Read Ngowili Yekpei Numu Kpɛlɛɛ Va 1 KƆLINTIBLƐISIA 13 Bible Online

1 KƆLINTIBLƐISIA 13 - Ngowili Yekpei Numu Kpɛlɛɛ Va bible

1 KƆLINTIBLƐISIA 13

¹Kia bɛɛ nga gulɔ a yɛpɛla nuuvungaa ti layiesia hu kɛɛ malikeisia ti ndɛi, kɛɛ ina ndoma ii nya lii hu, nya layie a yɛ a sɔlewoo gbama lɔ ɔɔ bamande jɔlɛwoo.

² Kia bɛɛ kpaya lɔ mbɛ ngowili yɛpɛisia hugɛva; kia bɛɛ ngi hindei gbi hugɔɔlɔ, ngi ndɔwuma hindei kpɛlɛɛ hugɔngɔ; kia bɛɛ nya layii a Ngewɔ a pielɔ ngi gu a ngiye waawangaa gulela, kɛɛ ina ndoma ii nya lii hu, gbɛogbɛ yaa a nge.

³Kia bɛɛ nga nya yeya-hani kpɛlɛɛ velɔ nungaa wɛ gbama tawao kia bɛɛ nga nya gbuhɛi velɔ ngɛɛ ti mɔ, kɛɛ ndoma i yɛlɔ nya lii hu, ngɛɛ nafa gbi jɔɔ hu.

⁴Ndoma a gulɔ kpalɛ bu huguhangɔ tawao ngi hindawandangɔ ɛɛ tolo gbua, ɛɛ lawo, ii mamanini;

⁵ndoma ii makɛvɛlini, ɛɛ ta yekpe ngi gbekpeyei lekee gɔli, ngi lii ɛɛ lewe fulo, ndoma ɛɛ nyamu lamagbatɛ ngi lii hu;

⁶ndoma goohu ɛɛ nɛɛ nyamu maahu kɛɛ a goohunɛɛlɔ tɔnyɛi maahu.

⁷Ndoma ɛɛ gbaha; a pielɔ muɛɛ gbe a lala a Ngewɔ, muɛɛ gbe a liilolaa, muɛɛ gbe a mu lii houla.

⁸Ndoma ɛɛ gɛlɛ. Kulɔma yia yɛpeisa tɛɛ lɛmbi; kɛnyɛyia wekeisia lelaa hu a lewelɔ; ngafa yekpe hinda hugɔɔlei a gbɔyɔlɔ.

⁹Ajifa kpayei na Ngewɔ Yafei i feni mu wɛ hinda hugɔva kɛɛ kulɔma yia leva ngakpuangɔ ii le;

¹⁰kɛɛ kpemei na yeengakpuangɔi a wa, yeena ngakpuangɔ ii le a lolɔ hu.

¹¹Watii na ngi yɛ ndopoyɛi hu, ngi yɛ yɛpɛlɔ kia ndopo, ndopo lii i nya goohu, nga gili kia ndopo; kɛɛ kiahuna na ngi lakpangaa, ngi ndopo hindei kpɛlɛɛ gulanga.

¹²Na mu tɔma kiahuna kpuangɔ a numu magbindingɔ lɔ mɛmɛɛ hugbindingɔ hu; kɛɛ Kristi wangɔi hu, ma ngi lɔlɔ gbalauŋ. Na ngi kɔɔngɔ kiahuna, kɛlɛngɔe; kɛɛ a watii na, nda a velɔ, ndavengɔ kia Ngewɔ i nya gɔngɔ la.

¹³Kia hindeisia ti na kiahuna, hinda sawei jisia lɔ na: lala a Ngewɔ kɛɛ liiloma kɛɛ ndoma; kɛɛ na tewengɔ ti kpɛlɛɛ ma tamia a ndoma.