Read Ngowili Yekpei Numu Kpɛlɛɛ Va 1 KƆLINTIBLƐISIA 11 Bible Online

1 KƆLINTIBLƐISIA 11 - Ngowili Yekpei Numu Kpɛlɛɛ Va bible

1 KƆLINTIBLƐISIA 11

¹ A nya wokɔɔ hɔɔ, kia lɔɔ nga Kristi wokɔɔ la.

²Nyaa wu latoma jifa kpelema gbi wuɛɛ lema nya luvayii ma tawao wa to kaai nasia wooma ngi tewenga wu gama.

³Kɛɛ nya longɔ wu hugɔɔ kɛ Kristi mia i hindo gbi mahu, hinii mia ngi nyahɛi mahu, tawao Ngewɔ mia i Kristi mahu.

⁴Faale hindoi na a yɛ Ngewɔ vɛlima ɔɔ a yɛ Ngewɔ wowili lema Ngewɔ vɛli vahɛi ma ngi wui mawɛɛngɔ, i Kristi yawufenga.

⁵Kɛɛ nyaha gbi lekee a yɛ Ngewɔ vɛlima ɔɔ a yɛ Ngewɔ wowili lema Ngewɔ vɛli vahɛi ma ngi wui mawɛɛngɔ ii le, i ngi hinii yawufenga, ajifa nduahugɛ gbi ii ngi ma tia nyahɛi na ngi wui wolengɔ.

⁶Nyahɛi ii ngi wui mawɛɛlɔ, mahoungɔ hɔɔ i ngi wui wole. Tawao jifa ngufema hinda le nyaha va i ngi wui wole ɔɔ i ngi wui maahu lewetewe, mahoungɔ i ngi wui mawɛɛ.

⁷ Sabu gbi ii na hindoi i ngi wui mawɛɛ ajifa hindoi gbatɛngɔ a Ngewɔ gbuayei lɔ tawao numu a Ngewɔ wɔlɔ yɛi lɔlɔ ngi hu. Kɛɛ nyahɛi a hindoi wɔlɔyɛi lɔlɔ ngi hu

⁸ ajifa hindoi ii gbuani nyahɛi hu nyahɛi lɔ i gbuani hindoi hu.

⁹Tawao tii hiindoi gbatɛni nyahɛi va, nyahɛi lɔ ti ngi gbatɛni hindoi va.

¹⁰Kɛɛ malikeisia tia ti va, mahoungɔ nyaha i ngi wui mawɛɛ kɛva kɛ i ngi hinii gbayei bu lɔ.

¹¹Na hu gbi kia mua Kristi-ni mu wilingɔ hu, nyahɛi a gbewelɔ hindoi va kia lɔɔ hindoi a gbewe nyahɛi va.

¹²Ajifa kia Ngewɔ i haala nyahɛi gbuani hindoi hu lɔ i kpatɛni, hii lɔɔ nyahɛi lɔ na a hindoi le; tawao Ngewɔ lɔ a hani gbi gbatɛ.

¹³Wua yekpe a kiti lewe ina nyandengɔe nyaha i Ngewɔ vɛli faha lia hani gbi ii ngi wui ma.

¹⁴Kia hindeisia ti na, wuɛ gaa kɛ ngugbitii i yɛni a ngufema hinda lɔ hindo va.

¹⁵Kɛɛ i yɛni a nyande hani lɔ nyaha ta ngi va. Ngewɔ i njombo guhaguhɛi venga ngi wɛ ngi mawɛɛva.

¹⁶Numu gbi longaa i ji hou a mawali, na lekee nga nde tamia a ji kɛ, mua kɛɛ Ngewɔ sɔsii wekeisia tɛɛ na nyɔkɔ wie Ngewɔ vɛlima.

¹⁷Na hu gbi, njɛpɛi jisia ngi wama ndema wu ma, ngii wu latoma ajifa Ngewɔ vɛli gomɛi nasia wa pie tii wu yɛma a Kristimablaa yekpe, ti wu nyamumaa lekee.

¹⁸Haala hindei, ti hugɛnga a nge kɛ ji wa gomɛ, wu luahu gɔlɛkɔlɛngɔe wa lapi luahu; tawao nya langɔe la kɛnga tɔnya le a ji.

¹⁹I laailɔ ke kɛ nduahugɔɔleisia ta yɛlɔ wu lia aako wu nasia gɔɔ gbalauŋ ti lalei lɔnyangɔ.

²⁰Ji wa gomɛ hinda yila mɛhɛɛ mɛva, mɛhɛɛ ba mia wa mɛ, Ndemɔi Gbɔkɔ Mɛhɛɛ ii le.

²¹Ajifa ji wa yɛ mɛhɛɛ mɛma, numu gbi a tɔtoo pɛiŋ a mɛla ngi mbaangɛisia ti yaa foo, famia ndɔlei a yɛ ti lɛɛngaa ma lɔ, ndɔi i yeenasia houngɔ.

²²Pɛlɛngaa tii wu yeya waa mɛhɛɛ mɛ na, wa ndɔ gboli? Wu longɔe wu lɛɛ Ngewɔ sɔsii hu, wu nungei nasia yawufe hinda gbɔungɔ ti laa? Gbɔɔ wu lii i nya ma ndeva wu ma kɔloongɔ ji ma? Mahoungɔe ngi wu lato? Sawo, ngɛɛ pie gbi!

²³Gbamaile kaai na ngi teweni wu gama, ngi majɔɔni a Ndemɔi lɔ, tamia a kpindi na ti yɛ mu Lemɔi Yesu vema, i Bledii gbuha yila wumbuilɔ,

²⁴i siɛgbua Ngewɔ ma, i ngaingai yɛ, “Nya gbuahɛi lɔ, na i na wu va. A Bledii ji mɛ nya hinda hitɛva wu wɛ.”

²⁵Hii lɔɔ kpɔkɔ mɛhɛɛ mɛngɔi wooma i ndɔ bolei wumbuni yɛ, “Ngewɔ hinda yangilingɔ ninɛi lɔ nya ŋamɛi hu. Watii gbi lekee wu ndɔi ji gbolingaa, a kpɔle nya hinda hitɛva wu wɛ.”

²⁶Ji i kɛilɔ kɛ watii gbi lekee wu bledii ji mɛngaa, wu ndɔi ji gboli bolei ji hu, wuaa Ndemɔi haalei hitɛma nungaa wɛ haaŋ i lohu i wa.

²⁷Ji i kɛilɔ kɛ numu i Ndemɔi bledii mɛngaa, i ndɔi gboli ngi bolei hu, a pelei na a baa gbua Ndemɔi ma, kɛ i jumbu wulinga Ndemɔi gbuhɛi ma kɛɛ ngi ŋamɛi.

²⁸Faale na, mahoungɔ numu gbi i ta yekpe lii hugbee pɛiŋ i yaa yeebledii mɛ, tawao i yeendɔi gboli yeebolei hu.

²⁹Ajifa ii kɔɛilɔ pɛiŋ kɛ bledii na kɛɛ ndɔi ti Ndemɔi gbuhɛi na va lɔ i feni a saahanii mu va, i yeebledii mɛngaa, i yeendɔi gboli, Ngewɔ a kpalɛ lalɔ ngi ma.

³⁰Na vamia wu gbotoma wu heegbɛngɔ, tawao wu lɛɛnga wu haanga.

³¹Kɛɛ Ngewɔ ɛɛ kpalɛ la mu ma ina mu mu liisia hugbeilɔ pɛiŋ mu yaa Ndemɔi Gbɔkɔ Mɛhɛɛ mɛ.

³²Kɛɛ Ndemɔi a mu lɛɛlɔ i kpalɛ la mu ma aako aa mu gbɛmbo mua nasia tii Ngewɔ gɔɔ.

³³Faale na, nya mbaa Kristimableisia, wu gomɛngaa Ndemɔi Gbɔkɔ Mɛhɛɛ mɛva, a wu nyɔunyɔ mawulo.

³⁴Tawao ndɔlei i yaa numu gbi ma, mahoungɔ i mɛhɛɛ mɛ pɛiŋ ngi yeekuwuhu aako Ngewɔ gbɛmbui aa la wu ma ji wa gomɛ hinda yila. Njɛpɛ wekei nasia pungɔ wu gɔlɛi hu, nga ti lelɔ ji nga wa.