Read Ngowili Yekpei Numu Kpɛlɛɛ Va ROMABLEISIA 4 Bible Online

ROMABLEISIA 4 - Ngowili Yekpei Numu Kpɛlɛɛ Va bible

ROMABLEISIA 4

¹Gbɔɔ hɔɔ ma nde kɔloongɔ Ebraham ma, mu gɛnyɛi kpɛlɛɛ mu maada? Gbɔɔ i ngi wieni?

²Kiaa hindei nasia i pieni famia Ngewɔ i ngi yɛni a pɔɔnamɔ i tia ta luahu gbatɛ, Ebraham aa sabu jɔlɔ lawoova. Kɛɛ sabu gbi ii ngiɛ lawoova Ngewɔ gulɔ.

³ Ngewɔ Gɔlɛi yɛ, “Ebraham langɔ yɛla a Ngewɔ, tawao ngi lalei va a Ngewɔ, Ngewɔ i ngi wumbuilɔ a pɔɔnamɔ.”

⁴Numui na a yenge ta ngi pawalɔ ngengei na va a pie; numu ɛɛ ngi pawɛi loli a mawaa, ta ndelɔ tɛɛ i yengenga faa.

⁵Kɛɛ numui na ngi langɔ a Ngewɔ, ngi wiehindeisia ii le, ngi langɔ a Ngewɔ na a ndɛɛmɔi wote a temumɔi, ngi lalei a Ngewɔ mia Ngewɔ a mbumbu aako i ngi wote a pɔnamɔ, i tia ta luahu gbatɛ.

⁶Ji mia Devidi lii i yɛ ma ji i yɛpɛni kɔlooni Kohunɛ na ma a yɛ numui na ma Ngewɔ a ngi wumbu a pɔnamɔ, ngi wiehinda va gbi ii le, Kia Devidi ndeila yɛ:

⁷“Nasia ti goohu nɛngɔe Ngewɔ i manunga ti nyamuisia ma, tawao Ngewɔ i ti jumbuisia mawɛɛnga!

⁸Numui na goohu nɛngɔe Ngewɔ ɛɛ ngi jumbuisia gbawa!”

⁹Nasia ti heingɔ bili ya tia lekee lɔ ti woo a Kohunɛ ji Devidi i yɛpɛma fa? Nasia ti heingɔ ii le bili ya tia bɛɛ ti woo le. Ajifa mu na hugɛnga Ngewɔ Gɔlɛi ndeni yɛ, “Ebraham langɔ yɛla a Ngewɔ tawao ngi lava a Ngewɔ, Ngewɔ i ngi wumbuilɔ a pɔɔnamɔ.”

¹⁰Miigbee lɔ ji i wieni? I wieni pɛiŋ ti yaa Ebraham hei biliya ɔɔ ji woma yɛla? I lani pɛiŋ a Ngewɔ ti yaa ngi hei bili ya, poma ii yɛla?

¹¹ Ti ngi heini bili ya poma lɔ, tawao bili na ti ngi heini nga i yɛni a tɔmaseli lɔ kɛva kɛ jifa Ebraham langɔ a Ngewɔ, Ngewɔ i ngi wumbunga a pɔɔnamɔ pɛiŋ ti yaa ngi hei biliya. Faale nasia gbi ti langɔ a Ngewɔ tawao Ngewɔ i ti wumbunga a pɔɔnablaa kia bɛɛ ti heingɔ ii le bili ya, ti maada lɔ a Ebraham lanayeihu.

¹²Ta lɔ gbɔma nasia ti heingɔ bili ya ti maada a ngie, ti heiva lekee ii le bili ya, kɛɛ ajifa kia lɔɔ mu maada i yɛ luva la jifa ngi langɔ a Ngewɔ pɛiŋ ti yaa ngi hei bili ya, hii lɔɔ ti luvama.

¹³Ngewɔ i Lahei wumbuilɔ Ebraham gama tia ngi bɔɔsɔɛisia yɛ dunyei a yɛlɔ a ti woo. Ngewɔ ii Lahei ji wumbuni jifa Ebraham i Sawei houni, kɛɛ jifa ngi langɔ yɛla a Ngewɔ tawao Ngewɔ i ngi wumbuilɔ a pɔnamɔ.

¹⁴ Gbamaile ina hani na Ngewɔ a Lahei wumbu fa a ve nasia lɔ wɛ ta Sawei hou kɛ gbama mia a lala a Ngewɔ, tao kɛ ngi Lahei gbɛogbɛ ii le.

¹⁵Sawei a pielɔ Ngewɔ i liilewe; kɛɛ mia Sawa gbi ii na, sawa nyanila ii na.

¹⁶Ngewɔ i Lahei ji wumbuilɔ hɔɔ jifa Ebraham lani a ngie aako na Ngewɔ i Lahei wumbuni fa i gɛ gbalauŋ kɛ ta lɔ i feni gbama Ebraham bɔɔsɔɛisia wɛ — nasia lekee ii le ta Sawei hou, kɛɛ nasia bɛɛ ti langɔ a Ngewɔ kia Ebraham pieni. Jifa Ebraham vuilɔ mu maada le lanayei ji hu.

¹⁷Kia Ngewɔ Gɔlɛi i ndeni yɛ, “Ngi bi yɛnga a kɛnyɛ gboto ti kɛkɛ.” Faale Lahei ji nyandengɔe ajifa Ngewɔ i kuluilɔ ma, Ngewɔ na Ebraham lani a ngie tawao Ngewɔ na a haamɔi vulu ngi layie a pie hani na ii na wɔɔ i yɛ na.

¹⁸Ebraham i lailɔ a Ngewɔ i liilo ngi ma kia bɛɛ liiloma sabu gbi ii yaa yɛ na, tawao na lɔ i pieni i wote a “Kɛnyɛ gboto ti kɛkɛ.” Kia lɔɔ Ngewɔ Gɔlɛi ndeni yɛ, “Bi bɔɔsɔɛisia ta gbotolɔ hii.”

¹⁹Ngi voi i loni kulo i gu a hɔndɔ yila; kɛɛ ngi layii a Ngewɔ hu ii haani ji i gilini a ngi gbuhɛi na haangɔ yɛla jɔngɔ, kɛɛ ji i gilini kɛ Sera gbemangɔe.

²⁰Ii gbeni a lala a Ngewɔ tawao ii lɛɛni Lahei na hu Ngewɔ i mbumbuni; ngi layii a Ngewɔ i ngi gɔilɔ a kpaya, kɛ i Ngewɔ latonga.

²¹Ngi langɔ la vulii kɛ Ngewɔ a gulɔ i na wie i Lahei wumbuni pieva.

²²Na vamia Ebraham, jifa ngi langɔ a Ngewɔ, Ngewɔ i ngi wumbuni a pɔɔnamɔ.

²³Njɛpɛi jisia “Ngewɔ i ngi wumbuilɔ a pɔɔnamɔ” ti nyɛingɔ ii le ta yakpe va.

²⁴Ti nyɛingɔ mua bɛɛ lɔ va, mua Ngewɔ i mu wumbunga a pɔɔnablaa, mu langɔ a Ngewɔ na i pieni mu Lemɔi Yesu i vulu i hiye hee hu.

²⁵ Ngewɔ i Yesu veilɔ nungaa wɛ ti ngi waa jifa mu yɛ jumbu wieni, i ngi vulu i ngi wumbu hee hu aako i mu yɛ a pɔɔnablaa, mua Ngewɔ-ni mu luahu i gbatɛ.