Read Ngowili Yekpei Numu Kpɛlɛɛ Va ROMABLEISIA 5 Bible Online

ROMABLEISIA 5 - Ngowili Yekpei Numu Kpɛlɛɛ Va bible

ROMABLEISIA 5

¹Kia naa Ngewɔ i mua tieni luahu gbatɛnga jifa mu langɔ a Yesu, mu lii i lɛlinga naa Ngewɔ gulɔ, mu Lemɔi Yesu Kristi sabui hu.

²Jifa mu lani a Kristi, i pieilɔ mu Ngewɔ yauwandei gbekpeyei na majɔɔ a pie gbama tawao tamia naa mu hu. Faale, mu goohunɛngɔ ajifa ma Ngewɔ wɔlɔyɛi majɔɔlɔ.

³Tawao ma goohunɛɛlɔ gbɔma kpalɛi nasia va ti lani mu ma ajifa mu kɔɔlɔ kɛ kpaalɛi a pieilɔ numu i gu hinda gbɔugbɔi bu,

⁴gula hinda gbɔugbɔi bu a numu hinda nɛɛlɔ Ngewɔ wɛ, tawao ji numu hinda a nɛɛ ngi wɛ a pielɔ numu i liilo ngi ma.

⁵Kulɔ gbe lee ji ɛɛ mu baa, ajifa Ngewɔ i ngi lomi wunga mu liihu, a Newɔ Ngafei hu we i ndamagbatɛni mu va.

⁶Gbamaile watii na lɛ kpaya gbi ii yɛ mu wɛ, Kristi i haailɔ gbɔva jumbubleisia ma a watii na i nɛni Ngewɔ wɛ.

⁷Hinda kpaukpau le numu va i haa pɔɔnamɔ va. Tɛngaa a wielɔ numu i luma i haa numu yekpe va.

⁸Kɛɛ Ngewɔ i ngi loyii a mue gɛnga a mue, a ji Kristi i haani mu va watii na lɛ jumbublaa a mue.

⁹Ngi haalei lɔ i mua Ngewɔ-ni mu luahu gbatɛnga na; bɛwɛbɛwɛngɔ waa le ngi wɛ mu bawova Ngewɔ liilewei yeya kpɛmbo-volei ma kɛyila.

¹⁰Ngewɔ juwungaa lɔ wɔɔ a mue, kɛɛ i mu wotenga a ngi ndiamɔngaa ngi Hindoloi haalei yɛ sabui va. Kia naa Ngewɔ ndiamɔngaa a mue, i laailɔ leiŋ kɛ Kristi lɛɛvui a mu bawolɔ huɛɛŋ!

¹¹Kɛɛ kpɛlɛɛ yaa na; ma goohunɛilɔ Ngewɔ va Yesu Kristi sabui hu ajifa i mu yɛnga naa a Ngewɔ ndiamɔngaa.

¹² Numu yila lɔ i pieni jumbui i wani dunyei hu tawao ngi jumbui lɔ i wani a hee. Faale hee i wɛlɛilɔ numui kpɛlɛɛ maahu, ajifa nuuvui kpɛlɛɛ ti jumbui wieilɔ.

¹³Jumbui i yɛlɔ dunyei hu pɛiŋ Ngewɔ i yaa Sawei ve; kɛɛ mia sawa gbi ii na, Ngewɔ ɛɛ jumbuisia gbawa.

¹⁴Kɛɛ i hiye Adam watii ma i to Mojisi watii ma, hee i temaya jɔɛilɔ nuuvu kpɛlɛɛ maahu, nasia vulii bɛɛ ti jumbui ii yɛ wieni kia Adam ndɛi na, ji Adam i Ngewɔ layie gbuani hu. Numui na ngi walei i yɛ hu yeetɔmaseli lɔ wɔɔ a Adam.

¹⁵Kɛɛ ti veenjɔɔ ti gba ti nyɔunyɔ ma, tawao pelei na Ngewɔ a hindawandei wiela gbama a nungaa i gba pelei na ma Adam i jumbui wieni la. Tɔnya le kɛ numu gboto ti haailɔ numu yakpei na ngi jumbui yilei na wooma. Kɛɛ pelei na Ngewɔ a ngi yauwandei gɛla i leweni na ma tawao pelei ji lɔ a ngi hindawandei wie la gbama a numu gboto kia lɔɔ pelei na i na numu yakpei na, Yesu Kristi sabui hu, i ngauwandei gɛni la.

¹⁶Tawao Ngewɔ hindawandei yeehuvɛi i gba numu yilei na jumbui yeehuvɛi ma. Jumbu yakpei na wooma, Ngewɔ a nungaa kpɛlɛɛ gbɛmbo lɔ; kɛɛ Ngewɔ yauwandei va, nungaa ti yɛnga a pɔɔnablaa kia bɛɛ ti jumbuisia wienga kpoto.

¹⁷Tɔnya mia kɛ ajifa numu yakpei na ngi jumbui va, yeewatii na wooma, hee mahaya majɔɛilɔ nuuvu mahu. Kɛɛ na numu yilei na, Yesu Kristi i pieni, i leweni polouŋ numu yilei na jumbui yeehuvɛi ma. Nasia gbi ta Ngewɔ yauwanda gboto wai majɔɔ kɛ ji a ti yɛ gbaama a pɔɔnablaa, ti gbayangɔ a yɛla ti lɛɛvuisia hu Kristi sabui hu.

¹⁸Faale na, kia jumbu yakpei i pieni Ngewɔ i nuuvui kpɛlɛɛ lɛɛ, hii lɔɔ pɔɔna hinda yakpei na Yesu i pieni nuuvui gbi yɛ va a pɔɔnamɔ.

¹⁹Tawao kia lɔɔ numu gboto ti woteni a jumbublaa jifa numu yila Ngewɔ layie gbuani hu, hii lɔɔ numu gboto ta wote a pɔɔnablaa tia Ngewɔ-ni ti luahu i gbatɛ jifa numu yila i goloni Ngewɔ wɛ.

²⁰Sawei i gbɔkuilɔ aako hinda nyamu wielei maa i to; kɛɛ jumbu hinda wielei maa ii toni, Ngewɔ yauwandei maa toilɔ i lewe ma polouŋ.

²¹Faale na, kia lɔɔ jumbui i temaya majɔɔni jifa hee i yɛ numui gbi ma, hii lɔɔ pɔɔnɛi i teemaya majɔɔni Ngewɔ yauwandei va, i li a mue kunafɔ lɛɛvui hu mu Lemɔi Yesu Kristi sabui hu.