛ gbalauŋ tewengɔ yeengovei ma?

⁸Gbɛe hɔɔ muɛ nde muɛɛ, “A mu nyamu wie aako mu mbɛlɛhei ve Ngewɔ wɛ?” A tɔnya nungaa lɛɛnga ti nya bɛlɛ nyaninga a ji ti yeenjɛpɛi ji vulii lelaa lɛnga nya wumba! Ngewɔ a yeenungei nasia lɛɛlɔ tawao ti lɛɛla wɔnangɔe.

⁹Kɛ mu Juuisia mu yɛyii fisangɔe nasia Juublaa yaa tie ti ma? Sawo! Ngi wilanga a kɛlaa kɛ Juuisia kɛɛ nasia Juublaa yaa tie ti kpɛlɛɛ ti jumbui gbayei bu lɔ.

¹⁰ Kia Ngewɔ Gɔlɛi i ndeni la yɛ; “Numu yakpe bɛɛ ii na aa wɔna,

¹¹numu ii na aa tɔnyɛi yeembui gɔɔ ɔɔ i Ngewɔ gɔkɔli.

¹²Numui kpɛlɛɛ ti wounvenga Ngewɔ ma, kpekpeya gbi ii ti kpɛlɛɛ hu: numu gbii na aa kpekpeya wie, numu yakpe bɛɛ.

¹³ Ti lɛisia wiengɔe kia kamba lawongɔi; ndɛɛ nyamu-nyamu lekee lɔ a gilikili ti nɛisia ma, kɛɛ njɛpɛi nasia ta numu waa, kia kaali-nyi, ta gbua ti laagulisia ya;

¹⁴sondu nyamu-nyamuisia ti ti lavengɔ.

¹⁵Ti huvulangɔ a numu gbalɛla kɛɛ numu waala;

¹⁶ta tombo lɔ lo kɛɛ ndiinyani mia gbi ta li na.

¹⁷Tii yaa ndiilɛli welei gɔɔni;

¹⁸tawao tii yaa gaani a luwala Ngewɔ ma.”

¹⁹Mu kɔɔnga na kɛ hani gbi lekee nyɛingɔ Sawei hu i nasia lɔ hinda hugɛma ti Sawei bu aako nuuvui gbi ti gbuawee gbi aa yɛ na, i pie dunyei gbi ti lo Ngewɔ gulɔ ti gbɛmbova.

²⁰ Ajifa numu gbi ɛɛ yɛ a pɔnamɔ Ngewɔ yaama jifa lekee a Sawei hou; na Sawei a pie ta mia a ji a pie nuuvu i kɔɔ kɛ i jumbu wienga.

²¹Kɛɛ kiahuna Ngewɔ pelei na gɛnga a nungaa yɛ la a pɔɔnablaa i tia tieni luahu gbatɛ, tawao kpitingɔ ii le Sawei ma. Sawei kɛɛ Ngewɔ lutuisia ti seli wuaanga ji va.

²²Ngewɔ a nungaa yɛlɔ a pɔɔnablaa ji ta la a Yesu Kristi. Ngewɔ a ji wielɔ a nungei nasia gbi ta la a Kristi. Pele wekangaa gbi ii na kulo bɛɛ Ngewɔ aa nungaa wote la a pɔɔnablaa aa tia tieni luahu gbatɛ.

²³Nuuvu gbi ti jumbu hinda wienga tawao ti maa i guhanga a Ngewɔ na a numu bawo.

²⁴Kɛɛ Ngewɔ yauwandei na va a fe numu wɛ a gbaama, i ti kpɛlɛɛ yɛnga a pɔɔnablaa, i taa tieni luahu gbatɛnga Yesu Kristi sabui hu, Yesu na a numu gbua nduwɔyɛi hu.

²⁵Ngewɔ i Yesu gbuɛilɔ a saa aako ngi haala i yɛ a sabu Ngewɔ i manu ti jumbuisia ma, ji ta la a Yesu. Ngewɔ i ji wieilɔ aako i kɛ kia a nungaa yɛ la a pɔɔnablaa i tia tieni luahu gbatɛ. Pɛiŋ Yesu i ya haa, i yɛ a ngi lii lɔ hou, a wounve nuuvuisia ti jumbuisia ma.

²⁶Kɛɛ kiahuna a watii ji, Ngewɔ ɛɛ yaa wounve jumbui ma, a kɛlɔ kɛ ta lɔ a numu wote a pɔɔnamɔ i tia ta luahu gbatɛ. Hii Ngewɔ a kɛ kɛ ngi wɔnangɔe tawao kɛ ta lɔ a numu gbi lekee yɛ a pɔnamɔ ina ngi langɔe a Yesu.

²⁷Gbɔɔ na hɔɔ ma lawo la? Tawao yeesabui a yɛ a gbɔɔ? Jifa le ma Sawei hou? Sawo, kɛɛ jifa mu langɔ a Yesu.

²⁸Ajifa mu ndenga na kɛ na lekee a pie Ngewɔ i numu yɛ a pɔɔnamɔ i tia ta luahu gbatɛ ta mia a lala a Yesu Kristi, hindei nasia wieva ii le Sawei ndeni.

²⁹Kɛ Juuisia lekee lɔ ti Yewɔ a Ngewɔ? Nasia Juublaa yaa tie tia bɛɛ ti Yewɔɛi yaa a ngie? A tɔnya Juuisia kɛɛ nasia Juublaa yaa tie ti Yewɔɛi lɔ a ngie.

³⁰ Ngewɔ i yakpe, tawao a Juuisia kɛɛ nasia Juublaa yaa tie yɛlɔ a pɔɔnablaa kia ti layii i na a Yesu.

³¹Kɛ ma loko gbualɔ hɔɔ Sawei houla hu jifa mu langɔ a Yesu? Sawo muɛɛ loko gbua hu kulo bɛɛ; ma loko lɔ hei Sawei bu.