Read Ngowili Yekpei Numu Kpɛlɛɛ Va ROMABLEISIA 9 Bible Online

ROMABLEISIA 9 - Ngowili Yekpei Numu Kpɛlɛɛ Va bible

ROMABLEISIA 9

¹Na ngi ndema tɔnya le; Kristi woo lɔ a nge famia ngɛɛ ndɛɛ gula. Nya lii, toko i Ngewɔ Yafei yeya ngayengeva, i nya liilonga kɛ ngii ndɛɛ lɔ gualama.

²Nya liinyani wɔlɔngɔ waa le, tawao kpalɛi na i nya lii hu nya bondɛi nasia va kɛlɛma gbi ii ma, nasia maa tieni mu luwu kɛɛ mu ŋama i yakpa!

³Tia ti va, ngaa lolɔ nya vulii Ngewɔ jondii i yɛ nya ma tawao mua Kristi mu luahu i gɔlɛ.

⁴ Tia lɔ Isrɛlbleisia a tie; i ti yɛlɔ a ngi leengaa i ti gɔ ngi wɔlɔyɛi hu; i pieilɔ tia tieni ti hindangaa yangili, i Sawei ve ti wɛ; Ngewɔ vɛliyii yeetɔnyangɔi lɔ ti yeya; ti Ngewɔ laaheisia majɔɔnga;

⁵ti gbuanga ti maada lɔwɔngɔi nasia hu lɔ, tawao Kristi ji i woteni a nuuvu, i gbuani ti bembei hu lɔ. Mahoungɔ numui gbi ti Ngewɔ lato kunafɔ va na hani gbi ti mahɛi a ngie! Amiina.

⁶Ngii ndema ngaa yɛma Ngewɔ lahei i gbahanga; ajifa Isrɛlbleisia kpɛlɛɛ ii le taa yɛ a Ngewɔ numu huwɔyɔngɔisia.

⁷ Tawao Ebraham bɔɔsɔɛisia kpɛlɛɛ ii lɛ taa yɛ a Ngewɔ leengeisia. Ngewɔ ndeilɔ Ebraham ma yɛ, “Ta Aisaki bɔɔsɔɛisia wumbulɔ a bi ndɛisia.”

⁸Ji i kɛilɔ kɛ ndeengɛi nasia ta ti gbua goohu ta ti le tii yɛni a Ngewɔ leengaa; ndeengɛi nasia ta ti le jifa Ngewɔ i Lahei wumbuni yɛ ta ti lelɔ, tia lɔ ti wumbungɔ a bɔɔsɔɛi yeetɔnyangɔisia Ngewɔ wɛ.

⁹ Ajifa ji Ngewɔ i yɛ Lahei na wumbuma i ndeilɔ yɛ, “Nga walɔ gbɔma watii na ma ndangɔ tawao Sera a hindolo lelɔ.”

¹⁰Tawao ii gɛlɛni na ma. Ajifa Ribɛka hiingaa leengaa veenjɔɔ kpɛlɛɛ ti kɛkɛ i yɛ yakpe, mu maada Aisaki.

¹¹ Kɛɛ aako i gɛ kɛ hindolo yakpe wumbula i yɛni a Ngewɔ lekee ngi hugbatɛi yeehuvaa lɔ, Ngewɔ ndeilɔ ngi ma yɛ, “Ndoi yeesɛmbɛi a mɔnɛlɔ yeekuloi wɛ.” I ji leni pɛiŋ ti yaa ti le, pɛiŋ yeengila bɛɛ i yaa hinda gbi wie, yeekpekpe ɔɔ yeenyamu; faale ji Ngewɔ i ndoi yeengila wumbuni i gbuani tolii na hu lɔ i ngi lolini la, ii gbuani nuuvu wiehinda gbi hu.

¹³ Kia Ngewɔ Gɔlɛi i ndeni la yɛ, “Ngi loilɔ a Jekɔpi, kɛɛ ngi loloilɔ a Isɔ.”

¹⁴Ma yɛ naa hɔɔ gbɛ? Ma ndelɔ muɛɛ Ngewɔ ii wɔnani? Muɛɛ na le kulo bɛɛ.

¹⁵Gbamaile i ndeilɔ Mojisi ma yɛ, “Nga manulɔ numui na ma nɛɛ nya wɛ, ngi numui na mamamau lɔ a nɛɛ nya wɛ.”

¹⁶Faale yeehindei ii gbuama na hu nuuvu longɔ la ɔɔ na a pie, i gbuama lekee Ngewɔ manumɛi hu lɔ.

¹⁷Gbamaile Ngewɔ Gɔlɛi i ndeilɔ tokulɔ mui na ma Fɛɛro yɛ, “Ngi bi yɛilɔ a maha aako ngi bi yayenge tawao kɔɔ dunyablaa gbi ti nya biyɛi gɔɔ.”

¹⁸Faale Ngewɔ a manu numui na lɔ ma a nɛɛ ngi wɛ, tawao a numu gbi woohu gbɔndalɔ a nɛɛ ngi wɛ.

¹⁹Wu yilayee a nya mɔlilɔ hɔɔ yɛ, “Ina hii ji i na, Ngewɔ a yee nyamu lo numu ma? Ye lɔ a ganga a Ngewɔ liima hindei?”

²⁰ Gbɛe ye lɔ a bie, ndiamɔ, Ngewɔ a yɛpɛ bi ma ba hunyɔɔ? Pɔlɔ-vɛi ɛɛ ngi gbatɛmɔi mɔli aa yɛma, “Gbɛe bi nya gbatɛni hii?”

²¹Kpaya lɔ fɛɛ-gbatɛmɔi wɛ yengeva a bowoi a fɛɛ-gbatɛla kia ngi longa la, tawao a fɛɛ fele gbatɛlɔ a bowoi gate yakpei, yeengila i na ta yenge la lekee a ngilangila ji hinda a yɛ wiema, ta yenge a yeepekei kpele gbi.

²²Hii lɔɔ Ngewɔ i hindei wienga. Ngi longɔ yɛla i kɛ kɛ ngi liilewengɔ tawao ngi longɔ yɛla i pie nungaa ti ngi gbayayii gɔɔ. Faale i ngi lii houilɔ waa nasia va ngi liilewengɔ yɛla ti ma, ngi magbatɛngɔ yɛla ti nyaniva.

²³Ngi longɔ yɛla gbɔma i ngi wɔlɔya wai magɛ, na i njeini mu ma, mua i manuni mu ma, nasia i ti magbatɛnga ngi wɔlɔyɛi majɔɔva.

²⁴Ajifa mua lɔ i mu lolini, ii mu gbuani Juuisia lekee lia, i mu gbuailɔ nasia Juublaa yaa tie bɛɛ lia.

²⁵Ji lɔ i ndei Hosia Gɔlɛi hu yɛ, “Nungei nasia tii yɛni a nya woo, nga ti lolilɔ a ‘Nya Nungeisia.’ Kɛnyɛi na ngii yɛ loni la, nga ti lolilɔ a ‘Nya Liimableisia.’

²⁶Tawao mia vulii Ngewɔ ndeni na ti ma yɛ, ‘Nya nungaa yaa a wue,’ na mia vulii ndɛvu-ve-Yewɔɛi a ti loli na a ngi leengeisia.”

²⁷Tawao Aisaya i yɛpɛilɔ ngeleya kɔlooni Isrɛl ma yɛ, “Isrɛlbleisia ti gboto bɛɛ kia ŋanyɛi na na i gboyei gbla, ti klohii mia ta bawo;

²⁸ajifa Ndemɔi a ngi gbɛmbui lewelɔ dunyabla gbi ma floflo a ndiilo.”

²⁹Piengɔe kia Aisaya i yɛ ndeni yɛ, “Kiaa Ndemɔ wai ii yɛ pieni ndeengaa taa lo mu woomɛi, maa wielɔ kia i Sɔdɔm wieni, maa wielɔ kia Gomɔra na.”

³⁰Gbɔɔ naa hɔɔ ma nde? Ma ji lɔ le: kɛ nasia Juublaa yaa tie tii lapima wɔɔ kɔɔ Ngewɔ i ti yɛ a pɔɔnabla, ti yɛnga a pɔɔnabla jifa ti langɔ a Ngewɔ;

³¹Kɛɛ Isrɛlblɛi nasia Ngewɔ i ti wumbuni, ti sawa gɔlima na a pie ti yɛ a pɔnabla, tii tɔni.

³²Gbɛe tii tɔni? Ajifa na ti pieni ii gbuani ti lalei hu a Ngewɔ kɛ ti wiehindeisia. Ti lugbɛilɔ a pele-ma-gɔtii na nungaa ta lugba la.

³³Kɔtii na Ngewɔ Gɔlɛi i yɛpɛni fa yɛ, “Kpe, nyaa kɔtu lama Jayɔn na nungaa ta ti lugba la, fawa gɔtii na a pie ti gula, Kɛɛ numu gbi lekee a liilo ngi ma ngi yaa ɛɛ wufe.”