Read Ngowili Yekpei Numu Kpɛlɛɛ Va 1 KƆLINTIBLƐISIA 12 Bible Online

1 KƆLINTIBLƐISIA 12 - Ngowili Yekpei Numu Kpɛlɛɛ Va bible

1 KƆLINTIBLƐISIA 12

¹Nyaa na yɛpɛma kɔloongɔ na ma wu kɔlɔ nyɛini fa, tamia a hani nasia Ngewɔ Yafei a fe gbama. Nya longɔ wu tɔnyɛi gɔɔ kɔlooni ti ma, nya mbaa Kristimableisia.

²Wu kɔɔlɔ kɛ watii na wuii yɛ lɛ Ngewɔ gɔɔ, ti wu yakɛilɔ hɛɛva nɔmɔli haangɔngaa ma.

³Nya longɔ wu kɔɔ kɛ numu gbi ii na Ngewɔ Yafei a pele gɛ a ngie aa gu a ndela yɛ, “Yesu jondungɔe!” Tawao numu gbi ɛɛ gu a ndela yɛ “Yesu lɔ Ndemɔi le” kɛlee Ngewɔ Yafei i pele gɛ a ngie.

⁴ Hani nasia Ngewɔ Yafei a fe gbama yeelasii gbotongɔe, kɛɛ Ngafa yakpei mia a ti ve.

⁵Tawao pele gboto lɔ na yengeva kɛɛ numui gbi ta yenge Ndemɔ yakpei lɔ wɛ.

⁶Mu guyii a yengela mahɔngɔ ii le kɛɛ Ngewɔ yakpei lɔ a kaahui ve numu gbi wɛ nga yenge va.

⁷Ngewɔ Yafei yeetɔmaseli lɔ numu kpɛlɛɛ hu, Kristimableisia gbi ti gbekpeyei va.

⁸Ngewɔ Yafei a numu yila gɔlɔ a nɛmahulewe yɛpɛva, yee-Ngafa yakpei i numu wekei gɔ a nɛmahulewe na hinda-hugɔɔla va.

⁹Ngafa yakpei ji a pielɔ numu yila i kpaya majɔɔ lava a Ngewɔ, i yeepekei gɔ a kpaya heegbɛblaa bawova.

¹⁰Ngafei a numu yila gɔlɔ a kpaya kabandeisia wieva; i yeepekei gɔ a kpaya Ngewɔ wowili leva; i gbɔma yeepekei gɔ a kpaya ngafangaa luahu gɔva. A numu yila gɔlɔ a kpaya kɛnyɛyia weka gboto leva, i pekei gɔ a kpaya kɛnyɛyiɛisia fasaiva.

¹¹Kɛɛ Ngewɔ Yafa yakpei mia a ji kpɛlɛɛ ve; kia a nɛɛ la ngi wɛ, a numu gbi gɔlɔ a hani i gba ngi mbaangɛisia ti ndɛisia ma.

¹² Kristi gbuangɔ a numu gbuha yila lɔ, mbeke gboto i ngi ma; nasia tii kɛni kɛ, numu gbuha gboto mia a ngie, numu gbuha yakpe mia a ngie, kia bɛɛ ngi gbatɛngɔ a mbeke gboto.

¹³Hii lɔɔ mu gbi, mu yɛ a Juungaa ɔɔ nasia Juu yaa tie, nduwɔngaa ɔɔ nasia nduwɔ yaa tie, Ngafa yakpei na i mu wuanga a Ngewɔ yei mu yenga a kpuha yila, tawao Ngafa yakpei ji i wunga mu liisia hu.

¹⁴Gbamaile numu gbuhɛi ii gbatɛni a mbeke yakpe, taa ngi ma kpoto.

¹⁵Ina kɔwɔi i ndeilɔ yɛ, “Jifa toko yaa a nge, ngii kpuhɛi ma,” na ɛɛ pie aa gbua mbeke ma.

¹⁶Tawao ina numu wolii i ndeilɔ yɛ, “Jifa ngaama yaa a nge, ngii numu gbuhɛi ma,” na ɛɛ pie aa gbua kpuhɛi ma.

¹⁷Ina numu gbuhɛi gbi i yɛni lekee a ngaama yila lɔ, aa yee njia mɛni? Tawao kiaa i yɛni a ngoli yakpe lɔ, aa yee gu a hani gu mɛnila?

¹⁸Kɛɛ tɔnyɛi a ji lɔ kɛ Ngewɔ i numu gbuhɛi yeehani gbi wuilɔ mia ngi longɔ i pu na.

¹⁹Numu gbuhɛi a yee yɛ na ina kpɛlɛɛ gbatɛngɔ a mbeke yakpe lɔ?

²⁰Tɔnyɛi a ji lɔ kɛ yeembeke gbotongɔe kɛɛ numu gbuhɛi i yakpe.

²¹Faale na, ngaamɛi ɛɛ gu aa nde tokoi ma yɛ, “Ngii gbeweni bi va!” Tawao ngui bɛɛ ɛɛ gu aa nde kɔwɔi ma yɛ, “Ngii gbeweni bi va.”

²²I gbua na ma, mahoungɔ mu mbekei nasia majɔɔ bi tɔaa bɛɛ tii gbayani;

²³tawao yeembekei nasia mu baa gɔɔ ti ma, tia mia ma ti mahugbe, yeembekei yeenasia tii nyandeni ma wufe a yɛpɛlaa kɔloongɔ,

²⁴tawao mu mbeke yeenyandemɛisia maa i houni mu ti mahuwɛɛ. Ngewɔ vulii lɔ i numu gbuhɛi yangɔyɔnga i kpatɛnga a pelei na hii bagɔma veva mbeke nasia wɛ tii gbeweni fa.

²⁵Faale na, numu mbekei luahu gɔlɛngɔ ii le, kɛɛ yeembekei-hanisia gbi ti gbewengɔe ti nyɔunyɔ va kia ti piengɔ a tia yekpe.

²⁶Numu mbekei yeehinda yila i gbalɛngaa, tia mbekei hani wekeisia kpɛlɛɛ mia ta gbalɛ; yeehani yila i tato majɔɔngaa, yeehani-hani wekeisia lɔ ta ngi goohunɛɛi wie.

²⁷Wu kpɛlɛɛ Kristi gbuhɛi lɔ a wue, tawao ngi gbuhɛi yeembekei lɔ a wu yilayee gbi.

²⁸ Kristimableisia lia Ngewɔ i numui gbi longa tomɛi na ngi bɛngɔ na. I haala lomɛi veni ngi loblɛisia lɔ wɛ, i yeefelei ve ngi lutuisia we, i yeesawei ve kaamɔisia wɛ; na wooma nasia ta kabande hindeisia wie, kɛɛ a nasia ta heegbɛisia bawo ɔɔ ta gbɔ nungaa wekeisia ma ɔɔ tokulɔbleisia ma ɔɔ ta kɛnyɛyia wekangaa gboto le.

²⁹Numui kpɛlɛɛ ii le taa yɛ a toblɛisia, ɔɔ Ngewɔ lutungaa ɔɔ kaamɔngaa. Numui gbi ii le kpaya aa yɛ ngi wɛ kabande hindangaa wieva

³⁰ɔɔ heegbɛisia bawova ɔɔ yɛpɛva kɛnyɛyia wekangaa hu ɔɔ yeekɛnyɛyiɛisia fasaiva.

³¹A gbewe hani yeebawai nasia va Ngewɔ Yafei a fe gbama. Tawao nga pele gɛlɔ a wue kpekpengɔ waa i lewe kpɛlɛɛ ma.